ໜັງສືພິມ ປະຊາຊົນ

ແນວລາວສ້າງຊາດຍາມໃດ ກໍໄດ້ຮັບການຊີ້ນຳ-ນຳພາ ຢ່າງໃກ້ຊິດຕິດແທດຈາກ ພັກ ປປ ລາວ

ເຜີຍແຜ່ໂດຍ: ທ່ານ ສິດທິພອນ ຣາຊະພົນ ເວລາ: 25/03/2020 09:00:54 ຈຳນວນຢ້ຽມຊົມ 1138 ຄັ້ງ

(ຄຳເຫັນຂອງ ທ່ານ ໄຊສົມພອນ ພົມວິຫານ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ
ເນື່ອງໃນໂອກາດວັນສ້າງຕັ້ງ ພັກ ປປ ລາວ ຄົບຮອບ 65 ປີ)

   ພັກປະຊາຊົນປະຕິວັດລາວ ແມ່ນພັກທີ່ກໍາເນີດມາຈາກພັກກອມມູນິດອິນດູຈີນໃນເມື່ອກ່ອນ ແລະ ໄດ້ຮັບການສ້າງຕັ້ງຂຶ້ນໃນວັນທີ 22 ມີນາ 1955 ຊຶ່ງມາຮອດປັດຈຸບັນມີອາຍຸ 65 ປີໃນຖານະເປັນພັກກໍາອໍານາດດຳລົງບົດບາດເປັນແກນນຳໃນລະບົບການເມືອງ, ເປັນພັກທີ່ມີຄວາມປີຊາສາ ມາດ ໃນການຊີ້ນໍາ-ນຳພາ ພາ ລະກິດຕໍ່ສູ້ປົດປ່ອຍຊາດ ກໍຄືປົກປັກຮັກສາ ແລະ ພັດທະນາປະເທດຊາດ. ໃນຂະບວນວິວັດ ແຫ່ງປະຫວັດສາດ ອັນລະອິດລະອ້ຽວດັ່ງກ່າວ ພັກເຮົາໄດ້ກຳນົດແນວທາງຍຸດ ທະສາດ, ບາດກ້າວເດີນ ແລະ ວິທີປະຕິວັດຂອງຊາດລາວ ໂດຍສອດຄ່ອງກັບເງື່ອນໄຂສະພາວະຄວາມເປັນຈິງຂອງປະເທດ ແລະ ສະພາບແວດລ້ອມແຫ່ງການເຊື່ອມໂຍງພາກພື້ນ ແລະ ສາກົນ ໃນແຕ່ລະໄລຍະ, ສາມາດສະຫຼຸບ ແລະ ຖອດຖອນໄດ້ບົດຮຽນ ໃນແຕ່ລະໄລຍະແຫ່ງບາດລ້ຽວ ປະຫວັດສາດຂອງການປະຕິວັດ ຊຶ່ງສາມາດຍາດໄດ້ໄຊຊະນະ ແລະ ມີຜົນສໍາເລັດ ໃນຫຼາຍດ້ານ; ການປັບປຸງແນວທາງ ແຜນນະໂຍບາຍຕ່າງໆ ທີ່ວາງອອກນັ້ນ ນັບມື້ມີຄວາມສົມບູນຍິ່ງຂຶ້ນ.
