ໜັງສືພິມ ປະຊາຊົນ

ຂີ່ລົດຖີບສີເຫຼືອງທ່ຽວປັກກິ່ງ ທັງມ່ອນ ທັງມ່ວນ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 15/05/2020 09:41:28 ຈຳນວນຢ້ຽມຊົມ 495 ຄັ້ງ

ໂດຍ: ບຸນຄົງ ມິດຕະພອນ
ລົດຖີບສີເຫຼືອງກັບຂ້າພະ ເຈົ້າຊ່ຳວ່າເປັນແຟນກັນ, ເປັນລົດຖີບທີ່ຜູ້ຂຽນມັກຫຼາຍກວ່າໝູ່ໃນຈຳນວນລົດຖີບຢູ່ປັກກິ່ງທີ່ມີທັງສີແດງ, ສີແສດ ແລະ ສີຂຽວອົມຟ້າ. ສຳລັບລົດສີເຫຼືອງເພິ່ນຫາກໍເອົາມາໃຫ້ບໍລິການໃໝ່ ໃນຕົ້ນປີນີ້ຈຶ່ງຖືວ່າເປັນລົດໃໝ່ອ່ຽມ, ຂີ່ກໍມ່ອນໆມ່ວນໆ ແລະ ມີຈຳນວນຫຼວງຫຼາຍ, ເກືອບວ່າຢູ່ແຄມທາງເສັ້ນໃດກໍຈະເຫັນລົດຖີບສີເຫຼືອງ ໂດຍສະເພາະແມ່ນຕາມປ້າຍລົດ ໄຟໃຕ້ດິນ, ສວນສາທາລະນະ ແລະ ຮ້ານສັບພະສິນຄ້າ.
ໃນໄລຍະທີ່ມີການແຜ່ລະບາດຂອງພະຍາດໂຄວິດ-19, ລົດຖີບແມ່ນພາຫະນະທີ່ມີບົດບາດຫຼາຍ ແລະ ຫຼາຍຫ້ອງການໄດ້ແນະນຳໃຫ້ພະ ນັກງານຕົນຫຼີກລ່ຽງການຂີ່ລົດເມ, ລົດໄຟໃຕ້ດິນ ເພາະເປັນລົດສາທາລະນະທີ່ມີຄົນຂີ່ຫຼາຍ ແລະ ມີຄວາມສ່ຽງຕໍ່ການ ຕິດເຊື້ອພະຍາດໂຄວິດ-19 ໃນໄລຍະນັ້ນລົດເມກໍຍັງແລ່ນໃຫ້ບໍລິການແຕ່ບໍ່ຄ່ອຍເຫັນຄົນຂີ່ພໍປານໃດ ເກືອບວ່າເປົ່າ ວ່າງ. ຄົນຈຶ່ງມັກຂີ່ລົດຖີບແຕ່ກໍຕ້ອງໃສ່ຖົງມື ແລະ ໝັ່ນ ລ້າງມື. ສະຫຼຸບແລ້ວທຸກຢ່າງ ແມ່ນເຂັ້ມງວດຮັດກຸມ.
ໃນປັກກິ່ງ, ການຄົມມະນາ ຄົມສະດວກສະບາຍຫຼາຍ, ທີ່ສະດວກສະບາຍທີ່ສຸດກໍຄືໃຊ້ໂທລະສັບມືຖືໜ່ວຍດຽວກໍສາ ມາດຈ່າຍຄ່າບໍລິການຕ່າງໆໄດ້ ຢ່າງສະບາຍເຊັ່ນ: ຄ່າລົດຖີບ, ຄ່າລົດໄຟໃຕ້ດິນ, ລົດເມ, ລົດແທັກຊີ. ຖ້າໃຜມາປັກກິ່ງເຫັນ ຜູ້ສາວງາມໆຢືນຢູ່ແຄມທາງກຳລັງລໍຖ້າລົດຄັນງາມມາຮັບ, ບາງທີກໍບໍ່ແມ່ນລົດແຟນລາວມາຮັບ ແຕ່ເປັນລົດຂອງບໍລິສັດ DIDI ທີ່ຄົນທົ່ວໄປສາມາດໃຊ້ app ເອີ້ນໃຊ້ບໍລິການໄດ້ໃນລາຄາທີ່ຍຸຕິທຳ. ເມື່ອກ່ອນຕອນຜູ້ຂຽນມາ ປັກກິ່ງໃໝ່ໆເຫັນແຕ່ລົດແທັກຊີ, ດຽວນີ້ກໍມີລົດໃນ app DIDI ເຂົ້າມາໃຫ້ບໍລິການ ຊຶ່ງເປັນເຈົ້າຂອງດຽວກັນກັບລົດຖີບສີຂຽວອົມຟ້າ. ມາເຮັດວຽກຢູ່ເມືອງຈີນຈຶ່ງເຫັນວ່າຈີນມີການປ່ຽນແປງເພື່ອຄວາມສະດວກວ່ອງໄວຢ່າງບໍ່ຢຸດຢັ້ງ, ມັກເຫັນສິ່ງໃໝ່ໆເກີດຂຶ້ນຢູ່ເລື້ອຍໆ.
ສິ່ງໃໝ່ໃນປັກກິ່ງອີກກໍຍັງມີປ້ຳສາກໄຟຟ້າ, ລົດໃຫຍ່ສ່ວນຫຼາຍໄດ້ຫັນມານຳໃຊ້ພະລັງງານໄຟຟ້າທີ່ເພິ່ນນິຍົມ ເອີ້ນກັນວ່າພະລັງງານສະອາດ, ຖ້າສາກຢູ່ໃນປ້ຳໄຟຟ້າກໍຈ່າຍ ປະມານ 55 ຢວນ ທີ່ສາມາດ ໃຊ້ໝໍ້ໄຟໄດ້ 2 ຊົ່ວໂມງ, ດີແທ້ເວລາຊື້ລົດໄຟຟ້າຄວນຊື້ປ້ຳສາກນຳບໍລິສັດລົດໄຟຟ້າມາສາກເອງໂລດ. ຖ້າສາກເອງຄ່າໄຟຟ້າກໍມີພຽງແຕ່ 15 ຢວນ ທີ່ສາມາດນຳໃຊ້ ໝໍ້ໄຟໄດ້ 2 ຊົ່ວໂມງ. ເຫັນການປ່ຽນແປງຂອງຍານພາຫະນະທີ່ຫັນມາໃຊ້ ໄຟຟ້າ. ຈຶ່ງຄິດວ່າປະເທດໃດມີພະລັງງານໄຟຟ້າຫຼາຍຈະຮັ່ງມີແທ້ໆ.
ໝູ່ຂອງຂ້າພະເຈົ້າຊື່ ເພີນ ທີ່ມາຈາກປະເທດອາຟຣິກາໃຕ້ ຊຶ່ງແມ່ນປະເທດໃນກຸ່ມ BRICS, ເຄີຍສົນທະນາກັນກ່ຽວກັບລົດສາທາລະນະໃນປະເທດອາຟຣິກກາໃຕ້. ນາງຍອມຮັບວ່າ: ເລື່ອງລົດສາທາ ລະນະລະຫວ່າງປະເທດຂອງນາງກັບຈີນ, ຈີນຈະສະດວກສະບາຍກວ່າ ແລະ ລາຄາກໍຈະຖືກກວ່າໂດຍສະເພາະປະເພດລົດສາທາລະນະ. ລົດເມພາຍໃນຕົວເມືອງປັກກິ່ງຈ່າຍພຽງ 2 ຢວນຕໍ່ຄັ້ງບໍ່ນັບໄລຍະທາງ. ແຕ່ຖ້າເປັນລົດໄຟໃຕ້ດິນຈ່າຍຄ່າລົດຕາມໄລຍະທາງ, ສ່ວນລົດ ຖີບສີເຫຼືອງຄັນງາມຂອງຂ້າພະ ເຈົ້າແມ່ນຄິດໄລເປັນນາທີ.
ເຖິງຈະເຂົ້າເດືອນພຶດສະ ພາແລ້ວກໍຕາມ, ແຕ່ອາກາດໃນປັກກິ່ງແມ່ນເຢັນສະບາຍ, ໃນວັນທີ 8 ພຶດສະພາ ຝົນຕົກໝົດມື້, ເຊົ້າມື້ຕໍ່ມາອາກາດ 10 ອົງສາເຢັນສະບາຍ. ອາກາດສົດຊື່ນພາໃຫ້ຢາກຂີ່ລົດຖີບແຕ່ເຊົ້າໆ ໂດຍສະເພາະແມ່ນໄລຍະທີ່ການສັນຈອນໃນປັກກິ່ງກັບຄືນເຂົ້າສູ່ສະພາບປົກ ກະຕິແລ້ວ, ດ້ວຍຄວາມສະ ດວກສະບາຍຂອງ app ໃນມືຖື ພຽງແຕ່ສະແກນຄິວອາໂຄດກໍສາມາດຖີບລົດສີເຫຼືອງເລາະປັກກິ່ງໄດ້ຢ່າງສະບາຍປອດໄພ. ເປົ້າໝາຍມື້ນີ້ຈຶ່ງແມ່ນຂົວໃຫຍ່ທີ່ຢູ່ໄກອອກໄປຈາກສະ ຖານທີ່ທີ່ຂ້າພະເຈົ້າພັກອາໄສປະມານ 8 ກິໂລແມັດ. ຜູ້ຂຽນເຄີຍຂີ່ລົດຖີບໄປ-ກັບໄກສຸດຮອດສວນປາຕາຊູທີ່ມີໄລຍະທາງລວມກັນ 20 ກິໂລແມັດ.
