ອາດສະພອນ ປະກາດ 16 ບ້ານເປັນບ້ານພັດທະນາຮອບດ້ານ


13.05.2019 9:16     

   ເມືອງອາດສະພອນ ແຂວງສະຫວັນນະເຂດ ໄດ້ຈັດພິທີປະກາດຮັບຮອງເອົາ 16 ບ້ານ ເປັນບ້ານພັດທະນາຮອບດ້ານ, ພ້ອມທັງປະກາດບ້ານໂນນມີໄຊ ເປັນບ້ານໃຫຍ່ສີສັນຕົວເມືອງນ້ອຍໃນເຂດຊົນນະບົດ ຊຶ່ງພິທີດັ່ງກ່າວໄດ້ຈັດຂຶ້ນເມື່ອບໍ່ດົນມານີ້ ທີ່ເດີ່ນວັດບ້ານໂພນນາດີ ໃຫ້ກຽດເປັນປະທານໂດຍ ທ່ານ ກົງຈັກ ໜໍ່ແກ້ວ ຄະນະປະຈໍາພັກແຂວງ, ຫົວໜ້າພະແນກການເງິນແຂວງ, ທ່ານ ແສງທອງ ວັງແກ້ວມະນີ ກໍາມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ມີພາກສ່ວນກ່ຽວຂ້ອງ ຕະຫຼອດຮອດປະຊາຊົນທັງ16 ບ້ານ ເຂົ້າຮ່ວມ. ທ່ານ ເພັດ ທຳທະວົງ ນາຍບ້ານໆໂພນນາດີ ຕາງ ໜ້າໃຫ້ກຸ່ມບ້ານທີ່ໄດ້ຮັບນາມ ມະຍົດໃນຄັ້ງນີ້ ຂຶ້ນຜ່ານບົດລາຍງານການສ້າງບ້ານພັດ ທະນາຮອບດ້ານໃຫ້ຮູ້ວ່າ: ທັງ 16 ບ້ານມີພົນລະເມືອງທັງໝົດ 16.560 ຄົນ, ຍິງ 8.254 ຄົນ, ມີ 2.571 ຄອບຄົວ, ໃນນັ້ນມີຊົນເຜົ່າຜູ້ໄທກວມເອົາ 12 ບ້ານ, ຊົນເຜົ່າບຣູ 4 ບ້ານ ຊຶ່ງນັບຖືສາສະໜາພຸດ ທັງໝົດ, ລັກສະນະພູມສັນຖານຂອງບ້ານເປັນເຂດທົ່ງພຽງເໝາະແກ່ການປູກຝັງ ແລະ ລ້ຽງສັດ, ອາຊີບຕົ້ນຕໍຂອງປະຊາຊົນປູກພືດ, ລ້ຽງສັດ ແລະ ຄ້າຂາຍເປັນອາຊີບສຳຮອງ ເພື່ອສ້າງລາຍຮັບໃຫ້ແກ່ຄອບຄົວ, ສ້າງລາຍຮັບສະເລ່ຍໄດ້ 3,9 ລ້ານກີບຕໍ່ຄົນຕໍ່ປີ ແລະ ເກັບລາຍຮັບເຂົ້າງົບປະມານປີ 2018 ປະຕິບັດໄດ້ 90,50% ປະຊາຊົນມີຄວາມຕື່ນຕົວທາງດ້ານການເມືອງ, ມີຄວາມສາມັກຄີຊ່ວຍເຫຼືອຊຶ່ງກັນ ແລະ ກັນຢ່າງແໜ້ນແຟ້ນ, ຕີລາຄາຄວາມຕື່ນຕົວປະຊາຊົນທາງດ້ານການເມືອງໄດ້ 95%, ຊຶ່ງມາຮອດປັດຈຸບັນໃນ 16 ບ້ານຍັງເຫຼືອຄອບຄົວທີ່ທຸກຍາກ 67 ຄອບຄົວ, ຜ່ານການປະເມີນວຽກງານແຕ່ລະດ້ານ 16 ບ້ານແມ່ນຄົບຕາມ 19 ມາດຖານເງື່ອນໄຂຂອງການສ້າງບ້ານພັດທະນາ. ຈາກນັ້ນ, ໃນພິທີ ກໍໄດ້ມອບໃບຢັ້ງຢືນຮັບຮອງເອົາ 16 ບ້ານເປັນບ້ານພັດທະນາຮອບດ້ານ ເປັນກຽດມອບໂດຍທ່ານ ກົງຈັກ ໜໍ່ແກ້ວ, ນອກຈາກນີ້ ຍັງໄດ້ມອບໃບຢັ້ງຢືນຮັບຮອງບ້ານໂນນມີໄຊ ເປັນບ້ານໃຫຍ່ສີສັນຕົວເມືອງນ້ອຍໃນເຂດຊົນນະບົດ ແລະ ມອບໃບຢັ້ງຢືນບ້ານປ້ອງກັນຊາດເຂັ້ມແຂງໃຫ້ 16 ບ້ານ, ບ້ານສາມັກຄີປອງດອງ 15 ບ້ານ, ບ້ານພັດທະນາສີມືແຮງງານ ແລະ ສະຫວັດດີການສັງຄົມ 17 ບ້ານ, ບ້ານແບບຢ່າງປະຕິບັດກົດໝາຍ 10 ບ້ານ, ບ້ານໜ່ວຍພັກປອດໃສ, ໜັກແໜ້ນ, ເຂັ້ມແຂງ10 ບ້ານ. ຫຼັງຈາກນັ້ນໄດ້ມີພິທີຕັດແຖບຜ້າ ແລະ ເປີດປ້າຍ ພ້ອມທັງລັ່ນຄ້ອງ 9 ບາດ ເພື່ອປະກາດທັງ 16 ບ້ານ ເປັນບ້ານພັດທະນາຢ່າງເປັນທາງການ. (ຂ່າວ: ແຂວງສະຫວັນະເຂດ)