ປທສ ປິດຊຸດອົບຮົມທິດສະດີການເມືອງ 45 ວັນ ຊຸດທີ IV


...

05.11.2018 7:53     

   ໃນຕອນເຊົ້າຂອງວັນທີ 16 ຕຸລາຜ່ານມານີ້, ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ໄດ້ຈັດພິທີປິດຊຸດຝຶກອົບຮົມທິດສະດີການເມືອງ-ການປົກຄອງ 45 ວັນ (13 ສິງຫາ - 16 ຕຸລາ 2018) ຊຸດທີ IV ຂຶ້ນທີ່ສະຖາບັນເຕັກໂນໂລຊີ ການສື່ສານຂໍ້ມູນຂ່າວສານໂດຍການເປັນປະທານ ແລະ ມອບໃບຢັ້ງຢືນ ຂອງ ທ່ານ ບຸນສະເຫຼີມໄຊ ເຄນນາວົງ ຄະນະປະຈໍາພັກ, ຮອງລັດຖະມົນຕີກະຊວງ ປທສ, ໃຫ້ກຽດເຂົ້າຮ່ວມໂດຍ ທ່ານ ສະໝຸດທອງ ສົມພານິດ ຄະນະພັກ ຮອງຫົວໜ້າສະຖາບັນການເມືອງ ແລະ ການປົກຄອງແຫ່ງຊາດ, ພ້ອມດ້ວຍຄະນະພັກ, ຄະນະພັກຮາກຖານ, ບັນດາເລຂາໜ່ວຍພັກອ້ອມຂ້າງ ກະຊວງ ປທສ ແລະ ນັກສໍາມະນາກອນທັງໝົດ. ໃນພິທີປິດ ທ່ານ ນາງ ວັນນາ ພົມມະວົງ ຮອງຫົວໜ້າ ກົມຈັດຕັ້ງ-ພະນັກງານ, ກະຊວງ ປທສ ໄດ້ສະຫຼຸບລາຍງານຜົນສໍາເລັດການຝຶກອົບຮົມ ທິດສະດີການເມືອງ-ການປົກຄອງ ຊຸດນີ້ ເຫັນໄດ້ວ່າພະນັກງານມີຄວາມໝັກແໜ້ນກ່ຽວກັບທິດສະດີມາກ-ເລນິນ ແລະ ສັງ ຄົມນິຍົມ, ມີຄວາມຮູ້ກ່ຽວກັບ ລະບອບປະຊາທິປະໄຕ ປະ ຊາຊົນ ສາມາດກໍາແໜ້ນແນວ ທາງປ່ຽນແປງໃໝ່, ການນໍາພາຂອງພັກ ແລະ ການຄຸ້ມຄອງຂອງລັດ ໃນເງື່ອນໄຂເສດ ຖະກິດຕະຫຼາດຕາມທິດສັງຄົມນິຍົມ ທີ່ມີລັກສະນະປະຕິວັດທີ່ຖືກຕ້ອງ, ມີຄຸນທາດການເມືອງ, ຄວາມຮູ້ຄວາມສາມາດ, ຄວາມປອດໃສຂາວສະອາດ ສົມຄູ່ກັບຄວາມຮັບຜິດຊອບ ແລະ ຕໍາແໜ່ງງານທີ່ຖືກມອບໝາຍ. ອີກດ້ານໜຶ່ງ ກໍ່ເປັນການທົບທວນຄວາມຮູ້ຄວາມສາມາດ ຂອງພະນັກງານຄືນ ໃນການຮຽນຮູ້ປະກອບເຕັກນິກອັນໃໝ່ທີ່ທັນສະໄໝ ແລະ ສາມາດເສີມສ້າງຄວາມຮູ້ທີ່ມີແລ້ວໃຫ້ອຸດົມສົມບູນກວ່າເກົ່າ ກໍ່ຄືການສືບຕໍ່ປະຕິບັດໜ້າທີ່ວຽກງານຂອງຕົນໃຫ້ໄດ້ດີ. ການຝຶກອົບຮົມໃນຄັ້ງນີ້, ກະຊວງ ປທສ ໄດ້ສົມທົບກັບສະຖາບັນການເມືອງ ແລະ ການປົກຄອງແຫ່ງຊາດ ທາງດ້ານເນື້ອໃນຫຼັກສູດ, ອາຈານສອນ ຊຶ່ງມີ 5 ພາກວິຊາ ໃນນັ້ນມີພາກວິຊາປັດຊະຍາ ມີ 8 ບົດ, ພາກວິຊາເສດຖະສາດການເມືອງມີ 10 ບົດ, ພາກລັດທິສັງຄົມນິຍົມວິທະຍາສາດມີ 6 ບົດ, ພາກວິຊາບໍລິຫານສາດມີ 8 ບົດ ແລະ ພາກວິຊາກໍ່ສ້າງພັກມີ 5 ບົດ ລວມທັງໝົດມີ 37 ບົດ.ມີບຸກຄະລາກອນເຂົ້າຮ່ວມ 44 ສະຫາຍ, ຍິງ 20 ສະຫາຍ, ຕົ້ນຕໍແມ່ນພະນັກງານໜຸ່ມນ້ອຍ ນອນໃນແຜນການກໍານົດພະນັກງານນໍາພາຄຸ້ມຄອງສືບທອດປ່ຽນແທນ ຂອງບັນດາໜ່ວຍພັກອ້ອມຂ້າງກະຊວງ. ໂອກາດດັ່ງກ່າວ, ທ່ານ ບຸນສະເຫຼີມໄຊ ເຄນນາວົງ ໄດ້ສະແດງຄວາມຊົມເຊີຍ ຕໍ່ຊຸດຝຶກອົບຮົມ ພ້ອມທັງຮຽກຮ້ອງໃຫ້ສໍາມະນາກອນ ຈົ່ງນໍາເອົາຄວາມຮູ້ຄວາມສາມາດ ທີ່ໄດ້ຮຽນມາໄປພັດທະນາເຂົ້າໃນໜ້າທີ່ວຽກງານທີ່ຕົນຮັບຜິດຊອບ ໃຫ້ເກີດປະໂຫຍດສູງສຸດ, ໂດຍສະເພາະແມ່ນຄວາມຮູ້ພື້ນຖານທາງດ້ານທິດສະດີ ການເມືອງ-ການປົກຄອງ, ຄວາມຮູ້ພື້ນຖານທິດສະດີມາກ-ເລນິນ, ບັນດາແນວທາງການພັດທະນາເສດຖະກິດສັງຄົມຂອງພັກ ໃນໄລຍະໃໝ່, ການຄຸ້ມຄອງລັດ, ການຄຸ້ມຄອງສັງຄົມດ້ວຍກົດໝາຍ ແລະ ອື່ນໆ. (ຂ່າວ: ກົມຈັດຕັ້ງ-ພະນັກ ງານ ປທສ, ພາບ: ຫ້ອງການ)