ບາງບົດຮຽນວຽກງານແນວຄິດຂອງພັກ

ເຜີຍ​ແຜ່​ໂດຍ​: ທ່ານ ສິດ​ທິ​ພອນ ຣາ​ຊະ​ພົນ ເວ​ລາ: 08/05/2020 09:47:07 ຈຳ​ນວນ​​ຢ້ຽມ​ຊົມ 356 ຄັ້ງ

ເປັນ​ເວລາ​ກວ່າ​ຫົກ​ທົດສະ​ ວັດ​ທີ​ຜ່ານມາ ນັບ​ແຕ່​ມື້​ພັກ​ເຮົາ​ ໄດ້​ຮັບ​ການ​ສ້າງຕັ້ງ​ຂຶ້ນ (22/ 3/1955), ພັກ​ເຮົາ​ໄດ້​ນຳພາ​ປະຊາຊົນ ຕໍ່ສູ້​ຢ່າງ​ລຽນ​ຕິດ ເພື່ອ​ຈຸດໝາຍ​ເອກະລາດ ແຫ່ງ​ຊາດ, ປະຊາທິປະໄຕ ແລະ ສັງຄົມ ນິຍົມ. ໃນ​ຂະບວນ​ວິວັດ​ແຫ່ງ​ການ​ນຳພາ​ການປະຕິວັດ​ນັ້ນ, ພັກ​ໄດ້​ຖື​ເອົາ​ວຽກ​ງານ​ແນວ​ຄິດ ເປັນ​ວຽກ​ທີ່​ສຳຄັນ​ຂອງ​ຕົນ. ວຽກ​ງານ​ແນວຄິດ​ຂອງ​ພັກ​ໄດ້​ປະກອບສ່ວນ​ອັນ​ສຳຄັນ ເຂົ້າ ໃນ​ໄຊຊະນະ ອັນ​ສະຫວ່າງ​ສະ ໄຫວ​ຂອງ​ພັກ ແລະ ປະຊາຊົນ​ລາວ​ເຮົາ. ບັນດາ​ບົດຮຽນ​ອັນ ອຸດົມສົມບູນ​ຂອງ​ວຽກ​ງານ​ແນວ​ຄິດ​ຂອງ​ພັກ ກວ່າ​ຫົກ​ທົດ​ສະ​ວັດ​ຜ່ານ​ມາຄວນ​ໄດ້​ສະຫຼຸບຢ່າງ​ເລິກເຊິ່ງ ເພື່ອ​ປະກອບສ່ວນ​ກໍ່ສ້າງ​ທິດສະ​ດີ​ກ່ຽວ​ກັບ​ວຽກ​ງານແນວ​ຄິດ ເພື່ອ​ໝູນ​ໃຊ້ ແລະ ເສີມ​ຂະຫຍາຍ​ເຂົ້າ​ໃນ​ໄລຍະໃໝ່, ປະຕິບັດ​ໜ້າທີ່​ປະຫວັດສາດ, ປົກ​ປັກ​ຮັກສາ​ເອກະລາດ​ແຫ່ງ​ຊາດ, ສິດ​ເປັນ​ເຈົ້າ​ປະເທດ​ຊາດ, ກໍ່ສ້າງ ແລະ ປັບປຸງ​ລະບອບ​ປະຊາ​ທິ​ປະ ໄຕ​ປະຊາຊົນ​ກ້າວ​ຂຶ້ນ​ສັງຄົມ​ນິຍົມ​ໃຫ້​ສຳເລັດຜົນ. ນີ້​ເປັນ​ວຽກ​ງານ​ໃຫຍ່, ຮຽກຮ້ອງ​ຕ້ອງ​ມີການ​ຄົ້ນຄວ້າ​ຢ່າງ​ເລິກເຊິ່ງ ຕິດ​ພັນ​ກັບ​ການສະຫຼຸບ​ການ​ກໍ່ສ້າງ ແລະ ຈັດ​ຕັ້ງ​ປະຕິບັດ ແນວທາງ​ຂອງ​ພັກ​ແຕ່​ລະ​ໄລຍະ​ຂອງ​ການປະຕິ​ວັດ. ດັ່ງນັ້ນ​ຈຶ່ງ​ສະເໜີ​ບາງ​ບົດຮຽນກ່ຽວ​ກັບ​ວຽກ​ງານ​ແນວ​ຄິດ​ຂອງ​ພັກ​ດັ່ງນີ້:
1. ວຽກ​ງານ​ແນວ​ຄິດ​ກ່ອນ​ອື່ນ​ໝົດ​ຕ້ອງຢຶດໝັ້ນ​ລັດທິ​ມາກ​-​ເລ​ນິນ ແລະ ແນວ​ຄິດ ໄກສອນ ພົມວິຫານ, ເລີ່ມ​ຈາກ​ພຶດຕິ​ກຳ​ເພື່ອໝູນ​ໃຊ້​ຢ່າງ​ປະດິດສ້າງ, ຮັບໃຊ້​ໃຫ້​ແກ່​ວຽກສ້າງ​ແນວ ທາງ​ການເມືອງ, ນຳ​ເອົາ​ແນວ ທາງ ເຂົ້າ​ສູ່​ຊີວິດ​ສັງຄົມ, ປະຕິ ບັດ​ໜ້າທີ່​ການເມືອງ​ໃນ​ແຕ່​ລະ​ໄລຍະ​ການ​ປະຕິ​ວັດ.
ພັກເຮົາ​ແມ່ນ​ຜົນ​ຂອງ​ການ​ສົມທົບ​ລັດທິ ຮັກ​ຊາດ​ຂອງ​ປະຊາຊົນ​ລາວ​ບັນດາເຜົ່າ ກັບຂະບວນ​ການ​ຕໍ່ສູ້​ຂອງ​ຊົນ​ຊັ້ນ​ກຳມະກອນ ແລະ ລັດທິ​ມາກ​-​ເລ​ນິນ ການ​ກຳເນີດ​ເກີດ​ຂຶ້ນ​ຂອງພັກ​ໄດ້​ສ້າງ​ບາດ​ລ້ຽວ​ໃໝ່​ຂອງ​ການ​ປະຕິວັດລາວ, ຢຸດຕິ​ວິ​ກິດ​ການ​ແນວທາງ​ກອບ​ກູ້​ປະເທດ​ຂອງ​ປະຊາຊົນເຮົາ ໃນ​ວິວັດທະນາ​ການ ການ​ປະຕິ ວັດ​ອັນ​ຍາວ​ນານ,  ປະທານ ໄກສອນ ພົມວິຫານ ໄດ້​ເອົາ​ລັດທິ​ມາກ​-​ເລ​ນິນ​ເປັນ ໃຈກາງ, ສືບ​ທອດ​ສິ່ງ​ຍອດ​ຍິ່ງ​ທີ່​ເປັນ​ມູນເຊື້ອຂອງ​ຊາດ ແລະ ແນວ​ຄິດ​ຂອງ​ມວນ​ມະນຸດ, ໝູນ​ໃຊ້​ເຂົ້າ​ສູ່​ພຶດຕິ​ກຳ​ການ​ປະຕິວັດ​ລາວ.  