ກະຊວງພາຍໃນ ມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2018


...

09.07.2019 9:41     

   ເພື່ອເປັນການຍ້ອງຍໍສັນ ລະເສີນ ແລະ ເປັນການຢັ້ງຢືນບຸກຄົນທີ່ຕັ້ງໜ້າປະກອບສ່ວນເຂົ້າໃນການປະຕິບັດວຽກງານຢ່າງຫ້າວຫັນ ພ້ອມເປັນການສົ່ງເສີມໃຫ້ຄະນະພັກ ແລະ ຄະ ນະນຳແຕ່ລະຂັ້ນ ຕະຫຼອດສະ ມາຊິກພັກ ແລະ ພະນັກງານ ແລະ ລັດຖະກອນມີຄວາມເອົາ ໃຈໃສ່ໃນການຊີ້ນຳ ແລະ ນຳ ພາ, ເປັນແບບຢ່າງນຳໜ້າ, ມີຫົວຄິດປະດິດສ້າງ, ມີຄວາມຮັບຜິດຊອບສູງ ໃນການຊີ້ນຳ ນຳພາ ແລະ ປະຕິບັດວຽກງານການຈັດຕັ້ງ. ດັ່ງນັ້ນ ກະຊວງພານໃນ ຈຶ່ງໄດ້ຈັດພິທີມອບ-ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ມອບໃບຍ້ອງຍໍບຸກຄົນດີເດັ່ນ ປະຈຳປີ 2018 ຂຶ້ນໃນວັນທີ 5 ກໍລະກົດ ຜ່ານມາ ໂດຍການເປັນປະທານຂອງທ່ານ ຄຳໝັ້ນ ສູນວິເລີດ ກຳມະການສູນ ກາງພັກ ເລຂາຄະນະພັກ ລັດ ຖະມົນຕີກະຊວງພາຍໃນ, ມີພະ ນັກງານວິຊາການກະຊວງພາຍໃນເຂົ້າຮ່ວມ. ສຳລັບໜ່ວຍພັກທີ່ໄດ້ຮັບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນໃນຄັ້ງນີ້ ປະກອບມີຈຳນວນ 10 ໜ່ວຍພັກ ແລະ ມີ ພະນັກງານ ລັດຖະກອນທີ່ໄດ້ຮັບຄັດເລືອກເປັນບຸກຄົນດີເດັ່ນ ປະຈຳປີ 2018 ລວມທັງໝົດ 185 ຄົນ, ຍິງ 73 ຄົນ. ໃນໂອກາດນີ້ ທ່ານ ຄຳໝັ້ນ ສູນວິເລີດ ກໍໄດ້ໃຫ້ກຽດຂຶ້ນມອບໃບຍ້ອງຍໍໃຫ້ແກ່ໜ່ວຍພັກປອດໃສ ແລະ ບຸກຄົນດີເດັ່ນຕາມ ລຳດັບ ແລະ ໃນຕອນທ້າຍຂອງ ພິທີທ່ານ ຄຳໝັ້ນ ສູນວິເລີດ ກໍໄດ້ໃຫ້ກຽດໂອ້ລົມຕໍ່ໜ່ວຍພັກ ທີ່ໄດ້ຮັບໃບຢັ້ງຢືນ ແລະ ສະ ມາຊິກພັກ, ພະນັກງານລັດຖະ ກອນທີ່ໄດ້ຮັບໃບຍ້ອງຍໍວ່າ ການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນເປັນວຽກງານທີ່ສຳຄັນ ໃນການຍົກສູງຄຸນນະພາບຂອງໜ່ວຍພັກ ແລະ ສະມາຊິກພັກໃຫ້ເປັນແກນນຳທີ່ເຂັ້ມແຂງ ໃນລະບົບການເມືອງຢູ່ຮາກຖານ, ການມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນນີ້ໄດ້ສ່ອງແສງໃຫ້ເຫັນເຖິງຄວາມເອົາໃຈໃສ່ໃນການຊີ້ນຳ ແລະ ນຳພາ, ເປັນແບບຢ່າງນຳໜ້າ, ມີຫົວຄິດປະດິດສ້າງ, ມີຄວາມຮັບຜິດຊອບສູງ ແລະ ມີຄວາມສາມັກຄີເປັນເອກະພາບກັນຂອງຄະນະພັກ ແລະ ຄະນະນຳແຕ່ລະຂັ້ນ, ບັນດາສະມາຊິກພັກ ແລະ ພະນັກງານລັດຖະກອນ ໄດ້ພ້ອມພຽງກັນຈັດຕັ້ງປະຕິບັດມະຕິກອງປະ ຊຸມໃຫຍ່ ຄັ້ງທີ I ຂອງອົງຄະນະພັກກະຊວງ, ມະຕິກອງປະຊຸມຂອງບັນດາໜ່ວຍພັກ ແລະ ໜ້າ ທີ່ວິຊາສະເພາະຂອງແຕ່ລະ ສະ ຫາຍຢ່າງຕັ້ງໜ້າ, ເຮັດໃຫ້ກະ ຊວງພາຍໃນເປັນເສນາທິການໃຫ້ແກ່ລັດຖະບານກ່ຽວກັບວຽກງານຄຸ້ມຄອງບໍລິຫານລັດໄດ້ເປັນຢ່າງດີ ສຳລັບວຽກງານການຍ້ອງຍໍກໍເປັນວຽກງານໜຶ່ງທີ່ສຳຄັນ ໃນການກະຕຸກຊຸກຍູ້ ໃຫ້ພະນັກງານ ລັດຖະກອນ ຍົກສູງສະຕິຕື່ນຕົວ, ມີນ້ຳໃຈບຸກບືນ ແລະ ດຸໝັ່ນ ໃນການປະຕິບັດໜ້າທີ່ວຽກງານທີ່ໄດ້ຮັບມອບໝາຍ ແລະ ໄດ້ອຸທິດສະຕິປັນຍາ ແລະ ເຫື່ອແຮງຂອງຕົນໃຫ້ແກ່ພາລະກິດປົກປັກຮັກສາ ແລະ ພັດທະນາປະເທດຊາດ. (ຂ່າວ-ພາບ: ບຸນຕອມ)