ຫົວ​ຂໍ້ : ປະທານ ສນຊ ໂອ້ລົມປະຊາຊົນບ້ານຈັນສະຫວ່າງ ເມືອງສີໂຄດຕະບອງ

ເຜີຍ​ແຜ່​ໂດຍ​: admin ເວ​ລາ: 25/12/2019 16:18:56 ຈຳ​ນວນ​ຜູ້​ເຂົ້າ​ຢ້ຽມ​ຊົມ 110 ຄັ້ງ

ທ່ານ ໄຊ​ສົມ​ພອນ ພົມວິຫານ ປະທານສູນ​ກາງ​ແນວ​ລາວ​ສ້າງ​ຊາດ ໄດ້​ໃຫ້ກຽດ​ໂອ້​ລົມ​ປະຊາຊົນ​ລາວ​ບັນດາເຜົ່າ ທີ່​ບ້ານຈັນ​ສະຫວ່າງ ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ໃນ​ວັນ​ທີ 21 ທັນວາ​ຜ່ານ​ມາ​ນີ້ ຊຶ່ງມີ​ທ່ານ ບຸນ​ມີ ໄຊ​ຍະ​ວົງ ຮອງ​ເຈົ້າເມືອງໆ ສີ​ໂຄດ​ຕະບອງ ພ້ອມ​ດ້ວຍ​ພໍ່​ແມ່​ປະຊາຊົນ ບ້ານ ຈັນ​ສະຫວ່າງ ເຂົ້າ​ຮ່ວມ​ຮັບ​ຟັງ 266 ຄົນ. ທ່ານນາຍບ້ານໆຈັນ​ສະ ຫວ່າງ ໄດ້​ລາຍ​ງານ​ສະພາບ​ຈຸດ​ພິເສດ​ໃນ​ການເຄື່ອນໄຫວ​ວຽກ​ງານ​ຂອງ​ບ້ານ​ໂດຍ​ຫຍໍ້​ໃຫ້​ທ່ານ ປະທານ ສນຊ ພ້ອມ​ດ້ວຍ​ຄະນະ​ໄດ້​ຮັບ​ຊາບ; ບ້ານ​ຈັນ​ສະຫວ່າງ ມີ​ເນື້ອທີ່​ທັງ​ໝົດ 362 ເຮັກຕາ, ປະກອບ​ມີ 124 ໜ່ວຍ, ມີ 1.578 ຫຼັງຄາ​ເຮືອນ, ມີ 1.866 ຄອບຄົວ, ມີ​ພົນລະເມືອງ​ທັງ​ໝົດ 7.730 ຄົນ, ຍິງ 4.040 ຄົນ ປະກອບ ມີ 11 ຊົນເຜົ່າ, ອາຊີບ​ສ່ວນ​ຫຼາຍ​ແມ່ນ​ພະນັກງານ​ລັດ -ເອກະ​ຊົນ ກວມ​ເອົາ 50% ນອກຈາກ​ນັ້ນ, ແມ່ນ​ຄ້າ​-​ຂາຍ, ກໍາ​ມະກອນ​ຮັບຈ້າງ​ທົ່ວ​ໄປ ແລະ ອາຊີບ​ອື່ນ​ຈໍາ​ນວນ​ໜຶ່ງ. ທ່າແຮງ​ຂອງ​ບ້ານ​ປະກອບ​ມີ ເສັ້ນທາງ​ແຫ່ງ​ຊາດ​ເລກ​ທີ 11 ຕັດ​ຜ່ານ, ປະຊາຊົນ​ໄດ້​ນໍາ​ໃຊ້​ລະບົບ​ໄຟຟ້າ, ນໍ້າ​ປະປາ, ໂຮງ ຮຽນ​ປະຖົມ​ສົມບູນ 1 ແຫ່ງ, ຕະຫຼາດ​ຊຸມ​ຊົນ 1 ແຫ່ງ, ມີ​ວັດ 3 ແຫ່ງ ແລະ ມີ​ໂບດ 1 ແຫ່ງ. ໃນ​ໂອກາດ​ນີ້, ທ່ານປະ ທານ ສນຊ ໄດ້​ເປັນ​ກຽດ​ໂອ້​ລົມ ກ່ອນ​ອື່ນ​ໝົດ​ທ່ານ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ກັບ​ອົງການ​ປົກຄອງ​ບ້ານ ແລະ ເມືອງ ທີ່​ຍາມ​ໃດ​ກໍ​ໄດ້​ໃກ້​ຊິດ​ຕິດ​ແທດ​ກັບ​ປະຊາຊົນ ທີ່​ສາມາດ​ຍາດ​ໄດ້ຜົນ​ງານ​ດີເດັ່ນ​ຫຼາຍດ້ານ. ພ້ອມນີ້, ທ່ານ ໄດ້​ຮຽກຮ້ອງ​ໃຫ້​ອົງການ​ປົກຄອງ ເມືອງ​-​ບ້ານ ເອົາ ໃຈໃສ່​ທາງ​ດ້ານ​ການເມືອງ​ແນວ​ຄິດ, ອົງການ​ປົກຄອງ​ສືບຕໍ່​ເອົາໃຈໃສ່​ສຶກສາ​ອົບຮົມ​ການເມືອງ​ແນວ​ຄິດ​ໂດຍ​ນໍາ​ເອົາ​ບັນດາ​ເອກະ​ສານ​ສໍາ​ຄັນ​ຕ່າງໆ ຂອງ​ພັກ​-​ລະບຽບ​ກົດໝາຍ​ຂອງ​ລັດ ແລະ ມະ​ຕິ​ຄໍາ​ສັ່ງ​ຕ່າງໆ​ຂອງ​ຂັ້ນ​ເທິງ​ລົງ​ເຜີຍແຜ່​ໃຫ້​ປະຊາຊົນ​ພາຍ​ໃນ​ບ້ານ​ໄດ້​ເຊື່ອມ​ຊຶມ ແລະ ເຂົ້າໃຈ​ຢ່າງ​ທົ່ວ​ເຖິງ​ມີ​ຄວາມ​ເອກະ​ພາບ, ວຽກ​ງານ​ປ້ອງ​ກັນ​ຊາດ​-​ປ້ອງ​ກັນ​ຄວາມ​ສະຫງົບ ໃຫ້​ສືບຕໍ່​ເອົາໃຈໃສ່​ຊີ້​ນໍາ-ນໍາ​ພາ ປກສ-ປກຊ ບ້ານ​ເຄື່ອນ​ໄຫວ​ຈັດ​ຕັ້​ງກໍາ​ລັງ​ເຄື່ອນ​ໄຫວ​ເວນຍາມ​ຕາມ​ຈຸດ​ຫຼໍ່​ແຫຼມ​ໃນ​ຂອບ​ເຂດ​ຄວາມ​ຮັບຜິດຊອບ​ຂອງ​ຕົນ​ຢ່າງ​ເປັນ​ປົກກະຕິ, ພາກສ່ວນ​ທີ່​ກ່ຽວຂ້ອງ​ໄດ້​ເອົາໃຈໃສ່​ແກ້​ໄຂ​ປະກົດ​ການ​ຫຍໍ້ທໍ້​ໂດຍ​ສະເພາະ​ແມ່ນ​ບັນຫາ​ຢາ​ເສບ​ຕິດ, ຂີ້ລັກ​ງັດ​ແງະ ໃຫ້​ຫຼຸດ​ໜ້ອຍ​ຖອຍ​ລົງ​ເທື່ອ​ລະ​ກ້າວ. ດ້ານ​ເສດ​ຖະ​ກິດ​-​ສັງຄົມ ໃຫ້​ສືບ​ຕໍ່​ນໍາ​ພາ​ປະຊາຊົນ​ສ້າງ​ເສດຖະກິດ​ຄອບຄົວ ເພື່ອ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃຫ້​ດີ​ຂຶ້ນ​ເທື່ອ​ລະ​ກ້າວ; ດ້ານ​ການ​ສຶກສາ ໃຫ້​ສືບຕໍ່​ຊີ້​ນໍາໆ ພາ​ພໍ່​ແມ່​ປະຊາ​ຊົນ​ນໍາ​ລູກ​ຫຼານ​ໃນ​ເກນ​ອາຍຸ ໃຫ້​ໄດ້​ເຂົ້າ​ໂຮງຮຽນ, ປຸກລະດົມ​ທຸກ​ຄອບຄົວ​ຮັກສາ​ອະນາໄມ 3 ສະອາດ ໃຫ້​ເປັນ​ປົກກະຕິ ແລະ ໃຫ້​ເອົາໃຈໃສ່​ຕໍ່​ວຽກ​ງານ​ສັກ​ຢາ​ກັນ​ພະຍາດ​ແມ່ຍິງ ແລະ ເດັກ​ນ້ອຍ. (ຂ່າວ​-​ພາບ: ສນຊ)

 

ສະ​ແດງ​ຄວາມ​ຄິດ​ເຫັນ​ຕໍ່​ບົດ​ຂ່າວ


ລາຍ​ການ​ສະ​ແດງ​ຄວາມ​ຄິດ​ເຫັນ​ຂອງ​ຂ່າວ

ລຳ​ດັບ ​​ຄວາມ​ຄິດ​ເຫັນຕໍ່​ກັບ​ຂ່າວ ​ເວ​ລາ​


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110