ໜັງສືພິມ ປະຊາຊົນ

ຄວາມສາມັກຄີແມ່ນຢາວັກຊິນຊ່ວຍອາຊຽນ ຍູ້ໂຣກລະ¬ບາດໃຫ້ຖອຍໄປ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 20/04/2020 08:49:23 ຈຳນວນຢ້ຽມຊົມ 644 ຄັ້ງ

ຮຽບຮຽງໂດຍ: ສີວັນ

ຖະແຫຼງການຮ່ວມຂອງກອງປະຊຸມ ອີກຄັ້ງໜຶ່ງໄດ້ຢັ້ງຢືນເຖິງຈິດໃຈສາມັກຄີ, ສະ ແດງໃຫ້ເຫັນຄຳໝັ້ນສັນຍາດ້ານການເມືອງຢ່າງແຮງກ່ຽວກັບການຮ່ວມມືພາຍໃນອາຊຽນ ກໍຄືກັບບັນດາຄູ່ຮ່ວມມື, ຢັ້ງຢືນໃຫ້ເຫັນວ່າ ແມ່ນກຳລັງແຮງຊ່ວຍໃຫ້ ອາຊຽນ ເອົາຊະນະຕໍ່ໂຣກລະບາດໂຄວິດ-19.
ພາຍໃຕ້ການເປັນປະ ທານຂອງ ທ່ານ ຫງວຽນຊວັນຟຸກ ນາຍົກລັດຖະມົນຕີຫວຽດນາມ ດ້ວຍບົດບາດເປັນປະທານ ອາຊຽນ, ກອງປະຊຸມສຸດຍອດພິເສດ ອາຊຽນ ແລະ ອາຊຽນ+3 ກ່ຽວກັບການຮັບມືກັບໂຣກລະບາດໂຄວິດ-19 ໄດ້ສິ້ນສຸດລົງ ໃນວັນທີ 14 ເມສາຜ່ານມາ ດ້ວຍໝາກຜົນສຳຄັນຫຼາຍຢ່າງ.
ຖະແຫຼງການຮ່ວມກອງປະຊຸມສຸດຍອດພິເສດ ອາຊຽນ ກ່ຽວກັບການຮັບມືກັບໂຣກລະບາດໂຄວິດ-19, ທີ່ບັນລຸໄດ້ຢູ່ບັນດາກອງປະຊຸມ ອີກຄັ້ງໜຶ່ງ ໄດ້ສືບຕໍ່ສ້າງກໍາລັງແຮງແຫ່ງຄວາມສາມັກຄີຂອງ ອາຊຽນ ກໍຄືຄຳເວົ້າຂອງທ່ານ ຫງວຽນຊວັນຟຸກ ໃນວາລະປີດກອງປະຊຸມສຸດຍອດພິເສດ ອາຊຽນ+3 ກ່ຽວກັບການຮັບມືກັບໂຣກລະບາດ ໂຄວິດ-19, “ຄວາມສາມັກຄີ ແລະ ການອູ້ມຊູຊ່ວຍເຫຼືອຊຶ່ງກັນ ແລະ ກັນ ລະຫວ່າງບັນດາປະເທດ” ແມ່ນຂໍກຸນແຈແຫ່ງຄວາມສຳເລັດ ເພື່ອໃຫ້ ອາຊຽນ ແລະ ບັນດາປະເທດຄູ່ຮ່ວມມື ຜ່ານຜ່າໄລຍະທີ່ຫຍຸ້ງຍາກນີ້.
