ກອງພັນທີ 2 ຕອນທີ 3

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 14/05/2020 09:41:30 ຈຳ​ນວນ​​ຢ້ຽມ​ຊົມ 297 ຄັ້ງ

ນ້ຳ​ໝອກ​ຍາມ​ເຊົ້າ​ຍັງ​ກົ້ວ ທົ່ວ​ທົ່ງ​ໄຫ​ຫີນ  ແຕ່​ລັດ​ສະໝີສີ ແດງ​ອັນ​ຜ່ອງ​ໃສ​ຂອງດວງພະ ອາ​ທິດ​ແຫ່ງມື້​ໃ​ໝ່ໄດ້​ພຸ່ງຂຶ້ນ ຂອບ​ຟ້າ​ທາງ​ດ້ານ​ບົວ​ລະ​ພາ​ພຸ້ນ ແລ້ວ  ຢູ່​ຕາມ​ໃບ​ຜັກ​ນາໆຊະນິດ ​ທີ່​ຂຽວ​ອຸ່​ມ​ທຸ່ມ​ຢູ່​ໃນ​ສວນ​ຂອງ ກອງ​ພ​ັນ​ທີ​ສອງໄດ້​ຢອດ​ນ້ຳ​ຄ້າງກາງ​ເດິກສັ່ນ​ສະ​ເທືອນ ແລ້ວ ຢາດ​ລົງ​ເປັນ​ຫ່າງໆ ເມື່ອ​ ສາຍ​ລົມ​ພັດ​ມາ.  ນາງ​ແພດ  ໂສ​ພາຍົກ ຈົກ​ຂຶ້ນຫວິດ​ຫົວວ່າຈະ ຟາດ  ລົງ​ເຕັມ​ແຮງ  ເພື່ອ​ໄງ້​ຕ​ໍ​ໄມ້​ອອກຈາກ​ໜານ​ຜັກ​ແຕ່​ນາງ​ຕ້ອງ​ຢຸດສະ​ງັກ  ເພາະ​ມີ​ສຽງ​ຮ້ອງ​ຂອງ ທ້າວ ຄຳ​ແດງ ດັງ​ມາ​ແຕ່​ຂ້າງ ສວນ​ເບື້ອງນັ້ນ​ວ່າ:
- ໂສ​ພາ ມາ​ພີ້​ກ່ອນ​ບຶດໜຶ່ງ​ ມີ​ວຽກ!
ກະ​ເທີນ​ໄດ້​ເງືອດ​ບາດ​ຈົກ ບາດ​ຄັກໆ  ແລ້ວ​ນາງບໍ່​ຫ່ອນຈະ ປະ​ໄດ້​  ນາງ​ຟາດ​ລົງ​ເຕັມ​ແຮງ ເຮັດ​ໃຫ​້​ຕໍ​ໄມ້​ສາໍ່​ລຳ​ຂາ​ຟົ້ງ​ສະ ເດັນ​ໄປ​ໄກ​ເຕີບ ນາງ  ໂສ​ພາ ຈຶ່ງ ວາງ​ຈົກ​ແປງ​ກະ​ດຸ​ມ​ເສື້ອ​ດີແລ້ວ ຈຶ່ງ​ຍ່າງ​ໄປ​ຫາ ທ້າວ ຄຳແດງ ຊຶ່ງ​ພວມ​ຂຸດ​ໜານ​ຜັກ​ຄື​ກັນ​ຢູ່​ໃນ​ຈຸ​ຜູ້​ຊາຍ  ທ້າວ ຄຳ​ແດງ ກໍ​ຍ່າງມາ ​ຫາ​ນາງ ແລ້ວ​ເວົ້າ​ຄ່ອຍໆ​ວ່າ:
-  ອ້າຍ  ຈຳ​ນ​ຽນ  ໃຫ້​ນ້ອງ​ໄປ ຫາ​ເພິ່ນ, ເພິ່ນ​ພວມ​ຂຸດ​ໜານ ຜັກ​ຢູ່​ພຸ້ນ​ເດ!
ນາງ  ໂສ​ພາ  ງຶ​ກ​ຫົວ​ແລ້ວ ຍ່າງ​ໄປ​ຫາ​ຜູ້​ບັງ​ຄັບ​ກອງ​ພັນທີ ສອງ ນາງເຄົາ​ລົບ ແລະ ຮັກແພງ​ທີ່​ສຸດ. ສະ​ຫາຍ ຈຳ​ນຽນ ເອົາແພ​ອາບ​ນ້ຳ​ຄຽນ​ຫົວນຸ່ງເສື້ອໄມ​ໂຢ​ສີ​ຂາວ ຂຸດ​ໜານ​ຜັກ ຢູ່​ກັບ​ອ້າຍ​ນ້ອງ​ຢ່າງ​ມ່ວນ​ຊື່ນ  ເມື່​ອ​ເຫັນ​ນາງ ໂສ​ພາ ຍ່າງ​ມາ​ຫາ ສະ​ຫາຍ​ກໍ​ວາງ​ສຽມ,     ຈົກ​ເອົາ​ແພເຊັດນ້ຳ ​ເທື່ອ​ທີ່​ອາບ​ໜ້າແລ້ວເວົ້າ​ຕໍ່ນາງ ໂສ​ພາ  ດ້ວຍ​ທ່າ​ທີ​ສະ​ໜິດ​ສະ​ໜົມ​ວ່າ:
- ມື້ນີ້  ນ້ອງ​ມີ​ວຽກ​ໄປ​ໂພນ ສະ​ຫວັນ​ແມ່ນ​ບໍ?
ນາງ ໂສ​ພາ ຕອບດ​້ວ​ຍ​ທ່າ ທີ​ສຸ​ພາບ​ວ່າ:
- ອາວ  ບົວ​ຄຳ  ບອກ​ໃຫ້​ນ້ອງ ຮູ້​ແຕ່​ຄືນນີ້​ວ່າ​ໃຫ້​ນ້ອງ​ໄປໂພນ ສະ​ຫວັນ ເພື່ອ​ຕິດ​ຕໍ່ຊື້​ຢາ​ທີ່​ພວກ ອ້​າຍ​ບອກມື້ນັ້ນ​ລະ.
- ນ້ອງ​ຈະ​ໄປ​ກັບ​ໃຜ​?
- ຕາມ​ອ້າຍ ບົວ​ຄຳ ບອກ ວ່າ​ໃຫ້​ນ້ອງ​ໄປ​ນຳ​ອ້າຍ ຄຳ​ແດງ ວ່າ​ຊັ້ນ!
ໃນ​ໄລ​ຍະ​ນີ້​ຈັກ​ເປັນ​ຫຍັງ  ຖ້າ​ເວົ້າ​ເຖິງ​ທ້າວ  ຄຳ​ແດງ  ນາງ  ໂສ ພາ ມັກ​ໜ້າ​ແດງ​ຂຶ້ນ ແລະ ເທ​ື່ອ ນີ້​ກໍ​ເວ​ົ້າ​ສຸດ​ຄວາມບໍ່​ຈັກ​ວ່າ​ນາງ ໂສ​ພາ ຄິດ​ໄດ້​ຄິດ​ດີ​ແນ​ວ​ໃດ ນາງ​ອວ່າຍ​ໜ້າ​ໄປ​ລັກ​ລີ້ຍິ້ມຜູ້ ດຽວ​ຄາວ​ໜຶ່ງ ຈຶ່ງ​ກ້າ​ອວ່າຍ​ກັບ ມາ​ຫາ​ສະ​ຫາຍ ຈຳ​ນຽນ​. ສະ ຫາຍ ຈຳ​ນຽນ ບໍ່​ໄດ້​ໄວ້​ໃຈ​ຕໍ່​ທ່າ​ທີ​ດັ່ງ​ກ່າວ ເພາະ​ສະ​ຫາຍ​ພວມ ໜັກ​ໃຈ​ນຳ​ວຽກ​ງານກົ້ມ​ຄິ​ດ​ຢູ່ ຄາວ​ໜ​ຶ່ງ​ແລ້ວ​ຈຶ່ງ​ເວົ້າ​ວ່າ:
- ນ້ອງ​ໄປ​ຫາ​ສະ​ຫາຍ ບົວ​ຄຳ ແລ້ວ​ຖາມ​ເພິ່ນວ​່າ​ ແພ​ນີ​ລົງກັນ​ຝົນ​ຂອງ​ອ້າຍ​ເອື້ອຍ​ນ້ອງ ພວກ​ເຮົາ​ມີ​ໝົດ​ທຸກ​ຄົນ​ແລ້​ວ​ບໍ? ແລະ ຖາມ​ຖ່ານ​ໄຟ​ສາຍ​ກໍ​ພໍ​ໃຊ້ ແລ້ວ​ບໍ?   ຖ້າ​ຍັງ​ບໍ່​ທັນ​ພຽງ​ພໍນັ້ນ ຂໍ​ໃຫ້​ເພິ່ນ​ເອົາ​ໃຈ​ໃສ່​ທາງ​ດ້ານນີ້ ດ້ວຍ.
