ໜັງສືພິມ ປະຊາຊົນ

ນາຍົກຫວຽດນາມເນັ້ນວ່າ: ການລົງທຶນປະຕິບັດນະໂຍບາຍສັງຄົມແມ່ນການລົງທຶນໃຫ້ແກ່ການພັດທະນາ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 26/03/2020 08:48:40 ຈຳນວນຢ້ຽມຊົມ 474 ຄັ້ງ

ວິທະຍຸກະຈາຍສຽງຫວຽດນາມລາຍງານວ່າ: ວັນທີ 24 ມີນາຜ່ານມາ, ທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ໄດ້ເປັນປະທານກອງປະຊຸມສະຫຼຸບກ່ຽວກັບການປະຕິບັດມະຕິຂອງກອງປະຊຸມຄັ້ງທີ 5 ຄະນະບໍລິຫານງານສູນກາງພັກ ຊຸດທີ XI ບາງບັນຫານະໂຍບາຍສັງຄົມໄລຍະ 2012 - 2020.
ກ່າວຄຳເຫັນທີ່ກອງປະຊຸມ, ທ່ານ ຫງວຽນຊວັນຟຸກ ເນັ້ນໜັກວ່າ: ຕ້ອງລຶບລ້າງຄວາມທຸກຍາກ, ຄວາມອຶດຫິວໃຫ້ແກ່ທຸກຄົນຢູ່ທຸກແຫ່ງໃນທຸກເວລາຢ່າງສິ້ນເຊີງ, ສຸມໃສ່ແກ້ໄຂກຸ່ມຄົນປະສົບກັບຄວາມທຸກຍາກທີ່ສຸດ, ເຂດປະສົບກັບຄວາມທຸກຍາກກວ່າໝູ່. ພິເສດ, ໃນໄລຍະປະສົມກັບຄວາມຫຍຸ້ງຍາກຈາກ COVID-19 ຄືໃນປັດຈຸບັນ, ຕ້ອງຄິດເຖິງບ້ວງເງິນໜູນຊ່ວຍແຫ່ງຊາດກ່ຽວກັບການຮັບປະກັນຊີວິດສັງຄົມ, ພິເສດແມ່ນຜູ້ອອກແຮງງານ.
ທ່ານນາຍົກລັດຖະມົນຕີ ຫວຽດນາມ ເນັ້ນໜັກວ່າ: ການພັດທະນາເສດຖະກິດຕ້ອງໄປຄຽງຄູ່ກັບການແກ້ໄຂບັນດາບັນຫາສັງຄົມ, ທ່ານໃຫ້ທັດ ສະນະຢ່າງຈະແຈ້ງວ່າ, ມະນຸດເປັນໃຈກາງຂອງຂະບວນວິວັດການພັດທະນາ, ຮັບປະກັນນະໂຍບາຍສັງຄົມຕ້ອງໄດ້ຮັບການສ້າງ ແລະ ຜັນຂະຫຍາຍປະຕິບັດຢ່າງກົມກຽວກັບການພັດທະນາເສດຖະກິດ. ການລົງທຶນປະຕິບັດນະໂຍບາຍສັງຄົມ ແມ່ນການລົງທຶນໃຫ້ແກ່ການພັດທະນາ.
ນະໂຍບາຍສັງຄົມ ຕ້ອງໄດ້ຮັບປະກັນການພັດທະນາແບບກວມລວມ, ຮອບດ້ານ, ພິເສດຕ້ອງຍົກສູງຄຸນນະພາບການພັດທະນາມະນຸດ, ສ້າງວຽກເຮັດງານທຳໃຫ້ທຸກຄົນ ແລະ ວຽກດີໃຫ້ແກ່ທຸກຄົນ. ໃນການປະຕິວັດ 4.0 ແລະ ສະພາບການໃນປັດຈຸບັນ, ທ່ານ ຫງວຽນຊວັນຟຸກ ກ່າວຢໍ້າວ່າ: ຕ້ອງຕັ້ງບັນຫາການບຳລຸງສ້າງ, ນຳໃຊ້ແຫຼ່ງຊັບພະຍາກອນມະນຸດທີ່ມີທັກສະ, ຄຸນນະພາບສູງຢ່າງມີປະສິດທິຜົນ, ພັດທະນາຕະຫຼາດແຮງງານຢ່າງປອດໃສ, ຄົບຊຸດ, ທັນສະໄໝ ແລະ ເຊື່ອມໂຍງ.