ພາຍໃຕ້ການນຳພາຂອງພັກ ທຄຕລ ມີການເຕີບໃຫຍ່ເຂັ້ມແຂງ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 31/03/2020 09:11:36 ຈຳ​ນວນ​​ຢ້ຽມ​ຊົມ 441 ຄັ້ງ

   ສະ­ຫາຍ ພູ​ຂົງ ຈັນ­ທະ​ຈັກ ຄະ­ນະ​ພັກ​ທະ­ນາ­ຄານ ແຫ່ງ ສປປ ລາວ ເລ­ຂາ​ຄະ­ນະ​ພັກ​ຮາກ​ຖານ​ທະ­ນາ­ຄານ​ການ​ຄ້າ​ຕ່າງ­ປະ­ເທດ​ລາວ ມະ­ຫາ­ຊົນ (ທຄຕລ) ຜູ້­ອຳ­ນວຍ­ການ​ໃຫຍ່ ທຄຕລ ​ໄດ້​ຕອບ​ຄຳ​ສຳ­ພາດ​ຕໍ່​ນັກ​ຂ່າວ ໜັງ­ສື­ພິມ​ປະ­ຊາ­ຊົນ ເນື່ອງ​ໃນ​ໂອ­ກາດ​ວັນ​ສ້າງ​ຕັ້ງ​ພັກປະ­ຊາ­ຊົນ ປະ­ຕິ­ວັດ​ລາວ ຄົບ­ຮອບ 65 ປີ
1. ທ່ານ​ມີ​ຄວາມ​ຮູ້­ສຶກ​ແນວ­ໃດ ຕໍ່​ວັນ​ສ້າງ­ຕັ້ງ​ພັກ​ປະ ­ຊາ­ຊົນ​ປະ­ຕິ­ວັດ​ລາວ ?.
   ດັ່ງ​ທີ່​ພວກ​ເຮົາ​ຮູ້​ແລ້ວ​ວ່າ: ປະ­ຫວັດ​ແຫ່ງ​ການ​ຕໍ່­ສູ້​ປະ­ຕິ ­ວັດ​ຂອງ​ປະ­ຊາ­ຊົນ​ລາວ ບັນ ­ດາ­ເຜົ່າ​ໃນ​ກວ່າ​ເຄິ່ງ​ສະ­ຕະວັດ​ຜ່ານ​ມາ​ນີ້ ໄດ້​ຕິດ​ພັນ​ກັບ​ການ​ກໍາ​ເນີດ ແລະ ເຕີບ​ໃຫຍ່​ຂະ ­ຫຍາຍ­ຕົວ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ຕະ­ຫຼອດ​ມາ, ທຸກ​ບາດ­ກ້າວ​ເດີນ, ທຸກ​ໄຊ­ຊະ­ນະ​ຂອງ​ປະ­ຊາ­ຊົນ​ລາວ​ໃນ​ການ​ຕໍ່­ສູ້​ປະ­ຕິ­ວັດ​ປົດ​ປ່ອຍ​ຊາດ​ໃນ​ເມື່ອ​ກ່ອນ ກໍຄື​ໄລ­ຍະ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ປັດ­ຈຸ​ບັນ ລ້ວນ​ແຕ່​ຕິດ​ພັນ​ກັບ​ການ​ນໍາ​ພາ​ຂອງ​ພັກ.
   ການ​ກໍາ​ເນີ​ດ​ເກີດ​ຂຶ້ນ​ຂອງ​ພັກ​ປະ­ຊາ­ຊົນ​ປະ­ຕິ­ວັດ​ລາວ ແມ່ນ​ວິ­ວັດ­ທະ­ນາ​ການ​ອັນ​ຈໍາ​ເປັນ​ຂອງ​ປະ­ຫວັດ­ສາດ, ແມ່ນ​ຄວາມ​ຮຽກ­ຮ້ອງ​ຕ້ອງ­ການ​ພາ ­ວະ​ວິ­ໄສ​ຂອງ​ຂະ­ບວນ​ການ ​ຕໍ່​ປະ­ຊາ­ຊົນ​ເຮົາ, ປະ­ຊາ­ຊົນ​ລາວ​ບັນ­ດາ­ເຜົ່າ ໄດ້​ສາມັກ​ຄີ​ເປັນ​ຈິດ​ໜຶ່ງ​ໃຈ​ດຽວ​ກັນ ດໍາ​ເນີນ​ການ​ຕໍ່­ສູ້​ອັນ​ລະ​ອິດ​ລະ​ອ້ຽວ ຍືດ​ເຍື້ອ​ຍາວ​ນານ ພາຍ​ໃຕ້​ຄັນ​ທຸງ​ຊາດ​-​ປະ­ຊາ­ທິ­ປະ­ໄຕ ທີ່​ສາ­ມາດ​ສ້າງ ແລະ ໝູນ​ໃຊ້​ກາ­ລະ​ໂອ­ກາດ​ໄດ້​ຢ່າງ​ຄ່ອງ​ແຄ້ວ​ເພື່ອ​ປັບ­ປຸງ ແລະ ຂະ​ຫຍາ​ຍກໍາ​ລັງ​ຕົວ​ຈິງ​ຂອງ​ການ​ປະ­ຕິ­ວັດ, ຕີ​ສັດ­ຕູ​ໃຫ້​ຖອຍ​ໄປ​ເທື່ອ​ລະ​ກ້າວ, ຍາດ​ເອົາ​ໄຊ​ຊະ​ນະ​ເ​ເຕ່​ລະ​ບັ້ນ​ຢ່າງ​ຕໍ່​ເນື່ອງ, ຈັບ​ກາ­ລະ​ໂອ ກາດ​ອໍາ​ນວຍ​ກ້າວ​ຂຶ້ນ​ຍາດ​ເອົາ​ໄຊ­ຊະ ­ນະ​ຢ່າງ​ສົມ­ບູນ, ລຶບ​ລ້າງ​ແອກ​ປົກ­ຄອງ​ຂອງ​ພວກ​ລ່າ​ເມືອງ​ຂຶ້ນ ແລະ ສັກ​ດີ​ນາ​ຢ່າງ​ສິ້ນ​ເຊີງ, ສະ​ຖາ​ປະນາ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ​ຂຶ້ນ, ຈົນ​ກ້າວ​ເຂົ້າ​ສູ່​ການ​ນໍາ​ພາ​ປະ­ຕິ­ບັດ 2 ໜ້າ­ທີ່​ຍຸດ­ທະ­ສາດ ໃນ​ການ​ປົກ​ປັກ​ຮັກ­ສາ ແລະ ສ້າງ­ສາ​ພັດ­ທະ­ນາ​ປະ­ເທດ​ຊາດ ໃຫ້​ດີ​ຂຶ້ນ​ເປັນ​ກ້າວໆ.
   ຜ່ານ​ການ­ຈັດ­ຕັ້ງ​ປະ­ຕິ­ບັດ​​ເຫັນ​ວ່າປະ­ເທດ​ຊາດ​ໄດ້​ມີຜົນ ­ງານ​ຍິ່ງ​ໃຫຍ່ ແລະ ຜົນ­ສຳ­ເລັດ​ໃນ​ຫຼາຍ​ດ້ານ​ເປັນ­ຕົ້ນ​ແມ່ນການ​ແກ້​ໄຂ​ຄວາມ​ຫຍຸ້ງ­ຍາກ​ດ້ານ​ເສດ­ຖະ­ກິດ​ມະ­ຫາ​ພາກ, ການ ­ຈັດ­ຕັ້ງ​ປະ­ຕິ­ບັດ​ງົບ­ປະມານ​ຂອງ​ລັດ, ການ​ແກ້​ໄຂ​ໜີ້​ສິນ​ສາ­ທາ ­ລະ­ນະ;  ການ​ປັບ­ປຸງ​ລັດ​ວິ​ສາ​ຫະ​ກິດ;  ການ​ບໍ­ລິ­ການ​ຂອງ​ລັດ ເພື່ອ​ອຳ­ນວຍ​ຄວາມ​ສະດວກ​ໃຫ້​ແກ່​ພາກ​ທຸ­ລະ​ກິດ, ການ​ຫຼຸດ ­ຜ່ອນ​ຂອດ​ຂັ້ນທີ່​ກົດ​ໜ່ວງ​ຖ່ວງ​ດຶງ​ການ​ພັດ­ທະ­ນາ;  ການ​ແກ້​ໄຂ​ບັນ­ຫາ​ເງິນຕາ; ການ​ຈໍ​ລະ​ຈອນ​ສິນ­ຄ້າ; ການ​ຊຸກ­ຍູ້​ສົ່ງ­ເສີມ​ວິ​ສາ​ຫະ​ກິດ​ຂະ­ໜາດ​ກາງ​-​ຂະ­ໜາດ​ນ້ອຍ ແລະ ການ​ສ້າງ​ຖານ​ລາຍ​ຮັບ​ໃໝ່; ຊົນ­ນະ­ບົດ​ຢູ່​ປະ­ເທດ​ເຮົາ ໂດຍ​ລວມ​ໄດ້​ມີ​ໂສມ​ໜ້າ​ຫັນ­ປ່ຽນ​ໃໝ່​ຢ່າງ​ຈະ­ແຈ້ງ, ນັບ​ທັງ​ພື້ນ­ຖານ​ໂຄງ​ລ່າງ, ລະ­ບົບ​ສາ​ທາ​ລະ​ນຸ​ປະ​ໂພກ, ການ​ຜະ­ລິດ, ບໍ­ລິ­ການ ລ້ວນ​ແຕ່​ໄດ້​ມີ​ການ​ພັດ­ທະ­ນາ, ຄວາມ­ທຸກ​ຍາກ​ໄດ້​ຫຼຸດ​ລົງ​ເປັນ​ກ້າວໆ; ຍົກ​ລະ­ດັບ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ດີ​ຂຶ້ນ, ດ້ານ​ການ​ສຶກ­ສາ​ກໍ​ມີ​ຄຸນ​ນະ​ພາບ​ຫຼາຍ​ຂຶ້ນ, ດ້ານ​ສາ​ທາ ລະ­ນະ​ສຸກ ກໍ​ໄດ້​ຮັບ​ການ​ພັດ­ທະ­ນາ, ເອົາ­ໃຈ ­ໃສ່​ແກ້​ໄຂ​ປະ­ກົດ​ການ​ຫຍໍ້­ທໍ້​ໃນ​ສັງ­ຄົມ​ຢ່າງ​ຕັ້ງ­ໜ້າ ແລະ ດ້ານ​ອື່ນໆ​ກໍ​ໄດ້​ຮັບ​ການ​ປັບ­ປຸງ​ດີຂຶ້ນ; ຈາກ​ບັນ­ດາ​ຜົນ­ງານ ແລະ ໄຊ ­ຊະ­ນະ​ທີ່​ປະ­ຊາ­ຊົນ​ລາວ​ຍາດ​ມາ​ໄດ້ ແມ່ນ​ຍ້ອນ​ພັກ​ເຮົາ​ມີ​ແນວ­ທາງ​ອັນ​ຖືກ­ຕ້ອງ, ຍ້ອນ​ກໍາ​ລັງ​ແຮງ​ມະ­ຫາ​ສາ­ມັກ­ຄີ​ຂອງ​ທົ່ວ​ພັກ, ທົ່ວ​ກອງ­ທັບ ແລະ ທົ່ວ​ປວງ​ຊົນ, ຍ້ອນ​ລັດ­ທິ​ຮັກ​ຊາດ​ອັນ​ດູດ­ດື່ມ ແລະ ຈິດ­ໃຈ​ເອ­ກະ­ລາດ, ຍ້ອນ​ການ​ປະ­ສານ​ສົມ​ທົບ​ກໍາ​ລັງ​ແຮງ​ຂອງ​ຊາດ ແລະ ຂອງ​ຍຸກ​ສະໄໝ, ຍ້ອນ​ພັກ​ເຮົາ​ຍາມ​ໃດ​ກໍຕິດ​ພັນ​ກັບ​ປະ­ຊາ­ຊົນ ອີງ​ໃສ່​ກໍາ​ລັງ​ແຮງ​ຂອງ​ປະ­ຊາ­ຊົນ ແລະ ເຮັດ​ທຸກ​ສິ່ງ​ທຸກ​ຢ່າງ​ເພື່ອ​ຜົນ​ປະ­ໂຫຍດ​ຂອງ​ປະ­ຊາ­ຊົນ, ມີ​ແຕ່​ພັກ​ປະ­ຊາ​ຊົນ​ປະ­ຕິ­ວັດ​ລາວ ຊຶ່ງ​ເປັນ​ກໍາ​ລັງ​ການ­ເມືອງ​ອັນ​ໜຶ່ງ​ອັນ​ດຽວ​ເທົ່າ​ນັ້ນ ທີ່​ໄດ້​ນໍາ​ພາ​ປວງ​ຊົນ​ລາວ​ຜ່ານ​ຜ່າ​ຄວາມ​ຫຍຸ້ງ­ຍາກ​ທຸ­ລະ­ກັນ­ດານ ແລະ ທົດ​ສອບ​ທ້າ​ທາຍ​ຕ່າງໆ ເພື່ອ​ກ້າວ​ເຂົ້າ​ສູ່​ຈຸດໝາຍ​ສັງ ­ຄົມ​ນິ­ຍົມ; ໃນ​ນາມຄະ­ນະ​ພັກ​ຮ​າກ​ຖານຄະ­ນະ​ຜູ້​ບໍ­ລິ­ຫານກໍ​ຄື​ພະ­ນັກ­ງານ​ໃນ​ທົ່ວ​ລະ­ບົບ ທຄຕລ ຂໍ​ຢັ້ງຢືນ​ວ່າ​ຈະ​ຕັ້ງ­ໜ້າ​ປະ­ກອບ­ສ່ວນ​ອຸ­ທິດ​ເຫື່ອ­ແຮງ, ສຸມ​ທຸ​ກສະ­ຕິ­ປັນ­ຍາ ແລະ ກໍາ​ລັງ​ວັງ­ຊາ ເຂົ້າ​ໃນ​ການ​ປະ­ຕິ­ບັດ​ໜ້າ­ທີ່​ການ­ເມືອງ​ຂອງ​ຕົນ​ຕາມ​ພາ­ລະ​ບົດ­ບາດ​ໜ້າ ທີ່​ເປັນ​ການ​ປະ­ກອບ­ສ່ວນ​ໃນ​ການ​ພັດ­ທະ ­ນາ​ປະ­ເທດ​ຊາດ ກໍຄື​ຂະແໜງ​ການ​ເງິນ​ການ​ທະ­ນາ­ຄານ ໃຫ້​ເທົ່າ​ທຽມ​ກັບ​ສາ​ກົນ.
