ເຈົ້າແຂວງໄຊຍະບູລີ ລົງຊຸກຍູ້ການປູກ-ການລ້ຽງ ຢູ່ເມືອງແກ່ນທ້າວ ແລະ ບໍ່ແຕນ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 29/04/2020 16:09:32 ຈຳ​ນວນ​​ຢ້ຽມ​ຊົມ 2709 ຄັ້ງ

  ທ່ານ ພົງ​ສະຫວັນ ສິດ​ທະ​ວົງ ເຈົ້າແຂວງ ໄຊ​ຍະ​ບູ​ລີ ພ້ອມ​ດ້ວຍ​ຄະນະ​ໄດ້​ລົງ​ຊຸກຍູ້​ຂະບວນ​ການ​ປູກ​-​ການ​ລ້ຽງ​ຂອງ​ປະຊາຊົນ​ເຂດ​ບ້ານຫ້ວຍ​ເລິກ​-​ວັງ​ປາ, ເມືອງ ແກ່ນ​ທ້າວ ແລະ ເຂດ​ບ້ານບໍ່​ສານ​-​ຕົ້ນ​ຕານ, ເມືອງບໍ່​ແຕນ, ແຂວງ ໄຊ​ຍະ​ບູ​ລີ ໃນ​ວັນ​ທີ 28-29 ເມສາ​ນີ້.

  ໂອກາດ​ດັ່ງກ່າວ ທ່ານ ເຈົ້າແຂວງ ໄດ້​ຮັບ​ຟັງ​ການ​ລາຍ​ງານ​ສະພາບ​ການ​ເກັບ​ກ່ຽວ​ຜົນ​ຜະລິດ​ລະດູແລ້ງ ແລະ ການ​ກະກຽມ​ຜະລິດ​ລະດູ​ປີ, ພ້ອມ​ທັງ​ໄດ້​ຮັບ​ຟັງ​ການ​ຕ້ານ ແລະ ສະກັດ​ກັ້ນ ການ​ແຜ່​ລະບາດ​ຂອງ​ພະຍາດ ໂຄ​ວິດ-19 ຂອງ​ແຕ່​ລະ​ບ້ານ ໂດຍ​ລວມ​ແລ້ວ​ການ​ເກັບ​ກູ້​ຜົນ​ຜະລິດ​ພືດ​ລະ ດູແລ້ງ​ແມ່ນ​ສໍາ​ເລັດ​ເກືອບ 100%, ພືດ​ທີ່​ປະຊາຊົນ​ປູກ​ສ່ວນ​ໃຫຍ່​ແມ່ນ ເຂົ້ານາແຊງ, ສາລີ​ຫວານ, ຖົ່ວດິນ, ໝາກແຕງ, ໝາກ​ເຜັດ​-​ໝາກເຂືອ ແລະ ພືດ​ຜັກ​ຕ່າງໆ, ນອກ​ນີ້​ປະຊາຊົນ​ຍັງ​ໄດ້​ລ້ຽງສັດ​ປະເພດ, ໝູ, ປາ, ເປັດ​-​ໄກ່ ແລະ ກົບ ເພື່ອ​ຈໍາ​ໜ່າຍ​ໃນ​ໄລຍະ​ວິ​ກິດ​ໂຄ​ວິດ19, ປະຊາຊົນ​ໃນ​ຂົງເຂດ​ບ້ານ​ດັ່ງກ່າວ​ນີ້​ສາມາດ​ກຸ້ມ​ຕົນ​ເອງ, ມີ​ເຂົ້າ, ປາ​-​ອາຫານ​ໄວ້​ບໍ ລິໂພກ​ຢ່າງ​ພຽງ​ພໍ.

  ສ່ວນ​ການ​ກະກຽມ​ສູ່​ການ​ຜະລິດ​ລະດູ​ປີໆ​ນີ້, ປະຊາຊົນ​ໄດ້​ກະກຽມ​ດິນ​ສໍາ​ເລັດ 100%, ໄດ້​ລົງມື​ປູກ​ພືດ​ສະບຽງ​ອາ​ຫານ ​ສໍາ​ເລັ​ດຈໍາ​ນວນ​ໜຶ່ງ​ເຊັ່ນ: ເຂົ້າ ນາ​ປີ​ແມ່ນ​ຕົກ​ກ້າ​ສໍາ​ເລັດ 50-60%, ສາລີ​ຫວານ, ໝາກຖົ່ວ​ດິນ, ພືດ​ຜັກ ແລະ ອື່ນໆ, ພືດ​ເປັນ​ສິນຄ້າ​ແມ່ນ​ປູກ​ສໍາ​ເລັດ​ເກືອບ 100% ສ່ວນ​ຫຼາຍ​ປະຊາຊົນ​ແມ່ນ​ປູກ​ມັນຕົ້ນ, ສາລີ​ຫົວອາຫານ​ສັດ, ໝາກງາ ແລະ ອື່ນໆ, ນອກ​ນີ້​ປະຊາຊົນ​ຍັງ​ໄດ້​ຫັນ​ຈາກ​ການ​ປູກ​ຫຍ້າ​ລ້ຽງສັດ​ໃຫຍ່​ປະເພດ​ງົວ​-​ຄວາຍ​ແບບ​ເປັນ​ເດີ່ນ, ເປັນ​ທົ່ງ​ມາ​ເປັນ​ການ​ປູກ​ຫຍ້າ​ລ້ຽງ​ແບບ​ທອມ (ລ້ຽງ​ທອມ​ງົວ).

