ລັດຖະມົນຕີກະຊວງການຕ່າງປະເທດ ສຳເລັດການຢ້ຽມຢາມ ລຸກຊຳບວກ


...

28.06.2019 9:07     

   ໂດຍຕອບສະໜອງຕາມຄຳເຊີນຂອງ ທ່ານ ຊອນ ອັສແຊນລບອນ (H.E. Mr. Jean ASSELBORN) ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແຫ່ງ ຣາຊະອາ ນາຈັກລຸກຊຳບວກ, ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ເດີນທາງຢ້ຽມຢາມ ຣາຊະອານາຈັກ ລຸກຊຳບວກ ຢ່າງເປັນທາງການ, ໃນລະຫວ່າງວັນທີ 26-27 ມິຖຸນາ 2019, ຊຶ່ງ ເປັນການຢ້ຽມຢາມຄັ້ງປະຖົມ ມະລືກ ແລະ ເປັນນິມິດໝາຍອັນສຳຄັນໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ຣາຊະອານາຈັກ ລຸກຊຳບວກ ໃຫ້ນັບມື້ນັບແໜ້ນແຟ້ນ ແລະ ແຕກດອກອອກຜົນຍິ່ງໆຂຶ້ນ. ໃນໄລຍະຢູ່ຢ້ຽມຢາມ ທ່ານ ສະເຫຼີມໄຊ ກົມມະສິດ ໄດ້ພົບປະສອງຝ່າຍກັບທ່ານ ຊອນ ອັສແຊນລບອນ ສອງ ຝ່າຍໄດ້ຕີລາຄາສູງຕໍ່ສາຍພົວ ພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ຣາຊະອານາຈັກ ລຸກຊໍາບວກ ນັບແຕ່ສອງປະ ເທດໄດ້ສ້າງຕັ້ງສາຍພົວພັນ ການທູດນຳກັນ ໃນວັນທີ 25 ກັນຍາ 1997 ເປັນຕົ້ນມາ. ພ້ອມກັນນັ້ນ, ກໍໄດ້ທົບທວນ ຄືນການຊ່ວຍເຫຼືອຂອງຣາຊະ ອານາຈັກ ລຸກຊຳບວກແກ່ ສປປ ລາວ ຊຶ່ງສຸມໃສ່ຂະ ແໜງການບຸລິມະສິດຂອງ ແຜນພັດທະນາເສດຖະກິດ - ສັງຄົມ ໃນໄລຍະຜ່ານມາຮອດປັດຈຸບັນເຊັ່ນ: ດ້ານການສຶກສາ, ສາທາລະ ນະສຸກ, ອຸດສາຫະກຳການ ທ່ອງທ່ຽວ, ການເກັບກູ້ລະເບີດບໍ່ທັນແຕກຢູ່ລາວ, ໂຮງແຮມ ແລະ ການບໍລິການ, ການເງິນ-ການທະນາຄານ, ພັດທະນາຊົນນະບົດ ແລະ ພື້ນຖານໂຄງລ່າງ. ສຳລັບການຊ່ວຍເຫຼືອຂອງລຸກຊຳບວກ ແມ່ນເປັນແຜນງານຮ່ວມມືໄລຍະຍາວ ລະຫວ່າງ ສອງລັດຖະບານ ແລະ ຈັດເປັນແຕ່ລະໄລຍະ, ຊຶ່ງມາເຖິງປັດຈຸບັນ ປະຕິບັດໄດ້ 4 ໄລຍະແລ້ວ ຄື: 1) ICP I ແຕ່ປີ 2003-2006 ມູນຄ່າ 18 ລ້ານເອີໂຣ, 2) ICP II ແຕ່ປີ 2007-2010 ມູນຄ່າ 35 ລ້ານເອີໂຣ, 3) ICP III ແຕ່ປີ 2011-2015 ມູນຄ່າ 50 ລ້ານເອີໂຣ ແລະ 4) ICP IVແຕ່ປີ 2016-2020 ມູນຄ່າ 75 ລ້ານເອີໂຣ, ຊຶ່ງລວມມູນຄ່າການຊ່ວຍເຫຼືອທັງໝົດ ນັບແຕ່ປີ 2003 ເປັນຕົ້ນມາມີເຖິງ 178 ລ້ານເອີໂຣ. ໃນໂອກາດຢ້ຽມຢາມທາງການ ທີ່ ຣາຊະອານາຈັກລຸກຊຳບວກ ໃນຄັ້ງນີ້, ນອກຈາກການພົບປະສອງຝ່າຍ ກັບ ທ່ານ ຊອນ ອັສແຊນລ໌ບອນ, ລັດຖະມົນຕີກະຊວງການຕ່າງປະເທດ ແລະ ວຽກງານເອີຣົບ ແລະ ພົບປະກັບ ທ່ານ ນາງ Paulette Lenert, ລັດຖະມົນຕີຮ່ວມມື ເພື່ອການພັດທະນາ ແລະ ມະນຸດສະທຳ ແຫ່ງ ຣາຊະອານາຈັກ ລຸກຊຳບວກ ແລ້ວ, ທ່ານ ສະເຫຼີມໄຊ ກົມມະສິດ ແລະ ຄະນະ ຍັງໄດ້ເຂົ້າຢ້ຽມຂໍ່ານັບ ພະນະທ່ານ ຊາວີເອ ແບນແຕນ (Xavier Bettel), ນາຍົກລັດຖະມົນຕີ ແຫ່ງ ຣາຊະອານາຈັກ ລຸກຊໍາບວກ ແລະ ທ່ຽວຊົມສະຖານທີ່ທ່ອງທ່ຽວທີ່ສຳຄັນທາງປະຫວັດສາດ ຈໍານວນໜຶ່ງໃນລຸກຊຳບວກ. (ພາບ-ຂ່າວ: ກະຊວງການຕ່າງປະເທດ)