ໜັງສືພິມ ປະຊາຊົນ

ຈີນ-ການາດາ ຮ່ວມມືກັນການຄົ້ນຄວ້າຜະລິດຢາວັກຊິນໂຄວິດ-19

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 15/05/2020 15:11:43 ຈຳນວນຢ້ຽມຊົມ 757 ຄັ້ງ

ຂ່າວສານຊີອາໄອລາຍງານວ່າ: ວັນທີ 13 ພຶດສະພາຜ່ານມາ, ທ່ານ ຈ້າວລີ້ຈ່ຽນ ໂຄສົກກະຊວງການຕ່າງປະເທດຈີນ ໄດ້ຢືນຢັນວ່າ: ຈີນ ພວມຮ່ວມມືກັບການາດາ ໃນການຄົ້ນຄວ້າຜະລິດຢາວັກຊິນພະຍາດໂຄວິດ-19.

ທ່ານ ຈ້າວລີ້ຈ່ຽນ ກ່າວໃນກອງປະຊຸມຖະແຫຼງຂ່າວທີ່ຈັດຂຶ້ນໃນມື້ດຽວກັນວ່າ: ພາຍຫຼັງເກີດການແຜ່ລະບາດຂອງພະຍາດໂຄວິດ-19 ເປັນຕົ້ນມາ, ຈີນ ແລະ ການາດາ ໄດ້ສະໜັບສະໜູນ ແລະ ຊ່ວຍຊູຍູ້ໜູນກັນ, ຕັ້ງໜ້າດຳເນີນການຮ່ວມມື ເພື່ອຮັບມືກັບການແຜ່ລະບາດຂອງພະຍາດ. ວັດຖຸອຸປະກອນການແພດ 32 ໂຕນ ທີ່ລັດຖະບານຈີນ ຊ່ວຍເຫຼືອ ການາດາ ໄດ້ຖືກຂົນສົ່ງໄປເຖິງ ການາດາ ໃນຫວ່າງກ່ອນນີ້ບໍ່ດົນ. ພ້ອມກັນນັ້ນ, ຈີນ ຍັງໄດ້ອຳນວຍຄວາມສະດວກ ແລະ ໃຫ້ການປະສານສົມທົບຢ່າງຕັ້ງໜ້າແກ່ການາດາ ໃນການຈັດຊື້ວັດຖຸອຸປະກອນການແພດຢູ່ ຈີນ ອີກດ້ວຍ.

ໂຄສົກທ່ານນີ້ກ່າວອີກວ່າ: ເຊື້ອພະຍາດບໍ່ມີພົມແດນ ແລະ ເປັນສິ່ງທ້າທາຍຮ່ວມຂອງມວນມະນຸດ. ການຄົ້ນຄວ້າຜະລິດຢາວັກຊິນມີຄວາມສຳຄັນທີ່ສຸດ ຕໍ່ການປ້ອງກັນ ແລະ ຄວບຄຸມການແຜ່ລະບາດຂອງພະຍາດດັ່ງກ່າວ. ທັງແມ່ນຂອດສຳຄັນທີ່ສຸດໃນການເອົາຊະນະການແຜ່ລະບາດຂອງພະຍາດ. ຈີນພວມຕັ້ງໜ້າດຳເນີນການຮ່ວມມືສາກົນ ໃນການຄົ້ນຄວ້າຜະລິດຢາ ແລະ ວັກຊິນ ກັບປະເທດຕ່າງໆໃນໂລກ. ໃນນັ້ນ ລວມທັງການາດາ, ພວກເຮົາຍິນດີສືບຕໍ່ຮ່ວມກັນກັບ ການາດາ ແລະ ປະຊາຄົມໂລກ ເລັ່ງລັດການຄົ້ນຄວ້າຜະລິດຜະລິດຕະພັນທາງການແພດ ເພື່ອຮັບມືກັບການແຜ່ລະບາດຂອງພະຍາດໂຄວິດ-19, ສຸມທຸກຄວາມພະຍາຍາມ ເພື່ອປົກປັກຮັກສາຄວາມປອດໄພດ້ານສາທາລະນະສຸກ ແລະ ຕ້ານກັບການແຜ່ລະບາດຂອງພະຍາດໃນໂລກ.