ອອປສ ເຊື່ອມຊຶມມະຕິ 8 ສະໄໝທີ X ຂອງພັກ


...

08.08.2019 10:04     

   ເມື່ອບໍ່ດົນຜ່ານມາ, ອົງການໄອຍະການປະຊາຊົນສູງສຸດ (ອອປສ) ໄດ້ເປີດກອງປະຊຸມເຜີຍແຜ່ ເຊື່ອມຊຶມມະຕິ 8 ສະໄໝທີ X ຂອງຄະນະບໍ ລິຫານງານສູນກາງພັກ ແລະ ສະຫຼຸບຜົນສໍາເລັດບັ້ນດໍາເນີນຊີວິດການເມືອງພາຍໃນບັນດາໜ່ວຍພັກ ທີ່ຂຶ້ນກັບ ອົງຄະນະ ພັກ ອົງການໄອຍະການປະຊາ ຊົນສູງສຸດ ໂດຍການໃຫ້ກຽດເປັນປະທານຂອງທ່ານ ຄໍາສານ ສຸວົງ ຫົວໜ້າອົງການໄອຍະການປະຊາຊົນສູງສຸດ ມີຄະນະພັກ, ຄະນະໜ່ວຍພັກ, ສະມາຊິກພັກ ແລະ ພະນັກງານ-ລັດຖະກອນ ເຂົ້າຮ່ວມ.
ກອງປະຊຸມໄດ້ຮັບຟັງ ວ່າດ້ວຍການເພີ່ມທະວີການນໍາພາແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ສ້າງຄວາມເຂັ້ມແຂງຂອງການຄຸ້ມຄອງມະຫາພາກ, ການພັດທະນາຊົນນະບົດ ແລະ ການແກ້ໄຂຄວາມທຸກຍາກຂອງປະຊາຊົນ; ການແບ່ງຂັ້ນຄຸ້ມຄອງໃນລະບົບອົງການບໍລິຫານລັດ ແລະ ການດໍາເນີນຄະດີຕາມຂະບວນການຍຸຕິທຳ ຊຶ່ງໄດ້ສ້າງຄວາມຮັບຮູ້ທີ່ຖືກຕ້ອງ ແລະ ຄວາມເຂົ້າໃຈເປັນເອກະພາບ ໃຫ້ແກ່ຖັນແຖວສະມາຊິກພັກ ແລະ ພະນັກງານ ອອປສ.
ກອງປະຊຸມຍັງໄດ້ສະຫຼຸບຕີລາຄາຜົນສຳເລັດ,ດ້ານດີ, ດ້ານອ່ອນ, ຂໍ້ຄົງຄ້າງ, ບົດຮຽນທີ່ຖອດຖອນໄດ້ ແລະ ວິທີການແກ້ໄຂໃນຕໍ່ໜ້າ. ສຳລັບບັ້ນດຳເນີນຊີວິດການເມືອງບັນດາໜ່ວຍພັກ ທີ່ຂຶ້ນກັບອົງຄະນະພັກ ອອປສ ການດຳເນີນຊີວິດການເມືອງພາຍໃນບັນດາໜ່ວຍພັກ ແມ່ນ ໄດ້ຈັດຕັ້ງປະຕິບັດມາແຕ່ວັນທີ 24 ເມສາ 2019 - 5 ມິຖຸນາ 2019. ຈຶ່ງສຳເລັດ ໂດຍຜ່ານການສຳຫຼວດກວດກາຕີລາຄາຈັດແບ່ງປະເພດ ສະມາຊິກພັກ, ໜ່ວຍພັກ ສະຫຼຸບໄດ້ດັ່ງນີ້: ໜ່ວຍພັກທົ່ວອົງຄະນະພັກ ອອປສ ປະກອບດ້ວຍ 10 ໜ່ວຍພັກຂຶ້ນກັບ; ມີສະມາຊິກພັກທັງໜົດ 154 ສະຫາຍ, ເປັນຍິງ 56 ສະຫາຍ, ສະມາຊິກສຳຮອງ 16 ສະຫາຍ, ເປັນຍິງ 8 ສະຫາຍ. ຜ່ານການກວດກາຕີລາຄາປະເພດບຸກຄົນສະມາຊິກພັກ: ປະເພດແຂງ ມີ 72 ສະຫາຍ, ຍິງ 23 ສະຫາຍ, ປະເພດກາງ 60 ສະຫາຍ, ຍິງ 25 ສະຫາຍ; ບໍ່ໄດ້ຈັດປະເພດ 22 ສະຫາຍ, ເປັນຍິງ 8 ສະຫາຍ; ປະເພດໜ່ວຍພັກແຂງ ມີ 4 ໜ່ວຍພັກ, ປະເພດກາງ ມີ 6 ໜ່ວຍພັກ.
ທ່ານ ຄໍາສານ ສຸວົງ ໄດ້ໂອ້ລົມ ແລະ ເນັ້ນໜັກໃຫ້ສະມາຊິກພັກ ພະນັກງານລັດຖະກອນ ໃຫ້ເພີ່ມທະວີການສຶກສາອົບຮົມການເມືອງ-ນໍາພາແນວຄິດ, ປັບປຸງທັດສະນະຫຼັກໝັ້ນຊົນຊັ້ນ, ຄຸນທາດການເມືອງ, ຄຸນສົມບັດສິນທໍາປະຕິວັດ, ຍົກສູງຄວາມເຊື່ອໝັ້ນຕໍ່ການນຳພາຂອງພັກ, ມີສະຕິຄວາມຮັບຜິດຊອບຕໍ່ໜ້າທີ່ການເມືອງ, ເພີ່ມທະວີວຽກງານກວດກາ, ວຽກງານປ້ອງກັນພັກ, ປະຕິບັດກົດໝາຍຕາມພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນທຸກຂັ້ນ ໃຫ້ມີຄວາມຮັບຜິດຊອບສູງ ແລະ ປະຕິບັດໜ້າທີ່ດ້ວຍຄວາມຖືກຕ້ອງໂປ່ງໃສ, ມີຄວາມຍຸຕິທໍາ ແລະ ຮັບໃຊ້ໃຫ້ແກ່ປະຊາຊົນ.
(ຂ່າວ: ອານຸສ)