ໜັງສືພິມ ປະຊາຊົນ

ຈີນ ໝັ້ນໃຈສຳເລັດເປົ້າໝາຍລຶບລ້າງຄວາມທຸກຍາກ ຮອບດ້ານຕາມກຳນົດ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 27/04/2020 10:10:42 ຈຳນວນຢ້ຽມຊົມ 312 ຄັ້ງ

ອີງຕາມແຜນການ, ປີນີ້ ຈີນຈະສຳເລັດໜ້າທີ່ລຶບລ້າງຄວາມທຸກຍາກທີ່ສຸດ ແລະ ບັນລຸການສ້າງເປັນສັງຄົມທີ່ອີ່ມໜຳສຳລານຢ່າງຮອບດ້ານ. ແຕ່ເນື່ອງຈາກ ສະພາບພະຍາດໂຄວິດ-19 ທີ່ເກີດຂຶ້ນຢ່າງກະທັນຫັນ ໄດ້ສ້າງຄວາມຫຍຸ້ງຍາກໃຫ້ແກ່ເປົ້າໝາຍດັ່ງກ່າວ.
ຂ່າວສານຊີອາໄອລາຍງານວ່າ: ໃນໄລຍະທີ່ ທ່ານ ສີຈິ້ນຜິງ ປະທານປະເທດຈີນລົງໄປກວດກາຢູ່ແຂວງສານຊີ ລະຫວ່າງ ວັນທີ 20 - 23 ເມສາຜ່ານມາ, ໄດ້ຊີ້ແຈງທິດທາງ ແລະ ເສັ້ນທາງໃຫ້ແກ່ການນຳໃຊ້ມາດຕະການເພື່ອລຶບລ້າງຄວາມທຸກຍາກເຊັ່ນ: ລຶບລ້າງຄວາມທຸກຍາກດ້ວຍຜະລິດຕະກຳ, ລຶບລ້າງຄວາມທຸກຍາກດ້ວຍການປະກອບອາຊີບ, ລຶບລ້າງຄວາມທຸກຍາກດ້ວຍສາທາລະນະສຸກ, ລຶບລ້າງຄວາມທຸກຍາກດ້ວຍການສຶກສາ ແລະ ອື່ນໆ, ໄດ້ສົ່ງສັນຍານອັນຈະແຈ້ງວ່າ: ຈີນ ຈະສຳເລັດໜ້າທີ່ໃນການລຶບລ້າງຄວາມທຸກຍາກຕາມເວລາກຳນົດ ແລະ ສະແດງໃຫ້ເຫັນທັດສະນະດ້ານການກຳອຳນາດ ແລະ ຈິດໃຈທີ່ “ຖືປະຊາຊົນເປັນຫຼັກ” ຂອງພັກກຳອຳນາດຂອງຈີນ.
ການເລືອກສະຖານທີ່ໄປກວດກາວຽກງານດ້ານການລຶບລ້າງຄວາມທຸກຍາກ ໂດຍ ທ່ານ ສີຈິ້ນຜິງ ໃນຄັ້ງນີ້ ແມ່ນມີຄວາມໝາຍເລິກເຊິ່ງ. ໃນວັນທີ 20 - 21 ເມສາ, ທ່ານ ສີຈິ້ນຜິງ ໄດ້ໄປຮອດສອງເມືອງທີ່ຕັ້ງຢູ່ເຂດພູດອຍຊີນຫຼິງ ແລະ ຕ້າປ່າຊ່ານ. ເຂດດັ່ງກ່າວເປັນໜຶ່ງໃນເຂດທຸກຍາກພິເສດ 14 ແຫ່ງທີ່ໂຮມສູນກັນ, ເປັນເຂດທີ່ທຸກຍາກທີ່ສຸດ. ທ່ານ ສີຈິ້ນຜິງ ໄດ້ໄປກວດກາຂະແໜງການຜະລິດເຫັດຫູໜູ ແລະ ສວນປູກຊາ, ຍັງໄດ້ໄປຢາມຄຸ້ມຊຸມຊົນ, ໂຮງໝໍຄລີນິກ ແລະ ໂຮງຮຽນໃຈກາງຢູ່ເມືອງເກົ່າ ໂດຍສະເພາະ, ເພື່ອເຮັດໃຫ້ “3 ຮັບປະກັນ” ໄດ້ຮັບການຈັດຕັ້ງປະຕິບັດຢ່າງແທ້ຈິງ. ການເຮັດໃຫ້ປະຊາຊົນຜູ້ທຸກຍາກບໍ່ເປັນຫ່ວງນໍາອາຫານການກິນ ແລະ ເຄື່ອງນຸ່ງຫົ່ມຢ່າງໜັກແໜ້ນ, ການສຶກສາພາກບັງຄັບ, ການປິ່ນປົວພື້ນຖານ, ຄວາມປອດໄພດ້ານເຮືອນຢູ່ມີການຮັບປະກັນ (ເວົ້າໂດຍຫຍໍ້ຄື: 2 ບໍ່ເປັນຫ່ວງ 3 ຮັບປະກັນ), ນີ້ເປັນມາດຕະຖານທີ່ໝັ້ນໜຽວບໍ່ປ່ຽນແປງຂອງຈີນ ໃນການແກ້ໄຂຄວາມທຸກຍາກ.
