ຮອງປະທານສະພາແຫ່ງຊາດຕິດຕາມ ກວດກາຢູ່ແຂວງສາລະວັນ


...

14.08.2019 10:28     

   ທ່ານ ແສງນວນ ໄຊຍະລາດ ຮອງປະທານສະພາແຫ່ງຊາດ ພ້ອມດ້ວຍຄະນະໄດ້ລົງເຄື່ອນໄຫວເຮັດວຽກຢູ່ແຂວງສາລະວັນ ໃນວັນທີ 13 ສິງຫານີ້ ເພື່ອຕິດຕາມກວດກາ ການຈັດຕັ້ງປະຕິບັດກົດໝາຍ ແລະ ລະບຽບການທີ່ກ່ຽວຂ້ອງ ຜູ້ເຊື່ອຖືສາສະໜາຕ່າງໆ ແລະ ການເຄື່ອນຍ້າຍພົນລະເມືອງຂອງປະຊາຊົນສອງຟາກຊາຍ ແດນທີ່ບໍ່ຖືກຕ້ອງຕາມກົດ ໝາຍ, ຕະຫຼອດຮອດການປະຕິ ບັດໜ້າທີ່ ແລະ ຄວາມສະດວກ-ຫຍຸ້ງຍາກ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ເຈົ້າໜ້າທີ່ດ່ານຊາຍແດນ.
ໃນໂອກາດນີ້, ບັນດາ ພະແນກພາຍໃນໄດ້ໃຫ້ຮູ້ວ່າ:ໄລຍະຜ່ານມາໄດ້ມີການແກ້ໄຂບັນຫາການເຄື່ອນໄຫວທາງ ສາສະໜາຈໍານວນໜຶ່ງດ້ວຍ ການສຶກສາອົບຮົມ ໂດຍປະ ສານສົມທົບກັບຂະແໜງການທີ່ກ່ຽວຂ້ອງຂອງເມືອງ, ຍັງມີປະກົດການຫຍໍ້ທໍ້ຈໍານວນໜ່ຶ່ງເຊັ່ນ: ການຫາລາຍໄດ້ໂດຍ ການສວຍໃຊ້ສາສະໜາ. ນອກ ຈາກນີ້ ກົນໄກແບບແຜນປະ ສານງານລະຫວ່າງເມືອງກັບແຂວງ ແລະ ສູນກາງຍັງບໍ່ດີເທົ່າທີ່ຄວນ.
ອົງການໄອຍະການປະຊາຊົນແຂວງ ໄດ້ລາຍງານໃຫ້ຮູ້ວ່າ: ໄລຍະຜ່ານມາໄດ້ຕິດຕາມກວດກາ ແລະ ຊຸກຍູ້ການປະຕິບັດຄໍາຕັດສິນຂອງສານຢ່າງເປັນປົກກະຕິ ຊຶ່ງເຫັນວ່າຍັງມີຄະດີຈໍານວນໜຶ່ງ ທີ່ຍັງບໍ່ສາມາດປະຕິບັດໄດ້, ການລົງຕິດຕາມກວດກາຄ້າຍຄຸມ ຂັງ-ດັດສ້າງແມ່ນໄດ້ເຮັດເປັນ ປົກກະຕິທຸກເດືອນ ຊຶ່ງເຫັນໄດ້ວ່າມີຄວາມຫຍຸ້ງຍາກທາງດ້ານສະຖານທີ່ ແລະ ການບໍລິ ການດ້ານສາທາລະນະສຸກ, ໄດ້ມີການປະສານງານກັບພາກ ສ່ວນທີ່ກ່ຽວຂ້ອງໄດ້ດີພໍສົມ ຄວນ, ແຕ່ກໍຍັງຕ້ອງໄດ້ເພີ່ມ ທະວີຄວາມຮັບຜິດຊອບຂອງ ພະນັກງານ ເພື່ອໃຫ້ການປະຕິ ບັດວຽກງານເຂັ້ມງວດຕາມລະບຽບ-ກົດໝາຍ.