ອາຊຽນ ສະໜິດຕິດພັນ ແລະ ເປັນເຈົ້າການຮັບມື, ນັບແຕ່ເກີດໂຣກລະບາດແຜ່ລະບາດໃນທົ່ວໂລກ ດ້ວຍຄວາມພະຍາຍາມລວມ, ຈຳນວນຜູ້ຕິດເຊື້ອຢູ່ພາກພື້ນ ອາຊຽນ ແມ່ນຍັງຕ່ຳ ແລະ ເພີ່ມຂຶ້ນ ຊ້າກວ່າ ເມື່ອທຽບໃສ່ອັດຕາສ່ວນລວມຂອງທົ່ວໂລກ. ນີ້ແມ່ນຄວາມພະຍາຍາມໄດ້ຮັບການຢັ້ງຢືນຈາກໂລກ ແລະ ແມ່ນຄວາມຈິງທີ່ບໍ່ອາດປະຕິເສດໄດ້.
ໃນຈຸດເວລານີ້, ສື່ມວນຊົນໂລກ ຍາມໃດກໍກ່າວເຖິງເລື່ອງບັນດາປະເທດອາຊຽນ, ບັນດາຄູ່ຮ່ວມມືຂອງອາຊຽນ ແລະ ຫຼາຍປະເທດເພື່ອນມິດອື່ນ “ແບ່ງທຸກແບ່ງສຸກ” ຮ່ວມແຮງຮ່ວມໃຈເມື່ອຖືກເຄາະຮ້າຍ ແລະ ກໍບໍ່ແມ່ນເລື່ອງບັງເອີນ ຊຶ່ງບັນດາສຳນັກຂ່າວສານໃຫຍ່, ໜັງສືພິມໃຫຍ່ຄື: Reuters, The Diplomat, ໜັງສືພິມ ວໍຊິງຕັນ ໂພສ ຫຼື ໜັງສືພິມ ນິວຢອກລາຍວັນ ທີ່ລົງພິມຫຼາຍຂ່າວ, ບົດກ່ຽວກັບຂໍ້ມູນຕ່າງໆ ແລະ ສ່ອງແສງກ່ຽວກັບຄວາມພະຍາຍາມຮ່ວມມືຂອງ ອາຊຽນ, ກ່ຽວກັບບົດບາດຂອງ ຫວຽດນາມ ຊຶ່ງແມ່ນປະເທດປະທານ ອາຊຽນ ໃນການຮັບມືກັບໂຣກລະບາດໂຄວິດ-19 ທີ່ອັນຕະລາຍນີ້. ໜັງສືພິມ Asiatoday ແມ່ນໜຶ່ງໃນບັນດາໜັງສືພິມໃຫຍ່ຂອງ ສ.ເກົາຫຼີ ກໍໄດ້ລົງພິມບົດຂຽນດ້ວຍເນື້ອໃນຕີລາຄາສູງຕໍ່ບົດບາດຂອງ ຫວຽດນາມ ສຳລັບການພັດທະນາ ແລະ ຄວາມສາມັກຄີຂອງ ອາຊຽນ, ເປັນຕົ້ນແມ່ນໃນສະພາບການທີ່ໂຣກລະບາດໂຄວິດ-19 ພວມແຜ່ລະບາດຢ່າງກ້ວາງຂວາງອອກສູ່ຫຼາຍປະເທດໃນໂລກ.
