6 ເດືອນຕົ້ນປີນີ້ ສະພາມີຜົນສຳເລັດຫຼາຍດ້ານ


...

13.06.2019 9:38     

   ການເຄື່ອນໄຫວຈັດຕັ້ງ ປະຕິບັດວຽກງານຂອງຄະນະ ປະຈຳສະພາແຫ່ງຊາດ ໃນໄລ ຍະ 6 ເດືອນຕົ້ນປີ 2019 ໄດ້ເອົາໃຈໃສ່ປະສານສົມທົບກັບ ພາກສ່ວນກ່ຽວຂ້ອງຮຽບຮຽງບັນດາກົດໝາຍທີ່ໄດ້ຮັບຮອງແລ້ວ ນຳສະເໜີຕໍ່ປະທານປະ ເທດອອກດຳລັດປະກາດໃຊ້ ທັນຕາມກຳນົດເວລາ, ກະກຽມແຜນສ້າງ ແລະ ປັບປຸງກົດໝາຍ ເພື່ອນຳມາພິຈາລະນາຮັບຮອງເອົາໃນກອງປະຊຸມ ຄັ້ງນີ້ມີຈຳ ນວນ 10 ສະບັບ, ເປັນກົດໝາຍສ້າງໃໝ່ 5 ສະບັບ, ປັບປຸງ 5 ສະບັບ. ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ໃນວັນທີ 12 ມິຖຸນານີ້ ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ປະ ທານສະພາແຫ່ງຊາດ, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ ຕາງໜ້າຄະນະປະຈໍາສະພາ ແຫ່ງຊາດ ໄດ້ຂຶ້ນລາຍງານ ການຈັດຕັ້ງປະຕິບັດແຜນ ການເຄື່ອນໄຫວວຽກງານຂອງ ຄະນະປະຈຳສະພາແຫ່ງຊາດ ໃນລະຫວ່າງກອງປະຊຸມສະ ໄໝສາມັນ ເທື່ອທີ 6 ຫາ 7 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດ ທີ VIII ໃຫ້ຮູ້ວ່າ: ຄະນະປະຈຳ ສະພາແຫ່ງຊາດຍັງໄດ້ຊີ້ນຳ ໃຫ້ບັນດາກຳມາທິການສົມທົບກັບ ພາກສ່ວນກ່ຽວຂ້ອງ ໃນການ ຄົ້ນຄ້ວາບັນດາຮ່າງກົດໝາຍ ແລະ ນິຕິກຳລຸ່ມກົດໝາຍຈຳ ນວນໜຶ່ງ ເຊັ່ນ: ຮ່າງກົດໝາຍ ວ່າດ້ວຍການຄຸ້ມຄອງອາວຸດ ແລະ ທາດລະເບີດ, ຮ່າງກົດ ໝາຍ ວ່າດ້ວຍຊາວໜຸ່ມລາວ, ຮ່າງກົດໝາຍ ວ່າດ້ວຍຄວາມສະເໝີພາບ ຍິງ-ຊາຍ ແລະ ຄົ້ນຄວ້າປັບປຸງນິຕິກຳລຸ່ມກົດ ໝາຍເປັນຮ່າງລັດຖະບັນຍັດ ຊຶ່ງກວມຂົງເຂດຄ່າທຳນຽມ ແລະ ການບໍລິການ, ພາສີທີ່ດິນ, ການປະຕິບັດອາກອນມູນຄ່າເພີ່ມໃນຂະແໜງບໍ່ແຮ່ ແລະ ພະ ລັງງານໄຟຟ້າ. ນອກນັ້ນ, ຍັງໄດ້ຈັດຕັ້ງການເຜີຍແຜ່ກົດໝາຍ ທີ່ຕິດພັນກັບສະພາແຫ່ງຊາດ ແລະ ສະພາປະຊາຊົນແຂວງ ຈຳນວນໜຶ່ງ. ຄະນະປະຈຳສະພາແຫ່ງຊາດໄດ້ດຳເນີນກອງປະຊຸມ ຂອງຕົນ 8 ຄັ້ງ ເພື່ອພິຈາລະນາ ຕົກລົງບັນຫາສຳຄັນຂອງຊາດ ກໍຄືຂອງລັດຖະບານ ເປັນຕົ້ນ ການຫັນປ່ຽນເນື້ອທີ່ດິນປ່າໄມ້ ໃນເຂດປ່າປ້ອງກັນແຫ່ງຊາດ ນ້ຳກົງ-ເຊຊູ ເພື່ອນຳໃຊ້ເຂົ້າໃນການພັດທະນາເຂື່ອນໄຟຟ້ານ້ຳກົງ 3 ແຂວງອັດຕະປື; ການພັດທະນາ ໂຄງການ ສາຍສົ່ງໄຟຟ້າ 500 ກິໂລໂວນ ມະຫາໄຊ-ເຊໂນ ປ່ຽນແທນສາຍສົ່ງໄຟຟ້າ ຊຳເໜືອ-ຊຽງຂວາງ; ການເກັບອາກອນກຳໄລ ໃນອັດຕາ 1% ຂອງຜູ້ຮັບເໝົາກໍ່ສ້າງໂຄງການສາຍສົ່ງສະຖາ ນີ ແລະ ເຂື່ອນໄຟຟ້າ. ພ້ອມນັ້ນ, ຍັງໄດ້ຮັບຮອງເອົາການປັບປຸງ ບຸກຄະລາກອນຂອງສານປະ ຊາຊົນສູງສຸດ ແລະ ການປັບປຸງ ວຽກງານຂອງອົງການໄອຍະການປະຊາຊົນສູງສຸດ; ວຽກງານຂອງອົງການກວດສອບ ແຫ່ງລັດກໍຄືວິໄສທັດຮອດປີ 2030, ຍຸດທະສາດການພັດ ທະນາຮອດປີ 2025 ແລະ ແຜນພັດທະນາຮອດປີ 2021; ລວມທັງວຽກງານຂອງສະພາແຫ່ງຊາດກໍຄືວຽກງານຕິດຕາມກວດ ກາການຈັດຕັ້ງປະຕິບັດກົດ ໝາຍ ແລະ ນິຕິກຳລຸ່ມກົດໝາຍ ທີ່ພົວພັນກັບ ການເກັບລາຍຮັບ, ກົດໝາຍ ວ່າດ້ວຍການສົ່ງເສີມ ການລົງທຶນ, ການລົງທຶນຂອງລັດ, ທັງຕິດຕາມຊຸກຍູ້ບັນດາກະຊວງ, ອົງການ ໃນການສ້າງ ແລະ ຜັນຂະຫຍາຍນິຕິກຳລຸ່ມກົດໝາຍ, ມາຮອດປັດຈຸບັນ ສາ ມາດສ້າງສຳເລັດ 181 ມາດຕາ ຂອງແຜນການ 278 ມາດຕາ. 6 ເດືອນຜ່ານມາ ມີຄຳຮ້ອງຂໍ ຄວາມເປັນທຳ ທັງໝົດ 589 ເລື່ອງ ແລະ ໄດ້ຮັບການແກ້ໄຂ ຕາມກຳນົດ 140 ເລື່ອງ. ທ່ານ ນາງ ສີໃສ ລືເດດມູນສອນ ກ່າວຕື່ມວ່າ: ບັນດາສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງໄດ້ຮັບການຍົກລະດັບ ຢ່າງຕໍ່ເນື່ອງ ເພື່ອສ້າງຄວາມເຂັ້ມແຂງທີ່ພົວພັນກັບການສ້າງ ປັບປຸງກົດໝາຍ ແລະ ນິຕິກຳລຸ່ມກົດໝາຍ, ຍຸດທະສາດການພັດທະນາແບບເຊື່ອມໂຍງເສດ ຖະກິດ, ນະໂຍບາຍທີ່ດິນ, ການສົ່ງເສີມທຸລະກິດຂະໜາດນ້ອຍ ແລະ ກາງ, ລວມທັກສະການຕິດຕາມ ກວດກາ, ການສັກຖາມ ແລະ ການລົງພົບປະ ກັບຜູ້ມີສິດເລືອກຕັ້ງ. ເພື່ອຮັບປະກັນໃຫ້ແກ່ການເຄື່ອນໄຫວວຽກງານ ປີ 2019, ຄະນະປະຈຳສະພາແຫ່ງຊາດໄດ້ຊີ້ນຳຢ່າງໃກ້ຊິດ ຕໍ່ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງໃຫ້ເອົາໃຈໃສ່ປະຕິບັດພາລະບົດ ບາດຂອງຕົນ, 6 ເດືອນຜ່ານມາ 10 ແຂວງໄດ້ອອກນິຕິກຳລຸ່ມກົດໝາຍ ເພື່ອຄຸ້ມຄອງລັດ-ຄຸ້ມຄອງເສດຖະກິດ-ສັງຄົມຂອງທ້ອງຖິ່ນ ຈຳນວນ 15 ສະບັບ. ຈາກນັ້ນ ບັນດາສະມາຊິກສະພາແຫ່ງຊາດ (ສສຊ) ໄດ້ພ້ອມກັນປະກອບຄຳຄິດເຫັນໃສ່ບົດລາຍງານດັ່ງກ່າວ ເພື່ອນຳໄປພິຈາລະນາແກ້ໄຂ ເຮັດໃຫ້ເນື້ອໃນສົມບູນ ແລະ ຮັດກຸມຂຶ້ນ. (ຂ່າວ-ພາບ: ສຸກສະຫວັນ)