2. ທ່ານ​ມີ​ຄວາມ​ເຂົ້າ­ໃຈ​ແນວ­ໃດ​ຕໍ່​ພັກ​ປະ­ຊາ­ຊົນ​ປະ­ຕິ ­ວັດ​ລາວ?.
   ພັກ​ປະ­ຊາ­ຊົນ​ປະ­ຕິ­ວັດ​ລາວ ສ້າງ­ຕັ້ງ​ຂຶ້ນ​ໃນ​ວັນ​ທີ 22 ມີນາ 1955 ເປັນ​ພັກ​ທີ່​ກໍາ​ເນີ​ດ​ຂຶ້ນ​ໃນ​ປະ­ເທດ​ກະ​ສິ​ກໍາ​ຫຼ້າ­ຫຼັງ, ປະ­ຊາ­ຊົນ​ລາວ​ສ່ວນ​ຫຼວງ­ຫຼາຍ​ແມ່ນ​ຊາວ​ໄຮ່­ນາ, ແຕ່​ກໍ​ແມ່ນ​ພັກ​ທີ່​ເດີນ​ຕາມ​ລັດ­ທິ​ມາກ​-​ເລ​ນິນ, ເປັນ​ພັກ​ທີ່​ສືບ​ທອດ​ພາ ­ລະ­ກິດ​ຂອງ​ພັກ​ກອມ​ມູ​ນິດ​ອິນ ­ດູ­ຈີນ, ເປັນ​ພັກ​ທີ່​ເປັນ​ຕົວ​ແທນ​ຂອງ​ຊົນ​ຊັ້​ນກໍາ​ມະ­ກອນ ແລະ ຊາວ​ຜູ້​ອອກ­ແຮງ​ງານ​ລາວ​ທີ່­ແທ້​ຈິງ; ເດັດ­ດ່ຽວ​ປົກ​ປັກ​ຮັກ­ສາ​ສິດ ແລະ ຜົນ​ປະ­ໂຫຍດ​ອັນ​ຊອບ​ທໍາ​ຂອງ​ປະ­ຊາ­ຊົນ​ບັນ­ດາ­ເຜົ່າ ແລະ ຊັ້ນ​ຄົນ​ຕ່າງໆ​ໃນ​ທົ່ວ​ປະ​ເທດ. ພັກ​ຖື​ເອົາ​ການ​ຮັບ​ໃຊ້​ຊາດ, ຮັບ​ໃຊ້​ປະ­ຊາ­ຊົນ ເປັນ​ທິດ​ນໍາ​ພື້ນ­ຖານ​ໃນ​ການເຄື່ອນ​ໄຫວ​ຂອງ​ຕົນ.
   ພັກ​ປະ­ຊາ­ຊົນ​ປະ­ຕິ­ວັດ​ລາວ ປະ­ຕິ­ບັດ​ສອງ​ໜ້າ­ທີ່​ຍຸດ ­ທະ­ສາດ ຄື: ປົກ​ປັກ​ຮັກ­ສາ​ລະ ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ ແລະ ພັດ­ທະ­ນາ​ປະ­ເທດ​ຊາດ, ຊຶ່ງ​ປົກ​ປັກ​ຮັກ­ສາ​ລະ­ບອບ​ປະ ­ຊາ­ທິ­ປະ­ໄຕ​ປະ­ຊາ­ຊົນ ກໍ​ແມ່ນ​ການ​ປົກ​ປັກ​ຮັກ­ສາ​ປະ­ເທດ​ຊາດ, ປົກ​ປັກ​ຮັກ­ສາ​ໝາກ­ຜົນ​ຂອງ​ການ​ປະ­ຕິ­ວັດ​ທີ່​ຍາດ​ມາ​ໄດ້, ປົກ​ປັກ​ຮັກ­ສາ​ເອ­ກະ­ລາດ, ອະ­ທິ­ປະ​ໄຕ ແລະ ຜືນ​ແຜ່ນ­ດິນ​ອັນ​ຄົບ​ຖ້ວນ​ຂອງ​ຊາດ​ໄວ້​ໃຫ້​ໄດ້​ຢ່າງ​ໝັ້ນ­ຄົງ, ຮັບ­ປະ­ກັນ​ໃຫ້​ປະ­ເທດ​ເຮົາ​ມີ​ຄວາມ​ສະ­ຫງົບ ແລະ ມີ​ສະ­ຖຽນ​ລະ​ພາບ ທົ່ວ​ປວງ​ຊົນ​ຮອບ­ດ້ານ​ຢ່າງ​ຕັ້ງ­ໜ້າ; ສ້າງ​ໃຫ້​ກອງ­ທັບ​ກາຍ­ເປັນ​ກອງ ­ທັບ​ທີ່​ເຂັ້ມ­ແຂງ ທັນ​ສະ­ໄໝ, ເປັນ​ກໍາ​ລັງ​ທີ່​ຈົງ​ຮັກ​ພັກ­ດີ​ອັນ​ບໍ­ລິ­ສຸດ​ຜຸດ​ຜ່ອງ​ຕໍ່​ຜົນ​ປະ­ໂຫຍດ​ລວມ​ຂອງ​ຊາດ ເພື່ອ​ເປັນ​ກໍາ​ລັງ​ຫຼັກ​ທີ່​ສໍາ​ຄັນ​ໃນ​ການ​ປົກ​ປັກ​ຮັກ­ສາ​ລະ­ບອບ​ປະ­ຊາ­ທິ­ປະ ­ໄຕ ປະ­ຊາ­ຊົນ​ເຮົາ, ສ້າງ​ເງື່ອນ​ໄຂ​ອໍາ​ນວຍ​ໃຫ້​ແກ່​ພາ­ລະ­ກິດ​ສ້າງ­ສາ​ພັດ­ທະ­ນາ​ປະ­ເທດ​ຊາດ ແລະ ການ​ທໍາ​ມາ​ຫາ​ກິນ​ຂອງ​ປະ­ຊາ­ຊົນ​ເຮົາ.
ການ​ພັດ­ທະ­ນາ​ປະ­ເທດ​ຊາດ ໂດຍ​ສະ­ເພາະ​ແມ່ນ​ການ​ພັດ­ທະ­ນາ​ເສດ​ຖະ​ກິດ​-​ສັງ­ຄົມ, ວັດ​ທະ​ນະ​ທໍາ ແລະ ຊີ­ວິດ​ການ​ເປັນ​ຢູ່​ຂອງ​ຄົນ​ພາຍ​ໃນ​ຊາດ​ໃຫ້​ດີ​ຂຶ້ນ, ມີ​ລາຍ​ຮັບ​ສູງ​ຂຶ້ນ ແລະ ມີ​ສ່ວນ​ເຫຼືອ​ແຮ​ໄວ້, ເຮັດ​ໃຫ້​ຄົນ​ໃນ​ຊາດ​ໄດ້​ຮັບ​ການ​ພັດ­ທະ­ນາ, ມີ​ຄວາມ​ຮູ້, ຄວາມ​ສາ­ມາດ, ມີ​ຈິດ­ໃຈ​ໂອບ​ເອື້ອ​ອາ­ລີ, ຮັກ​ເຊື້ອ​ແພງ​ຊາດ, ມີ​ນໍ້າ​ໃຈ​ບໍ­ລິ­ສຸດ​ສັດ ­ຊື່, ຮັກ​ຄວາມ​ກ້າວ­ໜ້າ ແລະ ມີ​ສຸ­ຂະ­ພາບ​ແຂງ­ແຮງ ປະ­ກອບ ­ສ່ວນ​ພັດ­ທະ­ນາ​ປະ­ເທດ​ຊາດ ໃຫ້​ຈະ­ເລີນ​ຮຸ່ງ­ເຮືອງ​ຂຶ້ນ.
