ປາຖະກະຖາ ເມືອງວຽງໄຊ ຖານທີ່ໝັ້ນ ຂອງການປະຕິວັດ


...

05.11.2018 12:09     

   ຄະນະໂຄສະນາອົບຮົມສູນກາງພັກ ໄດ້ຈັດພິທີປາຖະ ກະຖາ ເມືອງວຽງໄຊຖານທີ່ໝັ້ນຂອງການປະຕິວັດລາວ ຄົບຮອບ 50 ປີ (30/11/1968-30/11/2018) ໃນວັນທີ 2 ພະຈິກຜ່ານມາ ທີ່ຫ້ອງປະຊຸມຂອງຄະນະໂຄສະນາອົບຮົມສູນກາງພັກ, ສະຫາຍ ກິແກ້ວ ໄຂຄໍາພິທູນ ຄະນະເລຂາທິການສູນກາງພັກ ຫົວໜ້າຄະນະໂຄສະນາອົບຮົມສູນກາງພັກໃຫ້ກຽດປາຖະກະຖາ, ໂດຍມີບັນດາຄະນະພັກ, ພະນັກງານຫຼັກແຫຼ່ງ ແລະ ພາກສ່ວນກ່ຽວຂ້ອງເຂົ້າຮ່ວມຮັບຟັງ. ຈຸດປະສົງຂອງການປາ ຖະກະຖາ ເພື່ອສຶກສາອົບຮົມພະນັກງານ, ສະມາຊິກພັກນັກຮົບ ແລະ ປະຊາຊົນບັນ ດາເຜົ່າໂດຍສະເພາະ ແມ່ນຮຸ່ນຄົນໜຸ່ມ ໃຫ້ຮັບຮູ້ເຂົ້າໃຈຢ່າງເລິກເຊິ່ງ ກ່ຽວກັບເສັ້ນທາງກ້າວເດີນອັນລະອິດລະອ້ຽວຂອງການປະຕິວັດ ມູນເຊື້ອຕໍ່ສູ້ມີໄຊ ແລະ ການນໍາພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ ກໍຄືການຄົ້ນຄວ້າຮໍ່າຮຽນເອົາແບບຢ່າງຄຸນສົມບັດສິນທໍາປະຕິວັດຂອງບັນດາທ່ານຜູ້ນໍາຮຸ່ນກ່ອນ ໂດຍສະເພາະ ປະທານ ໄກສອນ ພົມວິຫານ ແລະ ຜູ້ນໍາຄົນອື່ນໆ ທີ່ໄດ້ນໍາພາພາລະກິດຕໍ່ສູ້ປົດປ່ອຍຊາດ, ສ້າງເມືອງວຽງໄຊເປັນຖານທີ່ໝັ້ນອັນແຂງແກ່ນ ເພື່ອເຮັດສໍາເລັດການປະຕິວັດຊາດ ປະຊາທິປະໄຕ ນໍາເອົາປະເທດຊາດກ້າວຂຶ້ນສູ່ສັງກາດໃໝ່. ໃນພິທີ ສະຫາຍ ກິແກ້ວ ໄຂຄໍາພິທູນ ໄດ້ຍົກໃຫ້ເຫັນເຖິງການຕໍ່ສູ້ຢ່າງດຸເດືອດຂ້ຽວຂາດ ແລະ ລະອິດລະອ້ຽວຂອງກອງ ທັບ ແລະ ປະຊາຊົນລາວ ພາຍໃຕ້ການນຳພາອັນສະຫຼາດສ່ອງໃສຂອງສູນກາງພັກ, ເພື່ອສືບຕໍ່ນຳພາ ພາລະກິດປະຕິວັດກ້າວຂຶ້ນຢ່າງບໍ່ຢຸດຢັ້ງ ມາຮອດປີ 1968 ສູນກາງພັກໄດ້ຕົກລົງສ້າງຕັ້ງເມືອງວຽງໄຊເປັນຖານທີ່ໝັ້ນຂອງການປະຕິວັດລາວ. ເມືອງວຽງໄຊ ເປັນບ່ອນກຳເນີດຂອງອົງການແນວລາວຮັກຊາດ, ເປັນໃຈກາງແຫ່ງການເຕົ້າໂຮມຄວາມສາມັກຄີທົ່ວປວງຊົນທັງຊາດ, ໂຄງການການເມືອງຂອງພັກໄດ້ກຳນົດວ່າ: "ມະຫາສາມັກຄີທົ່ວປວງຊົນ, ສ້າງຕັ້ງແນວໂຮມເອກະພາບແຫ່ງຊາດຢ່າງກວ້າງຂວາງໂດຍຕັ້ງຢູ່ບົນພື້ນຖານພັນທະພາບກຳມະກອນ-ຊາວນາ", ນຳພາປະຊາຊົນລາວບັນດາ ເຜົ່າຈັດຕັ້ງປະຕິບັດແນວທາງນະໂຍບາຍຂອງພັກ ເປັນອົງ ການແນວໂຮມຊຶ່ງປະຕິບັດແນວທາງມະຫາຊົນຂອງພັກ ເຕົ້າໂຮມຄວາມສາມັກຄີທຸກກຳລັງທີ່ຮັກຊາດ ເພື່ອສ້າງເປັນກຳລັງແຮງສັງລວມຕີເອົາຊະນະສັດຕູ. ເມືອງວຽງໄຊ ເປັນຖານທີ່ໝັ້ນຂອງການປະຕິວັດ ເປັນບ່ອນກໍ່ສ້າງ ແລະ ຂະຫຍາຍກຳລັງປະກອບອາວຸດ, ກໍ່ສ້າງ ແລະ ປົກປັກຮັກສາຖານທີ່ໝັ້ນຂອງການປະຕິວັດ, ກຳລັງປະກອບອາວຸດໄດ້ເຕີບໃຫຍ່ຂະຫຍາຍຕົວຢ່າງແຂງແຮງ ກາຍເປັນກຳລັງຫຼັກແຫຼ່ງໃນສົງຄາມປະຊາຊົນປົດປ່ອຍຊາດ, ກຳລັງປະກອບອາວຸດຂະຫຍາຍຕົວ ແລະ ເຕີບໃຫຍ່ເຂັ້ມແຂງ ທັງປະລິມານ ແລະ ຄຸນນະພາບ, ຍິ່ງຕີ ຍິ່ງໄດ້ຮັບໄຊະນະ, ຍິ່ງຕີຍິ່ງມີຄວາມເຂັ້ມແຂງ ແລະ ມີບົດຮຽນໃນການສູ້ຮົບ, ມີຄວາມເດັດດ່ຽວໜຽວແໜ້ນ ແລະ ພິລະອາດຫານ. ສະຫາຍ ຫົວຫນ້າຄະນະໂຄສະນາອົບຮົມສູນກາງພັກ ຍັງໄດ້ຍົກໃຫ້ເຫັນເຖິງການຕໍ່ສູ້ຢ່າງອົງອາດກ້າຫານຂອງກອງທັບ ແລະ ປະຊາຊົນລາວໃນແຕ່ລະສະໜາມຮົບຢູ່ພາກເໜືອ, ພາກກາງ ແລະ ພາກໃຕ້ ຈົນໄດ້ຮັບໄຊຊະນະຢ່າງຕໍ່ເນື່ອງ ແລະ ກ້າວໄປເຖິງປົດປ່ອຍປະເທດຊາດ ຢ່າງສົມ ບູນໃນວັນທີ 2 ທັນວາ 1975. ( ຂ່າວ: ແສງຈັນ)