ນາງ ໂສ​ພາ ຢືນ​ມິດ​ຢູ່​ຄາວ ໜຶ່ງ ເມື່ອບໍ່​ເຫັນ​ສະ​ຫາຍ ຈຳ ນຽນ ເວົ້າ​ຫຍັງ​ຕໍ່​ນາງ​ຈຶ່ງ​ຖາມ​ວ່າ:
-  ໝົດ​ທໍ່​ນັ້ນ​ບໍ​ອ້າຍ?
- ເອີ! ໝົດ​ທໍ່​ນັ້ນ​ລະ! ໄປ​ມ​າ ກໍ​ໃຫ້​ມີ​ສະ​ຕ​ິ​ລະ​ວັງ​ຕົວ​ໃຫ້​ດີ​ເດີ!
- ຈ້າ​ວ! ນ້ອງ​ໄປ​ກຽມ​ຕົວ​ໄດ້ ແລ້ວ​ບໍ?
ໃນ​ເວ​ລາ 7:00 ໂມງ​ຂອງມື້ ນັ້ນ ນາງ ໂສ​ພາ ກັບ ທ້າວ ຄຳ ແດງ  ພ້ອມ​ອ້າຍ​ນ້ອງ​ສາມ​ຄົນ​ໄດ້​ພາ​ກັນ​ຂຶ້ນ​ລົດ​ສີ​ແດງ  ຊຶ່ງ ອ້າຍ​ນ້ອງ​ໝົດ​ກອງ​ພັນ​ໂຮມ​ເງິນ​ກັນ​ຊື້ ແລ່ນ​ມຸ່ງ​ໜ້າ​ໄປ​ເມືອງ​ໂພນ​ສະ​ຫວັນ ໂດຍ​ແມ່ນ​ທ້າວ ຄຳ​ແດງ ເປັນ​ຜູ້​ຂັບ. ພໍ​ໄປ​ຮອດ ທາງ​ແວ່​ໄປ​ລາດ​ຮ່ວງ ເຫັນ​ພໍ່ ເຖົ້າ​ສາມ​ຄົນ​ຂີ່​ມ້າ​ສວ​ານ​ທາງ ມາ ພໍ​ເຫັນ​ລົດ​ສີ​ແດງ​ຂອງກອງ ພັນ​ທີ​ສອງ​ພໍ່​ເຖົ້າ​ຜູ້​ໜຶ່ງກວັກ​ມື ໃສ່ ພ້ອມ​ທັງ​ຮ້ອງ​ຖາມ​ວ່າ:
ແມ່ນ​ລົດ​ກອ​ງ​ພັນ​ທີ​ສອງ​ບໍ?
ລົດ​ຢຸດຫ່າງ​ຈາກ​ພໍ່​ເຖົ້າ​ບໍ່​ໄກ ທໍ່​ໃດ​ແມັດ. ນາງ ໂສ​ພາ ປ່ອນ ຫົວ​ອອກມ​າ​ຈາກ​ກາ​ບິນ ອວ່າຍ ໜ້າ​ໄປ​ຫາ​ພໍ່​ເຖົ້າ​ດັ່ງ​ກ່າວ ແລ້ວ ຮ້ອງ​ຂຶ້ນ​ດ້ວຍ​ສຽງ​ຕື່ນ​ເຕັ້ນ​ວ່າ:
- ໂອ! ພໍ່​ເຖົ້າ ສີ​ດາ, ບ້ານ ໜອງ​ໄຕ!
ນາງ ໂສ​ພາ ແລະ ທ້າວ ຄຳ​ແດງ ພາ​ກັນ​ລົງ​ຈາກ​ລົດ. ພໍ່​ເຖົ້າ ສີ​ດາ ນັ່ງ​ຢູ່​ເທິງ​ຫຼັງ​ມ້າ​ເວົ້າ​ຕໍ່​ນາງ ໂສ​ພາ ວ່າ:
- ທ່ານ​ທ້າວ ຕູ້ ແລະ ທ່ານ ຈຳ​ນຽນ ຍັງ​ຢູ່​ເຮືອນ​ບໍ? ພວກ​ພໍ່ ຢາກ​ໄປ​ຢາມ​ເພິ່ນ!
- ພວກ​ເພິ່ນ​ຍັງ​ຢູ່​ເຮືອນ​ຫັ້ນ ແລ້ວ​ພໍ່​ເອີຍ!
 (ອ່ານ​ຕໍ່​ສະ​ບັບ​ໜ້າ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110