ສຳເລັດກອງປະຊຸມລັດຖະບານສະໄໝສາມັນ ປະຈຳເດືອນຕຸລາ


...

02.11.2018 8:01     

   ກອງປະຊຸມລັດຖະບານສະໄໝສາມັນ ປະຈໍາເດືອນ ຕຸລາ 2018 ໄດ້ເປີດຂຶ້ນໃນວັນທີ 18 ແລະ ປິດລົງໃນວັນທີ 19 ຕຸລາ ທີ່ສຳນັກງານນາຍົກລັດ ຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ໂດຍມີບັນດາທ່ານຮອງນາຍົກ ລັດຖະມົນຕີ ແລະ ສະມາຊິກລັດຖະບານເຂົ້າຮ່ວມຢ່າງພ້ອມພຽງ. ກອງປະຊຸມຄັ້ງນີ້ ໄດ້ພ້ອມກັນສຸມໃສ່ພິຈາລະນາ, ປະກອບຄໍາເຫັນເຂົ້າໃສ່ 6 ເອກະສານສໍາຄັນດັ່ງນີ້: ກ່ຽວກັບການສະຫຼຸບຕີລາຄາການ ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບ ປະມານ ແລະ ແຜນເງິນຕາ ປະຈໍາປີ 2018 ແລະ ທິດທາງແຜນການ ສໍາລັບປີ 2019, ກອງປະຊຸມໄດ້ສະຫຼຸບຕີລາຄາ ຄື: ເຖິງວ່າການຈັດຕັ້ງປະຕິບັດໂຕເລກຄາດໝາຍຕ່າງໆ ອາດຈະບໍ່ບັນລຸຕາມຄາດໝາຍທີ່ສະພາແຫ່ງຊາດໄດ້ຮັບຮອງ, ແຕ່ໂດຍລວມເສດຖະກິດມະ ຫາພາກ ຍັງຂະຫຍາຍຕົວ, ປະເທດຊາດ ຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບ ຮ້ອຍໂດຍພື້ນຖານ. ຕໍ່ກັບບົດ ລາຍງານດັ່ງກ່າວ, ກອງປະຊຸມ ເຫັນດີຮັບຮອງເອົາ ແລະ ໄດ້ ຊີ້ນໍາໃຫ້ພາກສ່ວນທີ່ກ່ຽວຂ້ອງນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະບານ ໃຫ້ຈະແຈ້ງ, ຮັດກຸມ ແລະ ມີເຫດ ມີຜົນຕື່ມ ເພື່ອນຳໄປຂໍທິດຊີ້ນຳຈາກກອງປະຊຸມສູນກາງເທື່ອທີ 7 ສະໄໝທີ X ແລະ ຜ່ານກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII, ເປັນຕົ້ນ ໃຫ້ກະຊວງການເງິນເອົາໃຈໃສ່ຊຸກຍູ້ການເກັບລາຍຮັບໃຫ້ໄດ້ຕາມເປົ້າໝາຍວາງໄວ້ ພ້ອມນັ້ນໃຫ້ເອົາ ໃຈໃສ່ປັບປຸງກົນໄກການເກັບລາຍຮັບ ໂດຍການນຳໃຊ້ເຕັກໂນໂລຊີ, ເຄື່ອງມືທີ່ທັນສະໄໝ ແລະ ການຊອກຄົ້ນຖານລາຍຮັບໃໝ່; ສືບຕໍ່ຄຸ້ມຄອງເກັບກຳບັນຊີການນຳເຂົ້າສິນຄ້າໃຫ້ມາເສຍພາສີ-ອາກອນຖືກຕ້ອງ ແລະ ຄົບຖ້ວນຕາມບັນຊີຂອງຕົ້ນທາງການນຳເຂົ້າ ສຳລັບການເກັບພາສີທີ່ດິນເຂດການຜະລິດທີ່ຖືກຜົນກະທົບຈາກໄພນາໍ້ຖ້ວມ ໃນປີ 2018 ແມ່ນໃຫ້ຍົກເວັ້ນເສຍພາສີທີ່ດິນໃຫ້ເໝາະສົມ ໂດຍສົມທົບກັບພາກສ່ວນທີ່ກ່ຽວຂ້ອງ ເພື່ອສຳຫຼວດເນື້ອທີ່ດິນຕົວຈິງວ່າມີທັງໝົດຈັກຕອນໃນຂອບເຂດທົ່ວປະເທດທີ່ໄດ້ຮັບຜົນກະທົບ; ສືບຕໍ່ເອົາໃຈໃສ່ຈັດຕັ້ງປະຕິບັດດຳລັດ ວ່າດ້ວຍການປະຢັດ ແລະ ຕ້ານການຟຸມເຟືອຍຢ່າງເປັນຮູບປະທຳ. ໃຫ້ກະຊວງແຜນການ ແລະ ການລົງທຶນເອົາໃຈໃສ່ກວດກາຄືນບັນດາໂຄງການລົງ ທຶນຂອງລັດ, ໂຄງການໃດທີ່ມີປະສິດທິຜົນ ແລະ ບໍ່ມີປະສິດທິຜົນ, ສຳລັບໂຄງການທີ່ຈັດຕັ້ງປະຕິບັດສຳເລັດໄດ້ 100% ໃຫ້ກວດກາຄືນຄຸນນະພາບ ແລະ ມາດຕະຖານເຕັກນິກຕ່າງໆ ໂດຍການແຕ່ງຕັ້ງຄະ ນະຮັບຜິດຊອບລົງກວດກາຢູ່ບັນດາໂຄງການດັ່ງກ່າວຕົວຈິງ, ໃນຕໍ່ໜ້າໃຫ້ສຸມໃສ່ຈັດລຽງບຸລິມະສິດໂຄງການລົງທຶນຂອງລັດທີ່ເຫັນວ່າມີຄວາມຈຳເປັນ ແລະ ໂຄງການທີ່ມີປະສິດທິຜົນ ໂດຍໃຫ້ອີງຕາມງົບປະມານ ແລະ ຄວາມສາມາດທາງດ້ານການເງິນຕົວຈິງ ພ້ອມດຽວກັນນັ້ນ, ໃຫ້ປະເມີນຄືນການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດຂອງລັດຖະບານ ໂດຍສະເພາະການອຳນວຍຄວາມສະດວກໃຫ້ແກ່ພາກ ສ່ວນທຸລະກິດລົງທຶນຂອງພາກເອກະຊົນທີ່ຢູ່ໃນກອບຂອງກົດ ໝາຍ ແລະ ນະໂຍບາຍການລົງ ທຶນທີ່ພັກ-ລັດວາງອອກ. ໃຫ້ທະນາຄານແຫ່ງ ສປປ ລາວ ເອົາໃຈໃສ່ຄຸ້ມຄອງອັດຕາແລກ ປ່ຽນເງິນຕາຕ່າງປະເທດ, ນະ ໂຍບາຍສິນເຊື່ອ ເພື່ອຊຸກຍູ້ສົ່ງ ເສີມວິສາຫະກິດຂະໜາດນ້ອຍ ແລະ ຂະໜາດກາງ (SMEs) ໃຫ້ຫຼາຍຂຶ້ນ, ຄຽງຄູ່ກັບການປັບປຸງຄືນກົງຈັກການຈັດຕັ້ງ ແລະ ສຶກສາອົບຮົມພະນັກງານ ວຽກງານແນວຄິດ ໃນຂົງເຂດທະນາຄານ. ສຳລັບຜົນການສຳຫຼວດ, ສຶກສາຄົ້ນຄວ້າ ແລະ ວິເຄາະວິໄຈກ່ຽວກັບການສ້າງຕັ້ງ ແລະ ດຳເນີນງານຂອງເຂດເສດຖະ ກິດພິເສດ, ກອງປະຊຸມໄດ້ສະ ຫຼຸບຕີລາຄາວ່າ: ນັບແຕ່ປີ 2003 