ໃນກອງປະຊຸມກົມການ ເມືອງສູນກາງພັກກອມມູນິດຈີນ ໂດຍ ທ່ານ ສີຈິ້ນຜິງ ເປັນປະທານ ໄດ້ສະເໜີ “6 ຮັບປະກັນ” ຄື: ຮັບປະກັນການປະກອບອາຊີບຂອງປະຊາຊົນ, ຮັບປະກັນຊີວິດການເປັນຢູ່ພື້ນຖານ, ຮັບປະກັນຕະຫຼາດ, ຮັບປະກັນຄວາມປອດໄພດ້ານອາຫານ ແລະ ພະລັງງານ, ຮັບປະກັນຄວາມໝັ້ນທ່ຽງຂອງຕ່ອງໂສ້ສະໜອງ, ຮັບປະກັນການໝູນເດີນຂອງຂັ້ນຮາກ ຖານ. ພ້ອມກັນນັ້ນ, ກອງປະຊຸມ ຍັງໄດ້ສະເໜີນະໂຍບາຍ “6 ຮັກສາ”; ຮັກສາການປະກອບອາຊີບຂອງພົນລະເມືອງ, ຮັກສາຊີວິດການເປັນຢູ່ຂັ້ນພື້ນຖານ, ຮັກສາພາກສ່ວນຕົ້ນຕໍຂອງຕະຫຼາດ, ຮັກສາຄວາມປອດໄພດ້ານສະບຽງອາຫານ ແລະ ພະລັງງານ, ຮັກສາຄວາມໝັ້ນທ່ຽງຂອງຕ່ອງໂສ້ການຜະລິດ ແລະ ການສະໜອງ, ຮັກສາການດຳເນີນງານຂອງອົງການພື້ນຖານ. ໃນນັ້ນ, 2 ຮັບປະກັນທຳອິດກໍແມ່ນຮັບປະກັນການປະກອບອາຊີບ ແລະ ຊີວິດການເປັນຢູ່ຂັ້ນພື້ນຖານຂອງປະຊາຊົນ. ໃນການກວດກາວຽກງານໃນຄັ້ງນີ້ ທ່ານ ສີຈິ້ນຜິງ ຍັງໄດ້ໃຫ້ການຈັດວາງລະອຽດຕໍ່ວຽກງານລຶບລ້າງຄວາມທຸກຍາກໃນບາດກ້າວຕໍ່ໄປ.
ປິນີ້, ຈີນ ບັນລຸເປົ້າໝາຍຫຼຸດພົ້ນອອກຈາກຄວາມທຸກຍາກຢ່າງຮອບດ້ານຕາມເວລາກໍານົດ, ໝາຍຄວາມວ່າ: ຈີນ ບັນລຸເປົ້າໝາຍຫຼຸດຜ່ອນຄວາມທຸກຍາກທີ່ລະບຸໄວ້ໃນວາລະການພັດທະນະແບບຍືນຍົງ ປີ 2030 ຂອງອົງການສະຫະປະຊາຊາດ ສໍາເລັດລ່ວງໜ້າ 10 ປີ ຊຶ່ງມີຄວາມໝາຍທີ່ສໍາຄັນຕໍ່ທົ່ວໂລກ.