ເວົ້າເລື່ອງຄວາມປອດໄພໃນປັກກິ່ງ ບໍ່ແມ່ນເວົ້າໂມ້ , ເວົ້າໃນແບບນັກຂ່າວລາຍງານແຕ່ຄວາມເປັນຈິງ, ໃນປັກກິ່ງເພິ່ນມີຊ່ອງທາງສະເພາະສຳລັບລົດຖີບ. ທາງລົດຖີບກໍຈະມີຮູບລົດຖີບຢູ່ໜ້າທາງ. ແມ່ນແຕ່ໃນໄຟແດງກໍຈະມີສັນຍານຈະລາ ຈອນຮູບລົດຖີບ. ສະນັ້ນ ເວລາທີ່ເຮົາຂີ່ລົດຖີບກໍຕ້ອງໄປຕາມຊ່ອງທາງລົດຖີບ, ແມ່ນແຕ່ໃນຂົວໃຫຍ່ກໍມີຊ່ອງທາງສະເພາະສຳລັບລົດຖີບ, ຂີ່ລົດຖີບໃນປັກ ກິ່ງນີ້ ທັງສະດວກທັງປອດໄພ ແທ້ໆ. ທີ່ໝັ້ນໃຈແມ່ນທົ່ວເມືອງປັກກິ່ງມີກ້ອງວົງຈອນປິດທົ່ວທຸກຈອກທຸກແຈ.
ການຂີ່ລົດໃນປັກກິ່ງເພິ່ນຈຳກັດຄວາມໄວຄື: ປະເພດລົດເກງຂີ່ພາຍໃນເມືອງ 70 ກິໂລແມັດຕໍ່ຊົ່ວໂມງ, ແຕ່ຖ້າເປັນທາງດ່ວນ 80 - 120 ກິໂລ ແມັດຕໍ່ຊົວໂມງຂຶ້ນກັບບາງເສັ້ນທາງ, ການສັນຈອນໃນປັກກິ່ງເປັນການໃຫ້ກຽດຊຶ່ງກັນ ແລະ ກັນ. ຖ້າໃຜໄດ້ມາປັກກິ່ງຈະເຫັນ ວ່າ: ຢູ່ 4 ແຍກໄຟແດງຈະເຫັນ ຄົນຍ່າງຂ້າມທາງໃນຂະນະ ທີ່ມີສັນຍານໄຟຂຽວສຳລັບຄົນ, ໃນຂະນະດຽວກັນ ກໍມີສັນຍານໃຫ້ລົດໃຫຍ່ລ້ຽວໄດ້ເຊັ່ນກັນ, ສະ ນັ້ນຈຶ່ງເຫັນວ່າການໃຊ້ລົດໃຊ້ຖະໜົນກັບຄົນຍ່າງແມ່ນການໃຫ້ກຽດຊຶ່ງກັນ ແລະ ກັນ. ຫຼາຍເທື່ອທີ່ຂ້າພະເຈົ້າເຫັນ ແລະ ພົບພໍ້ດ້ວຍຕົນເອງເວລາລໍຖ້າຂ້າມທາງໃນທາງມ້າລາຍທີ່ບໍ່ແມ່ນເຂດໄຟແດງ, ລົດເມ ແລະ ລົດສ່ວນຕົວໄດ້ຢຸດເພື່ອໃຫ້ຄົນຂ້າມທາງ. ຂ້າພະເຈົ້າຈຶ່ງສະ ແດງຄວາມຂອບໃຈຕໍ່ຄວາມມີນ້ຳໃຈຂອງຜູ້ຂັບລົດດ້ວຍການກົ້ມຫົວລົງໜ້ອຍໜຶ່ງ.
ມັນເປັນຄວາມສຸກຢ່າງໜຶ່ງສຳລັບຄົນຕ່າງປະເທດຄົນໜຶ່ງທີ່ໄດ້ຂີ່ລົດຖີບທ່ຽວປັກກິ່ງໃນສະພາບທີ່ສະດວກປອດໄພ, ໃນປັກກິ່ງນີ້ມີຕົ້ນໄມ້ໃຫຍ່ໃຫ້ຮົ່ມເງົາຫຼາຍ, ເວລາທີ່ຂີ່ລົດຖີບສີເຫຼືອງໄປຕາມຊ່ອງທາງລົດ ຖີບກ້ອງຮົ່ມໄມ້ໃຫຍ່ຈັ່ງແມ່ນມີຄວາມສຸກ. ເມື່ອສະພາບການແຜ່ລະບາດຂອງພະຍາດໂຄວິດ-19 ໝົດສິ້ນໄປຈາກປັກກິ່ງ, ຂ້າພະເຈົ້າມີແຜນວ່າ ຈະຂີ່ລົດຖີບສີເຫຼືອງທີ່ຖືກໃຈເລາະປັກກິ່ງໃຫ້ໄກອອກໄປກວ່າເກົ່າ. ຄິດວ່າຕອນນັ້ນຍິ່ງຮູ້ປັກກິ່ງດີກວ່າເກົ່າ ແລະ ມີຄວາມສຸກກວ່າເກົ່າແລ້ວຈະເລົ່າສູ່ຟັງອີກ. ຕອນນີ້ບາຍໆ, ໄຈ້ຈ້ຽນ.