ຫົວ​ຂໍ້ : WB ເພີ່ມເງິນຊ່ວຍ¬ເຫຼືອເພື່ອຮັບມືກັບ COVID-19

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 26/03/2020 08:46:52 ຈຳ​ນວນ​ຜູ້​ເຂົ້າ​ຢ້ຽມ​ຊົມ 150 ຄັ້ງ

  ຂ່າວ​ຕ່າງປະເທດ​ລາຍ​ງານ​ວ່າ: ທ້າຍ​ອາທິດ​ທີ່​ຜ່ານ​ມາ, ທະນາຄານ​ໂລກ (WB) ໄດ້​ປະກາດ​ເພີ່ມ​ເງິນ​ຊ່ວຍເຫຼືອ​ແບບ​ຮີບ​ດ່ວນ​ລວມ​ມູນ​ຄ່າ 1,4 ໝື່ນ​ລ້ານ​ໂດ​ລາ ໃຫ້​ແກ່​ບໍລິສັດ ແລະ ປະເທດ​ທີ່​ໄດ້​ຮັບ​ຜົນ​ກະທົບ​ຈາກ​ການ​ແຜ່​ລະບາດ​ຢ່າງ​ວ່ອງໄວ​ຂອງ​ເຊື້ອ​ໄວ​ຣັດ​ສາຍ​ພັນ​ໃໝ່່ COVID-19.
  WB ໄດ້​ລະບຸ​ໃນ​ຖະແຫຼງການ​ວ່າ: ມາດ​ຕະການ​ດັ່ງກ່າວຈະ​ສ້າງ​ຄວາມ​ແຂງແຮງ​ໃຫ້​ກັບ​ລະບົບ​ການ​ກຽມ​ຄວາມ​ພ້ອມ​ດ້ານ​ສາທາລະນະ​ສຸກ​ລະດັບ​ປະເທດ ຊຶ່ງ​ລວມ​ເຖິງ​ການ​ຄວບ​ຄຸມ​ໂຣກ​ລະບາດ, ການ​ວິນິດ​ໄສ ແລະ ການ​ຮັກສາລວມ​ເຖິງ​ການ​ສະໜັບສະໜູນ​ພາກ​ເອກະ​ຊົນ. ທ່ານ ເດ​ວິດ ມັນ​ພາສ ປະທານ​ທະນາຄານ​ໂລກ​ລະບຸ​ວ່າ: ມາດ​ຕະການ​ນີ້, ຈະ​ໃຫ້​ຄວາມ​ຊ່ວຍເຫຼືອ​ແບບ​ຮີບ​ດ່ວນ​ກັບ​ທຸລະ​ກິດ​ຕ່າງໆ ແລະ ພະນັກງານ ເພື່ອ​ຫຼຸດຜ່ອນ​ຜົນ​ກະທົບ​ທາງ​ດ້ານ​ການ​ເງິນ, ເສດຖະກິດ ຈາກ​ການ​ແຜ່​ລະບາດ​ຂອງ​ໄວ​ຣັດ COVID-19. ທາງ​ດ້ານ​ບໍລິສັດ​ການ​ເງິນ​ສາກົນ (IFC) ຊຶ່ງ​ເປັນ​ໜ່ວຍ​ງານ​ຂອງ​ທະນາຄານ​ກາງ ທີ່​ປ່ອຍ​ເງິນ​ກູ້​ໃຫ້​ກັບ​ພາກ​ເອກະ​ຊົນ ຍັງ​ໄດ້​ເພີ່ມ​ເງິນ​ທຶນ​ຊ່ວຍເຫຼືອ​ອີກ 2 ພັນ​ລ້ານ​ໂດ​ລາ ສົ່ງ​ຜົນ​ໃຫ້​ຍອດ​ລວມ​ເງິນ​ຊ່ວຍເຫຼືອ​ຂອງ IFC ທີ່​ກ່ຽວຂ້ອງ​ກັບ COVID-19 ລວມ​ເປັນ 8 ພັນ​ລ້ານ​ໂດ​ລາ.
  ທະນາຄານ​ໂລກ ໄດ້​ເພີ່ມ​ວົງ​ເງິນ​ສະໜັບສະໜູນ​ດັ່ງກ່າວໃນ​ຂະນະ​ທີ່​ໄວ​ຣັດ COVID-19 ຍັງ​ຄົງແຜ່​ລະບາດ​ທົ່ວ​ໂລກ. ມະຫາວິທະຍາໄລ​ຈອນຮອບ​ກິ້ນ ລາຍ​ງານ​ວ່າ: ມີ​ຜູ້​ຕິດເຊື້ອ​ທົ່ວ​ໂລກ​ຫຼາຍ​ກວ່າ 196.000 ຄົນ ແລະ ມີ​ຜູ້​ເສຍ​ຊີວິດ​ແລ້ວ​ຫຼາຍ​ກວ່າ 7.800 ຄົນ.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110