ເລົ່າງາມປະກາດບ້ານຕົວແບບຕິດພັນກັບຮາກຖານການເມືອງ


...

02.11.2018 7:46     

   ເມືອງເລົ່າງາມ ໄດ້ມີພິທີີປະກາດບ້ານຕົວແບບຕ່າງໆ ຕິດພັນກັບການລົງກໍ່ສ້າງຮາກຖານການເມືອງ ເມື່ອບໍ່ດົນຜ່ານມາ ໂດຍການເຂົ້າຮ່ວມຂອງ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳ-ສັງຄົມ, ມີທ່ານ ນາງ ສູນທອນ ແກ້ວບົວລະພາ ເຈົ້າເມືອງເລົ່າງາມ, ມີຄະນະນຳ 8 ເມືອງ ແລະ ເມືອງຕ່າງໆຂອງແຂວງທີ່ມີຊາຍແດນຕິດຈອດກັນເຂົ້າຮ່ວມ. ໂດຍສືບຕໍ່ປະຕິບັດ ແລະ ຜັນຂະຫຍາຍມະຕິ ເລກທີ 25/ກມສພ ກ່ຽວກັບທິດທາງ, ເປົ້າໝາຍ ແລະ ມາດຕະການ ປະຕິບັດວຽກງານສາມສ້າງ. ເມືອງເລົ່າງາມໄດ້ຈັດຕັ້ງປະຕິບັດ ປັບປຸງກໍ່ສ້າງບັນດາກົງຈັກຂອງພັກຂອງລັດແຕ່ລະຂັ້ນຮອດຮາກ ຖານບ້ານ ໃຫ້ມີຄວາມເຂັ້ມແຂງ, ໜັກແໜ້ນຕາມ 4 ເນື້ອໃນ 4 ຄາດໝາຍ, ໂດຍສະເພາະໄດ້ສຸມໃສ່ໃນການກໍ່ສ້າງພັກ, ພະນັກ ງານ, ປັດຈຸບັນ ທົ່ວເມືອງມີສະມາຊິກພັກທັງໝົດ 1.783 ສະຫາຍ, ຍິງ 363 ສະຫາຍ, ມີ 121 ໜ່ວຍພັກ, ໃນນັ້ນໜ່ວຍພັກສຳນັກ ງານ 17ໜ່ວຍ, ມີ 97 ໜ່ວຍພັກບ້ານ ແລະ ໃນປີ 2018 ໄດ້ສຳເລັດການເລືອກຕັ້ງນາຍບ້ານ 100% ແລະມີການວາງແຜນລະອຽດການພັດທະນາບ້ານທັງໝົດ 97 ບ້ານທົ່ວເມືອງ ແລະ ແຜນພັດທະນາເສດຖະກິດ-ສັງຄົມ, ມີ 4 ບ້ານທີ່ໄດ້ຫັນເປັນແຜນການໂຄງການອັນລະອຽດຄື: ບ້ານໜອງແກ, ຂົວເສັດ, ດະເຊັຍໂພນຫີນແລະ ບ້ານດົງ. ທັງນີ້ເປັນການສືບຕໍ່ເສີມຂະຫຍາຍຄວາມເປັນເຈົ້າຂອງປະຊາຊົນໃນການພັດທະນາທ້ອງຖິ່ນໃຫ້ຫັນປ່ຽນໄປຕາມທິດພັດທະນາທີ່ຍືນຍົງ, ສ້າງເງື່ອນໄຂອຳນວຍຄວາມສະດວກໃຫ້ປະຊາຊົນໃນການດຳລົງຊິວິດ ແລະ ພັດທະນາເສດຖະກິດຄອບຄົວ ແລະກາຍເປັນຄອບຄົວຕົວແບບດ້ານກະສິກຳຮອບດ້ານ,ໂດຍມີ 4.568 ຄອບຄົວມີຈຳນວນ 21 ບ້ານ, ໃນນັ້ນມີຄອບຄົວຕົວແບບກະສິກຳ-ປ່າໄມ້ທີ່ພົ້ນເດັ່ນໃນການພັດທະນາ ຖືກທິດ 358 ຄອບຄົວ.ໄດ້ສຸມໃສ່ການສ້າງບ້ານເປັນ ຫົວໜ່ວຍພັດທະນາໃຫ້ໄດ້ 4 ດ້ານຄື: ປັບປຸງການເມືອງການປົກຄອງໃຫ້ມີຄວາມເຂັ້ມ ແຂງ, ໜັກແໜ້ນ, ສົ່ງເສີມການຜະລິດສິນຄ້າ-ບໍລິການ, ສົ່ງເສີມອະນຸລັກຮັກສາວັດ ທະນະທຳຮີດຄອງປະເພນີແລະ ຮັບປະກັນການປ້ອງກັນຄວາມສະຫງົບທົ່ວປວງຊົນ. ອີງໃສ່ທ່າແຮງບົ່ມຊ້ອນ ແລະ ເງື່ອນໄຂໃນການຜະລິດສິນຄ້າບົນພື້ນ ຖານຄວາມຕ້ອງການຂອງຕະ ຫຼາດ, ໄດ້ຊຸກຍູ້ບ້ານປູກພືດແບບປະສົມມີ 66 ບ້ານ, ບ້ານຜະລິດກາເຟເປັນສິນຄ້າ 24 ບ້ານ ແລະ ປູກເຂົ້າເປັນຕົ້ນຕໍ 7 ບ້ານ, ໃນນັ້ນເດັ່ນກວ່າໝູ່ແມ່ນການຜະລິດມັນຕົ້ນເປັນສິນຄ້າ ຊຶ່ງໃນປີ 2017-2018 ບັນລຸໄດ້ 4 ແສນໂຕນ, ກາເຟ 50 ພັນໂຕນ ແລະ ເຂົ້ານາປີ ນາແຊງ 25 ພັນໂຕນ. ຈາກນັ້ນ, ກໍໄດ້ ມີການປະກາດ ແລະ ມອບ ໃບຢັ້ງຢືນນາມມະຍົດບ້ານຕົວແບບຕ່າງໆຄື: ບ້ານໜັກແໜ້ນເຂັ້ມແຂງ 14 ບ້ານ, ຕົວແບບສາມັກຄີປອງດອງ 10 ບ້ານ, ບ້ານປະຕິບັດສິດສະເໝີພາບລະຫວ່າງຍິງຊາຍ16 ບ້ານ, ບ້ານປ້ອງກັນຄວາມສະຫງົບດີ 2 ບ້ານ, ບ້ານແບບຢ່າງປະ ຕິບັດກົດໝາຍ 11 ບ້ານ,ບ້ານ ແບບຢ່າງກະສິກຳ ແລະ ປ່າ ໄມ້ 21 ບ້ານ, ບ້ານຢຸດຕິການ ຖ່າຍຊະຊາຍ 3 ບ້ານ, ບ້ານວັດທະນະທຳໃໝ່ 6 ບ້ານ, ບ້ານພັດທະນາສີມືແຮງງານ 12 ບ້ານ ແລະ ປະກາດໜ່ວຍຕົວແບບຕ່າງໆຕື່ມອີກ ໂດຍສະເພາະ ນາມມະຍົດຕ່າງໆນັ້ນແມ່ນສະແດງໃຫ້ເຫັນເຖິງການຫັນລົງກໍ່ສ້າງຮາກຖານໃນການສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາປະ ຈຳປີ 2017-2018. (ຂ່າວ: ວິໄລວອນ ສິດທິໄຊ)