  ສໍາ​ລັບ​ການ​ຕ້ານ ແລະ ສະກັດ​ກັ້ນ​ພະຍາດ ໂຄ​ວິດ-19 ແຕ່​ລະ​ບ້ານ​ແມ່ນ​ໄດ້​ປະຕິບັດ​ຕາມ​ຄໍາ​ສັ່ງ 06/ນຍ ຢ່າງ​ເຂັ້ມ​ງວດ, ໂດຍ​ໄດ້​ນໍາ​ເອົາ​ແຮງ​ງານ​ທີ່​ກັບ​ຈາກ​ປະເທດ​ໄທ ແລະ ຕ່າງ​ແຂວງ ເຂົ້າ​ສູນ​ກັກ​ກັນ​ເປັນ​ເວລາ 14 ວັນ, ປັດຈຸບັນ​ແຮງ​ງານ​ເຫຼົ່ານັ້ນ​ໄດ້​ອອກ​ຈາກ​ສູນ​ກັບ​ສູ່​ຄອບຄົວ​ທັງ​ໝົດ​ແລ້ວ.

  ໂອກາດ​ດັ່ງກ່າວ ທ່ານ ພົງ​ສະຫວັນ ສິດ​ທະ​ວົງ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ປະຊາຊົນ​ແຕ່​ລະ​ບ້ານ​ທີ່​ໄດ້​ເອົາໃຈໃສ່​ໃນ​ການ​ຜະລິດ​ພືດ​ສະບຽງ​ອາຫານ​ເພື່ອ​ກຸ້ມ​ຕົນ​ເອງ​ໃນ​ໄລຍະ​ການ​ລະບາດ​ຂອງ​ພະຍາດ ໂຄ​ວິດ-19 ແລະ ໄດ້​ພ້ອມ​ກັນ​ເປັນ​ເຈົ້າ​ການ, ເຂັ້ມ​ງວດ ແລະ ຈັດ​ຕັ້ງ​ປະຕິບັດ​ຕາມ​ຄໍາ​ສັ່ງ 06/ນຍ ຢ່າງ​ມີ​ປະສິດ​ທິ​ຜົນ​ໃນ​ການ​ຕ້ານ ແລະ ສະກັດ​ກັ້ນ​ພະຍາດໂຄ​ວິດ-19 ແລະ ໄດ້​ຮຽກຮ້ອງ​ໃຫ້​ປະຊາຊົນ​ແຕ່​ລະ​ບ້ານ​ຈົ່ງ​ສືບ​ຕໍ່​ທໍາ​ການ​ຜະລິດ ດ້ວຍ​ການ​ປູກ​ພືດ​ສະບຽງ​ອາຫານ, ພື​ດອຸດ​ສາ​ຫະ​ກໍາ​ເປັນ​ສິນຄ້າ, ລ້ຽງສັດ, ສືບຕໍ່​ເກັບ​ກູ້​ຜົນ​ຜະລິດ​ລະດູແລ້ງ​ໃຫ້​ສໍາ​ເລັດ ແລະ ກະກຽມ​ສູ່​ການ​ຜະລິດ​ລະດູ​ປີ​ໃຫ້​ທ່ວງ​ທັນ​ກັບ​ລະດູ​ການ, ພ້ອມ​ດຽວ​ກັນ​ກໍ​ຕ້ອງ​ວາງ​ແຜນ​ປູກ​ໄມ້​ໃຫ້​ເປັນ​ປ່າ​ໃນ​ຂອບ​ເຂດ​ປ່າ​ຕົ້ນ​ນໍ້າ ເພື່ອ​ຮັກສາ​ແຫຼ່ງ​ນໍ້າ​ຕາມ​ຫ້ວຍ​ຕ່າງໆ​ບໍ່​ໃຫ້​ບົກ​ແຫ້ງ, ເອົາໃຈໃສ່​ຕໍ່​ບັນຫາ​ປະກົດ​ການ​ຫຍໍ້ທໍ້​ພາຍ​ໃນ​ບ້ານ​ເປັນຕົ້ນ​ແມ່ນ​ສຶກສາ​ອົບຮົມ​ລູກ​ຫຼານ​ໃຫ້​ຫ່າງ​ໄກ​ຈາກ​ຢາ​ເສບ​ຕິດ, ຈາກ​ນັ້ນ​ທ່ານ​ເຈົ້າແຂວງ ພ້ອມ​ຄະນະ​ໄດ້​ລົງຢ້ຽມຢາມ ເບິ່ງ​ການ​ປູກ​ຫຍ້າ​ທອມ​ງົວ ແລະ ສະຖານທີ່​ຜະລິດ​ຂອງ​ປະຊາຊົນ​ຕື່ມ​ອີກ.

(ຂ່າວ: ອຸ່ນ​ເຮືອນ ໂພທິ​ລັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110