ຫົວ​ຂໍ້ : ທ່ານ ປູຕິນ ຍັງໄດ້ຮັບຄວາມນິຍົມຈາກຊາວຣັດເຊຍ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 26/03/2020 08:51:34 ຈຳ​ນວນ​ຜູ້​ເຂົ້າ​ຢ້ຽມ​ຊົມ 311 ຄັ້ງ

ຮຽບຮຽງ​ໂດຍ: ສີ​ວັນ

  ຕົ້ນ​ເດືອນ​ມີນາ​ນີ້, ສະພາແຫ່ງ​ຊາດ​ຣັດ​ເຊຍ ໄດ້​ຮັບຮອງ​ເອົາ​ຂໍ້​ສະເໜີ​ປັບປຸງ​ລັດຖະ​ທຳ​ມະນູນ ດ້ວຍ​ອັດຕາສ່ວນສະໜັບສະໜູນ​ຢ່າງ​ຂາດ, ໄດ້​ເປີດ​ຊ່ອງ​ທາງໃຫ້ແກ່ທ່ານ ວະ​ລາ​ດີ​ເມຍ ປູ​ຕິນ ປະທານາທິບໍດີ​ຣັດ​ເຊຍ ທີ່ພວມກໍາອໍາ​ນາດ​ໃນ​ປັດຈຸບັນສາມາດນຳພາ​ປະເທດ​ຊາດ 2 ສະໄໝ​ຕື່ມ​ອີກ ຊຶ່ງ​ຈະ​ດໍາ​ເນີນ​ໄປ​ຈົນ​ຮອດ​ປີ 2036. ເຫດການ​ດັ່ງກ່າວ, ໄດ້​ລຶບ​ລ້າງຄວາມ​ລະ​ແວງ​ສົງ​ໃສ​ກ່ອນ​ນັ້ນກ່ຽວກັບ​ບົດບາດ​ຂອງ​ທ່ານ ປູ​ຕິນ ທີ່​ມີ​ຕໍ່​ປະເທດ​ຣັດ​ເຊຍ. ພາຍຫຼັງ​ສິ້ນ​ສຸດ​ອາຍຸ​ການ​ປະທານາທິບໍດີ ໃນ​ປີ 2024. ພ້ອມ​ທັງ​ສະແດງ​ໃຫ້​ເຫັນ​ວ່າ: ປະເທດ​ຣັດ​ເຊຍ ຍັງ​ຕ້ອງການ​ທ່ານ ປູ​ຕິນ ຕໍ່​ໄປ​ອີກ.
 ຕາມ​ແຫຼ່ງ​ຂ່າວສານ​ຫວຽດນາມ, ໃນ​ການ​ປ່ອນ​ບັດ​ລົງ​ປະຊາ​ມະຕິ​ດ້ວຍ​ບັດ​ເຫັນ​ດີ 383 ບັດ, ບັດ​ຂາວ 43 ບັດ ແລະ ບໍ່​ມີ​ບັດ​ຂັດຄ້ານ, ສະພາ​ຕ່ຳຣັດ​ເຊຍ (Duma ແຫ່ງ​ຊາດ​ຣັດ​ເຊຍ) ໄດ້​ສະແດງ​ຄວາມ​ເຫັນ ​ດີ​ເຫັນ​ພ້ອມ​ຢ່າງ​ເດັດຂາດຕໍ່​ຂໍ້​ສະເໜີ​ປັບປຸງ​ລັດ​ຖະ​ທຳ​ມະນູນ ໂດຍ ທ່ານ ນາງ ວາ​ເລນ​ຕິ​ນາ ເທ​ເຣ​ສ​ໂຄ​ວາ ສະມາຊິກ​ລັດ​ຖະ​ສະພາ​ຂອງ​ພັກ ປະເທດ​ຣັດ​ເຊຍ​ເອກະ​ພາບ ຍື່ນ​ສະເໜີ. ຕໍ່​ຈາກ​ນັ້ນ, ສະພາ​ສູງ​ຣັດ​ເຊຍ ກໍໄດ້​ຮັບຮອງ​ເອົາ​ຂໍ້​ສະເໜີ​ດັ່ງ ກ່າວ ດ້ວຍ​ບັດ​ເຫັນ​ດີ 160 ບັດ, ບັດ​ຂາວ 3 ບັດ ແລະ ບັດ​​ຂັດ ຄ້ານ 1 ບັດ.
