ຫົວ​ຂໍ້ : ເອເທນ ເປັນແຫຼ່ງກຳເນີດ ແລະ ຈຸດເລີ່ມຕົ້ນຂອງອະລິຍະທຳຕາເວັນຕົກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 25/03/2020 08:50:46 ຈຳ​ນວນ​ຜູ້​ເຂົ້າ​ຢ້ຽມ​ຊົມ 101 ຄັ້ງ

(ເນື່ອງ​ໃນ​ໂອກາດ​ວັນຊາດ ເກຣັກ 25 ມິີ​ນາ 2020)

 ຮຽບຮຽງໂດຍ: ລຸ້ງ​ດາວ ບຸນ​ມີ

  ເກຣັກ ຕັ້ງ​ຢູ່​ທາງ​ພາກໃຕ້​ຂອງ​ທະວີບ​ເອີ​ຣົບບ່ອນ​ທີ່​ຕັດ​ກັນລະຫວ່າງທະວີບ​ເອີ​ຣົບ, ພາກ​ຕາເວັນຕົກ​ຂອງ​ທະວີບອາຊີ ແລະ ອາ​ຟຣິ​ກາ, ມີ​ເນື້ອທີ່​ທັງ​ໝົດ 131.957 ກິໂລ​ຕາ​ແມັດ. ມີ​ຊາຍ​ແດນ​ຕິດ​ກັບອານ​ບາ​ນີ ທາງ​ດ້ານ​ຕາເວັນຕົກ​ສ່ຽງ​ເໜືອ, ຕິດ​ກັບມາ​ເຊ​ໂດ​ນີ ແລະ ບູນ​ກາ​ຣີ ທາງ​ດ້ານ​ເໜືອ, ຕິດ​ກັບຕວກ​ກີ ທາງ​ດ້ານ​ຕາເວັນ​ອອກ​ສ່ຽງ​ເໜືອ. ນະຄອນຫຼວງ​ຂອງ​ປະເທດ​ແມ່ນ ເອ​ເທ​ນ. ມີ​ພົນລະເມືອງ​ທັງ​ໝົດ 10,82 ລ້ານ​ຄົນ (ປີ 2017). ຊັບພະຍາກອນ​ທຳ​ມະ​ຊາດ ທີ່​ເປັນ​ທ່າແຮງ​ຂອງ​ປະເທດ​ແມ່ນ​ແຮ່​ທາດ, ປີ​ໂຕ​ຣ​ລຽມ, ຫີນ​ອ່ອນ. ສ່ວນ​ອຸດ​ສາ​ຫະ​ກໍາ​ທີ່​ສຳຄັນ​ຂອງ​ປະເທດ ແມ່ນ​ການທ່ອງທ່ຽວ, ອາ​ຫານ​ສໍາ​ເລັດ​ຮູບ, ແຜ່ນ​ແພ. ສິນຄ້າ​ສົ່ງ​ອອກ ແມ່ນ​ນຳ້ມັນ​ປີ​ໂຕ​ຣ​ລຽມ, ຢາ​ປົວ​ພະຍາດ, ເຄື່ອງໃຊ້​ໄຟຟ້າ, ອະ​ລູ​ມີ​ນຽມ, ພ​ລາ​ສ​ຕິກ ແລະ ຜະລິດ​ຕະ​ພັນ​ພ​ລາ​ສ​ຕິກ. ສິນຄ້າ​ສົ່ງ​ອອກ​ຂອງ​ປະເທດ​ສ່ວນ​ຫຼາຍ ແມ່ນ​ສົ່ງ​ໄປ​ປະເທດ​ເຢຍ​ລະ​ມັນ, ອີ​ຕາ​ລີ, ໄຊ​ປຣັສ, ບູນ​ກາ​ຣີ ແລະ ຕວກ​ກີ.
  ເກຣັກ ເປັນ​ປະເທດ​ຂະໜາດ​ໃຫຍ່​ທີ່​ມີ​ທັງ​ພູຜາ ແລະ ເກາະ​ຈຳນວນ​ຫຼາຍ, ມີ​ທິວ​ທັດ​ທຳ​ມະ​ຊາດ​ທີ່​ສວຍ​ງາມ ແລະ ເຕັມ​ໄປ​ດ້ວຍ​ອະລິຍະ​ທຳ​ບູຮານ​ທີ່​ເກົ່າ​ແກ່​ຫຼາຍ​ກວ່າ 3.000 ປີ ແລະ ມີ​ເລື່ອງ​ລາວ​ປະຫວັດສາດ​ຊວນ​ໃຫ້​ຄົ້ນຫາ, ແຕ່​ກໍເປັນ​ເມືອງ​ທີ່​ຄຶກຄື້ນ ແລະ ມີ​ສະຖານທີ່​ທ່ອງ​ທ່ຽວ​ຢ່າງ​ຫຼວງຫຼາຍ ບໍ່​ວ່າ​ຈະ​ເປັນ​ແຫຼ່ງ​ທ່ອງ​ທ່ຽວ​ທາງ​ທຳ​ມະ​ຊາດ, ປະ ຫວັດສາດ ແລະ ສະຖານທີ່​ບັນເທີງ​ຕ່າງໆ. ສະຖານທີ່​ທ່ອງ​ທ່ຽວ​ຕ່າງໆ ທີ່​ສ້າງ​ຂຶ້ນ​ມາ​ໄດ້​ຢ່າງ​ສອດຄ່ອງ ແລະ ເຂົ້າກັນ​ໄປ​ໃນ​ທຸກ​ສະຖານທີ່ ຊຶ່ງ​ເປັນ​ຈຸດໝາຍ​ປາຍທາງ​ໃນ​ຝັນ​ຂອງ​ນັກ​ທ່ອງ​ທ່ຽວ​ຫຼາຍໆ​ຄົນ ໂດຍ​ສະເພາະ​ແມ່ນ​ນະຄອນຫຼວງ​ເອ​ເທ​ນ. 
  ເອ​ເທນ ຊື່​ນີ້​ຫຼາຍໆ​ຄົນ​ຈະ​ຕ້ອງ​ເຄີຍ​ໄດ້​ຍິນ​ກັນ​ຢ່າງ​ແນ່ນອນ ເພາະ​ເປັນ​ອີກ​ໜຶ່ງ​ເມືອງ​ທີ່​ເກົ່າ​ແກ່​ທີ່​ສຸດ​ຂອງ​ໂລກ, ມີ​ປະຫວັດສາດ​ມາ​ຍາວ​ນານ​ຫຼາຍ​ພັນ​ປີ, ເປັນ​ແຫຼ່ງ​ກຳເນີດ ແລະ ຈຸດ​ເລີ່ມ​ຕົ້ນ​ຂອງ​ອະລິຍະ​ທຳ​ຕາເວັນຕົກ ແລະ ເປັນຕົ້ນ​ກຳເນີດ​ຂອງ​ປະຊາທິປະໄຕ ໂດຍ​ຕັ້ງ​ຊື່​ເມືອງ​ຕາມ ອາ​ເທ​ນາ ເທບ​ພະ​ເຈົ້າ ທີ່​ຊາວ​ເກຣັກ​ນັບ​ຖື. ແຕ່​ກ່ອນ​ຈະ​ໄດ້​ຊື່​ນີ້​ມາ ກໍບໍ່​ແມ່ນ​ເລື່ອງ​ງ່າຍ. ຕາມ​ຕຳນານ​ໄດ້​ບອກ​ໄວ້​ວ່າ: ຕັ້ງແຕ່​ສ້າງ​ສຳເລັດ​ໃໝ່ໆ ເມືອງ​ນີ້​ຍັງ​ບໍ່​ມີ​ຊື່ ແລະ ເທບ​ພະ​ເຈົ້າ​ປະຈຳເມືອງ​ທີ່​ຈະ​ຄອຍ​ປົກ​ປ້ອງ​ຄຸ້ມ​ຄອງ ແລະ ເປັນ​ທີ່​ເ​ພິ່ງ​ທາງ​ໃຈ​ໃຫ້​ກັບ​ຊາວ​ເມືອງ​ເຫຼົ່າ​ເທບ ແລະ ເທພີ ຈຶ່ງ​ມາ​ແຂ່ງຂັນ​ກັນ​ ເພື່ອ​ຊີງ​ຕໍ່າ​ແໜ່​ງ​ເທບ​ພະ​ເຈົ້າ​ປະຈຳເມືອງ​ຢ່າງ​ຫຼວງຫຼາຍ, ສຸດ​ທ້າຍ​ກໍເຫຼືອ​ພຽງ​ສອງ​ອົງ​ຄື: ເທບ​ພະ​ເຈົ້າ ໂພ​ໄຊ​ດອນ (Poseidon) ເທບ​ແຫ່ງ​ມະຫາ​ສະ​​ໝຸດ ແລະ ເທພີ ອາ​ເທ​ນາ (Athena) ເທພີ​ແຫ່ງ​ປັນຍາ  ແລະ  ໄດ້​ໃຫ້​ເທບ​ພະ​ເຈົ້າ ຊຸສ (Zeus) ຜູ້​ເປັນ​ຣາ​ຊາ​ຂອງ​ເທບ​ພະ​ເຈົ້າ​ທັງ​ໝົດ​ມາ​ຕັດສິນ ໂດຍ​ໃຫ້​ເນລະມິດ​ສິ່ງ​ຂອງ​ມາ​ໜຶ່ງ​ຢ່າງ ແກ່​ຊາວ​ເມືອງ ແລະ ໃຫ້​ຊາວ​ເມືອງ​ເລືອກ​ກັນ​ວ່າ: ຈະ​ໃຫ້​ໃຜ​ເປັນ​ເທບ​ພະ​ເຈົ້າ​ປະ​ຈໍາ​ເມືອງ. ເທບ​ພະ​ເຈົ້າ ໂພ​ໄຊ​ດອນ ຈຶ່ງ​ສ້າງ​ມ້າ​ຂຶ້ນ​ມາ ຊາວ​ເມືອງ​ກໍພາກັນ​ຊື່ນ​ຊົມ​ຍິນ​ດີ. ສ່ວນ​ເທພີ ອາ​ເທ​ນາ ໄດ້​ເນລະມິດ​ຕົ້ນ​ໝາກກອກ​ຂຶ້ນ​ມາ ຊຶ່ງ​ເປັນຕົ້ນ​ໄມ້​ທີ່​ສາມາດ​ໃຊ້​ປະໂຫຍດ​ໄດ້​ທຸກ​ສ່ວນ ແລະ ຍັງ​ເປັນ​ສັນ ຍາ​ລັກ​ຂອງ​ສັນຕິ​ພາບ. ໃນ​ຂະນະ​ທີ່​ມ້າ​ເບິ່ງ​ຄື​ວ່າ: ຈະ​ເປັນ​ສັນຍາ​ລັກ​ຂອງ​ສົງຄາມ​ຫຼາຍ​ກວ່າ ຊາວ​ເມືອງ ຈຶ່ງ​ພ້ອມ​ໃຈ​ກັນ​ຍົກ​ໃຫ້ ເທພີ ເປັນ​ຜູ້​ຊະນະ ແລະ ຕົກລົງ​ໃສ່​ຊື່​ເມືອງ​ວ່າ, ເອ​ເທນ ຕາມ​ຊື່​ຂອງ​ເທພີ ອ​າເທ​ນາ ແລະ ໝາກກອກ​ກໍເປັນ​ໝາກ​ໄມ້​ເສດຖະກິດ​ສຳຄັນ​ອັນ​ດັບ​ໜຶ່ງ​ຂອງ​ເກຣັກ​ມາ​ຈົນ​ເຖິງ​ປັດ​ຈຸ​ບັນ. ຕໍ່​ມາ​ໄດ້​ສ້າງ​ມະຫາ​ວິຫານ​ຂຶ້ນ ເພື່ອ​ບູຊາ​ເທພີ​ອາ​ເທ​ນາ​ຄື: ວິຫານ​ພາ​ເທ​ນອນ ສະຖານທີ່​ທ່ອງ​ທ່ຽວ ທີ່​ມີ​ຊື່​ສຽງ​ທີ່​ສຸດ​ຂອງ​ເກຣັກ ຢູ່ ເດີ ແອັກ​ໂຄ​ຣ​ໂປ​ລິສ (The Acropolis) ປ້ອມ​ຍາມ​ຢູ່​ເທິງ​ພູ​ສູງ ຊຶ່ງ​ຕັ້ງ​ຢູ່​ເທິງ​ກ້ອນ​ຫີນ​ທີ່​ໂຜ່​ຂຶ້ນ​ມາ​ເໜືອ​ເມືອງ​ອາ​ເທນ ແລະ ໄດ້​ສ້າງ​ຮູບ​ປັ້ນ ອາ​ເທ​ນາ ໄວ້​ພາຍ​ໃນ​ມະຫາ​ວິຫານ ແຕ່​ກໍ​ໄດ້​ສູນຫາຍ​ໄປ​ໃນ​ຍຸກ​ໄບ​ແຊນ​ໄທ ຊຶ່ງ​ໃນ​ຍຸກ​ເກືອບ 3.000 ປີ. ການ​ກໍ່ສ້າງ​ສະຖາປັດຕະຍະກຳ​ທີ່​ງົດ​ງາມ ແລະ ສົມບູນ ຖື​ວ່າ​ສຸດ​ຍອດ​ທີ່​ສຸດ ຊຶ່ງ​ສະແດງ​ໃຫ້​ເຫັນ​ເຖິງ​ຄວາມ​ສາມາດ​ຂອງ​ສະຖາປະນິກ​ໃນ​ຍຸກ​ນັ້ນ​ໄດ້​ເປັນ​ຢ່າງ​ດີ ແລະ ໄດ້​ຮັບ​ການ​ຂຶ້ນ​ທະບຽນ​ໃຫ້​ເປັນ​ມໍລະດົກ​ໂລກ​ໃນ​ປີ 1987. ນອກຈາກ​ນີ້, ຍັງ​ມີ​ສະຖານທີ່​ທ່ອງ​ທ່ຽວ​ອີກ​ຫຼາຍ​ແຫ່ງ​ທີ່​ໄດ້​ຈົດ​ທະບຽນ​ຂຶ້ນ​ເປັນ​ມໍລະດົກ​ໂລກ ອີກ​ເກືອບ 20 ແຫ່ງ.
  ສື່​ໃນ​ປະເທດ​ລາຍ​ງານ ໃນ​ວັນ​ທີ 12 ມີນາ 2017ວ່າ: ທ່ານ ອັນ​ເດຣ ອັນ​ເດ​ຣ​ດິດ ປະທານ​ສະມາຄົມ​ທຸລະ​ກິດ​ທ່ອງ​ທ່ຽວ​ເກຣັກ ກ່າວ​ຢູ່​ກອງ​ປະຊຸມ​ເສດຖະກິດ​ເດ​ວ​ຟີ​ວ່າ:  ພວກ​ເຮົາ​ຕັ້ງ​ເປົ້າ​ວ່າ​ຈະ​ເຮັດ​ໃຫ້​ປະເທດ​ກາຍເປັນ​ຈຸດໝາຍ​ປາຍທາງ​ການທ່ອງທ່ຽວ 1 ໃນ 10 ຂອງ​ໂລກ. ເກຣັກ ຕ້ອງການ​ຍົກ​ລະດັບ​ມາດຕະຖານ​ການ​ຈັດ​ອັນ​ດັບ​ໂລກ​ຂຶ້ນ​ຕື່ມ ເພື່ອ​ຊ່ວຍ​ຊົດ​ເຊີຍ​ວິ​ກິດ​ການ​ດ້ານ​ເສດຖະກິດ​ຂອງ​ປະ​ເທດ. ເກຣັກ ມີ​ແຜນ​ຈະ​ດຶງ​ດູດ​ນັກ​ທ່ອງ​ທ່ຽວ​ໃຫ້​ໄດ້ 35 ລ້ານ​ຄົນ, ເກັບ​ພາສີ​ທ່ອງ​ທ່ຽວ​ໃຫ້​ໄດ້ 20 