ນາຍົກລັດຖະມົນຕີ ພົບປະໂອ້ລົມການນຳຫຼັກແຫຼ່ງ ແຂວງວຽງຈັນ


...

13.08.2019 8:39     

   ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ພົບປະໂອ້ລົມການນຳ, ພະນັກງານຫຼັກແຫຼ່ງຂອງແຂວງວຽງຈັນ ໃນວັນທີ 9 ສິງຫາຜ່ານມານີ້ ທີ່ຫ້ອງວ່າການປົກຄອງແຂວງ ໂດຍມີ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ພ້ອມດ້ວຍຄະນະນຳ ແລະ ພະນັກງານຫຼັກແຫຼ່ງ ຂອງແຂວງວຽງຈັນ ໃຫ້ການຕ້ອນຮັບ.
    ໃນໂອກາດດັ່ງກ່າວ ທ່ານນາຍົກລັດຖະມົນຕີ ພ້ອມດ້ວຍຄະນະ ໄດ້ຮັບຟັງການລາຍ ງານຫຍໍ້ກ່ຽວກັບສະພາບການ ພັດທະນາເສດຖະກິດ-ສັງຄົມຂອງແຂວງ ໄລຍະ 6 ເດືອນຕົ້ນປີ 2019 ຈາກທ່ານເຈົ້າ ແຂວງໆວຽງຈັນ ຊຶ່ງໄດ້ຕີລາ ຄາວ່າ: ທົ່ວແຂວງ ຍັງສືບຕໍ່ມີ ຄວາມສະຫງົບ, ສັງຄົມມີຄວາມ ເປັນລະບຽບຮຽບຮ້ອຍ ຊຶ່ງເປັນ ພື້ນຖານໃຫ້ແກ່ການພັດທະ ນາເສດຖະກິດ-ສັງຄົມ ຂະ ຫຍາຍຕົວເປັນກ້າວໆ, ຊີວິດການເປັນຢູ່ຂອງປະຊາຊົນບັນ ດາເຜົ່າ ໄດ້ຮັບການປັບປຸງດີ ຂຶ້ນຢ່າງຕໍ່ເນື່ອງ. ສຳລັບ 6 ເດືອນຕົ້ນປີ 2019 ເສດຖະກິດຂະຫຍາຍຕົວໃນລະດັບ 6,7%, ສາມາດເກັບລາຍຮັບເຂົ້າງົບ ປະມານໄດ້ທັງໝົດ 111,39 ຕື້ກີບ, ເທົ່າກັບ 54,44% ຂອງແຜນການປີ, ເມື່ອທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 8,77%, ການຜະລິດເຂົ້ານາປີ ສາມາດຕົກກ້າ ແລະ ປັກດໍາ ສໍາເລັດ 11.288ເຮັກ ຕາ, ເທົ່າກັບ 78% ຂອງແຜນ ການປີ, ສາເຫດທີ່ບໍ່ໄດ້ຕາມແຜນການ ຍ້ອນສະພາບຝົນ ບໍ່ຕົກຕາມລະດູການ ຊຶ່ງເມືອງທີ່ຖືກຜົນກະທົບໜັກກວ່າໝູ່ແມ່ນເມືອງຊະນະຄາມ ເຮັດໃຫ້ບໍ່ມີນໍ້າພຽງພໍ ແກ່ການຜະລິດເຂົ້າ, ເນື້ອທີ່ປັກດໍາເສຍຫາຍ 3.600 ເຮັກຕາ ແລະ ປັກດໍາຄືນໃໝ່ແລ້ວ 200 ເຮັກຕາ, ການປູກພືດເປັນສິນຄ້າ ໄດ້ດໍາເນີນໄປຢ່າງເປັນຂະບວນ, ການລ້ຽງສັດເປັນສິນຄ້າ ສາມາດຕອບສະໜອງສະບຽງອາຫານ ໃຫ້ແກ່ສັງຄົມໄດ້ດີສົມຄວນ, ການປະຕິບັດຄາດໝາຍທາງດ້ານສັງຄົມ ມີຄວາມຄືບໜ້າ, ມີບາງດ້ານປະຕິບັດໄດ້ລື່ນແຜນການ, ໄດ້ເອົາໃຈໃສ່ວຽກງານ ພັດທະນາຊົນນະບົດ ແລະ ແກ້ໄຂຄວາມ ທຸກຍາກ, ປັດຈຸບັນ ທົ່ວແຂວງ ຍັງມີບ້ານທຸກຍາກ 9 ບ້ານ, ກວມເອົາ 2,15% ຂອງຈໍານວນບ້ານໃນທົ່ວແຂວງ.
