ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນ ແຂວງໄຊສົມບູນ ຊຸດທີ I


...

26.07.2019 9:47     

   ກອງປະຊຸມສະໄໝສາ ມັນເທື່ອທີ 7 ຂອງສະພາປະ ຊາຊົນ ແຂວງໄຊສົມບູນ ຊຸດທີ I ໄດ້ເປີດຂຶ້ນຢ່າງເປັນທາງການໃນວັນທີ 24 ກໍລະກົດນີ້ ທີ່ສະໂມສອນເມືອງອານຸວົງ ໂດຍການເປັນປະທານຮ່ວມຂອງທ່ານ ບຸນສຸກ ຈອມວິສານ ປະທານສະພາປະຊາຊົນແຂວງ ເຂົ້າຮ່ວມກອງປະຊຸມຄັ້ງນີ້ ໂດຍທ່ານ ພອຍຄຳ ຮຸ່ງບຸນຍວງ ຮອງເຈົ້າແຂວງໄຊສົມບູນ ພ້ອມດ້ວຍສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 18 ແຂວງໄຊສົມບູນ, ສະມາຊິກສະພາປະຊາຊົນ ແຂວງ, ການນຳທັງ 5 ເມືອງ ພະແນກການ, ອົງການ-ກົມກອງ ອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້ ທ່ານ ບຸນສຸກ ຈອມວິສານ ປະທານສະພາປະຊາຊົນແຂວງ ໄດ້ກ່າວສູນທອນພົດ ພ້ອມທັງຊີ້ນຳໃຫ້ຜູ້ແທນກອງປະຊຸມ ຈົ່ງສຸມທຸກສະຕິປັນຍາຂອງຕົນ ເຂົ້າໃນການປະກອບຄຳຄິດ-ຄຳເຫັນ ດ້ວຍຄວາມຮັບຜິດຊອບສູງ ທັງນີ້ກໍເພື່ອພ້ອມກັນຄົ້ນຄວ້າ ແລະ ປຶກສາຫາລືບັນຫາທີ່ສຳຄັນຕ່າງໆຂອງແຂວງ ຈາກນັ້ນ ທ່ານໄດ້ກ່າວເປີດກອງປະຊຸມ ຢ່າງເປັນທາງການ. ພ້ອມດຽວກັນນີ້ ຜູ້ເຂົ້າຮ່ວມໄດ້ຮັບຟັງການລາຍງານຜົນການຈັດຕັ້ງກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 13 ສະໄໝທີ VI ໄດ້ເປີດຂຶ້ນໃນວັນທີ 24-26 ກໍລະກົດນີ້ ທີ່ຫ້ອງວ່າການປົກຄອງແຂວງ ໂດຍການເປັນປະທານຂອງທ່ານ ກອງແກ້ວ ໄຊສົງຄາມ ກຳມະການສູນກາງພັກ ເລຂາພັກແຂວງ ເຈົ້າແຂວງບໍລິຄຳໄຊ, ມີບັນດາຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກການ, ເຈົ້າເມືອງ 7 ຕົວເມືອງ, ປກສ-ປກຊ, ລັດວິສາຫະກິດ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.
ທ່ານ ບຸນມາ ບຸຈະເລີນ ຮອງເລຂາພັກແຂວງ ຮອງເຈົ້າແຂວງ ໄດ້ຕີລາຄາຄືນການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 12 ສະໄໝທີ VI ໃນໄລຍະ 6 ເດືອນຕົ້ນປີ 2019 ທີ່ຜ່ານມາ ຊຶ່ງໄດ້ສຳເລັດການເຜີຍແຜ່ເຊື່ອມຊຶມບັນດານິຕິກຳ ແລະ ເອກະສານສຳຄັນຕ່າງໆ ພ້ອມນັ້ນທາງຄະນະພັກອຳນາດການປົກຄອງທຸກຂັ້ນ ຍັງໄດ້ເອົາໃຈໃສ່ຕໍ່ໍວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ສັງຄົມມີຄວາມສະຫງົບປອດໄພ, ຍົກສູງເພີ່ມທະວີຄວາມສາມາດການນຳພາ, ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ; ທົ່ວປວງຊົນມີຄວາມສາມັກຄີເປັນປຶກແຜ່ນ, ຊີວິດການເປັນຢູ່ຂອງປະຊາຊົນໄດ້ຮັບການພັດທະນາ; ດ້ານວຽກງານເສດຖະກິດ-ສັງຄົມ ແມ່ນໄດ້ເອົາໃຈໃສ່ຄຸ້ມຄອງ ແລະ ປັບປຸງບັນດາຫົວໜ່ວຍວິສາຫະກິດ ໃຫ້ໄປຕາມທິດຫັນເປັນອຸດສາຫະກຳທັນສະໄໝ ເຮັດໃຫ້ການຜະລິດ ແລະ ການບໍລິການ ເປັນໄປຕາມກົນໄກເສດຖະກິດຕະຫຼາດ, ການລົງທຶນຂອງລັດ 321 ໂຄງການ ສາມາດປະຕິບັດໄດ້ 161 ໂຄງການ ມູນຄ່າ 38,92 ຕື້ກີບ ເທົ່າກັບ 65,83%, ການຈັດຕັ້ງປະຕິບັດລາຍຮັບ-ລາຍຈ່າຍງົບປະມານ ລວມຍອດລາຍຮັບທັງໝົດພູດສູນກາງ ແລະ ທ້ອງຖິ່ນໄດ້ 385 ຕື້ກ່ວາກີບທຽບໃສ່ແຜນ 6 ເດືອນຕົ້ນປີປະຕິບັດໄດ້ 89,67% ທຽບໃສ່ແຜນການປີໄດ້ 44,44%, ການຜະລິດເຂົ້ານາແຊງ ປະຕິບັດໄດ້ 1.357 ຮຕ ເທົ່າກັບ 43,95%, ນາປີແຜນການປີ 37.470 ຮຕ ຕົກກ້າແລ້ວ 1.601 ຮຕ, ພືດ,ສະບຽງອາຫານ 5.182 ຮຕ ແລະ ການຜະລິດຊີ້ນ-ປາ-ໄຂ່ ເພື່ອບໍລິໂພກ ໄດ້ 8.256 ໂຕນ. ນອກນັ້ນວຽກງານພັດທະນາ ແລະ ການປັບປຸງກົງຈັກລັດບໍລິຫານຂັ້ນແຂວງ, ເມືອງ, ເພີ່ມທະວີຄຸ້ມຄອງລັດ-ຄຸ້ມຄອງສັງຄົມ ແລະ ປະຕິບັດລະບຽບກົດໝາຍ ກໍມີຄວາມເຂັ້ມແຂງໜັກແໜ້ນ, ມີຄວາມສາມັກຄີ, ສະເໝີພາບ ແລະ ຍຸຕິທຳໃນສັງຄົມ. ຂົງເຂດການເມືອງ, ວັດທະນະທຳ-ສັງຄົມ, ການເສີມສ້າງຄວາມສາມັກຄີເປັນປຶກແຜນຂອງປວງຊົນ ພາຍໃຕ້ການນຳພາຂອງພັກ ກໍໄດ້ຮັບການເອົາໃຈໃສ່ຊີ້ນຳ-ນຳພາ, ກວດກາຢ່າງເປັນລະບົບ, ໄດ້ຮັບການປັບປຸງ ແລະ ແກ້ໄຂຢ່າງຕໍ່ເນື່ອງ ເຮັດໃຫ້ຫຼາຍວຽກງານໄດ້ຮັບຜົນດີ ແລະ ສຳເລັດເປັນກ້າວໆ. ກອງປະຊຸມຄັ້ງນີ້ດຳເນີນເປັນເວລາ 3 ວັນເຕັມ ຈຶ່ງສຳເລັດ, ພ້ອມນີ້ບັນດາຜູ້ແທນກອງປະຊຸມ ຍັງໄດ້ຮັບຟັງການຜ່ານຮ່າງບົດສະຫຼຸບການຈັດຕັ້ງປະຕິບັດວຽກງານຮອບດ້ານ, ການເກັບລາຍຮັບເຂົ້າງົບປະມານ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ, ວຽກງານພົ້ນເດັ່ນຂອງບັນດາເມືອງ, ຜ່ານຮ່າງນິຕິກຳ ແລະ ເອກະສານອື່ນໆອີກຈຳນວນໜຶ່ງ ພ້ອມທັງປະກອບຄຳຄິດຄຳເຫັນໃສ່ບັນດາບັນຫາພົ້ນເດັ່ນຂອງແຕ່ລະຂົງເຂດ.
(ຂ່າວ: ວຽງສະຫວັນ)