ນັ້ນແມ່ນ​ແນວ​ຄິດ​ເພື່ອ​ປົດ​ປ່ອຍ​ຊາດ, ປົດ​ປ່ອຍຊົນ​ຊັ້ນ, ປົດ​ປ່ອຍ​ສັງຄົມ ແລະ ປົດ​ປ່ອຍ ຄົນ; ກ່ຽວ​ກັບ​ເອກະລາດ​ແຫ່ງ​ຊາດ, ປະຊາທິ​ປະ​ໄຕ​ຕິດ​ພັນ​ກັບ​ສັງຄົມ​ນິຍົມ, ສົມທົບ​ກຳລັງ ແຮງ​ຂອງ​ຊາດ ກັບ​ກໍາ​ລັງ​ແຮງ​ຍຸກ​ສະໄໝ; ກຳລັງ​ແຮງ​ຂອງ​ປະຊາຊົນ, ກ້ອນ​ກຳລັງ​ສາມັກຄີ ແຫ່ງ​ຊາດ; ສິດ​ເປັນ​ເຈົ້າ​ຂອງ​ປະຊາຊົນ; ກໍ່ສ້າງ​ລັດ​ຂອງ​ປະ ຊາຊົນ, ໂດຍ​ປະຊາຊົນ, ເພື່ອ ປະຊາຊົນ, ການ​ປ້ອງ​ກັນ​ຊາດ, ປ້ອງ​ກັນ​ຄວາມສະຫງົບ​ທົ່ວ​ປວງ​ຊົນ; ການ​ກໍ່ສ້າງ​ກຳລັງ​ປະ ກອບ​ອາວຸດ​ປະຊາຊົນ; ການ​ຂະຫຍາຍ​ເສດ​ຖະກິດ​ສິນຄ້າ, ວັດທະນະທຳ​ມີ​ເອກະລັກ​ຂອງ​ຊາດ, ປະຊາຊົນ ແລະ ກ້າວ ໜ້າ; ການ​ຍົກສູງ​ຊີວິດ​ການ​ເປັນ​ຢູ່​ຂອງ​ປະຊາຊົນ​ທາງ​ດ້ານ ວັດຖຸ ແລະ ຈິດໃຈ; ຄຸນສົມບັດ​ປະຕິວັດ, ປະຢັດມັດ​ທະ​ຍັດ, ເສຍສະຫຼະ​ຢ່າງ​ບໍ່​ມີ​ຂອບ​ເຂດ, ຄວາມ​ເປັນ​ຫວ່ງ​ເປັນ​ໄຍ​ບຳລຸງ​ສ້າງ​ຮຸ່ນ​ຜູ້​ສືບທອດ​ປະຕິວັດ​ໃນ​ອະນາຄົດ; ກ່ຽວ​ກັບ​ການ​ກໍ່ ສ້າງ​ພັກ​ໃຫ້​ຂາວ​ສະອາດ, ໜັກ​ແໜ້ນ ແລະ ເຂັ້ມແຂງ, ພະນັກງານ​ສະມາຊິກ​ພັກ​ທັງ​ເປັນ​ຜູ້ນຳພາ​ທັງ​ແມ່ນ​ຜູ້​ຮັບ​ໃຊ້​ທີ່​ບໍລິສຸດ​ຂອງ​ປະຊາ​ຊົນ. ແນວ​ຄິດ ໄກສອນ ພົມວິຫານ ແມ່ນ​ມໍລະດົກ ດ້ານ​ຈິດໃຈ​ອັນ​ປະເສີດ​ຂອງ​ພັກ ແລະ ຂອງ ຊາດ​ລາວ ນັ້ນ​ກໍ​ແມ່ນ​ການ​ປະກອບສ່ວນ​ຂອງ ພັກ​ເຮົາ​ເຂົ້າ​ໃນ​ການ​ຂະຫຍາຍ​ລັດທິມາກ​-​ເລນິນ ແລະ ຂະບວນ​ການ​ປະຕິວັດ​ໂລກ.
 ໃຕ້​ແສງ​ສະຫວ່າງ​ຂອງ​ລັດທິ​ມາກ​-​ເລນິນ ແລະ ແນວ​ຄິດ ໄກສອນ    ພົມວິຫານ,  ພັກ​ເຮົາ​ໄດ້​ສ້າງ​ແນວທາງ​ການເມືອງ​ຂອງ​ຕົນ ຜ່ານ​ບັນດາ​ຍຸກ​ສະໄໝ​ຂອງ​ການ​ປະຕິວັດ; ພັກ​ເຮົາ​ໄດ້​ຢຶດໝັ້ນ ເອກະລາດ​ແຫ່ງ​ຊາດ, ປະຊາທິປະໄຕ ແລະ ສັງຄົມ​ນິຍົມ, ໂຄສະນາແນວທາງ, ແຜນ​ນະໂຍບາຍ​ຂອງ​ພັກ​ໃຫ້​ແກ່ພະນັກງານ, ສະມາຊິກພັກ, ມະຫາຊົນ​ຕິດພັນ​ກັບ​ການ​ປະ ຕິບັດ​ໜ້າທີ່​ການເມືອງ​ແຕ່​ລະ ໄລຍະໃນ​ຂະບວນ​ວິວັດ​ແຫ່ງ​ການ​ນຳ​ເອົາ​ແນວທາງ​ເຂົ້າ​ສູ່​ຊີວິດ​ສັງຄົມ, ພັກ​ເຮົາ​ຜ່ານ​ວຽກ​ງານ​ພຶດຕິ​ກຳ, ຫງ່ຽງ​ຫູ​ຟັງ​ຄວາມ​ຄິດ​ເຫັນ​ຂອງປະຊາຊົນ ເພື່ອ​ສະຫຼຸບ​ບົດຮຽນ, ເພີ່ມ​ເຕີມເຮັດ​ໃຫ້​ແນວທາງ, ແຜນ​ນະໂຍບາຍ​ຄົບ​ຖ້ວນ ແລະ ເໝາະ​ສົມ​ກັບ​ການ​ປະຕິວັດ​ປະເທດ​ເຮົາ.
ນັບ​ແຕ່​ມື້​ພັກ​ເຮົາ​ໄດ້​ກຳ ເນີດ​ເກີດ​ຂຶ້ນ​ມາ, ວຽກ​ງານ​ແນວ​ ຄິດ​ໄດ້​ຮັບ​ການ​ກຳນົດ​ເປັນວຽກ ງານ​ທຳອິດ ເພື່ອ​ເຜີຍແຜ່​ໂຄງ ການ​ການເມືອງ, ແນວທາງ​ຂອງ​ພັກ​ໃນ​ໝູ່​ປະຊາຊົນ​ຢ່າງ ກວ້າງຂວາງ ແລະ ເລິກເຊິ່ງ, ເຮັດ​ໃຫ້​ມະຫາຊົນ ມີ​ຄວາມ​ຕື່ນ​ຕົວ​ປະຕິວັດ, ເຂົ້າໃຈ​ແນວທາງ ກອບ​ກູ້​ປະເທດ​ຊາດ, ຂະຫຍາຍ​ຂະບວນ​ການຮັກ​ຊາດ​ຂອງ​ປະຊາຊົນຕາມ​ຫຼັກ​ໝັ້ນ​ຂອງ​ຊົນ ຊັ້ນ​ກຳມະກອນ, ໂຄສະນາ, ປຸກລະດົມ ແລະ ເຜີຍແຜ່​ໂທດ​ກຳ​ຂອງ​ພວກ​ປະຕິ​ການ, ອະທິ ບາຍ​ແນວທາງ​ກອບ​ກູ້​ປະເທດ ແລະ ປະຊາຊົນ ຕິດ​ພັນ​ກັບ​ການ​ຕໍ່ສູ້​ຂອງ​ມະຫາຊົນ, ຍາດ​ເອົາ ສິດ​ໃນ​ການ​ດຳລົງ​ຊີວິດ, ສິດ​ປະຊາ​ທິ​ປະ​ໄຕ... ດ້ວຍ​ການ ເຄື່ອນໄຫວ​ດ້ານ​ແນວ​ຄິດ ແລະ ການຈັດ​ຕັ້ງ​ຢ່າງ​ກວ້າງຂວາງ, ພັກ​ເຮົາ​ໄດ້​ປຸກລະດົມ ຂະບວນ​ປະຕິວັດ​ທົ່ວ​ປະເທດ​ລຸກ​ຮື່​ຂຶ້ນ​ຢຶດ​ອຳນາດ​ດ້ວຍ​ກຳລັງ​ປະ ກອບ​ອາວຸດ​ໃນ​ວັນ​ທີ 23 ສິງຫາ ແລະ  ປະກາດ​ປະເທດ​ລາວ​ເປັນ​ເອກະລາດ​ໃນ​ວັນ​ທີ 12 ຕຸລາ ປີ 1945.