   ພ້ອມ​ກັນ​ນີ້, ພັກ​ປະ­ຊາ ­ຊົນ​ປະ­ຕິ­ວັດ​ລາວ​ເວ­ລາ​ໃດ​ກໍ​ຢຶດ​ໝັ້ນ 6 ຫຼັກ­ການ​ຂອງ​ການ​ປ່ຽນ­ແປງ​ໃໝ່ ຄື: ຫຼັກ­ການ​ທີ 1: ຢຶດ​ໝັ້ນ​ຈຸດ­ໝາຍ​ສັງ­ຄົມ​ນິ­ຍົມ, ຫຼັກ­ການ​ທີ 2: ຢຶດ​ໝັ້ນ ແລະ ໝູນ​ໃຊ້​ລັດ­ທິ​ມາກ​-​ເລ​ນິນ ຢ່າງ​ປະ­ດິດ​ສ້າງ, ສອດ­ຄ່ອງ​ກັບ​ຈຸດ​ພິ­ເສດ​ຂອງ​ປະ­ເທດ​ເຮົາ,  ຫຼັກ ­ການ​ທີ 3: ຢຶດ​ໝັ້ນ​ໃນ​ການ​ນໍາ​ພາ​ຂອງ​ພັກ, ເພີ່ມ​ທະ­ວີ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ພາຍ​ໃນ​ພັກ ບົນ​ພື້ນ­ຖານ​ຫຼັກ­ການ​ລວມ​ສູນ​ປະ­ຊາ­ທິ­ປະ­ໄຕ ແລະ ແນວ­ທາງ​ຂອງ​ພັກ, ຫຼັກ­ການ​ທີ 4: ເສີມ​ຂະ­ຫຍາຍ​ປະ­ຊາ­ທິ ­ປະ­ໄຕ ແລະ ສິດ​ເປັນ​ເຈົ້າ​ຂອງ​ປະ­ຊາ­ຊົນ​ບັນ­ດາ­ເຜົ່າ, ສ້າງ​ກໍາ​ລັງ​ສາ­ມັກ­ຄີ​ທົ່ວ​ປວງ​ຊົນ ແລະ ຄວາມ​ເປັນ​ປຶກ​ແຜ່ນ​ຂອງ​ຊາດ​ລາວ​ເອ­ກະ​ພາບ, ຫຼັກ­ການ​ທີ 5: ເພີ່ມ​ທະ­ວີ​ຄວາມ​ສັກ­ສິດ​ຂອງ​ລະ​ບົ​ບອໍາ​ນາດ ປະ­ຊາ­ທິ­ປະ­ໄຕ ປະ­ຊາ­ຊົນ, ອີງ​ໃສ່​ກໍາ​ລັງ​ແຮງ​ຂອງ​ປະ­ຊາ­ຊົນ ແລະ ເພື່ອ​ປະ ­ຊາ­ຊົນ, ຕ້ານ​ປະ­ກົດ​ການ​ອາ­ຍາ​ສິດ​ທຸກ​ຮູບ​ແບບ ແລະ ຫຼັກ­ການ​ທີ 6: ເຊີດ​ຊູ​ຈິດ ­ໃຈ​ເອ­ກະ­ລາດ​ເປັນ​ເຈົ້າ​ຕົນ​ເອງ ສົມ­ທົບ​ກັບ​ກໍາ​ລັງ​ແຮງ​ຂອງ​ຍຸກ​ສະ​ໄໝ.
   ພັກ​ປະ­ຊາ­ຊົນ​ປະ­ຕິ­ວັດ​ລາວ​ເປັນ​ພັກ​ກໍາອໍາ​ນາດ, ມີ​ຄວາມ​ຮັບ­ຜິດ­ຊອບ​ໃນ​ການ​ນໍາ​ພາ​ທົ່ວ​ປວງ​ຊົນ, ວາງ​ແຜນ ແລະ ບູ­ລະ­ນະ​ແນວ­ທາງ​ນະ­ໂຍ ­ບາຍ​ໃໝ່​ທີ່​ມີ​ລັກ​ສະ​ນະ​ກໍາ​ນົດ​ທິດ​ຂະ­ຫຍາຍ­ຕົວ​ຂອງ​ປະ­ເທດ​ຊາດ​ໃນ​ທຸກ​ຂົງ­ເຂດ ໃຫ້​ສອດ ­ຄ່ອງ​ກັບ​ການ​ຂະ­ຫຍາຍ­ຕົວ​ຂອງ​ສັງ­ຄົມ ແລະ ສອດ­ຄ່ອງ​ກັບ​ການ​ຂະ­ຫຍາຍ­ຕົວ​ຂອງ​ປະ­ເທດ​ຊາດ, ຕອບ​ສະ­ໜອງ​ຄວາມ​ມຸ່ງ​ມາດ​ປາ­ຖະ­ໜາ​ອັນ​ແຮງ​ກ້າ​ຂອງ​ປະ­ຊາ­ຊົນ​ບັນ­ດາ ­ເຜົ່າ, ເຕົ້າ­ໂຮມ​ຄວາມ​ສາ­ມັກ­ຄີ​ເປັນ​ເອ­ກະ​ພາບ​ທົ່ວ​ປວງ​ຊົນ​ລາວ​ທັງ​ຊາດ. ພັກ​ເປັນ​ແກນ​ນໍາ​ໃນ​ລະ­ບົບ​ການ­ເມືອງ ແຫ່ງ​ລະ­ບອບ​ປະ­ຊາ­ທິ­ປະ­ໄຕ​ປະ­ຊາ­ຊົນ, ເສີມ​ຂະ­ຫຍາຍ​ພາ­ລະ​ບົດ­ບາດ​ຄຸ້ມ​ຄອງ ແລະ ຈັດ​ຕັ້ງ​ປະ­ຕິ­ບັດ​ຂອງ​ລັດ, ແນວ​ລາວ​ສ້າງ​ຊາດ, ອົງ­ການ​ຈັດ​ຕັ້ງ​ມະ­ຫາ­ຊົນ ແລະ ອົງ­ການ​ຈັດ​ຕັ້ງ​ສັງ­ຄົມ​ອື່ນໆ. ພັກ​ເຄົາ­ລົບ ແລະ ເຄື່ອນ​ໄຫວ​ຕາມ​ລັດ​ຖະ​ທໍາ​ມະ­ນູນ ແລະ ກົດ​ໝາຍ.
