ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ປິດລົງດ້ວຍຜົນສຳເລັດ


...

02.11.2018 7:41     

   ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໄດ້ເປີດຂຶ້ນ ແລະ ດຳເນີນຢ່າງເປັນທາງການ ແຕ່ວັນທີ 22 ເຖິງວັນທີ 30 ຕຸລາ 2018 ທີ່ສຳນັກງານສູນກາງພັກ, ພາຍໃຕ້ການເປັນປະທານຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ຊຶ່ງມີບັນດາສະຫາຍກຳມະການກົມການເມືອງ, ຄະນະເລຂາທິການສູນກາງພັກ, ບັນດາກຳມະການສູນກາງພັກ ທັງສົມບູນ ແລະ ສຳຮອງ. ນອກນັ້ນ, ຍັງມີທີ່ປຶກສາຄະນະບໍລິຫານງານສູນກາງພັກ, ເລຂາຄະນະພັກກະຊວງ, ອົງການ, ເລຂາພັກແຂວງ ແລະ ເຈົ້າແຂວງ ທີ່ບໍ່ແມ່ນກຳມະການສູນກາງພັກຈຳນວນໜຶ່ງ. ກອງປະຊຸມໄດ້ຄົ້ນຄວ້າຕີລາຄາ, ປຶກສາຫາລື ແລະ ໃຫ້ທິດຊີ້ນຳ ເພື່ອແກ້ບັນຫາສຳຄັນຮີບດ່ວນຈຳນວນໜຶ່ງ ດັ່ງນີ້: 1. ຕີລາຄາສະພາບດ້ານເສດຖະກິດ-ການເງິນ ໃນປັດຈຸບັນ ແລະ ທິດທາງ, ມາດຕະການແກ້ໄຂໃນຕໍ່ໜ້າ; 2. ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ແຜນເງິນຕາ ປະຈຳປີ 2018 ແລະ ທິດທາງແຜນການສຳລັບປີ 2019; 3. ຕີລາຄາວຽກງານກໍ່ສ້າງຮາກຖານການເມືອງໃນໄລຍະຜ່ານມາ ແລະ ທິດທາງໃນຕໍ່ໜ້າ; 4. ການກະກຽມກອງປະຊຸມໃຫຍ່ ຄັ້ງທີ XI ຂອງພັກ. ນອກນັ້ນ, ຍັງໄດ້ດຳເນີນຊີວິດການເມືອງພາຍໃນຄະນະບໍລິຫານງານສູນກາງພັກ. ກອງປະຊຸມເປັນເອກະພາບກັນຕີລາຄືນດ້ານຕັ້ງໜ້າ, ໄດ້ດຳເນີນການຄົ້ນຄ້ວາປະ ກອບຄຳເຫັນ ຕໍ່ບັນຫາຕ່າງໆ ທີ່ຕັ້ງຂຶ້ນ ໃນກອງປະຊຸມຢ່າງ ກົງໄປກົງມາ, ເລິກເຊິ່ງໂດຍ ສະເພາະ ແມ່ນສຸມໃສ່ວິເຄາະ ໄຈ້ແຍກບັນຫາ ທີ່ຍັງຄົງຄ້າງ ແລະ ມີຄວາມເປັນເອກະພາບຮັບຮອງເອົາທິດທາງວຽກງານຈຸດສຸມໃນຕໍ່ໜ້າ ແນໃສ່ສ້າງການຫັນປ່ຽນອັນແຂງແຮງໃນແຕ່ລະຂົງເຂດວຽກງານ, ສ້າງບັນດາປັດໄຈຕົວຈິງ ເພື່ອ ຄຳ້ປະກັນການປັບປຸງເສດ ຖະກິດມະຫາພາກໃຫ້ເຂັ້ມແຂງຂຶ້ນ, ສ້າງຄວາມສາມາດໃໝ່ຂອງພື້ນຖານການຜະລິດ ແລະ ການບໍລິການ, ຮັບປະກັນຄວາມໝັ້ນຄົງ ແລະ ຍືນຍົງໃນການພັດທະນາເສດຖະກິດ-ສັງຄົມ, ສືບຕໍ່ນຳພາປະເທດຊາດຫຼຸດພົ້ນຈາກສະຖານະພາບດ້ອຍພັດທະນາຕາມຄາດໝາຍທີ່ວາງອອກ; ເພື່ອຈັດຕັ້ງປະຕິບັດບັນດາເນື້ອໃນເຫຼົ່ານັ້ນ ກອງປະຊຸມໄດ້ເນັ້ນໜັກເຖິງການສ້າງຄວາມເຂົ້າໃຈເປັນເອກະພາບ ແລະ ເລິກເຊິ່ງກວ່າເກົ່າ ຕໍ່ຄວາມຮັບຜິດຊອບການເມືອງ ຂອງຄະນະບໍລິຫານງານສູນກາງພັກ ແຕ່ລະສະຫາຍ ນັບທັງເລຂາຄະນະພັກກະຊວງ, ອົງການ, ແຂວງ ໃນການນຳພາ-ຊີ້ນຳຜັນຂະຫຍາຍມະຕິ, ຄຳສັ່ງ ລວມທັງບັນດານິຕິກຳຕ່າງໆຂອງສູນກາງພັກ ແລະ ລັດຖະບານ ວາງອອກ, ພ້ອມທັງເປັນເຈົ້າການນຳພາ ຊີ້ນຳ ແກ້ບັນຫາຕ່າງໆ ຢ່າງຈິງຈັງ, ຮັບປະກັນໝາກຜົນຕົວຈິງ. ຄະນະບໍລິຫານງານສູນກາງພັກ ໄດ້ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ປະຊາຊົນລາວທັງຊາດ ຈົ່ງເພີ່ມທະວີຄວາມສາມັກຄີເປັນປຶກແຜ່ນທົ່ວພັກ ແລະ ທົ່ວສັງຄົມ, ເຊີດຊູ ແລະ ເສີມຂະຫຍາຍຈິດໃຈຮັກຊາດ, ເອກະລາດເປັນເຈົ້າຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຕິດພັນກັບການສູ້ຊົນ ເຮັດສຳເລັດໜ້າທີ່ໃນຄວາມຮັບຜິດຊອບຂອງຕົນ. ກອງປະຊຸມໄດ້ມອບໃຫ້ຄະນະພັກແຕ່ລະຂັ້ນ ເປັນເຈົ້າການຈັດຕັ້ງເຊື່ອມຊຶມ, ກຳແໜ້ນ ແລະ ຈັດຕັ້ງຜັນຂະ ຫຍາຍມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 7 ສະໄໝທີ X ໃຫ້ເປັນຂະບວນຟົດຟື້ນ, ແຂງແຮງ, ຕໍ່ເນື່ອງ, ບັນລຸຜົນສຳເລັດຕົວຈິງຢ່າງຈົບງາມ. (ຂ່າວ:ຫ້ອງວ່າການສູນກາງພັກ-ພາບ:ພູວຽງຄຳ)