ຜ່ານ​ແຕ່​ລະ​ໄລຍະ​ການ​ຂະຫຍາຍຕົວ, ຈາກ​ແນວລາວ​ ອິດສະຫຼະເຖິງ​ແນວ​ລາວຮັກ​ຊາດ, ຜ່ານ​ສອງ​ຂະບວນການ ​ຕໍ່ສູ້​ຕ້ານຈັກກະພັດ​ຝຣັ່ງ ແລະ ອາເມຣິກາຜູ້​ຮຸກ​ຮານ, ການ ເຄື່ອນໄຫວ​ດ້ານ​ແນວ​ຄິດ​ຂອງ​ພັກ​ເວລາໃດ​ກໍ​ໄດ້​ຢຶດໝັ້ນ​ລັດ ທິ​ມາກ​-​ເລ​ນິນ, ຢ່າງ​ເລິກເຊິ່ງ ຍ້ອນ​ແນວ​ນັ້ນພັກ​ເຮົາ​ຈຶ່ງ​ກຳນົດ​ແນວທາງ ການ​ປະຕິວັດ​ຢ່າງ​ຖືກຕ້ອງ, ໂຄສະນາ​ສຶກສາ ອົບຮົມ, ປຸກ​ລະດົມ​ພະນັກງານ, ສະມາຊິກ ພັກ ແລະ ປະຊາຊົນ, ເຊື່ອມ​ຊຶມ​ແນວທາງ, ຍົກ​ສູງ​ມາ ນະ​ຈິດ​ຕັດສິນ​ໃຈ​ເຮັດ​ສຳເລັດ​ໜ້າທີ່ການ​ປະຕິ​ວັດ.
ວຽກ​ງານແນວ​ຄິດ​ຂອງ​ພັກ​ໄດ້​ເປັນ​ປັດໄຈ​ສຳຄັນ​ອັນ​ທຳອິດ​ໃນ​ການ​ທົດ​ສອບ​ສິ່ງ​ທ້າທາຍ​ຕ່າງໆ ເພື່ອ​ຍາດ​ເອົາ​ໄຊຊະນະ​ຄັ້ງ​ປະຫວັດ​ສາດ​ໃນ​ການ​ຕີ​ເອົາ​ຊະນະ​ຈັກກະພັດ ໃຫຍ່​ສອງ​ໂຕ​ຄື: ຝຣັ່ງ ແລະ ອາເມລິກາ, ຍາດເອົາ​ເອກະ ລາດ ເສລີພາບ ມາ​ໃຫ້​ປະເທດ​ຊາດ, ນຳພາ​ປະເທດ​ສ້າງ ແລະ ຂະຫຍາຍ​ລະບອບປະຊາ ທິປະ ໄຕ​ປະຊາຊົນ​ກ້າວ​ຂຶ້ນ​ສູ່​ສັງຄົມ​ນິຍົມ.
ບັນດາ​ຄວາມ​ຜິດພາດ​ຂອງ​ພັກ​ເຮົາ​ໃນການ​ຟ້າວ​ຟັ່ງ​ນຳ​ເອົາ​ປະເທດ​ກ້າວ​ຂຶ້ນ​ສັງຄົມ ນິຍົມ​ໂດຍ​ກົງ​ນັ້ນແມ່ນ​ຍ້ອນ​ທັດສະນະ​ກົນ​ຈັກ, ຄຳ​ພີ, ຈົດ​ກ່າຍ​ເອົາ​ຂອງ​ຕ່າງປະເທດ, ຫຼ້າ​ຫຼັງທາງ​ດ້ານ​ທິດ​ສະ​ດີ, ບໍ່​ເລີ່ມ​ຈາກ​ຕົວ​ຈິງ​ຂອງ ປະເທດ​ລາວ...

ໂດຍ: ກ.ອໍ​ລະ​ບູນ

(ຄັດຈາກວາ​ລະ​ສານ​ອາ​ລຸນ​ໃໝ່ ສະ​ບັບ 12/2019)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110