ໃນຂະນະທີ່ພະແນກພົວ ພັນຕ່າງປະເທດ ໄດ້ລາຍງານໃຫ້ຮູ້ວ່າ: ແຂວງສາລະວັນ ກັບແຂວງກວາງຈິ ສສ.ຫວຽດ ນາມ ໄດ້ສໍາເລັດການປັກຫຼັກໝາຍຊາຍແດນແຕ່ປີ 2013, ເຈົ້າໜ້າທີ່ຂອງສອງຝ່າຍໄດ້ມີການ ປະສານສົມທົບກັນແໜ້ນ ໃນ ການສະກັດກັ້ນການລັກລອບ ນໍາເອົາສິນຄ້າຜ່ານຊາຍແດນ ຜິດກົດໝາຍ, ໄດ້ມີການແລກ ປ່ຽນບົດຮຽນຊຶ່ງກັນ ແລະ ກັນ ໂດຍສະເພາະການຮ່ວມມື ຊ່ວຍເຫຼືອທາງດ້ານອຸປະກອນ ແລະ ການຝຶກອົບຮົມຂອງຝ່າຍຫວຽດນາມ ແກ່ ສປປ ລາວ, ການແກ້ໄຂບັນຫາການຍົກຍ້າຍຕັ້ງຖິ່ນຖານຂ້າມຊາຍ ແດນ ໄດ້ມີການຈັດຕັ້ງຄະນະ ກໍາມະການຂັ້ນແຂວງ ເພື່ອ ສໍາຫຼວດກວດກາ ແລະ ເອກະ ພາບໃນການຮັບຮອງເອົາພົນ ລະເມືອງທີ່ຍົກຍ້າຍມາຕັ້ງຖິ່ນຖານໃຫ້ຖືກຕ້ອງ ຕາມກົດໝາຍ ຊຶ່ງສ່ວນໃຫຍ່ແມ່ນກໍລະນີຍົກ ຍ້າຍຍ້ອນສ້າງຄອບຄົວໃໝ່ລະ ຫວ່າງ ຄົນຫວຽດນາມກັບຄົນລາວ ແລະ ຄົນລາວກັບຄົນຫວຽດນາມ.
ກອງບັນຊາການປ້ອງກັນຄວາມສະຫງົບ ແລະ ກອງບັນຊາການປ້ອງກັນຊາດແຂວງ ກໍໄດ້ລາຍງານວ່າ: ໂດຍລວມແລ້ວ ແຂວງສາລະວັນມີຄວາມສະຫງົບດີ, ໄດ້ມີການໂຄສະນາເຜີຍແຜ່ລະບຽບກົດໝາຍຜ່ານສື່ມວນຊົນ ເຊັ່ນ: ວິທະຍຸ, ລະບົບໂທລະໂຄ່ງ ແລະ ໂທລະພາບແຂວງ ເພື່ອໃຫ້ປະຊາຊົນປະ ກອບສ່ວນຮັກສາຄວາມສະ ຫງົບ ພ້ອມທັງປະຕິບັດກົດລະບຽບ-ກົດໝາຍຢ່າງເຂັ້ມງວດ, ເອົາໃຈໃສ່ເບິ່ງແຍງຜູ້ຖືກຫານັກໂທດ ໃນຄ້າຍຄຸມຂັງ-ດັດສ້າງ ເປັນຢ່າງດີ.
ໃນໂອກາດນີ້, ທ່ານ ແສງນວນ ໄຊຍະລາດ ຊຶ່ງທ່ານໄດ້ເນັ້ນໃຫ້ອໍານາດການປົກ ຄອງທຸກຂັ້ນສືບຕໍ່ສຶກສາອົບຮົມດ້ານການເມືອງແນວຄິດ ໂດຍສະເພາະແມ່ນການແກ້ໄຂບັນຫາສາສະໜາຢ່າງຄ່ອງແຄ້ວ-ນິ້ມນວນ, ສືບຕໍ່ເຂັ້ມງວດໃນການປະຕິບັດໜ້າທີ່ວຽກງານ ໂດຍສະເພາະໃນການຄຸ້ມຄອງດ່ານຊາຍແດນ, ເພີ່ມທະວີການປະສານງານຢ່າງແໜ້ນແຟ້ນລະຫວ່າງພາກສ່ວນທີ່ກ່ຽວຂ້ອງ, ບັນດາພະແນກການ ໃຫ້ສູ້ຊົນແກ້ໄຂປະກົດການຫຍໍ້ທໍ້ທີ່ເກີດຂຶ້ນພາຍໃນ; ບັນຫາອື່ນໆ ແມ່ນຈະນໍາໄປສະເໜີພາກສ່ວນກ່ຽວຂ້ອງ ເພື່ອແກ້ໄຂຕາມຄວາມເໝາະສົມ.
(ຂ່າວ+ພາບ: ສພຊ)