ຮອງລັດຖະມົນຕີ ຖວທ ຕ້ອນຮັບຄະນະຜູ້ແທນ ໂຄສະນາສຶກສາສູນກາງພັກກອມມູນິດຫວຽດນາມ


...

10.05.2019 11:09     

   ໃນວັນທີ 9 ເມສານີ້ ທີ່ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຕ້ອນຮັບການເຂົ້າຢ້ຽມພົບປະຂອງຄະນະຜູ້ແທນໂຄສະນາສຶກສາສູນກາງພັກກອມມູນິດຫວຽດນາມ ຊຶ່ງນຳໂດຍ ທ່ານ ບຸ່ຍ ເຈືອງ ຢາງ ຮອງຫົວໜ້າຄະນະໂຄສະນາສຶກສາສູນກາງພັກກອມມູນິດຫວຽດນາມ, ໃນໂອກາດທີ່ເດີນ ທາງມາຢ້ຽມຢາມ ແລະ ເຮັດວຽກຢູ່ ສປປ ລາວ. ໂອກາດນີ້, ທ່ານຮອງລັດຖະມົນຕີໄດ້ກ່າວສະແດງຄວາມຍ້ອງຍໍຊົມເຊີຍ ແລະ ຍິນດີຕ້ອນຮັບຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງຄະ ນະຜູ້ແທນໃນຄັ້ງນີ້ ຊຶ່ງຈະເປັນການປະກອບສ່ວນເສີມສ້າງຮັດແໜ້ນສາຍພົວພັນມິດຕະພາບ ແລະ ການຮ່ວມມືລະ ຫວ່າງສອງພັກ-ລັດ ແລະ ປະ ຊາຊົນສອງຊາດທີ່ມີມາແລ້ວ ນັ້ນໃຫ້ເຕີບໃຫຍ່ຂະຫຍາຍຕົວຍິ່ງໆຂຶ້ນ. ທ່ານຮອງລັດຖະມົນຕີຍັງໄດ້ອວຍພອນໃຫ້ທ່ານ ບຸ່ຍ ເຈືອງ ຢາງ ພ້ອມຄະນະ ຈົ່ງປະ ສົບຜົນສຳເລັດອັນຈົບງາມໃນ ການມາຢ້ຽມຢາມ ແລະ ເຮັດ ວຽກ ຢູ່ ສປປ ລາວ ຄັ້ງນີ້. ໃນໂອກາດດຽວກັນ, ທ່ານ ບຸ່ຍ ເຈືອງ ຢາງ ກໍໄດ້ກ່າວສະແດງຄວາມຂອບໃຈ ຕໍ່ທ່ານຮອງລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງ ແຈ້ງຈຸດປະສົງໃນການເດີນ ທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານຮອງລັດຖະມົນຕີຮັບຊາບອີກດ້ວຍ. (ຂ່າວ-ພາບ: ນາງ ສະຫວັນຄຳ)