ສຳເລັດກອງປະຊຸມຄົບຄະນະສູນກາງສະຫະພັນແມ່ຍິງລາວ ຄັ້ງທີ 5 ສະໄໝທີ VII


...

26.07.2019 9:47     

   ກອງປະຊຸມຄົບຄະນະບໍ ລິຫານງານສູນກາງສະຫະພັນແມ່ຍິງລາວ ຄັ້ງທີ 5 ສະໄໝທີ VII ໄດ້ປິດລົງດ້ວຍຜົນສຳເລັດໃນວັນທີ 25 ກໍລະກົດນີ້ ທີ່ສູນຝຶກອົບຮົມແມ່ຍິງລາວ ໂດຍການເປັນປະທານຂອງ ທ່ານ ນາງ ອິນລາວັນ ແກ້ວບຸນພັນ ປະທານຄະນະບໍລິຫານງານສູນກາງສະຫະພັນແມ່ຍິງລາວ, ມີບັນດາຄະນະບໍລິຫານງານສະຫະພັນແມ່ຍິງລາວ ສະໄໝທີ VII, ບັນດາຮອງປະທານສູນກາງສະຫະພັນແມ່ຍິງລາວ ປະທານ-ຮອງປະທານສະຫະພັນແມ່ຍິງກະຊວງ, ອົງການ, ແຂວງ ແລະ ນະຄອນຫຼວງພ້ອມແຂກຖືກເຊີນເຂົ້າຮ່ວມ.
ທ່ານ ນາງ ອິນລາວັນ ແກ້ວບຸນພັນ ໄດ້ກ່າວປິດກອງປະຊຸມວ່າ: ກອງປະຊຸມໃນຄັ້ງນີ້ ບັນດາຜູ້ແທນໄດ້ພ້ອມກັນສຸມຈິດໃຈຄົ້ນຄວ້າເຊື່ອມຊຶມບົດໂອ້ລົມຂອງການນຳຂັ້ນສູງຕໍ່ທິດທາງການພັດທະນາແມ່ຍິງລາວໃນຕໍ່ໜ້າ ພິເສດແມ່ນໄດ້ຮ່ວມກັນຕີລາຄາເພື່ອສ້າງຄວາມເປັນເອກະພາບໃນບັນຫາສຳຄັນຕ່າງໆ ເປັນຕົ້ນບົດສະຫຼຸບເຄື່ອນໄຫວວຽກງານຮອບດ້ານຂອງສະຫະພັນແມ່ຍິງໃນ 6 ເດືອນຕົ້ນປີ, ຄາດຄະເນທິດທາງແຜນການ 6 ເດືອນທ້າຍປີ 2019 ແລະ ແຜນການເຄື່ອນໄຫວໃນປີ 2020. ຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານສູນກາງສະຫະພັນແມ່ຍິງລາວ ຄັ້ງທີ 4 ສະໄໝທີ VII. ການຈັດຕັ້ງປະຕິບັດມະຕິກອງປະຊຸມປຶກສາຫາລືກ່ຽວກັບການສ້າງພະນັກງານນຳພາ-ຄຸ້ມຄອງເພດຍິງຊຸດທີ 1 ແລະ ແຜນກຳນົດທີ່ຄະນະພັກໄດ້ຮັບຮອງ. ສະຫຼຸບບັ້ນແຂ່ງຂັນ 3 ດີ 2 ໄລຍະ ໃນໄລຍະສະໄໝທີ VII ຕິດພັນກັບວຽກງານສາມສ້າງ. ຜ່ານແຜນການກະກຽມໃຫ້ແກ່ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VIII ຂອງຄະນະຊີ້ນຳ ແລະ ຊີ້ນຳການສ້າງຂະບວນການສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວຄົບຮອບ 65 ປີ. ທົບທວນຄືນການຈັດຕັ້ງປະຕິບັດຖະແຫຼງການ ແລະ ແຜນປະຕິບັດງານປັກກິ່ງຄົບຮອບ 25 ປີ ແລະ ບັນຫາຕ່າງໆ. ພາຍຫຼັງການຮັບຟັງລາຍງານບັນດາຜູ້ແທນກໍໄດ້ເອົາໃຈໃສ່ດ້ວຍຄວາມຮັບຜິດຊອບສູງໃນການຄົ້ນຄ້ວາປະກອບຄຳຄິດຄຳເຫັນໃສ່ຮ່າງບົດສະຫຼຸບໂດຍໄດ້ຍົກໃຫ້ເຫັນທັງດ້ານດີ-ດ້ານອ່ອນ, ຂໍ້ຄົງຄ້າງ. ສິ່ງທ້າທ້າຍໃນການຈັດຕັ້ງປະຕິບັດ ແລະ ວິທີການແກ້ໄຂບັນຫາເພື່ອຮັບປະກັນການສົ່ງເສີມພັດທະນາແມ່ຍິງລາວບັນດາເຜົ່າ ການປະກອບຄຳຄິດຄຳເຫັນນັ້ນປະກອບສ່ວນອັນສຳຄັນເຮັດໃຫ້ການສະຫຼຸບຕີລາຄາການເຄື່ອນໄຫວວຽກງານຮອບດ້ານຂອງສະຫະພັນແມ່ຍິງລາວໃນ 1 ປີຜ່ານມາສອດຄ່ອງກັບສະພາບຄວາມເປັນຈິງ.
(ຂ່າວ: ກົງມະລີ, ພາບ: ພູວັນ)