   ພາຍໃຕ້ການຊີ້ນຳ ແລະ ນຳພາຢ່າງໃກ້ຊິດຂອງພັກ ປປ ລາວ, ຄະນະພັກສູນກາງແນວລາວສ້າງຊາດ (ສນຊ) ແຕ່ລະສະໄໝ ກໍໄດ້ເຮັດສຳເລັດໜ້າທີ່ວຽກງານຂອງຕົນ, ເວົ້າສະເພາະພາຍຫຼັງກອງປະຊຸມໃຫຍ່ແນວລາວສ້າງຊາດ ສະ ໄໝທີ X; ຄະນະພັກ ສນຊ ໄດ້ສືບຕໍ່ ແລະ ເສີມຂະຫຍາຍມູນເຊື້ອ ອັນສະຫງ່າລາສີຂອງແນວລາວອິດສະຫຼະ ແລະ ແນວລາວຮັກຊາດໃນການເຕົ້າໂຮມຄວາມສາມັກຄີປະຊາຊົນລາວບັນດາເຜົ່າ, ຊັ້ນຄົນ, ສາສະໜາ, ເພດ-ໄວນັບທັງພີ່ນ້ອງເຊື້ອຊາດລາວຢູ່ຕ່າງປະເທດເຂົ້າໃນການປະຕິບັດແນວທາງ, ນະໂຍບາຍຂອງພັກ, ແຜນພັດທະນາເສດຖະກິດ-ສັງຄົມແຕ່ລະໄລຍະ, ປະຕິບັດລັດຖະທໍາມະນູນ, ລະບຽບ, ກົດໝາຍຂອງລັດກໍຄືການປະຕິບັດສອງໜ້າທີ່ຍຸດທະສາດໃນປັດຈຸບັນຊຶ່ງຄະນະພັກ ສນຊ ໄດ້ພ້ອມກັນຊີ້ນໍານໍາພາເຄື່ອນໄຫວວຽກແນວໂຮມໃນໄລຍະໃໝ່ ຊຶ່ງມີຜົນງານພົ້ນເດັ່ນດັ່ງນີ້: ສນຊ ປະກອບມີຄະນະປະຈໍາ ຊຶ່ງເຮັດໜ້າທີ່ປະຈໍາການແກ້ໄຂວຽກງານ, ມີລະບອບປະຊຸມປະຈໍາເດືອນ, ປະຊຸມເປີດກວ້າງ,ກອງປະຊຸມຄົບຄະນະຂອງກໍາມະການສູນກາງແນວລາວສ້າງຊາດ,ມີກອງປະຊຸມສ່ອງແສງກັບອົງການພາຄີ, ມີຮອງປະທານສູນກາງແນວລາວສ້າງຊາດບໍ່ປະຈໍາການ, ມີບັນ ດາກົມ, ສູນ, ຫ້ອງການ, ມີ 6 ຄະນະທີ່ປຶກສາ ແລະ ຄູ່ຮ່ວມງານຄືື: ຄະນະທີ່ປຶກສາວຽກງານເສດຖະກິດແລະ ກົດໝາຍ; ຄະນະທີ່ປຶກສາວຽກງານຊົນ ເຜົ່າ; ຄະນະທີ່ປຶກສາວຽກງານຊັ້ນຄົນ ແລະ ການຈັດຕັ້ງສັງຄົມ; ຄະນະທີ່ປຶກສາວຽກງານສາສະໜາ ແລະ ຄະນະທີ່ປຶກສາວຽກງານຄົນເຊື້ອຊາດລາວຢູ່ຕ່າງປະເທດ; ຄະນະພັກໄດ້ເອົາໃຈໃສ່ ຊີ້ນໍາປັບປຸງກົດໝາຍວ່າດ້ວຍ ແນວລາວສ້າງຊາດ ແລະ ໄດ້ນໍາເຂົ້າພິ ຈາລະນາ ແລະ ໄດ້ຖືກຮັບຮອງໃນກອງປະຊຸມສະໄໝສາມັນທີ 6 ຂອງສະພາແຫ່ງຊາດ ຊຸດທີ VIII, ໄດ້ຊີ້ນໍານໍາພາປັບປຸງຮ່າງມະຕິກົມການເມືອງສູນກາງພັກ ວ່າດ້ວຍວຽກງານແນວໂຮມ ແລະ ວຽກງານອົງການຈັດຕັ້ງມະຫາຊົນຂອງພັກ ໄລຍະໃໝ່ ແລະ ໄດ້ສ້າງຫຼັກສູດວຽກງານແນວລາວສ້າງຊາດ (ວຽກງານແນວໂຮມ, ວຽກງານຊົນເຜົ່າ, ສາສະໜາ, ວຽກງານກວດກາແນວລາວສ້າງຊາດ, ການທູດປະຊາຊົນ). ວຽກງານໂຄສະນາ ນອກຈາກມີວາລະສານ, ປະ ຕິທິນ, ລາຍການວິທະຍຸ, ໂທ ລະພາບແລ້ວ ຍັງມີໜັງສືພິມສາມັກຄີພັດທະນາ, ເວັບໄຊ, ພ້ອມກັນນັ້ນ, ຍັງໄດ້ສ້າງໂຄງການຂຽນປື້ມປະຫວັດ ສາດແນວລາວສ້າງຊາດ ແລະ ສ້າງຫໍມູນເຊື້ອແນວລາວສ້າງຊາດ; ວຽກງານສາສະໜາ ໄດ້ຊີ້ນໍາຄະນະຮັບຜິດຊອບຮ່າງຄໍາແນະນໍາການຈັດຕັ້ງປະຕິບັດດໍາລັດ 315/ລບ ວ່າດ້ວຍການຄຸ້ມຄອງ ແລະ ປົກປ້ອງການເຄື່ອນໄຫວສາສະໜາ ຢູ່ ສປປ ລາວໃນຂົງເຂດແນວລາວສ້າງຊາດ ແລະ ຄໍາແນະນໍາການປະສານງານວຽກງານແນວລາວສ້າງຊາດກັບກະຊວງພາຍໃນ;ປະກອບສ່ວນສໍາຄັນດ້ານສະຕິປັນຍາໃນການປັບປຸງທໍາມະນູນສົງ ຈົນສໍາເລັດ ແລະ ສາມາດປະກາດໃຊ້ ປີ 2019; ໄດ້ຈັດພິທີສະແດງສິລະປະຂອງບັນດາສາສະໜາຕ່າງໆ ແລະ ສ້າງກິດຈະກໍາໄປທັດສະນະສຶກສາສະຖານທີ່ສໍາຄັນທາງປະຫວັດສາດ ເຊັ່ນ: ເມືອງວຽງໄຊ ແຂວງຫົວພັນ, ຖໍ້າປີວເມືອງຄໍາ ແຂວງຊຽງຂວາງ ແລະ ສະຖານທີ່ສໍາຄັນອື່ນໆຢູ່ເຂດປະຕິວັດໃນເມື່ອກ່ອນ; ໄດ້ຈັດກອງປະຊຸມຝຶກອົບຮົມ ແລະ ເຜີຍແຜ່ນິຕິກໍາກ່ຽວກັບວຽກງານສາສະໜາ ໃຫ້ແກ່ບັນດາສາສະໜາ ໃນຂອບເຂດທົ່ວປະເທດ; ໄດ້ປະກອບສ່ວນຊ່ວຍກະກຽມ ແລະ ດໍາເນີນກອງປະຊຸມປະທານອົງການພຸດທະສາສະໜາ 3 ປະເທດຄື: ກໍາປູເຈຍ-ລາວ-ຫວຽດນາມ,ການສະເຫຼີມສະຫຼອງວັນພຸດທະ ສາສະໜາສາກົນ, ວັນວິສາ ຂະບູຊາລະດັບຊາດ; ໄດ້ຊີ້ ນໍາ ນໍາພາການເຮັດບຸນອຸທິດ ກຸສົນໃຫ້ແກ່ອະດີດການນໍາ ພັກ-ລັດ ປີ 2017 ຢູ່ວັດທາດ ຫຼວງເໜືອ;ໄດ້ຊີ້ນໍາຕໍ່ຄະນະຮັບຜິດຊອບກະກຽມງານທໍາມະຍາດຕາ 5 