ຮອງນາຍົກ ຕ້ອນຮັບຄະນະປະເມີນເສດຖະກິດມະຫາພາກ ອົງການກອງທຶນການເງິນສາກົນ


...

22.05.2019 9:25     

   ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ນາງ ອີເຕີລີ ຄຣີນເທັດ ຫົວໜ້າຄະນະປະເມີນເສດຖະກິດມະຫາພາກອົງການກອງທຶນການເງິນສາກົນ (IMF) ພ້ອມດ້ວຍຄະນະໃນວັນທີ 21 ພຶດສະພານີ້ ທີ່ສຳນັກງານນາຍົກລັດຖະມົນຕີ. ໃນໂອກາດດັ່ງກ່າວນີ້ ທ່ານ ສົມດີ ດວງດີ ກໍໄດ້ສະ ແດງຄວາມຕ້ອນຮັບດ້ວຍໄມ ຕີຈິດມິດຕະພາບ ແລະ ຕີລາຄາສູງຕໍ່ທ່ານ ນາງ ອີເຕີລີ ຄຣີນເທັດ ພ້ອມຄະນະທີ່ໄດ້ເດີນທາງມາຢ້ຽມຢາມ ສປປ ລາວ ແລະ ເຮັດວຽກຮ່ວມກັບກະຊວງການເງິນຂອງລາວໃນຄັ້ງນີ້ ຖືເປັນນິມິດໝາຍອັນດີໃນການພົວພັນຮ່ວມມືລະຫວ່າງສປປລາວ ກັບ ອົງການກອງທຶນການເງິນສາກົນ (IMF) ໃຫ້ມີບາດກ້າວຂະຫຍາຍຕົວ ຍິ່ງໆຂຶ້ນ. ພ້ອມດຽວກັນທ່ານ ນາງ ອີເຕີລີ ຄຣີນເທັດ ກໍໄດ້ສະແດງຄວາມຂອບອົກຂອບໃຈຕໍ່ການຕ້ອນຮັບຂອງທ່ານຮອງນາຍົກລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າຕ້ອນຮັບຄະນະປະເມີນເສດຖະກິດມະຫາພາກອົງການກອງທຶນການເງິນສາກົນ ພ້ອມທັງແຈ້ງຈຸດປະສົງໃນການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວໃນຄັ້ງນີ້ໃຫ້ທ່ານຮອງນາຍົກໄດ້ຮັບຊາບ. (ຂ່າວ : ສຸກສາຄອນ, ພາບ: ສຸກສະຫວັນ)