ຄະນະຜູ້ແທນພັກ ປປ ລາວ ສຳເລັດການເຂົ້້າຮ່ວມກອງປະຊຸມພັກການເມືອງໃນອາຊີ


30.10.2018 15:42     

   ຄະນະຜູ້ແທນພັກ ປປ ລາວ ນຳໂດຍ ສະຫາຍ ສົມພອນ ສີຈະເລີນ ຮອງຫົວໜ້າຄະນະພົວພັນຕ່າງປະເທດສູນກາງພັກ ປປ ລາວ ໄດ້ເດີນທາງໄປເຂົ້າຮ່ວມກອງປະຊຸມໃຫຍ່ ຄັ້ງທີ 10 ຂອງບັນດາພັກການເມືອງໃນອາຊີ (The 10th General Assembly of the ICAPP) ທີ່ຈັດຂຶ້ນໃນວັນທີ 24-27 ຕຸລາ ຜ່ານມາ ທີ່ນະຄອນຫຼວງມົດ ສະກູ ສະຫະພັນຣັດເຊຍ ໂດຍການເປັນເຈົ້າພາບຂອງພັກຣັດເຊຍເອກະພາບ (United Russia Party). ກອງປະຊຸມຄັ້ງນີ້ ພາຍໃຕ້ 2 ຫົວຂໍ້ຕົ້ນຕໍຄື: 1. "ບົດບາດຂອງບັນດາພັກການເມືອງໃນການຫຼຸດຜ່ອນຄວາມເຄັ່ງຕຶງສາກົນ ແລະ ການຕໍ່ສູ້ຕ້ານລັດ ທິຂວາຈັດ" ແລະ 2. "ຄວາມສຳຄັນຂອງການຮ່ວມມືສາກົນ ລະຫວ່າງບັນດາພັກ ໃນການສ້າງ ແລະ ເສີມຂະຫຍາຍສາຍພົວພັນທາງດ້ານການເມືອງ, ເສດຖະກິດ ແລະ ສັງຄົມ ລະ ຫວ່າງລັດ" ໂດຍມີຜູ້ແທນຈາກ 70 ພັກການເມືອງ ຈາກ 37 ປະ ເທດເຂົ້າຮ່ວມ. ຄະນະຜູ້ແທນ ພັກ ປປ ລາວ ໄດ້ປະກອບຄຳເຫັນໃນກອງປະຊຸມ ໂດຍໄດ້ຕີລາຄາສູງ ແລະ ຊົມເຊີຍຕໍ່ການເປັນເຈົ້າ ພາບຂອງພັກຣັດເຊຍເອກະພາບ, ຍົກໃຫ້ເຫັນບົດບາດການນຳພາອັນພົ້ນເດັ່ນຂອງພັກ ປປ ລາວ ໂດຍສະເພາະແມ່ນໃນຂົງເຂດວຽກງານການຕ່າງ ປະເທດ ຊຶ່ງສະແດງອອກໃນການກຳນົດນະໂຍບາຍການຕ່າງປະເທດທີ່ຖືກຕ້ອງ ແລະ ສອດຄ່ອງໃນແຕ່ລະໄລຍະ, ເປີດກວ້າງ ແລະ ເສີມຂະຫຍາຍການພົວພັນຮ່ວມມືກັບບັນດາ ພັກການເມືອງ ແລະ ປະເທດຕ່າງໆໃນໂລກຢ່າງເປັນຮູບປະທຳ ແລະ ມີໝາກຜົນຕົວຈິງໃນ ຂົງເຂດການເມືອງ-ຄວາມໝັ້ນ ຄົງ, ເສດຖະກິດ, ວັດທະນະທຳ -ສັງຄົມ ແລະ ຂົງເຂດອື່ນໆ, ປະ ກອບສ່ວນສຳຄັນເຂົ້າໃນການສ້າງສາພັດທະນາ ສປປ ລາວ ກໍຄືໃນພາລະກິດເສີມສ້າງສັນຕິພາບ, ການຕໍ່ສູ້ຕ້ານລັດທິກໍ່ການຮ້າຍ ແລະ ລັດທິຂວາຈັດ. ບັນດາຜູ້ແທນກອງປະຊຸມ ໄດ້ເປັນເອກະພາບກັນຮັບ ຮອງ ເອົາຖະແຫຼງການມົດສະກູ ຊຶ່ງ ໄດ້ຢືນຢັນຄືນບັນດາຫຼັກການ ພື້ນຖານໃນການຮ່ວມມືລະ ຫວ່າງບັນດາພັກການເມືອງໃນຂົງເຂດອາຊີ ຕາມທີ່ໄດ້ກຳນົດໄວ້ ໃນທຳມະນູນຂອງໄອແຄັບ; ຊົມເຊີຍຄວາມຄືບໜ້າໃນການແກ້ໄຂ ບັນຫາແຫຼມເກົາຫຼີ, ເນັ້ນໜັກການຍົກສູງບົດບາດຂອງບັນ ດາພັກການເມືອງໃນພາກພື້ນຕ່າງໆ ໂດຍສະເພາະແມ່ນທາງດ້ານການເມືອງ, ຄວາມໝັ້ນຄົງ, ເສດຖະກິດ-ສັງຄົມ; ການສ້າງຄວາມເຂົ້າໃຈທີ່ເປັນເອກະພາບກັນ, ການຊອກຫາບັນດາວິທີທາງ ແລະ ວາງບັນດາ ມາດຕະການແກ້ໄຂຮ່ວມກັນ ເພື່ອຮັບມືກັບບັນດາສິ່ງທ້າທາຍຂອງພາກພື້ນ ແລະ ສາກົນ ໂດຍສະເພາະແມ່ນ ການຫຼຸດຜ່ອນຄວາມເຄັ່ງຕຶງ, ການຕໍ່ສູ້ຕ້ານລັດທິຂວາຈັດ, ລັດທິເອກະນິຍົມ ແລະ ລັດທິປົກປ້ອງຕົນເອງ; ການເສີມຂະຫຍາຍການຮ່ວມມືໃນກອບຫຼາຍຝ່າຍ ລວມທັງການເປັນຄູ່ຮ່ວມມືກັບບັນດາອົງການ ຈັດຕັ້ງສາກົນເຊັ່ນ: ອົງການອຸຍແນັດສະໂກ (UNESCO), ສະພາການຮ່ວມມືເສດຖະກິດ ແລະ ສັງຄົມຂອງ ສປຊ (ECOSOC), ການສະໝັກເຂົ້າເປັນຜູ້ສັງເກດການກອງປະຊຸມສະ ມັດຊາໃຫຍ່ ສປຊ ຂອງໄອແຄັບ, ການເສີມຂະຫຍາຍກົນໄກການພົວພັນສາມຝ່າຍ ລະຫວ່າງ ໄອແຄັບ, ອົງການໂກປານ (ບັນດາພັກການເມືອງ ໃນອາເມຣິກາລາຕິນ ແລະ ກາຣາອີບ) ແລະ ອົງການແຄັບ (ສະພາບັນດາພັກການເມືອງ ໃນອາຟຣິກກາ) ແລະ ການປະກອບສ່ວນຂອງໄອແຄັບເຂົ້າໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຂອງ ສປຊ (SDGs) ເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາ ໃນພາກພື້ນ ແລະ ສາກົນ. ຄຽງຄູ່ກັບກອງປະຊຸມໃຫຍ່ ຄັ້ງທີ 10 ຂອງບັນດາພັກ ການເມືອງໃນອາຊີນີ້, ຍັງມີ 5 ກອງປະຊຸມປິ່ນອ້ອມ ຊຶ່ງໃນນັ້ນຜູ້ຕາງໜ້າຂອງພັກ ປປ ລາວ ໄດ້ເຂົ້າຮ່ວມ 2 ກອງປະຊຸມຄື: ກອງປະຊຸມຄັ້ງທີ 4 ຂອງຄະນະກຳມະການຊາວໜຸ່ມ ໄອແຄັບ ແລະ ກອງປະຊຸມຄັ້ງທີ 5 ຂອງຄະນະກຳມະການແມ່ຍິງ ໄອແຄັບ. ນອກຈາກເຂົ້າຮ່ວມກອງປະຊຸມແລ້ວ, ຄະນະຜູ້ແທນພັກເຮົາ ຍັງໄດ້ພົບປະສອງຝ່າຍກັບ ພັກກອມມູນິດຈີນ, ພັກແຮງງານເກົາຫຼີ, ພັກກອມມູນິດສະ ຫະພັນຣັດເຊຍ ແລະ ພັກກອມມູນິດຂອງຊາວກອມມູນິດ ຣັດເຊຍ ແລະ ເຄື່ອນໄຫວຢ້ຽມຊົມສະຖານທີ່ວັດທະນະທຳທີ່ສຳຄັນທາງດ້ານປະຫວັດສາດຂອງນະຄອນຫຼວງມົດສະກູອີກດ້ວຍ. (ຂ່າວ: ຄຕພ)