ແຜ່ນດິນ; ຊີ້ນໍາຄະນະຮັບຜິດຊອບຮ່າງມະຕິຂອງຄະນະບໍລິຫານງານສູນກາງພັກ ວ່າດ້ວຍວຽກງານສາສະໜາ; ວຽກງານຊົນເຜົ່າ: ໄດ້ເອົາໃຈໃສ່ຊີ້ນໍານໍາພາການປະຕິບັດນະໂຍບາຍ ແລະ ສ້າງຄວາມສາມັກຄີບັນດາເຜົ່າ, ຜູ້ຊົງຄຸນວຸດທິບັນດາເຜົ່າ, ຊີ້ນໍາຄະນະຄົ້ນຄ້ວາຊື່ເອີ້ນ ເຜົ່າບຣູ ແລະ ໄດ້ສາມາດນໍາຜ່ານກອງປະຊຸມສະໄໝສາມັນທີ 7 ຂອງສະພາແຫ່ງຊາດ ຊຸດທີ VIII ໄດ້ຖືກຮັບຮອງຊື່ເອີ້ນຊົນເຜົ່າ ບຣູ ເປັນຊົນເຜົ່າທີ 50 ຂອງປະເທດເຮົາ; ໄດ້ດໍາເນີນກອງປະຊຸມພົບປະຜູ້ຊົງຄຸນວຸດທິບັນດາເຜົ່າທົ່ວປະເທດ ຄັ້ງທີ 3; ໄດ້ຊີ້ນໍາໃຫ້ຄະນະຮັບຜິດຊອບຮ່າງຄໍາແນະນໍາການຈັດຕັ້ງປະຕິບັດຮີດຄອງປະເພນີຊົນເຜົ່າ ແລະ ໄດ້ຊີ້ນໍາຮ່າງມະຕິຂອງຄະນະບໍລິຫານງານສູນກາງພັກ ກ່ຽວກັບວຽກງານຊົນເຜົ່າໄລຍະໃໝ່. ນອກຈາກນີ້, ຍັງໄດ້ຊຸກຍູ້ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງຂອງແນວລາວສ້າງຊາດຕິດພັນກັບວຽກງານສາມສ້າງ ຊຶ່ງມາຮອດປັດ ຈຸບັນສາມາດປະກາດຮັບ ຮອງຄອບຄົວສາມັກຄີປອງດອງໄດ້ 658.000 ຄອບຄົວ, ບ້ານສາມັກຄີໄດ້ 4.162 ບ້ານ, ເມືອງສາມັກຄີໄດ້ 4 ເມືອງ.
   ໃນດ້ານວຽກງານການທູດປະຊາຊົນ, ຄະນະພັກໄດ້ເອົາໃຈໃສ່ຊີ້ນໍານໍາພາການພົວພັນຮ່ວມມືກັບອົງການແນວໂຮມກັບບັນດາປະເທດເພື່ອນມິດຍຸດທະສາດເຊັ່ນ: ສສ. ຫວຽດນາມ, ສປ ຈີນ, ຣາຊະອານາຈັກກໍາປູເຈຍ, ກູບາ, ສປປ ເກົາຫຼີ, ສະຫະພັນຣັດເຊຍ. ປັດຈຸບັນມີກໍາມະການສູນກາງແນວລາວສ້າງຊາດ 10 ທ່ານ ທີ່ເປັນຕົວແທນຄົນເຊື້ອຊາດລາວຢູ່ 7 ປະເທດຄື: ອາເມຣິກາ, ຝຣັ່ງ, ການາດາ, ອົສຕຣາລີ, ນິວຊີແລນ, ອັງກິດ ແລະ ຍີປຸ່ນ, ພ້ອມກັນນີ້,ພີ່ນ້ອງຄົນເຊື້ອຊາດລາວຢູ່ຝຣັ່ງ, ການາດາຮ່ວມກັບສູນກາງແນວລາວສ້າງຊາດຈັດບຸນກະຖິນເພື່ອຖວາຍຢູ່ລາວ, ຍັງໄດ້ຕ້ອນຮັບພີ່ນ້ອງຄົນເຊື້ອຊາດລາວຢູ່ປະເທດອົສຕຣາລີ, ນິວຊີແລນ ມາຢ້ຽມຢາມ. ນອກຈາກນີ້, ຍັງໄດ້ຮ່ວມມືກັບອົງການອຸຍນີເຊັບປະຈໍາລາວ ເພື່ອປຸກລະດົມປະຊາຊົນເຂົ້າຮ່ວມການຢອດຢາ-ສັກຢາ, ອົງການອາຫານໂລກ ເພື່ອຊ່ວຍອາຫານກາງເວັນ, ກະຊວງສາທາລະນະສຸກ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ເພື່ອສ້າງຄວາມເຂັ້ມແຂງໃຫ້ແນວລາວສ້າງຊາດ ແລະ ສ້າງບ້ານແບບຢ່າງ 17 ບ້ານໃນ 9 ຕົວເມືອງ ນະ ຄອນຫຼວງວຽງຈັນເປັນບ້ານສີ ຂຽວສະອາດງາມຕາ, ກຸ່ມບໍ ລິສັດພົງສະຫວັນ ເພື່ອສ້າງໂຄງການຄອບຄົວ ແລະ ບ້ານສາມັກຄີປອງດອງ ຕິດພັນກັບການແກ້ໄຂຄວາມທຸກຍາກຂອງປະຊາຊົນບັນດາເຜົ່າເຂດພັດທະນາ 516 ເມືອງລ້ອງຊານ ແຂວງໄຊສົມບູນ, ໂຄງການສົ່ງເສີມກະສິກໍາ ການປູກຕົ້ນໄມ້ໃຫ້ໝາກຢູ່ແຂວງຫົວພັນ, ໄຊຍະບູລີ, ສະຫວັນນະເຂດ, ພ້ອມກັນນັ້ນ, ຍັງໄດ້ຮ່ວມມືກັບບັນດາສະມາຄົມ, ມູນນິທິ ແລະ ການຈັດຕັ້ງທາງສັງຄົມ ແລະ ອື່ນໆ.
   ໃນນາມຕາງໜ້າຄະນະກໍາມະການແນວລາວສ້າງຊາດ ແຕ່ລະຂັ້ນສະແດງຄວາມກະ ຕັນຍູຮູ້ບຸນຄຸນຕໍ່ພັກ ປປ ລາວ ທີ່ໄດ້ຈັດຕັ້ງນໍາພາທຸກໄຊຊະນະຂອງການປະຕິວັດລາວ, ສ້າງອະນາຄົດອັນສະຫວ່າງສະໄຫວໃຫ້ແກ່ປະເທດຊາດ,ນໍາເອົາຜົນປະໂຫຍດອັນມະຫາສານມາສູ່ປະຊາຊົນລາວບັນດາເຜົ່ານັບແຕ່ມື້ໄດ້ຮັບການສ້າງຕັ້ງຂຶ້ນທີ່ໃສ່ຊື່ເອີ້ນວ່າແນວລາວອິດສະຫຼະຕໍ່ມາປ່ຽນເປັນແນວລາວຮັກຊາດ ແລະ ແນວລາວສ້າງຊາດ ຍາມໃດກໍໄດ້ຮັບການຊີ້ນໍາ - ນໍາພາຢ່າງໃກ້ຊິດ ຕິດແທດຈາກ ພັກ ປປ ລາວ ເຮັດໃຫ້ຄະນະກໍາມະການແນວລາວສ້າງຊາດແຕ່ລະຂັ້ນນັບມື້ໄດ້ຮັບການປັບປຸງໃຫ້ເຕີບໃຫຍ່ເຂັ້ມແຂງໃນທຸກດ້ານ, ກາຍເປັນອົງການສໍາພັນທາງການເມືອງ ທີ່ກວ້າງຂວາງ, ເປັນ ພື້ນຖານການເມືອງທີ່ໜັກ ແໜ້ນ ແລະ ເປັນຄັນທຸງເຕົ້າ ໂຮມຄວາມສາມັກຄີປອງດອງທົ່ວວົງຄະນາຍາດແຫ່ງຊາດ.