  ເນື້ອ​ໃນ​ສຳຄັນ​ທີ່​ສຸດຂອງ​ ຂໍ້​ສະເໜີ​ປັບປຸງ​ລັດ​ຖະ​ທຳ​ມະ ນູນ ແມ່ນ​ລຶບ​ລ້າງ​ອາຍຸ​ການ​ປະທານາທິບໍດີ  2 ສະ​ໄໝ. ມາ​ຮອດ​ປັດຈຸບັນ ທ່ານ ປູ​ຕິນ ໄດ້​ນຳພາ​ປະເທດ​ຣັດ​ເຊຍ​ເປັນ​ເວລາ 20 ກ່​ວາປີ​ທີ່​ຜ່ານ​ມາ ໂດຍ​ໄດ້​ນຳ​ປະເທດ​ຣັດ​ເຊຍ ຜ່ານ​ຜ່າ​ວິ​ກິດ​ການ, ບືນ​ຕົວ​ຂຶ້ນ​ຢ່າງ​ເຂັ້ມແຂງ​ຈົນ​ເຖິງ​ທຸກ​ວັນ​ນີ້. ນີ້​ໝາຍ​ຄວາມ​ວ່າ, ອະນຸຍາດ​ໃຫ້​ທ່ານ ປູ​ຕິນ ສາມາດ​ດຳລົງ​ຕຳແໜ່ງ​ປະທານາທິບໍດີ​ສູງ​ສຸດ ແມ່ນ 2 ສະ​ໄໝ​ຕື່ມ​ອີກ.
  ຢ່າງໃດ​ກໍ​ຕາມ, ມາ​ຮອດ​ຈຸດ​ເວລາ​ນີ້ ຊາວ​ຣັດ​ເຊຍ ຍັງ​ຕ້ອງການ​ຜູ້​ນໍາ​ທີ່​ເກັ່ງ​ສາ​ມາດ​ນໍາ​ພາ​ປະເທດ​ຊາດ​ກ້າວ​ເດີນ​ໄປ​ຕາມ​ທິດ​ພັດທະນາ​ຢ່າງ​ທ່ານ ປູ​ຕິ​ນ. ຊາວ​ຣັດ​ເຊຍ ເກືອບ​ທຸກ​ຄົນ​ລ້ວນ​ແຕ່​ໃຫ້​ຂໍ້​ສັງເກດ​ວ່າ: ທ່ານ ປູ​ຕິນ ຍັງ​ຈະ​ນຳພາ​ປະເທດ​ຊາດ​ຕາມ​ວິທີ​ໃດ​ໜຶ່ງ. ພິເສດ, ເມື່ອ​ທ່ານ ປູ​ຕິນ ໄດ້​ສະເໜີ​ໃຫ້​ປັບປຸງ​ລັດ​ຖະ​ທຳ​ມະນູນ ເພື່ອ​ເພີ່ມ​ສິດ​ອຳນາດ​ໃຫ້​ແກ່​ນາຍົກລັດຖະມົນຕີ ແລະ ສະພາ​ແຫ່ງ​ຊາດ. ພ້ອມ​ກັນ​ນັ້ນ, ທ່ານ ດິ​ມິ​ຕຣີ ເມດ​ເວ​ເດບ ນາຍົກລັດຖະມົນຕີ ພ້ອມ​ກັບ​ຄະນະ​ລັດຖະບານ​ທັງ​ໝົດ ໄດ້​ປະກາດ​ລາ​ອອກ​ຈາກ​ຕຳແໜ່ງ ເມື່ອ​ກາງ​ເດືອນ​ມັງກອນ​ທີ່​ຜ່ານ​ມາ. ນັກ​ໄຈ້​ແຍກ​ຫຼາຍ​ທ່ານຕ່າງ​ກໍ​ໃຫ້​ທັດສະນະ​ວ່າ: ທ່ານ  ປູ​ຕິນ ພວມ​ມີ​ການ​ໄລ່​ລຽງ ເພື່ອ​ກາຍເປັນ​ນາຍົກລັດຖະມົນຕີ ດ້ວຍ​ສິດ​ອຳນາດ​ໃຫຍ່​ກ່​ວາ​ເກົ່າ ຊຶ່ງ​ຄ້າຍຄື​ກັບ​ແຜນການ​ທີ່​ໄດ້​ປະຕິບັດ​ຜ່ານ​ມາ ເມື່ອ​ສິ້ນ​ສຸດ​ອາຍຸ​ການ​ປະທານາທິບໍດີ​ສະ​ໄໝ​ທໍາ​ອິດ ໃນ​ປີ 2008.
