ລາວ-ອິນໂດເນເຊຍ ຮັດແໜ້ນການພົວພັນ ຮ່ວມມື


...

26.06.2019 11:10     

   ຂປລ. ວັນທີ 25 ມິຖຸນາ 2019 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີໄດ້ໃຫ້ກຽດຕ້ອນຮັບທ່ານນາງ ຣິນີ ມາແຣນນີ ໂຊມາໂນ (Rini Mariani Soemarno) ລັດຖະມົນຕີກະ ຊວງລັດວິສາຫະກິດຂອງອິນໂດເນເຊຍ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 24-26 ມິຖຸນາ 2019 ນີ້. ໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ທ່ານນາງ ຣິນີ ມາແຣນນີ ໂຊມາໂນ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ຊຶ່ງເປັນນິມິດໝາຍອັນດີ, ເຮັດໃຫ້ການພົວພັນຮ່ວມມື ໃນທຸກຂົງເຂດວຽກງານ ໂດຍສະເພາະການພົວພັນຮ່ວມມື ທາງດ້ານການຄ້າ-ການລົງທຶນ, ດ້ານກະສິກຳ, ດ້ານພະລັງງານ ແລະ ບໍ່ແຮ່ ລະຫວ່າງສອງປະ ເທດລາວ ແລະ ອິນໂດເນເຊຍ ໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການສະໜັບສະໜູນ ຊ່ວຍເຫຼືອຊຶ່ງກັນ ແລະ ກັນ ໃນອະນາຄົດ ແລະ ຍາວນານ. ພ້ອມນັ້ນ, ທ່ານ ທອງລຸນ ສີສຸລິດ ຍັງໄດ້ສະແດງຄວາມຂອບໃຈ ຕໍ່ລັດຖະບານອິນໂດເນເຊຍທີ່ ໄດ້ໃຫ້ການສະໜັບສະໜູນຊ່ວຍເຫຼືອແກ່ ສປປ ລາວ ໃນທຸກຂົງເຂດວຽກງານ ໂດຍສະເພາະ ທາງດ້ານການພັດທະນາຊັບ ພະຍາກອນມະນຸດ ທັງໃນໄລ ຍະສັ້ນ, ໄລຍະຍາວ ແລະ ອື່ນໆ. ທ່ານນາງ ຣິນີ ມາແຣນນີ ໂຊມາໂນ ກໍໄດ້ສະແດງຄວາມ ຂອບໃຈຕໍ່ທ່ານ ທອງລຸນ ສີສຸລິດ ທີ່ໄດ້ສະຫຼະເວລາອັນມີຄ່າຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງລາຍງານສະພາບການເຄື່ອນໄຫວຢ້ຽມຢາມ ຢູ່ ສປປ ລາວ ໃຫ້ທ່ານນາຍົກລັດ ຖະມົນຕີຮັບຊາບອີກດ້ວຍ. (ຂ່າວ: ທະນູທອງ ພາບ: ອ່າຍຄຳ)