ເປັນຕົ້ນມາ, ລັດຖະບານໄດ້ກຳນົດເອົາເຂດເສດຖະກິດພິເສດ ສະຫວັນ-ເຊໂນ ເປັນເຂດທຳອິດຢູ່ ສປປ ລາວ ຕາມດຳລັດສະບັບເລກທີ 148/ນຍ, ລົງວັນທີ 29 ກັນຍາ 2003 ເພື່ອສ້າງໃຫ້ເປັນນິຄົມອຸດສາຫະກຳທີ່ທັນສະໄໝ ຕາມແລວທາງເສດຖະກິດຕາເວັນອອກ-ຕາເວັນຕົກ ໂດຍອີງຕາມຍຸດ ທະສາດທາງດ້ານທີ່ຕັ້ງສຳຄັນ ຂອງການເຊື່ອມຕໍ່ພາຍໃນ ແລະ ພາກພື້ນຂອງ ສປປ ລາວ. ມາຮອດປັດຈຸບັນ, ທົ່ວປະເທດ ມີເຂດເສດຖະກິດພິເສດ ທັງໝົດຈຳນວນ 12 ແຫ່ງ ແລະ ລັດຖະບານໄດ້ອອກດຳລັດ ສະ ບັບເລກທີ 188/ລບ, ລົງວັນທີ 7 ມິຖຸນາ 2018 ວ່າດ້ວຍເຂດເສດຖະກິດພິເສດ ຊຶ່ງມີຜົນບັງ ຄັບໃຊ້ໃນປັດຈຸບັນ. ຕໍ່ບັນຫາດັ່ງກ່າວ, ກອງປະຊຸມໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປປັບປຸງຕາມການປະກອບຄຳເຫັນຂອງສະມາຊິກລັດຖະ ບານ, ມອບໃຫ້ກະຊວງແຜນ ການ ແລະ ການລົງທຶນໃນການ ຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດ, ເປັນຕົ້ນເອົາ ໃຈໃສ່ສ້າງເງື່ອນໄຂອຳນວຍຄວາມສະດວກ ໃນການດຳເນີນທຸລະກິດຢູ່ໃນເຂດເສດຖະກິດພິເສດ ຕາມຈຸດພິເສດຂອງແຕ່ລະບ່ອນ; ເອົາໃຈໃສ່ປະຕິບັດກົນໄກປະຕູດຽວ ເພື່ອສ້າງຄວາມເຊື່ອໝັ້ນໃຫ້ແກ່ນັກລົງທຶນ; ກຳນົດນະໂຍບາຍພາສີ-ອາກອນ ຕາມກົດໝາຍ, ລະບຽບການ. ສຳຄັນໃຫ້ເອົາໃຈໃສ່ໃນການຄຸ້ມຄອງເຂດເສດຖະກິດພິ ເສດ ໃຫ້ດີ ເພື່ອບໍ່ໃຫ້ມີການສວຍ ໂອກາດ ຫຼື ຫຼີກລ່ຽງການຖອກພັນທະໃຫ້ລັດຖະບານ. - ກ່ຽວກັບບົດລາຍງານສະພາບການຄຸ້ມຄອງ ແລະ ນຳໃຊ້ອິນເຕີເນັດ ແລະ ສື່ສັງຄົມອອນລາຍ, ປັດຈຸບັນການພັດ ທະນາ, ການຄຸ້ມຄອງ ແລະ ການນຳໃຊ້ເຕັກໂນໂລຊີການສື່ ສານຂໍ້ມູນຂ່າວສານ ຫຼື ICT ໄດ້ສົ່ງຜົນກະທົບຢ່າງໃຫຍ່ຫຼວງ ທັງໃນດ້ານບວກ ແລະ ດ້ານລົບ ຕໍ່ການພັດທະນາເສດຖະກິດ-ສັງຄົມຂອງໂລກ, ເວົ້າສະເພາະ ສປປ ລາວ ຂອງພວກເຮົາ. ກອງປະຊຸມໄດ້ເຫັນດີຕໍ່ບົດລາຍງານຂອງຂະແໜງການ ແລະ ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປຄົ້ນຄວ້າ, ຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດການຄຸ້ມຄອງ ແລະ ນຳໃຊ້ອິນເຕີເນັດ ແລະ ສື່ສັງຄົມອອນລາຍໃຫ້ເກີດປະໂຫຍດສູງສຸດຕໍ່ການ ພັດທະນາເສດຖະກິດ-ສັງຄົມ. - ຕໍ່ກັບຮ່າງດຳລັດ ວ່າດ້ວຍການຈັດຕັ້ງປະຕິບັດແຜນ ແມ່ບົດຈັດສັນທີ່ດິນແຫ່ງຊາດ, ກອງປະຊຸມໄດ້ຊີ້ນຳໃຫ້ພາກ ສ່ວນທີ່ກ່ຽວຂ້ອງນຳໄປປັບປຸງ ຕາມການປະກອບຄຳເຫັນຂອງສະມາຊິກລັດຖະບານ ໂດຍໃຫ້ເຮັດເປັນຂໍ້ຕົກລົງ ວ່າດ້ວຍການແບ່ງຄວາມຮັບຜິດຊອບໃຫ້ບັນ ດາຂະແໜງການ ເພື່ອຈັດຕັ້ງຜັນຂະຫຍາຍ ແລະ ຈັດຕັ້ງປະ ຕິບັດແຜນແມ່ບົດຈັດສັນທີ່ດິນ ແຫ່ງຊາດ. ພ້ອມດຽວກັນນີ້, ໃຫ້ປັບປຸງຄວາມຮັບຜິດຊອບຂອງຂະແໜງການ ແລະ ອົງການປົກຄອງທ້ອງຖິ່ນໄປຕາມທິດສາມສ້າງ. ສິ່ງສຳຄັນແມ່ນບໍ່ໃຫ້ຊາໍ້ຊ້ອນກັນໃນການຈັດຕັ້ງປະຕິບັດຕົວຈິງ, ນອກນັ້ນ ໃຫ້ກຳນົດກົນໄກການປະສານງານ ລະຫວ່າງ ບັນດາຂະແໜງການ ແລະ ທ້ອງຖິ່ນ. - ຮ່າງດຳລັດ ວ່າດ້ວຍຄວາມປອດໄພ ແລະ ສຸຂະພາບແຮງງານ, ກອງປະຊຸມ ເຫັນດີຮັບຮອງດ້ານຫຼັກການ ແລະ ຊີ້ນຳໃຫ້ສະມາຊິກລັດຖະບານ ນຳໄປຄົ້ນຄວ້າ ແລະ ປະກອບ ຄຳຄິດຄຳເຫັນຕື່ມບາງມາດຕາທີ່ເຫັນວ່າຍັງບໍ່ທັນຊັດເຈນ, ຈະ ແຈ້ງ ແລະ ຄົບຖ້ວນ, ພາຍຫຼັງ ປັບປຸງແລ້ວ ໃຫ້ພາກສ່ວນທີ່ ກ່ຽວຂ້ອງປະສານສົມທົບກັບ ຫ້ອງວ່າການສຳນັກງານນາ ຍົກລັດຖະມົນຕີຮຽບຮຽງຄືນ ເພື່ອເຮັດໃຫ້ດຳລັດດັ່ງກ່າວມີເນື້ອໃນຄົບຖ້ວນສົມບູນ. - ສຳລັບດຳລັດ ວ່າດ້ວຍການຄຸ້ມຄອງ ແລະ ນຳໃຊ້ການ ຊ່ວຍເຫຼືອທາງການ ເພື່ອການພັດທະນາ (ສະບັບປັບ ປຸງ). ກອງປະຊຸມໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປຄົ້ນຄວ້າ ແລະ ປັບປຸງຄືນ ພາຍຫຼັງສໍາເລັດການປັບປຸງແລ້ວ ໃຫ້ນຳມາຜ່ານກອງປະຊຸມລັດຖະບານ ໃນຄັ້ງຕໍ່ໄປ. ໃນໜຶ່ງເດືອນຜ່ານມາ, ລັດ ຖະບານ ໄດ້ປະຕິບັດຫຼາຍວຽກ ງານຈຸດສຸມທີ່ສຳຄັນດັ່ງນີ້: ໄດ້ຊີ້ນຳຢ່າງເອົາໃຈໃສ່ ແລະ ຕິດ ຕາມຢ່າງຈົດຈໍ່ຕໍ່ການແກ້ໄຂໄພ ພິບັດຢູ່ແຂວງອັດຕະປື ແລະ ໄພນາໍ້ຖ້ວມໃນຂອບເຂດທົ່ວປະ ເທດ. ຄະນະຮັບຜິດຊອບທັງແກ້ໄຂໄພພິບັດ ແລະ ສືບສວນ-ສອບສວນ ທີ່ຖືກແຕ່ງຕັ້ງພາຍໃຕ້ການເປັນປະທານຂອງ 2 ຮອງນາຍົກລັດຖະມົນຕີ ໄດ້ປະ ຕິບັດໜ້າທີ່ດ້ວຍຄວາມຮັບຜິດ ຊອບສູງ ແລະ ມີຄວາມຄືບໜ້າເປັນຢ່າງດີ. ໄດ້ສຸມໃສ່ການຊຸກຍູ້ການ ຈັດຕັ້ງປະຕິບັດແຜນງົບປະ ມານ ປີ 2018 ໃຫ້ບັນລຸຕາມ ແຜນ ພ້ອມທັງຄົ້ນຄວ້າ ແລະ ຫັນການສ້າງແຜນພັດທະນາເສດຖະກິດ-ສັງຄົມ, ແຜນງົບປະ ມານ ແລະ ແຜນເງິນຕາປີ 2019 ໃຫ້ແທດຕົວຈິງ ໂດຍຜ່ານກອງປະຊຸມປຶກສາຫາລືຫຼາຍຄັ້ງ, ລວມທັງກອງປະຊຸມລັດຖະບານ ໃນຄັ້ງນີ້. ອັນນີ້, ຖືເປັນບາດກ້າວໃໝ່ທີ່ສຳຄັນ, ຊຶ່ງລັດຖະບານຈະນຳສະເໜີຕໍ່ກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 7 ໃນອາທິດໜ້ານີ້. ໄດ້ດຳເນີນກອງປະຊຸມນາຍົກ-ຮອງນາຍົກລັດຖະມົນຕີ ເພື່ອພິຈາລະນາຫຼາຍບັນຫາທີ່ສຳຄັນ, ເປັນຕົ້ນແມ່ນການຈັດ ສັນ ແລະ ພັັດທະນາຕາມແລວທາງລົດໄຟຢູ່ບັນດາແຂວງທີ່ ມີທາງລົດໄຟຜ່ານ, ການພິຈາ ລະນາໂຄງການລົງທຶນທີ່ສຳ ຄັນ, ຄຳສະເໜີຂອງຂະແໜງ ການ ແລະ ທ້ອງຖິ່ນ ແລະ ບັນ ຫາອື່ນໆຈຳນວນໜຶ່ງ ຊຶ່ງໄດ້ອອກເປັນນິຕິກຳທັງໝົດ 614 ສະບັບ ໃນນັ້ນ ເປັນຄຳສັ່ງ 1 ສະບັບ, ດຳລັດ 11 ສະບັບ, ຂໍ້ຕົກລົງ 3 ສະບັບ, ແຈ້ງການ 599 ສະບັບ. ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຮ່ວມກອງປະຊຸມເວທີປຶກສາຫາລືເສດຖະກິດໂລກ ວ່າດ້ວຍອາຊຽນ ຢູ່ ສສ ຫວຽດນາມ, ກອງປະຊຸມສຸດຍອດແມ່ນາໍ້ຂອງ-ຍີ່ປຸ່ນ ຄັ້ງທີ 10 ທີ່ປະເທດຍີ່ປຸ່ນ ແລະ ກອງປະຊຸມພົບປະຜູ້ນຳອາຊຽນ ແລະ ສະຖາບັນການເງິນສາກົນທີ່ປະເທດອິນໂດເນເຊຍ. ສ່ວນບັນດາສະຫາຍຮອງນາຍົກລັດຖະມົນຕີ ແລະ ສະມາຊິກລັດຖະບານກໍໄດ້ໄປເຄື່ອນໄຫວຕາມພາລະບົດບາດ ແລະ ການມອບໝາຍຢູ່ທັງພາຍໃນ ແລະ ຕ່າງປະເທດຢ່າງຕັ້ງ ໜ້າ. ກອງປະຊຸມ ໄດ້ເປັນເອກະພາບ ແລະ ຕັດສິນໃຈສູງ ເພື່ອພ້ອມກັນຈັດຕັ້ງປະຕິບັດວຽກງານຈຸດສຸມ ໃນເດືອນພະຈິກ 2018 ດັ່ງນີ້: ໃຫ້ກະຊວງປ້ອງ ກັນຄວາມສະຫງົບສືບຕໍ່ຮັກ ສາຄວາມສະຫງົບ ແລະ ຄວາມ ເປັນລະບຽບຮຽບຮ້ອຍຂອງ ສັງຄົມ; ເພີ່ມທະວີຄວາມເອົາ ໃຈໃສ່ແກ້ໄຂປະກົດການຫຍໍ້ທໍ້ທາງສັງຄົມ ໂດຍໃຫ້ທົ່ວສັງຄົມມີສ່ວນຮ່ວມຊ່ວຍກັນ, ຕອບຕ້ານ ແລະ ສະກັດກັ້ນທຸກກົນ ອຸບາຍເລ່ລ່ຽມທີ່ເຄື່ອນໄຫວກໍ່ ຄວາມບໍ່ສະຫງົບຂອງພວກສັດ ຕູ ແລະ ກຸ່ມຄົນບໍ່ດີສືບຕໍ່ຕິດ ຕາມ, ກວດກາ ແລະ ບັງຄັບໃຊ້ ກົດໝາຍ ແລະ ລະບຽບການ ເພື່ອຄຸ້ມຄອງການນຳໃຊ້ສື່ສັງ ຄົມອອນລາຍຕ່າງໆ. ໃຫ້ກະຊວງການເງິນ, ກະ ຊວງແຜນການ ແລະ ການລົງ ທຶນ ແລະ ທະນາຄານ ແຫ່ງ ສປປ ລາວ ປະສານສົມທົບກັນ ເພື່ອຄວາມເປັນເອກະພາບ ໃນການກະກຽມລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ສຳລັບປີ 2018 ແລະ ທິດທາງແຜນການ ປີ 2019 ຕໍ່ກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ທີ່ຈະຈັດ ຂຶ້ນໃນລະຫວ່າງວັນທີ 22 ຫາ 30 ຕຸລາ 2018. ໃຫ້ກະຊວງການເງິນເປັນເຈົ້າການສົມກັບພາກສ່ວນກ່ຽວ ຂ້ອງສືບຕໍ່ບຸກບືນເກັບລາຍຮັບ ຈາກຖານລາຍຮັບຕ່າງໆ, ເປັນ ຕົ້ນແມ່ນຈາກພາສີທີ່ດິນ, ການນຳເຂົ້າ ແລະ ສົ່ງອອກສິນຄ້າ, ໜີ້ຄ້າງມອບຄ່າສຳປະທານທີ່ດິນ, ຄ່າສຳປະທານ ເພື່ອການຊອກຄົ້ນ, ສຳຫຼວດ ຫຼື ຂຸດຄົ້ນແຮ່ທາດ, ໜີ້ຄ້າງມອບຄ່າພາກຫຼວງໄຟຟ້າ ແລະ ອື່ນໆ. ໃຫ້ກະຊວງແຜນການ ແລະ ການລົງທຶນເປັນໃຈກາງ ປະສານກັບບັນດາຂະແໜງ ການ ເພື່ອເລັ່ງແກ້ໄຂບັນດາ 7 ສິ່ງ ກີດຂວາງໃນການດຳເນີນທຸ ລະກິດ ແລະ ການລົງທຶນ ເພື່ອ ປັບປຸງບັນຍາກາດ ແລະ ສິ່ງ ແວດລ້ອມໃນການລົງທຶນຂອງປະເທດເຮົາໃຫ້ດີຂຶ້ນ, ພ້ອມທັງ ຕິດຕາມຊຸກຍູ້ ແລະ ສະຫຼຸບລາຍງານການຈັດຕັ້ງປະຕິບັດ 8 ມາດຕະການຊຸກຍູ້ເສດຖະກິດໃຫ້ມີຄວາມຄືບໜ້າ ແລະ ມີປະສິດທິຜົນ ເພື່ອກຽມລາຍງານຕໍ່ກອງປະຊຸມສະພາເທື່ອທີ 6 ຂອງສະພາແຫ່ງຊາດ ຊຸດທີ VIII ທີ່ຈະມາເຖິງນີ້. ໃຫ້ທະນາຄານ ແຫ່ງ ສປປ ລາວ ສືບຕໍ່ຄຸ້ມຄອງ ແລະ ຮັກ ສາສະຖຽນລະພາບເງິນຕາຕ່າງ ປະເທດໃຫ້ມີຄວາມໝັ້ນທ່ຽງ, ຄຸ້ມຄອງອັດຕາແລກປ່ຽນໃຫ້ເໜັງຕີງໃນລະດັບທີ່ກຳນົດໄວ້, ຄຸ້ມຄອງການເຄື່ອນໄຫວຂອງທະນາຄານທຸລະກິດ ແລະ ເພີ່ມທະວີການຕິດຕາມ-ກວດກາ ສິນເຊື່ອຂອງບັນດາສະຖາບັນການເງິນຈຸນລະພາກໃຫ້ເຄື່ອນໄຫວຖືກຕ້ອງຕາມລະບຽບ-ກົດໝາຍ; ຄົ້ນຄວ້າອັດຕາດອກເບ້ຍເງິນກູ້ ເພື່ອສົ່ງເສີມຊຸກຍູ້ການຜະລິດ, ການລົງທຶນ ແລະ ເພື່ອກະຕຸ້ນເສດຖະກິດໃຫ້ຂະ ຫຍາຍຕົວ. ໃຫ້ກະຊວງອຸດສາຫະກຳ ແລະ ການຄ້າ ເປັນເຈົ້າການສົມທົບກັບພາກສ່ວນກ່ຽວຂ້ອງ ຊຸກຍູ້ສົ່ງເສີມການຜະລິດເປັນສິນຄ້າ ພ້ອມທັງຊອກຫາຕະ ຫຼາດໃຫ້ຜູ້ປະກອບການເພື່ອຮອງຮັບ; ຄຸ້ມຄອງລາຄາສິນຄ້າໃນທ້ອງຕະຫຼາດບໍ່ໃຫ້ມີການສວຍໂອກາດຂຶ້ນລາຄາສິນຄ້າ ເນື່ອງຈາກລາຄານາໍ້ມັນມີການເໜັງຕີງ ເພື່ອບໍ່ໃຫ້ກະທົບຕໍ່ຊີ ວິດການເປັນຢູ່ຂອງປະຊາຊົນ. ພ້ອມກັນນີ້, ກໍໃຫ້ຄົ້ນຄວ້າທິດທາງ ແລະ ຄຳສະເໜີ ເພື່ອຊຸກຍູ້ສົ່ງເສີມການຮ່ວມມືດ້ານການຄ້າ ລາວ-ຈີນ ໃນໂອກາດທີ່ຄະ ນະຜູ້ແທນຂອງລັດຖະບານຈະ ເຂົ້າຮ່ວມງານວາງສະແດງສິນ ຄ້າທີ່ ສປ ຈີນ ໃນຕົ້ນເດືອນພະ ຈິກ ທີ່ຈະມາເຖິງ. ໃຫ້ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ສືບຕໍ່ໂຄສະນາຂົນຂວາຍ ເພື່ອຍາດແຍ່ງນັກທ່ອງທ່ຽວໃຫ້ຫຼາຍຂຶ້ນ ໃນໄຕມາດສຸດທ້າຍຂອງປີ 2018 ຊຶ່ງເປັນໄລຍະທີ່ນັກທ່ອງທ່ຽວຈະມາຫຼາຍ (High Season) ເພື່ອເປັນກຳລັງແຮງສຳຄັນໃຫ້ພວກເຮົາບັນລຸໂຕເລກຄາດໝາຍການເຕີບໂຕທາງດ້ານເສດຖະກິດທີ່ວາງໄວ້. ໃຫ້ກະຊວງກະສິກຳ ແລະ ປ່າໄມ້ ແລະ ກະຊວງໂຍທາທິການ ແລະ ຂົນສົ່ງ ປະສານສົມທົບ ແລະ ວາງແຜນໃຫ້ສົມຄູ່ກັນໃນການສ້ອມແປງ, ປັບປຸງ ແລະ ຟື້ນຟູພື້ນຖານໂຄງລ່າງທີ່ຈຳເປັນ ແລະ ປັດໄຈການຜະ ລິດຕ່າງໆ, ເປັນຕົ້ນແນວພັນພືດ ແນວພັນສັດ ເພື່ອຊຸກຍູ້ການຜະລິດຂອງປະຊາຊົນ ພາຍຫຼັງໄພນຳ້ຖ້ວມ, ທັງກະກຽມໃຫ້ແກ່ການຜະລິດລະດູແລ້ງ. ໃຫ້ຄະນະຮັບຜິດຊອບແກ້ໄຂໄພພິບັດສືບຕໍ່ສຳຫຼວດຜົນເສຍຫາຍ ແລະ ສືບຕໍ່ຊ່ວຍ ເຫຼືອປະຊາຊົນຜູ້ຖືກຜົນກະທົບ ຈົນໄດ້ຮັບການຟື້ນຟູໄດ້ເປັນປົກກະຕິ. ພ້ອມດຽວກັນນີ້, ກໍ ໃຫ້ຄະນະສືບສວນສອບສວນ ຫາສາເຫດການແຕກພັງຂອງຄູກັ້ນນາໍ້ຂອງເຂື່ອນເຊປຽນ-ເຊນາໍ້ນ້ອຍ ແລະ ຄະນະກວດກາຄຸນນະພາບຂອງເຂື່ອນໃນຂອບເຂດທົ່ວປະເທດສືບຕໍ່ປະຕິບັດວຽກງານຈຸດສຸມຂອງຕົນໃຫ້ມີຄວາມຄືບໜ້າຕາມແຜນການທີ່ວາງໄວ້ ທັງຮັບປະກັນຄຸນນະພາບ, ຄວາມໂປ່ງໃສ, ປະຢັດ ງົບປະມານ ແລະ ເປັນທີ່ຍອມ ຮັບຕໍ່ພາຍໃນ ແລະ ສາກົນ. ໃຫ້ບັນດາກະຊວງ, ອົງ ການ ແລະ ທ້ອງຖິ່ນ ທີ່ກ່ຽວຂ້ອງ ຂຸ້ນຂ້ຽວປະຕິບັດວຽກງານກະ ກຽມ ແລະ ເຂົ້າຮ່ວມພິທີສະ ເຫຼີມສະຫຼອງເມືອງວຽງໄຊ ເຂດທີ່ໝັ້ນການປະຕິວັດລາວ ຄົບ ຮອບ 50 ປີ ຕາມແຜນການຂອງຄະນະຮັບຜິດຊອບຂັ້ນສູນກາງວາງອອກ. ໃຫ້ກະຊວງການຕ່າງປະ ເທດສືບຕໍ່ຕິດຕາມສະພາບການຂອງສາກົນ ແລະ ພາກພື້ນ ຢ່າງໃກ້ຊິດ ແລະ ສັງລວມລາຍງານເອົາທັດສະນະຂອງ ສປປ ລາວ ຕໍ່ບັນຫາ ແລະ ລາຍງານຂັ້ນເທິງຢ່າງເປັນປະຈຳ. ພ້ອມກັນນີ້, ກໍໃຫ້ເອົາໃຈໃສ່ຄົ້ນຄວ້າ ແລະ ຜັນຂະຫຍາຍໝາກຜົນຂອງການເຂົ້າຮ່ວມກອງປະຊຸມສາກົນ ເພື່ອຍາດແຍ່ງເອົາການສະໜັບສະໜູນ, ຊ່ວຍເຫຼືອ ແລະ ຜັນຂະຫຍາຍຂໍ້ຕົກລົງການຮ່ວມມືກັບຕ່າງປະເທດ. ໃຫ້ປະສານກັບຂະແໜງການກ່ຽວຂ້ອງກະກຽມການເຄື່ອນ ໄຫວວຽກງານຕ່າງປະເທດໃຫ້ ແກ່ການນຳພັກ-ລັດ ໂດຍສະ ເພາະການກະກຽມເຂົ້າຮ່ວມງານວາງສະແດງເອັກສະໂປຣ ທີ່ ສປ ຈີນ; ການເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 33 ແລະ ບັນດາກອງປະຊຸມສຸດຍອດທີ່ກ່ຽວຂ້ອງທີ່ປະເທດສິງກະໂປ ແລະ ອື່ນໆ. (ຂ່າວ: ກົມປະຊາສຳພັນ)