ສຳມະນາວິທະຍາສາດ ເມືອງວຽງໄຊ-ຖານທີ່ໝັ້ນ ຂອງການປະຕິວັດ ຄົບຮອບ 50 ປີ


...

05.11.2018 7:50     

   ຄະນະໂຄສະນາອົບຮົມສູນກາງພັກ ໄດ້ຈັດສຳມະນາວິທະຍາສາດພາຍໃຕ້ຫົວຂໍ້ "ເມືອງວຽງໄຊ-ຖານທີ່ໝັ້ນຂອງການປະຕິວັດ ຄົບຮອບ 50 ປີ (30/11/1968-30/11/2018) ຂຶ້ນໃນວັນທີ 18 ຕຸລານີ້ ທີ່ຫໍປະ ຊຸມແຫ່ງຊາດ ໂດຍການເຂົ້າ ຮ່ວມເປັນປະທານກ່າວເປີດຂອງ ສະຫາຍ ພັນຄຳ ວິພາວັນ ກຳມະການກົມການເມືອງສູນ ກາງພັກ ຜູ້ປະຈຳການຄະນະເລຂາທິການສູນກາງພັກ ຮອງ ປະທານປະເທດ ຫົວໜ້າຄະນະຮັບຜິດຊອບການກະກຽມສະ ເຫຼີມສະຫຼອງວັນສ້າງຕັ້ງເມືອງວຽງໄຊ-ຖານທີ່ໝັ້ນຂອງການປະຕິວັດ, ໂດຍມີບັນດາສະຫາຍການນຳພັກ-ລັດ, ພະນັກງານປະຕິວັດອາວຸໂສ, ຄະນະນຳຈາກກະຊວງ ທະບວງກົມ ແລະ ນັກຮຽນຮູ້ປັນຍາຊົນ ເຂົ້າຮ່ວມເກືອບ 600 ສະຫາຍ. ພາຍຫຼັງ ສະຫາຍ ກິແກ້ວ ໄຂຄຳພິທູນ ກຳມະການສູນກາງພັກ ຄະນະເລຂາທິການສູນກາງພັກ ຫົວໜ້າຄະນະໂຄສະນາ ອົບຮົມສູນກາງພັກ ໄດ້ຂຶ້ນກ່າວ ຈຸດປະສົງຂອງກອງປະຊຸມ ແລ້ວ, ສະຫາຍ ພັນຄຳ ວິພາວັນ ໄດ້ກ່າວເປີດພິທີຢ່າງເປັນທາງ ການ ໂດຍໄດ້ຍົກໃຫ້ເຫັນວ່າ: ກອງປະຊຸມສຳມະນາຄັ້ງນີ້ ມີ ຄວາມໝາຍສຳຄັນຫຼາຍ, ເພາະ ມັນເປັນການຄົ້ນຄວ້າ, ສັງລວມທິດສະດີ ແລະ ພຶດຕິກຳແຫ່ງການຊີ້ນຳ, ນຳພາ ພາລະກິດປະຕິວັດໃນແຕ່ລະໄລຍະຂອງພັກເຮົາ ໂດຍສະເພາະການວາງແຜນຍຸດທະສາດ, ຍຸດໂທບາຍ ແລະ ວິທີການປະຕິວັດອອກຢ່າງຖືກຕ້ອງ, ສອດຄ່ອງໃນໄລຍະຂອງການຕໍ່ສູ້ກູ້ຊາດ, ຕ້ານລັດທິລ່າເມືອງຂຶ້ນແບບເກົ່າ ແລະ ແບບໃໝ່. ກອງປະຊຸມສຳມະນາຄັ້ງນີ້ເປັນໂອກາດທີ່ສຳຄັນໃຫ້ແກ່ການສຶກສາອົບຮົມພະນັກງານ, ສະມາຊິກພັກ, ທະຫານ, ຕຳຫຼວດ ຕະຫຼອດຮອດປະຊາຊົນລາວບັນດາເຜົ່າໃນທົ່ວປະເທດໂດຍສະເພາະແມ່ນຄົນຮຸ່ນໜຸ່ມ, ຮຸ່ນສືບທອດ ທີ່ເປັນອະນາຄົດຂອງຊາດ ໃຫ້ຮັບຮູ້ ແລະ ເຂົ້າໃຈຢ່າງ ເລິກເຊິ່ງ, ຈະແຈ້ງກ່ຽວກັບເສັ້ນ ທາງກ້າວເດີນອັນລະອິດລະອ້ຽວຂອງການປະຕິວັດ, ເສີມຂະຫຍາຍມູນເຊື້ອຕໍ່ສູ້ມີໄຊ ແລະ ການນຳພາອັນສະຫຼາດສ່ອງໃສຂອງພັກກໍຄືການຈົດຈຳລຳ້ລຶກຜົນງານ, ຄຸນງາມຄວາມດີ ແລະ ຮໍ່າຮຽນເອົາແບບຢ່າງທີ່ດີ, ແບບແຜນດຳລົງຊີວິດ, ຄຸນສົມບັດສິນທຳປະຕິວັດຂອງບັນດາຜູ້ນຳການປະຕິວັດຮຸ່ນກ່ອນ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນສະຫງ່າອົງອາດຂອງກຳລັງປະກອບອາວຸດ ແລະ ປະຊາຊົນລາວບັນດາເຜົ່າໃນທົ່ວປະເທດເວົ້າລວມ, ເວົ້າສະເພາະແມ່ນມູນເຊື້ອອົງອາດກ້າຫານຕໍ່ສູ້ບໍ່ຍອມຈຳນົນ, ເດັດດ່ຽວໜຽວແໜ້ນຂອງປະຊາຊົນຊາວເມືອງວຽງໄຊ ແຂວງຫົວພັນ ທີ່ປະກອບສ່ວນຢ່າງຕັ້ງໜ້າ, ຄຽງບ່າຄຽງໄຫຼ່ກັບກຳລັງປະ ກອບອາວຸດໃນການຕໍ່ສູ້ກັບຈັກກະພັດອາເມຣິກາ ແລະ ລູກແຫຼ້ງຕີນມືຂາຍຊາດຂອງພວກມັນ ເພື່ອຍາດເອົາເອກະລາດ, ປະຊາທິປະໄຕ ແລະ ອິດສະຫຼະພາບມາສູ່ປະຊາຊົນລາວທັງຊາດ, ການສ້າງຕັ້ງເມືອງວຽງໄຊ ແຂວງຫົວພັນໃຫ້ກາຍເປັນພື້ນຖານທີ່ແໜ້ນແກ່ນ. ເປັນແນວຫຼັງອັນໜັກແໜ້ນຂອງການປະຕິວັດເຮົາໃນໄລຍະຕໍ່ສູ້ຕ້ານການຮຸກຮານ ແລະ ແຊກແຊງຂອງພວກລ່າເມືອງຂຶ້ນ, ເຮັດສຳເລັດການປະຕິວັດຊາດ ປະຊາທິປະໄຕນັ້ນເປັນເຫດການອັນໂດດເດັ່ນ ແລະ ໃສແຈ້ງທີ່ສຸດອັນໜຶ່ງທີ່ສະແດງອອກເຖິງການນຳພາອັນຖືກຕ້ອງສະຫຼາດສ່ອງໃສຂອງພັກເຮົາທີ່ຮູ້ກຳນົດແນວທາງການຕໍ່ສູ້ປະຕິວັດຢ່າງສອດຄ່ອງ ໂດຍເອົາຈິດໃຈຮັກຊາດອັນດູດດື່ມຕິດພັນກັບລັດທິມາກ-ເລນິນ, ເອົາຂະບວນການປະຕິວັດຂອງປະເທດເຮົາຕິດພັນກັບຂະບວນການປະຕິວັດຂອງປະເທດເພື່ອນມິດຍຸດທະສາດ ແລະຂອງໂລກນຳພາຂະບວນການປະຕິວັດຂອງພັກເຮົາຍາດເອົາໄຊຊະນະເທື່ອລະກ້າວ, ກ້າວໄປເຖິງຍາດເອົາໄຊຊະນະຢ່າງສົມບູນ. ໃນວາລະດຳເນີນກອງປະຊຸມ ຜູ້ເຂົ້າຮ່ວມໄດ້ຮັບຟັງ 5 ຫົວຂໍ້ທີ່ສຳຄັນຄື: ໜຶ່ງ, ເມືອງວຽງໄຊ-ສູນກາງ ຂອງການປະຕິວັດ ຊາດ ປະຊາທິປະໄຕ ສະເໜີໂດຍ ສະຫາຍ ພູທັກ ພິດທະນູສອນ ຜູ້ຊ່ວຍຫົວໜ້າຫ້ອງວ່າການສູນກາງພັກ, ສະມາຊິກສະພາວິທະຍາສາດສັງຄົມ, ສອງ, ແນວລາວຮັກຊາດ-ໃຈກາງເຕົ້າໂຮມຄວາມສາມັກຄີປະຊາຊົນບັນດາເຜົ່າ ເຂົ້າໃນການປະຕິວັດຊາດ ປະຊາທິປະໄຕ ຢູ່ປະເທດເຮົາ ສະເໜີໂດຍ ສະຫາຍ ຄຳຫຼ້າ ລິ້ງນະສອນ ຮອງປະທານສູນກາງແນວລາວສ້າງຊາດ, ສາມ, ເມືອງວຽງໄຊ- ສູນກາງ ການນຳພາຂອງພັກ ໃນການ ສ້າງກຳລັງປະກອບອາວຸດຕາມແນວທາງສົງຄາມປະຊາຊົນ ເພື່ອພາລະກິດປົດປ່ອຍຊາດ ສະເໜີໂດຍ ສະຫາຍ ພົນຕີ ສອນທອງ ພົມລາວົງ ຮອງຫົວໜ້າກົມໃຫຍ່ການເມືອງກອງທັບ, ສີ່, ເມືອງວຽງໄຊ-ຕົ້ນກຳເນີດ ສປປ ລາວ ສະເໜີໂດຍ ສະຫາຍ ນາງ ອຳທິລໍ ລັດຖະຍອດ ຮອງຫົວໜ້າສະຖາບັນຄົ້ນຄວ້າປະຫວັດສາດ ແລະ ຫ້າ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອເມືອງ ວຽງໄຊວິລະຊົນຢ່າງບໍ່ຢຸດຢັ້ງ ສະເໜີໂດຍ ສະຫາຍ ວັນໄຊ ແພງຊຸມມາ ເຈົ້າແຂວງໆຫົວພັນ. (ຂ່າວ: ພູວຽງຄຳ)