   ແຕ່​ເຖິງ​ຢ່າງໃດ​ກໍຕາມ, ເມື່ອ​ເວົ້າ​ເຖິງ​ບົດບາດ​ການ​ນຳ​ປະເທດ​ຣັດ​ເຊຍ ຂອງ​ທ່ານ ປູ​ຕິນ, ພາຍຫຼັງ​ປີ 2024 ໄດ້​ສະແດງ​ອອກ​ຢ່າງ​ຈະແຈ້ງ ຜົນ​ການ​ປ່ອນ​ບັດ​ລົງ​ປະຊາ​ມະຕິ​ດ້ວຍ​ບັດ​ເຫັນ​ດີ 383 ບັດ, ເມື່ອ​ວັນ​ທີ 10 ມີນາ​ຜ່ານ​ມາ ເກືອບ​ວ່າ​ແນ່ນອນ​ແລ້ວ​ທີ່ ທ່ານ ປູ​ຕິນ ຈະ​ສືບຕໍ່​ນຳພາ​ປະເທດ​ຣັດ​ເຊຍ ໃນ​ຖາ​ນະ​ເປັນ​ປະ​ທາ​ນາ​ທິ​ບໍດີ. ສິ່ງ​ສຳຄັນ​ກວ່າ​ນັ້ນ ແມ່ນ​ໄດ້​ສະແດງ​ໃຫ້​ເຫັນ​ວ່າ: ປະເທດ​ຣັດ​ເຊຍ ຍັງ​ຄົງ​ຕ້ອງການ​ທ່ານ​ປູ​ຕິນ ຕໍ່​ໄປ​ອີກ.
  ຖ້າ​ພິ​ຈາ​ລະ​ນາ​ໃນ​ສະ ພາບ​ການ​ປັດຈຸບັນ, ວົງ​ການ​ນັກ​ໄຈ້​ແຍກ​ພາຍ​ໃນ​ປະເທດ​ຣັດ​ເຊຍ ແລະ ຕ່າງປະເທດ​ລ້ວນ​ແຕ່​ຖື​ວ່າ: ບໍ່​ມີ​ໃຜ​ສາມາດ​ມາ​ແທນ​ບົດບາດນຳ​ພາ​ປະເທດ​ຣັດ​ເຊຍ ຂອງ​ປະທານາທິບໍດີ ປູ​ຕິນ ໄດ້ ໃນ​ເວລາ​ຢ່າງ​ໜ້ອຍ​ສຸດ 1 ທົດ​ສະ​ວັດ​ຈະ​ມາ​ເຖິງ. ພິເສດ, ໃນ​ສະພາບ​ການ​ທີ່​ປະເທດ​ຣັດ​ເຊຍ ພວມ​ຕ້ອງ​ປະ​ເຊີນ​ໜ້າ​ກັບ​ສິ່ງ​ທ້າ​ທາຍ​ອັນ​ໜັກໜ່ວງ​ຫຼາຍ​ປະການ, ຈາກ​ນະໂຍບາຍ​ໃຫ້​ຕົກ​ຢູ່​ໂດ​ດດ່ຽວ ແລະ ຄຳ​ສັ່ງ​ລົງໂທດ​ຈາກ​ຝ່າຍ​ຕາເວັນຕົກ ຕະຫຼອດ​ຮອດ​ບັນດາ​ຄວາມ​ຫຍຸ້ງຍາກ​ອັນ​ໃຫຍ່​ຫຼວງ​ດ້ານ​ເສດຖະກິດ ຍ້ອນ​ລາຄາ​ນ້ຳມັນ​ດິບ ໄດ້​ຫຼຸດ​ລົງ​ຢ່າງ​ແຮງ ແລະ ການ​ກະທົບ​ຈາກ​ໂຣກ​ລະບາດ COVID-19. ຍິ່ງ​ກວ່າ​ນັ້ນ, ນັກ​ການເມືອງ ແລະ ນັກ​ໄຈ້​ແຍກ​ຣັດ​ເຊຍ ຫຼາຍ​ທ່ານ​ກໍຢັ້ງຢືນ​ວ່າ: ມີ​ພຽງ​ແຕ່​ຄວາມ​ເກັ່ງ​ກ້າ​ສາມາດ, ຄວາມ​ຕັດສິນ​ໃຈ​ຢ່າງ​ເດັດຂາດ ແລະ ຄວາມ​ຮັກ​ອັນ​ໃຫຍ​່ຫຼວງ​ຕໍ່​ປະເທດ​ຣັດ​ເຊຍ ຂອງ​ທ່ານ ປູ​ຕິນ ຈຶ່ງ​ຈະ​ຮັບປະກັນ​ຢ່າງ​ແນ່ນອນ​ວ່າ: ປະເທດ​ຣັດ​ເຊຍ ຈະ​ສາມາດ​ຜ່ານ​ຜ່າ​ຄວາມ​ຫຍຸ້ງຍາກ ແລະ ສິ່ງ​ທ້າ​ທາຍ​ນາໆ​ປະການ​ໃນ​ປັດຈຸບັນ ກໍຄື​ໃນ​ອະນາຄົດ​ໄດ້.
   ໃນ​ຂະນະ​ນັ້ນ, ມີ​ຫຼາຍ​ຄຳ​ເຫັນ​ສະຫຼຸບ​ແບບ​ງ່າຍໆ​ວ່າ: ພຽງ​ແຕ່​ພິຈາລະນາ​ໃນ​ດ້ານ​ຜົນງານ​ແຫ່ງ​ການ​ນຳພາ​ປະເທດ​ຣັດ​ເຊຍໃນ 2 ​ກວ່າທົດ​ສະ​ວັດ​ທີ່​ຜ່ານ​ມາ ກໍເຫັນ​ວ່າ: ທ່ານ ປູ​ຕິນ ມີ​ສິດ​ໄດ້​ຮັບ​ບໍ່​ວ່າ​ສິດ​ບຸລິມະສິດ​ພິເສດ​ໃດໆ ນັບ​ທັງ​ການ​ປັບປຸງ​ລັດ​ຖະ​ທຳ​ມະນູນ ເພື່ອ​ແກ່ຍາວ​ສິດ​ອຳ​ນາດ. ແຕ່​ເຖິງ​ຢ່າງໃດ​ກໍ່​ຕາມ, ມາ​ຮອດ​ຈຸດ​ເວລາ​ນີ້, ເປົ້າ​ໝາຍ​ທຸກ​ການ​ປຶກສາ​ຫາລື, ແຕ່​ທ່ານ ປູ​ຕິນ ກໍ​ຍັງ​ບໍ່​ທັນ​ໄດ້​ຢັ້ງຢືນ​ວ່າ: ຈະ​ສືບຕໍ່​ອອກ​ສະໝັກ​ຫາ​ສຽງ​ເລືອກ​ຕັ້ງ​ເປັນ​ປະທານາທິບໍດີ​ອີກ ​ຫຼື​ ບໍ່.
 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110