3. ການ​ຊີ້​ນໍາ-ນໍາ​ພາ​ໃນ​ຂົງ ­ເຂດ​ວຽກ​ງານ​ທີ່​ຮັບ­ຜິດ­ຊອບ​ວຽກ​ງານ​ມີ​ຄື​ແນວ­ໃດ? ໂດຍ​ສະ­ເພາະ​ຜົນ­ງານ​ການ​ເຄື່ອນ ໄຫວ​ວຽກ​ງານ​ຂອງ​ທະ­ນາ­ຄານ ພາຍ​ໃຕ້​ການ​ຊີ້​ນໍາ-ນໍາ​ພາ​ຂອງ​ຄະ­ນະ​ພັກ​ຮາກ​ຖານ ທຄຕລ ເປັນ​ແນວ­ໃດ?
   ຄະ­ນະ​ພັກ​ຮາກ​ຖານ​ໄດ້​ເອົາ­ໃຈ­ໃສ່​ຊີ້​ນຳໆ​ພາ ການ​ດຳ ­ເນີນ​ທຸ­ລະ​ກິດ​ຂອງ​ທະ­ນາ­ຄານ ຢ່າງ​ມີ​ຫົວ­ຄິດ​ປະ­ດິດ​ສ້າງ, ນຳ​ໃຊ້ ແລະ ບໍ­ລິ­ຫານ​ທຶນ­ຮອນ​ທີ່​ມີ​ຢູ່​ໃຫ້​ມີ​ປະ­ສິດ​ທິ​ຜົນ ບົນ​ພື້ນ ­ຖານ​ການ​ວິ­ເຄາະ, ພິ­ຈາ­ລະ­ນາ​ຄວາມ​ສ່ຽງ ແລະ ສຸມ​ໃສ່​ຄວາມ​ອາດ​ສາ­ມາດ​ທ່າ­ແຮງ​ບົ່ມຊ້ອນ​ທີ່​ມີ ເພື່ອ​ເຮັດ​ໃຫ້­ການ​ດຳ­ເນີນ​ງານ​ມີ​ປະ­ສິດ​ທິ​ຜົນ​ສູງ​ສຸດ​ຊຶ່ງ​ສະ­ແດງ ອອກ​ຄື: ໄດ້ຈັດ​ກອງ​ປະ­ຊຸມ​ສະ­ພາ​ບໍ­ລິ­ຫານ​ສະ­ໄໝ​ສາ­ມັນ 5 ຄັ້ງ; ກອງ​ປະ­ຊຸມ​ຜູ້​ຖື​ຮຸ້ນ ປະ​ຈໍາ​ປີ 2018  1 ຄັ້ງ, ຈັດ​ກອງ​ປະ­ຊຸມ​ທົບ​ທວນ​ຜົນ​ການ​ດໍາ​ເນີນ​ທຸ­ລະ​ກິດ ທຄຕລ 4 ຄັ້ງ, ເຊັນ​ສັນ­ຍາ​ວ່າ​ດ້ວຍ​ການ​ບໍ­ລິ­ການ​ດ້ານ​ການ​ເງິນ ແລະ ຈຳ­ໜ່າຍ​ຮຸ້ນ ທຄຕລ 19% ຂອງ​ກະ­ຊວງ​ການ​ເງິນ​ລະ­ຫວ່າງ ທຄຕລ ກັບ ບໍ­ລິ­ສັດ ​ຫຼັກ​ຊັບ​ລາວ​-​ຈີນ ຈຳ­ກັດ ພ້ອມ​ທັງ​ສໍາ​ເລັດ​ການ​​ຂາຍ​ຮຸ້ນ​ອອກ​ສູ່​ສັງ​ຄົມ ​ຈໍາ​ນວນ 10% ຕາມ​ເວລາ ​ທີ່​ກໍາ​ນົດ, ແຍກ​ພະ​ແນກ​​ຄຸ້ມ​ຄອງ​ສິນ​ເຊື່ອ​ອອກ​ເປັນ 3 ພະ​ແນກຄື: ພະ​ແນ​ກ​ປະ­ຕິ­ບັດ​ການ​ສິນ​ເຊື່ອ, ພະ​ແນ​ກ​ຂາຍ​ຜະ­ລິດ​ຕະ​ພັນ​ສິນ​ເຊື່ອ, ພະ​ແນ​ກ​ບໍ­ລິ ­ຫານ​ສິນ​ເຊື່ອ ແລະ ສ້າງ­ຕັ້ງ​ພະ​ແນ​ກ​ນິ­ຕິ​ກຳ, ທຄຕລ ເຂົ້າ​ເປັນ​ສະມາ­ຊິກ​ໂດຍ​ກົງ​ຂອງ AMEX, ອອກ​ຜະ­ລິດ​ຕະ​ພັນ​ໃໝ່ BCEL