ກອງປະຊຸມຄົບຄະນະກຳມາທິການແຜນການ ການເງິນ ແລະ ການກວດສອບ


...

02.11.2018 7:53     

   ກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ໄດ້ຈັດກອງປະຊຸມຄົບຄະນະ ເພື່ອສະຫຼຸບການເຄື່ອນໄຫວວຽກງານໃນ 1 ປີຜ່ານມາ ພ້ອມທັງປະກອບຄຳເຫັນໃສ່ບັນດາເນື້ອໃນທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII. ກອງປະຊຸມດັ່ງກ່າວ ໄດ້ຈັດຂຶ້ນໃນວັນທີ 31 ຕຸລາ ທີ່ສູນການຮ່ວມມື ແລະ ຝຶກອົບ ຮົມ ( ຫຼັກ 5) ພາຍໃຕ້ການເປັນປະທານຂອງ ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ມີພາກສ່ວນກ່ຽວຂ້ອງເຂົ້າຮ່ວມ. ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ, ການເງິນ ແລະ ການກວດສອບສະພາແຫ່ງຊາດ ໄດ້ກ່າວວ່າ: ກອງປະຊຸມຄົບຄະນະກໍາມາທິການປະຈໍາປີ 2018 ຄັ້ງນີ້ ເພື່ອສະຫຼຸບຕີລາຄາ ຜົນການເຄື່ອນໄຫວວຽກງານ ໜຶ່ງປີຜ່ານມາ ແລະ ວາງທິດທາງແຜນການໃນຕໍ່ໜ້າຂອງກໍາມາທິການ, ນອກຈາກນີ້ ກອງປະຊຸມຍັງຈະໄດ້ພິຈາລະນາ ແລະ ປະກອບຄໍາເຫັນໃສ່ເນື້ອໃນສໍາຄັນທີ່ຈະນໍາເຂົ້າສູ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ VIII ມີຄື: ຮັບຟັງບົດສະຫຼຸບການເຄື່ອນໄຫວວຽກງານປະຈໍາປີ 2018 ແລະ ແຜນການປີ 2019 ຂອງກໍາມາທິການແຜນການ,ການເງິນ ແລະ ການກວດສອບ; ສະຫຼຸບຕີລາຄາການຈັດຕັ້ງປະຕິບັດ ກົດໝາຍ ແລະ ນິຕິກໍາໃຕ້ກົດໝາຍ ໃນຂົງເຂດແຜນການ, ການເງິນ ແລະ ການກວດສອບ ໂດຍສະເພາະ ກົດໝາຍວ່າດ້ວຍ ສົ່ງເສີມການລົງທຶນ, ກົດໝາຍວ່າດ້ວຍງົບປະມານ ແລະ ກົດ ໝາຍອື່ນໆທີ່ກ່ຽວຂ້ອງ; ຮ່າງບົດສະຫຼຸບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປີ 2018 ແລະ ທິດທາງແຜນການປີ2019; ຮ່າງບົດສະຫຼຸບການຈັດຕັ້ງປະຕິບັດແຜນງົບປະມານແຫ່ງລັດ ປີ 2018 ແລະ ທິດທາງ 2019; ຮ່າງບົດສະຫຼຸບການຈັດຕັ້ງປະຕິບັດແຜນເງິນຕາປີ 2018 ແລະ ທິດທາງແຜນການປີ 2019; ຮ່າງບົດສະຫຼຸບການຈັດຕັ້ງປະຕິບັດການເຄື່ອນໄຫວປີ 2018 ແລະ ທິດທາງແຜນການປີ2019 ແລະ ບົດລາຍງານການສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດປີ 2017; ບົດລາຍງານຂອງອົງ ການກວດກາລັດຖະບານ ກ່ຽວກັບ ການແກ້ໄຂບົດສະຫຼຸບຂາດຕົວ ການຈັດຕັ້ງປະຕິບັດ ແຜນງົບປະມານແຫ່ງລັດ ສົກປີ 2015-2016. ( ຂ່າວ-ພາບ: ແສງຈັນ)