ຕື້​ເອີ​ໂຣ ເມື່ອ​ຮອດ​ປີ 2021. ການທ່ອງທ່ຽວ​ໄດ້​ປະກອບສ່ວນ​ໃຫ້​ກັບ​ລວມ​ຍອດ​ລາຍ​ຮັບ​ພາຍ​ໃນ​ປະເທດ (GDP) ກວມ 18%. ສື່​ໃນ​ປະ​ເທດ​ເກຣັກ ລາຍ​ງານ​ໃນ​ວັນ​ທີ 22 ມີນາ​ຜ່ານ​ມາ​ວ່າ: ຊາວ​ຣັດ​ເຊຍ ໄດ້​ເລືອກ​ປະ​ເທດ​ເກຣັກ ເປັນ​ບ່ອນ​​ພັກ​ຜ່ອນ​ດ້ານ​ການທ່ອງທ່ຽວ ໂດຍ​ການ​ຈອງ​ລ່ວງ​ໜ້າ​ເພີ່ມ​ຂຶ້ນ 2 ເທົ່າ ໃນ​ເດືອນ​ທຳອິດ​ຂອງ​ປີ 2017. ອີງ​ຕາມ​ອົງການ​ທ່ອງ​ທ່ຽວ ຣັດ​ເຊຍ ໃຫ້​ຮູ້​ວ່າ: ການ​ຈອງ​ເພື່ອ​ໄປ​ທ່ຽວ​ເກັຣກ ເພີ່ມ​ຂຶ້ນ 20% ແລະ ຄາດ​ວ່າ: ນັກ​ທ່ອງ​ທ່ຽວ​ຈາກ ຣັດ​ເຊຍ ຈະ​ມີ​ເຖິງ 1 ລ້ານ​ຄົນ ໄປ​ທ່ຽວ​ເກຣັກ. ສ່ວນ​ຊາວ​ເຢຍ​ລະ​ມັນ ໄດ້​ຈອງ​ເພື່ອ​ທີ່​ຈະ​ມາ​ທ່ຽວ​ເກຣັກ ເພີ່ມ​ຂຶ້ນ 67% ໃນ​ລະດູ​ທ່ອງ​ທ່ຽວ​ປີ 2017. ຂ່າວ​ແຈ້ງ​ຕື່ມ​ວ່າ: ໃນ 2 ເດືອນ​ທຳອິດ​ຂອງ​ປີ 2017, ການ​ເດີນທາງ​ຂອງ​ຜູ້ໂດຍສານ​ໃນ​ເດີ່ນ​ບິນ​ປະ​ເທດ​ເກຣັກ ໄດ້​ເພີ່ມ​ຂຶ້ນ 7,2% ເມື່ອ​ທຽບ​ກັບ​ໄລຍະ​ດຽວ​ກັນ​ຂອງ​ປີ 2016. ຈຳນວນ​ຜູ້ໂດຍສານ​ໃນ 2 ເດືອນ​ຕົ້ນ​ປີ ແມ່ນ 3.75 ລ້ານ​ຄົນ. ເມື່ອ​ທຽບ​ກັບ​ໄລຍະ​ດຽວ​ກັນ​ຂອງ​ປີ 2016, ບັນລຸ 3,49 ລ້ານ​ຄົນ. ໃນ​ນັ້ນ​ຈຳນວນ​ຖ້ຽວ​ບິນ​ແມ່ນ 38.298 ຖ້ຽວ​ບິນ ເປັນ​ຖ້ຽວ​ບິນ​ສາກົນ 14.988 ຖ້ຽວ​ບິນ.
  ສປປ ລາວ ແລະ ເກຣັກ ສ້າງຕັ້ງ​ສາຍ​ພົວພັນ​ທາງ​ການ​ທູດ​ນຳ​ກັນ ໃນ​ວັນ​ທີ 15 ມິຖຸນາ ປີ 1989.

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110