ໜັງສືພິມ ປະຊາຊົນ

WB ເພີ່ມເງິນຊ່ວຍ¬ເຫຼືອເພື່ອຮັບມືກັບ COVID-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 26/03/2020 08:46:52 ຈຳນວນຢ້ຽມຊົມ 404 ຄັ້ງ

ຂ່າວຕ່າງປະເທດລາຍງານວ່າ: ທ້າຍອາທິດທີ່ຜ່ານມາ, ທະນາຄານໂລກ (WB) ໄດ້ປະກາດເພີ່ມເງິນຊ່ວຍເຫຼືອແບບຮີບດ່ວນລວມມູນຄ່າ 1,4 ໝື່ນລ້ານໂດລາ ໃຫ້ແກ່ບໍລິສັດ ແລະ ປະເທດທີ່ໄດ້ຮັບຜົນກະທົບຈາກການແຜ່ລະບາດຢ່າງວ່ອງໄວຂອງເຊື້ອໄວຣັດສາຍພັນໃໝ່່ COVID-19.
WB ໄດ້ລະບຸໃນຖະແຫຼງການວ່າ: ມາດຕະການດັ່ງກ່າວຈະສ້າງຄວາມແຂງແຮງໃຫ້ກັບລະບົບການກຽມຄວາມພ້ອມດ້ານສາທາລະນະສຸກລະດັບປະເທດ ຊຶ່ງລວມເຖິງການຄວບຄຸມໂຣກລະບາດ, ການວິນິດໄສ ແລະ ການຮັກສາລວມເຖິງການສະໜັບສະໜູນພາກເອກະຊົນ. ທ່ານ ເດວິດ ມັນພາສ ປະທານທະນາຄານໂລກລະບຸວ່າ: ມາດຕະການນີ້, ຈະໃຫ້ຄວາມຊ່ວຍເຫຼືອແບບຮີບດ່ວນກັບທຸລະກິດຕ່າງໆ ແລະ ພະນັກງານ ເພື່ອຫຼຸດຜ່ອນຜົນກະທົບທາງດ້ານການເງິນ, ເສດຖະກິດ ຈາກການແຜ່ລະບາດຂອງໄວຣັດ COVID-19. ທາງດ້ານບໍລິສັດການເງິນສາກົນ (IFC) ຊຶ່ງເປັນໜ່ວຍງານຂອງທະນາຄານກາງ ທີ່ປ່ອຍເງິນກູ້ໃຫ້ກັບພາກເອກະຊົນ ຍັງໄດ້ເພີ່ມເງິນທຶນຊ່ວຍເຫຼືອອີກ 2 ພັນລ້ານໂດລາ ສົ່ງຜົນໃຫ້ຍອດລວມເງິນຊ່ວຍເຫຼືອຂອງ IFC ທີ່ກ່ຽວຂ້ອງກັບ COVID-19 ລວມເປັນ 8 ພັນລ້ານໂດລາ.
ທະນາຄານໂລກ ໄດ້ເພີ່ມວົງເງິນສະໜັບສະໜູນດັ່ງກ່າວໃນຂະນະທີ່ໄວຣັດ COVID-19 ຍັງຄົງແຜ່ລະບາດທົ່ວໂລກ. ມະຫາວິທະຍາໄລຈອນຮອບກິ້ນ ລາຍງານວ່າ: ມີຜູ້ຕິດເຊື້ອທົ່ວໂລກຫຼາຍກວ່າ 196.000 ຄົນ ແລະ ມີຜູ້ເສຍຊີວິດແລ້ວຫຼາຍກວ່າ 7.800 ຄົນ.