ຫົວ​ຂໍ້ : IMF ເຕືອນ COVID-19 ອາດເຮັດໃຫ້ເສດຖະກິດໂລກທົດຖອຍ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 25/03/2020 08:44:31 ຈຳ​ນວນ​ຜູ້​ເຂົ້າ​ຢ້ຽມ​ຊົມ 99 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ, ວັນ​ທີ 23 ມີນາ​ທີ່​ຜ່ານ​ມາ, ກອງ​ທຶນ​ການ​ເງິນ​ສາກົນ (IMF) ກ່າວ​ເຕືອນ​ວ່າ: ການ​ແຜ່​ລະບາດ​ຂອງ​ເຊື້ອ​ໄວ​ຣັດ COVID-19 ອາດ​ຈະ​ເຮັດ​ໃຫ້​ເສດຖະກິດ​ໂລກ​ປະສົບ​ກັບ​ພາວະ​ທົດຖອຍ​ໃນ​ປີ​ນີ້ ກ່ອນ​ທີ່​ຈະ​ຟື້ນ​ຕົວ​ໄດ້​ໃນ​ປີ 2021.
  IMF ລະບຸ​ວ່າ: ການ​ແຜ່​ລະບາດ​ຢ່າງ​ໜັກ​ຂອງ​ໄວ​ຣັດ COVID-19 ຈະ​ເປັນ​ສາເຫດ​ເຮັດ​ໃຫ້​ເສດຖະກິດ​ໂລກ​ທົດຖອຍ​ໃນ​ປີ 2020 ຊຶ່ງ​ອາດ​ຈະ​ຮ້າຍ​ແຮງ​ກວ່າ​ໄລຍະ​ທີ່​ເກີດ​ວິ​ກິດ​ການ​ເງິນ​ໂລກ​ໃນ​ໄລຍະ​ປີ 2008-2009, ແຕ່​ຜົນ​ຜະລິດ​ທາງ​ດ້ານ​ເສດຖະກິດ​ຈະ​ເລີ່ມ​ຟື້ນ​ຕົວ​ໃນ​ປີ 2021. ນອກຈາກ​ນີ້, ທ່ານ ນາງ ຄຣິ​ສ​ຕາ​ລິ​ນາ ຈໍ​ຈີ​ວາ ຜູ້ອຳນວຍການ IMF ໄດ້​ກ່າວ​ສະແດງ​ຄວາມ​ຍິນດີ​ທີ່​ລັດຖະບານ​ຫຼາຍ​ປະເທດ ດຳເນີນ​ມາດ​ຕະການ​ຜ່ອນຄາຍ​ທາງ​ດ້ານ​ການ​ເງິນ ເພື່ອ​ກະ​ຕຸ້ນ​ເສດຖະກິດ ແລະ ປົກ​ປ້ອງ​ບໍລິສັດ​ທີ່​ໄດ້​ຮັບ​ຜົນ​ກະທົບ​ຈາກ​ການ​ແຜ່​ລະບາດ​ຂອງ​ໂຣກ COVID-19. ທ່ານ ນາງ ຈໍ​ຈີ​ວາ ໄດ້​ອອກ​ບົດ​ລາຍ​ງານ​ທ່າ​ອ່ຽງ​ເສດຖະກິດ​ໂລກ​ສະບັບ​ຫຼ້າ​ສຸດ ຫຼັງ​ຈາກ​ສຳເລັດ​ກອງ​ປະຊຸມ​ຮ່ວມ​ກັບ​ບັນດາ​ລັດຖະມົນຕີ​ກະຊວງ​ການ​ເງິນ ແລະ ທະນາຄານ​ຈາກ​ກຸ່ມ G20, ໄດ້​ມີ​ມະຕິ​ເຫັນ​ດີ​ຮ່ວມ​ກັນ​ທີ່​ຈະ​ສຸມ​ກໍາ​ລັງ​ຮ່ວມ​ກັນ​ໃນ​ການ​ຮັບ​ມື​ກັບ​ບັນຫາ​ການ​ແຜ່​ລະບາດ​ຂອງ​ໂຣກ COVID-19, ທ່ານ ນາງ ຈໍ​ຈີ​ວາ ກ່າວ​ຕື່ມ​ວ່າ: ຕົ້ນ​ທຶນ​ມະນຸດ​ທີ່​ໄດ້​ຮັບ​ຜົນ​ກະທົບ​ການ​ແຜ່​ລະບາດ​ຂອງ​ໄວ​ຣັດ COVID-19 ມະຫາສານ ຫຼາຍ​ທຸກ​ປະເທດ​ຈຳເປັນ​ຕ້ອງ​ຮ່ວມ​ມື​ກັນ​ເພື່ອ​ປົກ​ປ້ອງ​ປະຊາຊົນ ແລະ ຈຳກັດ​ຄວາມ​ເສຍ​ຫາຍ​ທາງ​ດ້ານ​ເສດຖະກິດ​ທີ່​ກຳລັງ​ເກີດ​ຂຶ້ນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110