ສະພາ ຮັບຮອງເອົາການແຕ່ງຕັ້ງບຸກຄະລາກອນ 2 ຕຳແໜ່ງ


10.06.2019 10:04     

   ບັນດາສະມາຊິກສະພາ ແຫ່ງຊາດ (ສສຊ) ໄດ້ພິຈາລະ ນາ ແລະ ຮັບຮອງເອົາການສະ ເໜີເລືອກຕັ້ງທ່ານ ຄຳພາ ແສງດາລາ ຮອງປະທານສານປະຊາ ຊົນສູງສຸດ ເປັນປະທານສານປະຊາຊົນສູງສຸດ ແລະ ຮັບຮອງເອົາການແຕ່ງຕັ້ງ ທ່ານ ວິດົງ ໄຊຍະສອນ ເຈົ້າແຂວງໆວຽງຈັນ ເປັນລັດຖະມົນຕີປະຈຳສຳນັກ ງານນາຍົກລັດຖະມົນຕີ.
ໃນຕອນບ່າຍຂອງວັນທີ 7 ມິຖຸນາ ຜ່ານມານີ້ ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ພາຍໃຕ້ການເປັນປະທານຂອງ ທ່ານ ບຸນປອນ ບຸດຕະນະວົງ ຮອງປະທານສະພາແຫ່ງຊາດ, ບັນດາສະມາຊິກສະພາແຫ່ງຊາດໄດ້ພິຈາລະນາ ແລະ ຮັບ ຮອງເອົາການເລືອກຕັ້ງ ແລະ ແຕ່ງຕັ້ງບຸກຄະລາກອນຕາມ ໜັງສືສະເໜີຂອງທ່ານປະທານປະເທດ ແຫ່ງ ສປປ ລາວ ສະບັບເລກທີ 217/ປປທ ລົງວັນທີ 5 ມິຖຸນາ 2019 ແລະ ໜັງສືສະເໜີຂອງທ່ານນາຍົກລັດຖະມົນຕີ ແຫ່ງ ສປປ ລາວ ສະບັບເລກທີ 177/ນຍ ລົງວັນທີ 22 ເມສາ 2019.
ສສຊ ໄດ້ພ້ອມກັນປະ ກອບຄຳເຫັນໃສ່ ການເລືອກຕັ້ງ ແລະ ແຕ່ງຕັ້ງບຸກຄະລາກອນຈຳນວນດັ່ງກ່າວ, ກ່ອນຈະລົງຄະແນນສຽງຮັບຮອງເອົາດ້ວຍສຽງສ່ວນຫຼາຍ.
ທ່ານ ຄຳພາ ແສງດາລາ ກ່າວວ່າ: ຈະຮ່ວມກັບຄະນະ ພັກ, ຄະນະນຳສານປະຊາຊົນສູງສຸດ, ສານປະຊາຊົນທ້ອງຖິ່ນ ແລະ ພະນັກງານສານປະຊາຊົນ ທຸກຄົນຈະຕັ້ງໜ້າບຸກບືນສຸມ ສະຕິປັນຍາເຫື່ອແຮງເຂົ້າໃນການປັບປຸງກົງຈັກການຈັດຕັ້ງ ຂອງສານປະຊາຊົນໃຫ້ໜັກແໜ້ນ ແລະ ເຂັ້ມແຂງ, ສຶກສາອົບຮົມການເມືອງແນວຄິດ, ຈັນຍາບັນ ຈັນຍາທຳ, ສະກັດກັ້ນ ຕ້ານການສໍ້ລາດບັງຫຼວງ ແລະ ຍົກສູງຄວາມຮູ້ ຄວາມສາມາດ ດ້ານວິຊາສະເພາະ ແລະ ຄວາມຮູ້ດ້ານພາສາຕ່າງປະເທດໃຫ້ຜູ້ ພິພາກສາ ແລະ ພະນັກງານຂອງ ສານຢ່າງເປັນປົກກະຕິ ເພື່ອ ຮອງຮັບໜ້າທີ່ການເມືອງຂອງ ພັກ-ລັດຖະບານທີ່ນັບມື້ນັບສູງ ແລະ ເຊື່ອມໂຍງກັບສາກົນເທື່ອລະກ້າວ.
ທ່ານກ່າວອີກວ່າ: ຈະເພີ່ມ ທະວີການອອກນິຕິກຳລຸ່ມກົດ ໝາຍໃຫ້ຫຼາຍຂຶ້ນ ເພື່ອເປັນບ່ອນອີງໃຫ້ສານປະຊາຊົນທຸກ ຂັ້ນຈັດຕັ້ງປະຕິບັດໃຫ້ມີຄວາມເປັນເອກະພາບ, ສ້າງກົນໄກ ເງື່ອນໄຂໃຫ້ປະຊາຊົນມີສ່ວນຮ່ວມໃນການດຳເນີນຄະດີຂອງ ສານ ແລະ ເຂົ້າເຖິງຂະບວນ ການຍຸຕິທຳໃຫ້ນັບມື້ຫຼາຍຂຶ້ນ ຍົກສູງຄຸນນະພາບການພິຈາ ລະນາຕັດສິນ ແລະ ພິພາກສາ ຄະດີ 3 ຂັ້ນຄື: ຂັ້ນຕົ້ນ, ຂັ້ນອຸ ທອນ ແລະ ຂັ້ນລຶບລ້າງຂອງສານປະຊາຊົນໃຫ້ມີຄວາມວ່ອງ ໄວຖືກຕ້ອງ ແລະ ເປັນທຳ ດັ່ງຄຳຂວັນທີ່ວ່າ: "ຮອບຄອບ ມີວິໄນ ວິນິໄສຈະແຈ້ງ ຕັດສິນເປັນ ທຳ ນຳໄປປະຕິບັດໄດ້" ໂດຍຈະສຸມໃສ່ເຮັດໃຫ້ສານຂັ້ນຕົ້ນ ຊຶ່ງເປັນປະຕູດ່ານທຳອິດທີ່ບໍລິການຮັບໃຊ້ປະຊາຊົນ ແລະ ເປັນທີ່ເພິ່ງ ໄວ້ເນື້ອເຊື່ອໃຈຂອງປະຊາຊົນ.
(ຂ່າວ: ຄຳເຮືອງ)