ໃນສະພາບການໂລກ ສືບຕໍ່ປະເຊີນໜ້າກັບບັນດາຄວາມຫຍຸ້ງຍາກຍ້ອນໂຣກລະບາດກໍ່ຂຶ້ນ, ການຮ່ວມແຮງຮ່ວມໃຈ, ແບ່ງປັນຂອງອາຊຽນ, ບັນດາຄວາມພະຍາຍາມຂອງແຕ່ລະປະເທດສະມາຊິກ ອາຊຽນ, ໃນນັ້ນມີ ຫວຽດນາມ ຊຶ່ງບໍ່ພຽງແຕ່ສະແດງໃຫ້ເຫັນຈິດໃຈຄວາມສາມັກຄີດ້ວຍຫຼາຍຮູບຫຼາຍແບບເທົ່ານັ້ນ ແຕ່ຫາກຍັງແມ່ນກໍາລັງແຮງແຫ່ງຄວາມໄວ້ເນື້ອເຊື່ອໃຈອີກດ້ວຍ ຊ່ວຍໃຫ້ປະຊາຊົນມີຄວາມໄວ້ເນື້ອເຊື່ອໃຈຕໍ່ການຊີ້ນຳ-ນຳພາຂອງບັນດາລັດຖະບານ; ຊ່ວຍອາຊຽນ ກາຍເປັນຈຸດພົ້ນເດັ່ນໃນວຽກງານປ້ອງກັນ, ສະກັດກັ້ນໂຣກລະບາດໂຄວິດ-19 ແລະ ຢັ້ງຢືນພາບພົດ ແລະ ທີ່ຕັ້ງຂອງ ຫວຽດນາມ ໃນບົດບາດເປັນປະທານ ອາຊຽນ 2020, ຊຸກຍູ້ການຮ່ວມມືໃນພາກພື້ນ ແລະ ສາກົນ ເພື່ອຮັບມືກັບໂຣກລະບາດ. ເປັນທີ່ຈະແຈ້ງແລ້ວວ່າ: ໂຣກລະບາດໂຄວິດ-19 ແມ່ນສິ່ງທ້າທາຍ ແຕ່ກໍແມ່ນກາລະໂອກາດເພື່ອໃຫ້ບັນດາປະເທດຍັບເຂົ້າໃກ້ກັນກວ່າ, ຜູກພັນກັນກວ່າ ພ້ອມກັນແບ່ງປັນບົດຮຽນກ່ຽວກັບການຮັບມື ກໍຄືສະແດງໃຫ້ເຫັນບົດບາດເປັນໃຈກາງຂອງອາຊຽນ ໃນການແກ້ໄຂບັນດາສິ່ງທ້າທາຍແບບໃໝ່.
ສໍາລັບຫວຽດນາມ ໃນຖານະບົດບາດຮັກສາການຮ່ວມມືໃນ ອາຊຽນ. ໃນຖານະບົດບາດເປັນປະທານອາຊຽນ 2020, ປະເທດເຈົ້າພາບຂອງກອງປະຊຸມສຸດຍອດພິເສດ ອາຊຽນ ແລະ ອາຊຽນ+3 ກ່ຽວກັບການຮັບມືກັບໂຣກລະບາດໂຄວິດ-19, ບັນດາແນວຄວາມຄິດ, ຂໍ້ສະເໜີ, ຫົວຂໍ້ຂອງ ຫວຽດນາມ ທີ່ໄດ້ຍົກອອກມາ ລ້ວນແຕ່ໄດ້ຮັບຄວາມເຫັນດີເຫັນພ້ອມ. ພ້ອມກັນນັ້ນ, ເລື່ອງແບ່ງປັນບັນດາບົດຮຽນອັນລ້ຳຄ່າ, ແບ່ງປັນຂໍ້ມູນດ້ານສາທາລະນະສຸກ ໃນການປິ່ນປົວພະຍາດ; ການໜູນຊ່ວຍອຸປະກອນການແພດໃຫ້ແກ່ການປ້ອງກັນ, ສະກັດກັ້ນໂຣກລະບາດ ຫຼື ຊ່ວຍເຫຼືອກັນປົກປ້ອງພົນລະເມືອງ ແລະ ອື່ນໆ ແມ່ນບັນດາປັດໄຈທີ່ຈຳເປັນ ເພື່ອຊ່ວຍໃຫ້ ອາຊຽນ ແລະ ບັນດາຄູ່ຮ່ວມມື ຜ່ານຜ່າຄວາມຫຍຸ້ງຍາກໃນປັດຈຸບັນ ແລະ ສິ່ງສຳຄັນທີ່ສຸດ ແມ່ນຖືປະຊາຊົນເປັນໃຈກາງ, ບັນດາຂໍ້ລິເລີ່ມທີ່ຍົກອອກມາ ຕ້ອງໄດ້ຮັບການສະໜັບສະໜູນ, ເຫັນດີເຫັນພ້ອມ, ຮ່ວມແຮງຮ່ວມໃຈການກະທຳຈາກປະຊາຊົນ ຈຶ່ງສາມາດເສີມຂະຫຍາຍປະສິດທິຜົນໃນການປ້ອງກັນ, ສະກັດກັ້ນໂຣກລະບາດໄດ້.