    ຫຼັງຈາກນັ້ນ, ທ່ານນາຍົກ ລັດຖະມົນຕີ ໄດ້ສະເໜີໃຫ້ບັນດາທ່ານລັດຖະມົນຕີກະຊວງກ່ຽວຂ້ອງມີຄຳເຫັນ ແລະ ຊີ້ແຈງຕໍ່ບາງບັນຫາ ທີ່ພົ້ນເດັ່ນ ແລະ ທາງແຂວງມີຄວາມສົນໃຈ ເປັນຕົ້ນ ການສົ່ງເສີມການຜະລິດເປັນສິນຄ້າ ທີ່ທ້ອງ ຖິ່ນມີທ່າແຮງ, ບັນຫາການ ແຜ່ ລະບາດຂອງພະຍາດອະຫິວາ ໝູອາຟຣິກກາ ແລະ ສັດຕູພືດ; ການປ້ອງກັນ ແລະ ແກ້ໄຂ ການລະບາດຂອງພະຍາດໄຂ້ ເລືອດອອກ; ການຊົດເຊີຍຜົນກະທົບຈາກໂຄງການກໍ່ສ້າງເສັ້ນທາງລົດໄຟ ລາວ-ຈີນ ແລະ ທາງດ່ວນ ວຽງຈັນ-ວັງວຽງ ໃຫ້ແກ່ປະຊາຊົນ ແລະ ບັນຫາອື່ນໆ.
    ການພົບປະໂອ້ລົມຄັ້ງນີ້, ທ່ານ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດ ທີ່ແຂວງວຽງຈັນ ສາມາດປະ ຕິບັດໄດ້ໃນໄລຍະຜ່ານມາ, ພ້ອມທັງຍົກໃຫ້ເຫັນທ່າແຮງໃນການພັດທະນາ ຂອງແຂວງວຽງຈັນ ທີ່ມີຫຼາຍດ້ານ (ທີ່ຕັ້ງ ພູມສັນຖານ, ເສັ້ນທາງດ່ວນ, ທາງລົດໄຟ, ຊັບພະຍາກອນທຳມະຊາດ ແລະ ທຳມະຊາດທີ່ສວຍງາມ) ແລະ ບັນຫາພົ້ນເດັ່ນ ຂໍ້ຄົງຄ້າງບາງດ້ານ ທີ່ຍັງຕ້ອງໄດ້ພ້ອມກັນເອົາໃຈໃສ່ປັບປຸງແກ້ໄຂໃນຕໍ່ໜ້າ ໃຫ້ຕົກໄປເປັນກ້າວໆ.
    ທ່ານນາຍົກລັດຖະມົນຕີ ໄດ້ເນັ້ນໜັກໃຫ້ຄະນະນໍາທຸກຂັ້ນພາຍໃນແຂວງ ຕ້ອງເອົາໃຈໃສ່ສຸມທຸກສະຕິປັນຍາ ແລະ ຄວາມສາມາດເຂົ້າໃນການພັດທະນາເສດຖະກິດ-ສັງຄົມ ຂອງແຂວງ, ຕ້ອງວາງແຜນການພັດທະນາ ໃຫ້ແທດເໝາະກັບສະພາບຕົວຈິງຕາມທ່າແຮງຂອງຕົນ ແລະ ສາມາດຈັດຕັ້ງປະຕິບັດໄດ້, ຄົ້ນຄວ້າສ້າງເງື່ອນໄຂ ແລະ ຊຸກຍູ້ໃຫ້ປະຊາຊົນ ມີສ່ວນຮ່ວມໃນການພັດທະນາ; ເອົາໃຈໃສ່ປົກປັກຮັກສາສິ່ງແວດລ້ອມ, ຊັບພະຍາກອນທຳມະຊາດ ໃຫ້ຄົງຄວາມອຸດົມສົມບູນ, ນຳໃຊ້ຢ່າງສົມເຫດສົມຜົນ, ຍືນຍົງ ແລະ ມີປະໂຫຍດສູງສຸດ; ເອົາໃຈໃສ່ປະຕິບັດແຜນຈັດເກັບລາຍຮັບໃຫ້ດີ ແລະ ຄຸ້ມຄອງລາຍຈ່າຍງົບປະມານ ຢ່າງເຄັ່ງຄັດ ບົນຈິດໃຈ ປະຢັດມັດທະຍັດ, ມີຄວາມໂປ່ງໃສ ແລະ ກວດສອບໄດ້; ການພິຈາລະນາໂຄງການລົງທຶນຂອງລັດ ຕ້ອງສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງການພັດທະນາ, ລົງທຶນແລ້ວ ໃຫ້ສາມາດປະກອບສ່ວນ ເຂົ້າໃນການຊຸກຍູ້ເສດຖະກິດ-ສັງຄົມຢ່າງແທ້ຈິງ ເປັນຕົ້ນ ການພັດທະນາຊົນນະບົດ, ການສຶກສາ ກໍ່ຄືການພັດທະນາຊັບພະຍາກອນມະນຸຸດ, ສາທາ ລະນະສຸກ ໂດຍສະເພາະການປິ່ນປົວສຸຂະພາບ ແລະ ໂພຊະນາການ, ລວມທັງ ການກໍ່ສ້າງຮາກຖານການເມືອງ ໃຫ້ມີຄວາມໜັກແໜ້ນ ແລະ ເຂັ້ມແຂງ, ພ້ອມນີ້ ໃຫ້ມີການຄຸ້ມຄອງ ຕິດຕາມກວດກາການ ຈັດຕັ້ງປະຕິບັດ ຢ່າງເປັນປະຈຳ; ໃຫ້ເອົາໃຈໃສ່ຄຸ້ມຄອງໂຄງການລົງທຶນ-ສຳປະທານໃຫ້ດີ ໂດຍມີການເລືອກເຟັ້ນນັກລົງທຶນ ທີ່ມີຄວາມສາມາດທາງດ້ານທຶນຮອນ, ເຕັກນິກ, ປະສົບການ ແລະ ປະຫວັດການພັດທະນາທີ່ດີ ລວມທັງ ການສ້າງສັນຍາຕ່າງໆ ຕ້ອງໃຫ້ມີຄວາມຮັດກຸມ, ບໍ່ໃຫ້ມີຊ່ອງວ່າງ, ໃນຂະນະດຽວກັນ ກໍໃຫ້ເຂັ້ມງວດໃນການຕິດຕາມກວດກາໂຄງການທີ່ໄດ້ອະນຸມັດ ໄປແລ້ວ ເພື່ອຮັບປະກັນບໍ່ໃຫ້ມີລັກສະນະຈັບຈ່ອງ ເພື່ອຖ່ວງດຶງການພັດທະນາ; ເພີ່ມທະວີການດຶງດູດ ແລະ ຊຸກຍູ້ສົ່ງເສີມການລົງທຶນຂອງພາກເອກະຊົນ ທັງພາຍໃນ ແລະ ຕ່າງປະເທດ ໃຫ້ຫຼາຍຂຶ້ນ ຕາມນະໂຍບາຍ 3 ເປີດ (ເປີດປະຕູ, ເປີດສິ່ງກີດ ຂວາງ, ເປີດໃຈ) ດ້ວຍການ ເອົາໃຈໃສ່ອຳນວຍຄວາມສະ ດວກ ແລະ ແກ້ໄຂສິ່ງອຸດຕັນ ຂໍ້ຫຍຸ້ງຍາກຕ່າງໆ ດ້ວຍຄວາມເປັນເຈົ້າການສູງ; ເອົາໃຈໃສ່ຄົ້ນຄວ້າ ແລະ ສົ່ງເສີມການຜະລິດເປັນສິນຄ້າ, ການຜະລິດກະສິກຳສະອາດ ໃຫ້ຫຼາຍຂຶ້ນ ເພື່ອສະໜອງ ໃຫ້ແກ່ຄວາມຕ້ອງການຂອງຕະຫຼາດ ຊຶ່ງມີທ່າ ແຮງເພີ່ມຂຶ້ນຈາກ ເສັ້ນທາງລົດໄຟ ແລະ ທາງດ່ວນ ສ້າງສຳເລັດແລ້ວ; ຄຸ້ມຄອງ ການປູກພືດ ບໍ່ໃຫ້ໃສ່ສານເຄມີ, ຢາຂ້າຫຍ້າ ເພື່ອຮັບປະກັນບໍ່ໃຫ້ມີສານເຄມີຕົກຄ້າງ ແລະ ໄຫຼລົງສູ່ແມ່ນຳ້; ເອົາໃຈໃສ່ຕິດຕາມ ເຝົ້າລະວັງການລະບາດຂອງ ພະຍາດອະຫິວາໝູອາຟຣິກກາ ແລະ ສັດຕູພືດ; ເອົາໃຈໃສ່ການຕິດຕາມ ເຝົ້າລະວັງ ແລະ ແກ້ໄຂ ການລະບາດຂອງໄຂ້ຍຸງລາຍ, ເອົາໃຈໃສ່ທຳລາຍແຫຼ່ງໜອນນຳ້ຍຸງລາຍ ຊຶ່ງການປ້ອງກັນແຕ່ຫົວທີ ແມ່ນພາລະກິດຂອງໝົດທຸກຄົນ; ໃຫ້ສືບຕໍ່ເອົາໃຈໃສ່ສະກັດກັ້ນ ແລະ ຕ້ານປະກົດການຫຍໍ້ທໍ້ຕ່າງໆໃນສັງຄົມ ເປັນຕົ້ນ ຢາເສບຕິດ, ການຄ້າຂາຍເຖື່ອນ ແລະ ອື່ນໆ ລວມທັງການສວຍໃຊ້ສື່ອອນລາຍ ຂອງກຸ່ມຄົນບໍ່ຫວັງດີ ເພື່ອທັບຖົມໂຈມຕີ ແບ່ງແຍກຄວາມສາມັກຄີພາຍໃນພັກ, ລັດ ແລະ ປະເທດຊາດ ຂອງພວກເຮົາ. ພ້ອມນີ້, ໄດ້ຊີ້ນຳໃຫ້ແຂວງ ເອົາໃຈໃສ່ປະຕິບັດລະບອບແບບແຜນວິທີເຮັດວຽກແບບລວມສູນປະຊາທິປະໄຕ, ສຽງສ່ວນໜ້ອຍ ຂຶ້ນກັບສຽງສ່ວນຫຼາຍ, ຂັ້ນລຸ່ມ ປະຕິບັດຕາມຂັ້ນເທິງ ບົນພື້ນຖານການປຶກສາຫາລືຊຶ່ງກັນ ແລະ ກັນ, ປັບປຸງ ຄວາມເຂັ້ມແຂງ ແລະ ຄວາມເປັນເອກະພາບພາຍໃນ ເພື່ອຮັບປະກັນໃຫ້ການພັດທະນາ ຂອງແຂວງວຽງຈັນ ບໍ່ຢຸດຈຶ້ງ ແຕ່ຕ້ອງພັດທະນາຂຶ້ນເລື້ອຍໆ.
(ພາບ-ຂ່າວ: ຫສນຍ)