ຫົວ​ຂໍ້ : ເມືອງເງິນ ເອົາໃຈໃສ່ຕ້ານ ແລະ ສະກັດກັ້ນ COVID-19 ຢ່າງເຂັ້ມງວດ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 26/03/2020 08:54:50 ຈຳ​ນວນ​ຜູ້​ເຂົ້າ​ຢ້ຽມ​ຊົມ 134 ຄັ້ງ

ທ່ານ ບຸນ​ເລື່ອນ ບົວ​ໄລ ຫົວໜ້າ​ຫ້ອງການ​ສາທາລະນະ​ສຸກ​ເມືອງເງິນ ແຂວງໄຊ​ຍະ​ບູ​ລີ ໄດ້​ໃຫ້​​ສຳພາດ​ຕໍ່​ນັກ​ຂ່າວ​ຂອງ​ເມືອງ ໃນ​ຄັ້ງ​ວັນ​ທີ 24 ມີນາວ່າ: ຕໍ່​ກັບ​ມາດ​ຕະການ​ເຝົ້າ​ລະວັງ​ການ​ຕ້ານ ແລະ ສະກັດ​ກັ້ນ, ຄວບ​ຄຸມ ແລະ ແກ້​ໄຂພະຍາດ​ອັກເສບ​ປອດຈາກ​ເຊື້ອ​ຈຸ​ລະ​ໂ​ຣກ​ສາຍ​ພັນ​ໃໝ່ COVID-19,  ເມືອງ​ເງິນ ກໍເປັນ​ເມືອງ​ໜຶ່ງ​​ທີ່ມີ​ຄວາມ​ສ່ຽງຕໍ່​ ກັບ​ພະຍາດ​ດັ່ງກ່າວ ຈຶ່ງ​ໄດ້​ວາງ​ມາດ​ຕະການ​ເຝົ້າ​ລະວັງ ໂດຍ​ສະເພາະ​ແມ່ນ​ຕິດຕາມ​ກວດກາ ກັ່ນ​ກອງ ຈຸດ​ການ​ໃຫ້​ບໍລິການ​ຕ່າງໆ​ເຊັ່ນ: ດ່ານ​ສາກົນ​ນຳ້​ເງິນ, ໂຮງໝໍ​ຊຸມ​ຊົນ,ໂຮງໝໍ​ນ້ອຍ 6 ແຫ່ງ, ຂັ້ນ​ບ້ານ ໃນ​ການ​ຊ່ວຍ​ຕິດ​ຕາມ. ສຳລັບ​ດ່ານ​ສາກົນ​ນ້ຳ​ເງິນ ທາງ​ຫ້ອງການ​ສາທາລະນະ​ສຸກ ແມ່ນ​ໄດ້​ຕັ້ງ​ຈຸດ​ກວດ​ຢູ່​ດ່ານ ເພື່ອ​ຄັດ​ກອງ ຜູ້ໂດຍສານ ແລະ ແຮງ​ງານ​ລາວ ທີ່​ເດີນທາງ​ມາ​ແຕ່ ປະເທດ ເພື່ອນ​ບ້ານ. ມີ​ການ​ກວດ ແລະ ກັ່ນ​ກອງ​ຢ່າງ​ເຂັ້ມ​ງວດ ເປັນຕົ້ນ​ການ​ວັດ​ອຸນຫະພູມ, ກຳມະຈອນ, ຄວາມດັນ ແລະ ອື່ນໆ ພາຍຫຼັງ​ຄັດ​ແຍກ​ຈາກ​ຈຸດ​ກວດ​ຢູ່​ດ່ານ​ສາກົນ​ນ້ຳ​ເງິນ​ແລ້ວ ຍັງ​ມີ​ລົດ​ຮັບ​ສົ່ງ​ມາ​ກວດ​ຄັດ​ແຍກ​ຢູ່​ສູນ​ໃຫຍ່​ປະຈຳເມືອງ ຢູ່ທ່ີ​ໂຮງໝໍ​ຫຼັງ​ເກົ່າ ພ້ອມ​ທັງ​ສອບ​ຖາມ​ປະຫວັດທີ່ຢູ່, ບ່ອນ​ເຮັດ​ວຽກ ແລະ ປະສານ​ງານ ຈັດ​ສົ່ງ​ລາຍ​ຊື່ ໃຫ້​ທາງ​ພາກສ່ວນ​ທີ່ກ່ຽວຂ້ອງ ບັນດາ​ເມືອງ ຫຼື ແຂວງ ນັ້ນໆ ເພື່ອ​ມີ​ມາດ​ຕະການ​ໃນ​ການ​ຮັບ​ເອົາ. ກໍລະນີ​ພົບ​ເຫັນ​ຜູ້​ໃດ​ທີ​່ເຂົ້າ​ຄ່າ​ຍ​ຂອງ​ພະຍາດ COVID-19  ຫຼື ມີ​ປະຫວັດ​ເຄີຍ​ຢູ່​ເຂດ​ທີ່​ມີ​ການ​ລະບາດ​ຂອງ​ພະຍາດ​ດັ່ງກ່າວ ແມ່ນ​ຈະ​ໄດ້​ແຍກ​ປ່ຽວ ຢູ່​ໂຮງໝໍຊຸມ​ຊົນ​ເມືອງ​ເງິນ. ສ່ວນ​ມາດ​ຕະການ​ຢູ່​ຂັ້ນ​ຮາກ​ຖານ​ບ້ານ ແມ່ນ​ໄດ້​ກຳນົດ​ເອົາ​ໂຮງຮຽນ ຂອງ​ແຕ່​ລະ​ບ້ານທີ່​ມີ​ສຸກສາລາ ແລະ ໂຮງໝໍ​ນ້ອຍ​ຕັ້ງ​ຢູ່ ລວມ​ມີ​ທັງ​ໝົດ  6 ສູນ ເປັນ​ບ່ອນ​ຄັດ​ແຍກ, ຕິດ​ຕາມ. ຜູ້​ທ່ີເດີນທາງ​ມາ ແຕ່​ບ່ອນ​ທີ​່ມີ​ຄວາມ​ສ່ຽງ ສາມາດ​ຮອງ​ຮັບ​ຜູ້​ທີ່ສົງ​ໃສ​ເຂົ້າ​ໄປກັກ​ບໍລິເວນ 14 ວັນ ໄດ້​ເຖິງ 10-15 ຄົນ ຕໍ່​ສູນ. 
(ຂ່າວ: ອິນ​ແປງ ແຫວນ​ຄຳ)

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110