ສູນກາງສະຫະພັນກຳມະບານລາວ ມອບ-ຮັບໜ້າທີ່ພະນັກງານຂັ້ນກົມ


...

02.07.2019 11:06     

   ສູນກາງສະຫະພັນກຳມະບານລາວໄດ້ຈັດພິທີມອບ-ຮັບໜ້າທີ່ ລະຫວ່າງ ຫົວໜ້າກົມປົກປ້ອງແຮງງານ ຜູ້ເກົ່າ ແລະ ຮັກສາການຫົວໜ້າກົມຜູ້ໃໝ່, ຫົວໜ້າກົມກວດກາຜູ້ເກົ່າ ແລະ ຮັກສາການຫົວໜ້າກົມຜູ້ໃໝ່ ຂຶ້ນໃນວັນທີ 26 ມິຖຸນາຜ່ານມາ ທີ່ສູນກາງສະຫະພັນດັ່ງກ່າວ ໂດຍເປັນກຽດເຂົ້າຮ່ວມຂອງທ່ານ ປ້ານ ນ້ອຍມະນີ ກຳມະການສູນກາງພັກ ປະທານຄະນະບໍລິຫານງານສູນກາງສະຫະພັນກຳມະບານລາວ, ມີບັນດາຮອງປະທານ, ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ ທ່ານຫົວໜ້າກົມຈັດຕັ້ງພະນັກງານ ສູນກາງສະຫະພັນກຳມະບານລາວ ໄດ້ຜ່ານມະຕິຕົກລົງຂອງຄະນະເລຂາທິການສູນກາງພັກ, ແຈ້ງການຂອງລັດຖະມົນຕີກະຊວງພາຍໃນ, ຂໍ້ຕົກລົງ ຂອງປະທານຄະນະບໍລິຫານງານສູນກາງສະຫະພັນກຳມະບານລາວ ວ່າດ້ວຍການອະນຸມັດໃຫ້ພະນັກງານອອກຮັບອຸດໜູນບຳນານ, ການຮັບລັດຖະກອນທີ່ໂຍກຍ້າຍ ແລະ ສັບຊ້ອນພະນັກງານລັດຖະກອນ ຢູ່ພາຍໃນສູນກາງສະຫະພັນກຳມະບານລາວ.
ການມອບ-ຮັບໜ້າທີ່ຄັ້ງນີ້ ມີຂຶ້ນລະຫວ່າງ ທ່ານ ອຸ່ນຄຳ ບຸນຍະແສງ ກຳມະການຄະນະບໍລິຫານງານສູນກາງສະຫະພັນກຳມະບານລາວ ຫົວໜ້າກົມປົກປ້ອງແຮງງານຜູ້ເກົ່າ ແລະ ທ່ານ ພອນສານ ວິໄລເມັ້ງ ກຳມະການຄະນະບໍລິຫານງານສູນກາງສະຫະພັນກຳມະບານລາວ ຮັກສາການຫົວໜ້າກົມປົກປ້ອງແຮງງານຜູ້ໃໝ່ ແລະ ທ່ານ ຈຳປາ ວົງພະຈັນ ຫົວໜ້າກົມກວດກາຜູ້ເກົ່າ ແລະ ທ່ານ ຂັນທອງ ສຸດທິມາດ ກຳມະການຄະນະບໍລິຫານງານສູນກາງສະຫະພັນກຳມະບານລາວ ຮັກສາການຫົວໜ້າກົມກວດກາຜູ້ໃໝ່, ຈາກນັ້ນ ກໍໄດ້ມີພິທີເຊັນບົດບັນທຶກ ມອບ-ຮັບ ໜ້າທີ່ຂອງທັງສອງກົມຢ່າງເປັນທາງການ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ປ້ານ ນ້ອຍມະນີ, ມີບັນດາຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ຫົວໜ້າກົມ-ຮອງກົມ.
ໃນພິທີຍັງໄດ້ຮັບຟັງການໂອ້ລົມຂອງ ທ່ານ ປ້ານ ນ້ອຍມະນີ ຊຶ່ງທ່ານໄດ້ເນັ້ນໃຫ້ຜູ້ທີ່ໄດ້ຮັບໜ້າທີ່ໃໝ່ ຈົ່ງສືບຕໍ່ຊີ້ນຳ-ນຳພາວຽກງານທີ່ໄດ້ຮັບມອບໝາຍໃຫ້ໄດ້ຮັບຜົນສຳເລັດ, ຄຽງຄູ່ກັບການສຶກສາອົບຮົມການເມືອງ-ແນວຄິດ ແລະ ຊີ້ນຳວຽກງານວິຊາສະເພາະຕາມພາລະບົດບາດ ສິດ ແລະ ໜ້າທີ່ຂອງວຽກງານປົກປ້ອງແຮງງານ ແລະ ວຽກງານກວດກາ ເພື່ອເຮັດໃຫ້ວຽກງານດັ່ງກ່າວ ໄດ້ມີການເຄື່ອນໄຫວດີຂຶ້ນກວ່າເກົ່າ.
(ຂ່າວ: ນັດດາ ສີລິລັກ)