ໄຊຍະບູລີ ສຳເລັດກອງປະຊຸມຄົບຄະນະ ບໍລິຫານງານພັກແຂວງ ຄັ້ງທີ 11


...

05.11.2018 7:52     

   ພາຍຫຼັງທີ່ໄດ້ດຳເນີນກອງປະຊຸມຄົບຄະນະບໍລິຫານງານພັກແຂວງໄຊຍະບູລີ ເປີດກວ້າງຄັ້ງທີ 11 ( ສະໄໝທີ VI ) ມາເປັນເວລາ 3 ວັນເຕັມ ຈິ່ງໄດ້ສຳເລັດລົງໃນຕອນບ່າຍຂອງວັນທີ 17 ຕຸລາ ຜ່ານມາ ທີ່ສະໂມສອນຫ້ອງວ່າການແຂວງໄຊຍະບູລີ, ໂດຍພາຍໃຕ້ການເປັນປະທານຂອງສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ ເຈົ້າແຂວງໄຊຍະບູລີ, ເປັນກຽດເຂົ້າຮ່ວມ ມີສະຫາຍ ວັນໄຊ ຊົງຊາຢູ ຮອງປະທານຄະນະກວດກາສູນກາງພັກ ແລະ ອົງການກວດສອບລັດຖະບານ, ມີຄະນະຈັດຕັ້ງສູນກາງພັກ, ມີບັນດາຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ 11 ເມືອງ, ເລຂາຄະນະພັກຮາກຖານ, ເລຂາໜ່ວຍພັກບັນດາພະແນກການ, ກົມກອງ, ອົງການ, ລັດວິສາຫະກິດເຂົ້າຮ່ວມ 100 ກວ່າສະຫາຍ. ການດຳເນີນກອງປະຊຸມດັ່ງກ່າວ ແມ່ນໄດ້ສຸມໃສ່, ຄົ້ນຄວ້າປະກອບຄຳຄິດ-ຄຳເຫັນຢ່າງກົງໄປກົງມາ ແລະ ໄດ້ຕົກ ລົງເຫັນດີເປັນເອກະພາບຮັບ ຮອງເອົາບົດສັງເກດຕີລາຄາການຈັດຕັ້ງປະຕິບັດ ມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 10 ສະໄໝທີ VI ແລະ ວຽກງານຈຸດສຸມໃນໄລຍະ 3 ເດືອນທ້າຍປີ 2018; ຮັບຮອງເອົາບົດສະຫຼຸບຕີລາຄາ ການຊີ້ນໍາ-ນຳພາ ການຈັດຕັ້ງປະຕິບັດວຽກງານປົກປ້ອງກົດໝາຍ ໃນການດຳເນີນຄະດີຕາມຂະບວນການຍຸຕິທໍາ ແລະ ທິດທາງ ແຜນການໃນຕໍ່ໜ້າ; ຮັບຮອງເອົາບົດສັງເກດຕີລາຄາວຽກງານກໍ່ສ້າງພັກ-ພະນັກງານໃນໄລຍະ 3 ປີຜ່ານມາ ແລະ ທິດທາງແຜນການ ແຕ່ນີ້ຮອດກອງປະຊຸມໃຫຍ່ ຄັ້ງທີ VII ປີ 2020; ໂດຍລວມແລ້ວ ແຂວງໄຊຍະບູລີ ແມ່ນສືບຕໍ່ມີສະຖຽນລະພາບ, ມີຄວາມສະຫງົບດ້ານການເມືອງ ແລະ ຄວາມເປັນລະບຽບຮຽບຮ້ອຍທາງສັງຄົມໜັກແໜ້ນ; ປະຊາຊົນດໍາລົງຊີວິດມີຄວາມສະຫງົບປອດໄພ, ເຮັດໃຫ້ຊີວິດການເປັນຢູ່ນັບມື້ນັບດີຂຶ້ນ; ເສດຖະກິດຂະຫຍາຍຕົວໃນລະດັບ 8,7 %, ສະເລ່ຍລາຍຮັບ 2.811 ໂດລາ ຕໍ່ຄົນຕໍ່ປີ; ການຜະລິດກະສິກໍາກໍເປັນຂະບວນກວ້າງຂວາງ; ສິ່ງທີ່ພົ້ນເດັ່ນໃນປີນີ້ ແມ່ນການປູກພືດເປັນສິນຄ້າ ໂດຍສະເພາະແມ່ນ ມັນຕົ້ນ, ສາລີອາຫານສັດ, ໝາກເດືອຍ, ພືດຕະກຸນຖົ່ວ ແລະ ອື່ນໆ ປະຕິບັດໄດ້ 107.972 ເຮັກຕາ, ຄາດຄະເນຜົນຜະລິດໄດ້ 1.198.487 ໂຕນ, ນອກນີ້ ແມ່ນການປູກຫຍ້າລ້ຽງສັດ; ທົ່ວແຂວງໄດ້ຊົມໃຊ້ໄຟຟ້າ 99,77 % ຂອງຈໍານວນບ້ານທັງໝົດ, ຄອບຄົວທີ່ໄດ້ຊົມໃຊ້ກວມ 98,14 %. ການຈັດຕັ້ງປະຕິບັດວຽກງານວັດທະນະທຳ-ສັງຄົມ ກໍໄດ້ດຳເນີນໄປດ້ວຍຜົນສຳເລັດ ແລະ ມີບັນຍາກາດ ຊຶ່ງສາມາດປະຕິບັດໄດ້ຫຼາຍເປົ້າໝາຍສະ ຫັດສະວັດດ້ານການພັດທະ ນາ, ຄອບຄົວທຸກຍາກຍັງເຫຼືອ 1.202 ຄອບຄົວ, ກວມເອົາ 1,62%; ຂອງຄອບຄົວທັງໝົດ. ຕອນທ້າຍຂອງກອງປະຊຸມ ສະຫາຍ ພົງສະຫວັນ ສິດທະວົງ ຍັງໄດ້ເນັ້ນໜັກບາງບັນຫາເຊັ່ນ: ສືບຕໍ່ເອົາໃຈໃສ່ຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ; ໂດຍສະເພາະແມ່ນ ການແກ້ໄຂບັນຫາປະກົດການຫຍໍ້ທໍ້ ທາງສັງຄົມ ເປັນຕົ້ນ ບັນຫາຢາ ເສບຕິດ, ອຸບັດເຫດຕາມທ້ອງຖະໜົນ, ໄພພິບັດທີ່ອາດຈະເກີດຂຶ້ນ, ຊຸກຍູ້ການຈັດຕັ້ງປະຕິບັດບັນດາໂຄງການລົງທຶນຂອງລັດ ລວມທັງໂຄງການຂະແໜງການຄຸ້ມຄອງ ແລະ ການລົງທຶນ ຂອງເອກະຊົນ, ທຶນຊ່ວຍເຫຼືອກູ້ຢືມ ໃຫ້ໄດ້ຮັບການຈັດຕັ້ງ ປະຕິບັດໄປຕາມແຜນ, ຍູ້ດັນເສດຖະກິດ ໃນ 3 ເດືອນທ້າຍປີ ໃຫ້ມີປະສິດທິຜົນ, ສາມາດຂັບເຄື່ອນເສດຖະກິດຂອງແຂວງ ໃຫ້ມີຄວາມຄ່ອງຕົວ, ຂະຫຍາຍຕົວຢ່າງຕໍ່ເນື່ອງ ແລະ ໝັ້ນທ່ຽງ ຢູ່ໃນລະດັບ 8,7% ຕາມແຜນການທີ່ວາງໄວ້, ສືບຕໍ່ຊີ້ນຳ-ນຳພາ ຄະນະພັກທຸກຂັ້ນໃນການ ກໍ່ສ້າງພັກ-ພະນັກງານ ໃຫ້ມີຄວາມໜັກແໜ້ນດ້ານການເມືອງ-ແນວຄິດ, ເຂັ້ມແຂງທາງດ້ານການຈັດຕັ້ງ ແລະ ແບບແຜນວິທີນຳພາ; ເອົາໃຈໃສ່ໃນການປັບປຸງກົນໄກການບໍລິຫານລັດໃຫ້ມີຄວາມໂປ່ງໃສຫັນເຂົ້າສູ່ລະບຽບກົດໝາຍ ເທື່ອລະກ້າວ, ພ້ອມທັງປັບປຸງກົງຈັກຂອງອົງການປົກຄອງໃຫ້ສອດຄ່ອງເໝາະສົມ ແລະ ສົມຄູ່ກັບຄວາມຮຽກຮ້ອງຕ້ອງການ ເພື່ອກະກຽມໃຫ້ແກ່ກອງປະຊຸມໃຫຍ່ 3 ຂັ້ນ. (ໂດຍ: ອຸ່ນເຮືອນ ໂພທິລັກ)