ໃນສະພາບການໂຣກລະບາດໂຄວິດ-19 ພວມແຜ່ລະບາດອອກສູ່ທົ່ວໂລກ, ຫວຽດນາມ ພວມຢັ້ງຢືນໄດ້ບົດບາດເປັນປະທານ ອາຊຽນ ແລະ ຖືນີ້ແມ່ນກາລະໂອກາດ ເພື່ອນຳມາຊຶ່ງຄວາມສາມັກຄີ ແລະ ການຮ່ວມມືຮອບດ້ານ ລະຫວ່າງ 10 ປະເທດສະມາຊິກ ອາຊຽນ. ພາຍຫຼັງຖະແຫຼງການຮ່ວມ ອາຊຽນ ເພີ່ມທະວີການຮ່ວມມືໃຫ້ບຸລິມະສິດຮັບມືກັບໂຣກລະບາດ ຂອງອາຊຽນ ໂດຍຫວຽດນາມ ເປັນເຈົ້າພາບຈັດຕັ້ງຂຶ້ນໃນຖານະເປັນປະທານ ອາຊຽນ, ວັນທີ 14 ກຸມພາຜ່ານມາ, ພາຍໃຕ້ບົດບາດປະທານ ອາຊຽນ, ກອງປະຊຸມລັດຖະມົນຕີການຕ່າງປະເທດພິເສດ ຈີນ - ອາຊຽນ ກໍໄດ້ຈັດຂຶ້ນຢູ່ນະຄອນຫຼວງວຽງຈັນ ແຫ່ງ ສປປ ລາວ ໃນວັນທີ 20 ກຸມພາຜ່ານມາ, ເພື່ອເພີ່ມທະວີການຮ່ວມມື ແລະ ຮັບມືກັບໂຣກລະບາດໂຄວິດ-19.
ໃນຄັ້ງນີ້, ການຈັດຕັ້ງ 2 ກອງປະຊຸມສຸດຍອດພິເສດກ່ຽວກັບການຮັບມືກັບໂຣກລະບາດໂຄວິດ-19 ສຳເລັດຜົນ, ບໍ່ພຽງແຕ່ສືບຕໍ່ສະແດງໃຫ້ເຫັນຈິດໃຈຕັ້ງໜ້າ, ຄວາມຮັບຜິດຊອບທີ່ມີຢູ່ແລ້ວຂອງ ຫວຽດນາມ ໃນການຮ່ວມມືພາຍໃນອາຊຽນ ເທົ່ານັ້ນ ແຕ່ຫາກຍັງສະແດງໃຫ້ເຫັນບົດບາດ “ການເຊື່ອມຕໍ່, ເປັນເຈົ້າການຮັບມື”, ຮັກສາການຮ່ວມມືຂອງ ອາຊຽນ ກັບບັນດາຄູ່ຮ່ວມມື. ຜ່ານກອງປະຊຸມສຸດຍອດພິເສດ ອາຊຽນ ແລະ ອາຊຽນ+3 ກ່ຽວກັບການຮັບມືກັບໂຣກລະບາດໂຄວິດ-19, ຫວຽດນາມ, ອາຊຽນ ແລະ ບັນດາປະເທດຄູ່ຮ່ວມມື ໄດ້ພ້ອມກັນເສີມສ້າງນ້ຳໃຈຄວາມສາມັກຄີ, ແບ່ງປັນ, ຮ່ວມມື, ຕັດສິນໃຈເອົາຊະນະຕໍ່ໂຣກລະບາດໂຄວິດ-19ໃຫ້ໄດ້.