MasterCard, ຮ່ວມ​ມື​ກັບ Swift Pass ໃນ​ການ​ບໍ­ລິ­ການ​ຊໍາ​ລະ​ເງິນ​ດ້ວຍ WeChat ແລະ AliPay ແລະ ຮ່ວມ​ມື​ກັບ​ຢູ​ນຽນ​ເພ​ສາ­ກົນ ໃນ​ການ​ໃຫ້​ບໍ­ລິ­ການ​ຊໍາ​ລະ­ສະ​ສາງ​ຜ່ານ QR CODE UnionPay ແລະ ຮ່ວມ​ມື​ກັບ ທະ ­ນາ­ຄານ​ທະ​ນາ​ຊາດ ປະ­ເທດ​ໄທ ໃນ​ການ​ຊຳ­ລະ​ຊະ​ສາງ​ຂ້າມ​ຊາຍ​ແດນ​ດ້ວຍ​ລະ ­ບົບ QR Code,ຮ່ວມ​ລົງ​ນາມ​ສັນ­ຍາ​ຮ່ວມ​ທຶນ​ສ້າງ­ຕັ້ງ ບໍ­ລິ­ສັດ ລາວ​ເນ​ເຊິ​ນ​ນໍ​ເພ​ເມັ້ນ​ເນັດ​ເວີກ ຈໍາ​ກັດ (LAPNET),BCEL Road Tax ສາ­ມາດ​ຍາດ​ລາງ­ວັນ​ຮອງ​ຊະ­ນະ​ເລີດ ICT AWARD 2019 ລະ­ດັບ​ປະ ­ເທດ ແລະ ຍາດ​ໄດ້​ລາງ­ວັນ​ຊະ­ນະ​ເລີດ ລະ­ດັບ​ອາ​ຊຽນ, ພັດທະ­ນາ​ໂຄງ­ການ Smart VAT Phase II ແລະ ເຊື່ອມ​ລະ­ບົບ ບ 53 ການ​ຊໍາ​ລະ​ຄ່າ​ທໍາ​ນຽມ​ນໍາ​ເຂົ້າ​ລົດ­ຊົ່ວ​ຄາວ​ຄົນ​ ຕ່າງ­ປະ­ເທດຂອງ​ກົມ​ພາ­ສີ ໃຫ້​ມາ​ຊໍາ​ລະ​ຢູ່​ຕູ້​ບໍ­ລິ ­ການ​ອັດຕະ­ໂນ­ມັດ ທີ່​ຂົວ​ມິດ ­ຕະ­ພາບ​ລາວ​-​ໄທ 1, ເປີດ​ບໍ­ລິ ­ການ​ໃນ​ວັນ​ເສົາ​-​ອາທິດ ໂດຍ​ເນັ້ນ​ໃສ່​ໜ່ວຍ​ບໍ­ລິ­ການ​ທີ່​ມີ​ບໍ​ລິ​ມາດ​ການ​ບໍ­ລິ­ການ​ຫຼາຍ​ຈໍາ​ນວນ 5 ໜ່ວຍ​ໃນ​ເບື້ອງ​ຕົ້ນ​ຄື: ໜ່ວຍ​ບໍ ­ລິ­ການ​ໄອ​ເຕັກ, ໜ່ວຍ​ບໍ­ລິ­ການ​ຕະ­ຫຼາດ​ເຊົ້າ; ໜ່ວຍ​ບໍ­ລິ­ການ​ສີ​ໄຄ, ໜ່ວຍ​ບໍ ­ລິ­ການ​ທົ່ງ​ຈະ­ເລີນ ແລະ ໜ່ວຍ​ບໍ ­ລິ­ການ​ຕະ­ຫຼາດ​ໃໝ່​ປາກ​ເຊ, ຜົນ​ການ​ດໍາ​ເນີນ​ທຸ­ລະ​ກິດ ປີ 2019 ຄື: ຍອດ​ຊັບ​ສິນ/ໜີ້​ສິນ ປະ­ຕິ­ບັດ​ໄດ້ເກີນ​ແຜນ 9,6%, ຍອດ​ເງິນ ​ກູ້​ທັງ​ໝົດ: ປະ­ຕິ ­ບັດ​ໄດ້ 104,5%, ຍອດ​ເງິນ​ຝາກ: ປະ­ຕິ­ບັດ​ໄດ້​ເກີນ​ແຜນ 12%.


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110