ໜັງສືພິມ ປະຊາຊົນ

ທ່ານ ສີຈິ້ນຜິງ ເນັ້ນບັນລຸເປົ້າໝາຍລຶບລ້າງ ຄວາມທຸກຍາກ ສ້າງສັງຄົມອີ່ມໜຳສຳລານ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 18/05/2020 09:42:52 ຈຳນວນຢ້ຽມຊົມ 857 ຄັ້ງ

ຂ່າວສານຊີອາໄອລາຍງານວ່າ: ຄະນະປະຈຳກົມການ ເມືອງສູນກາງພັກກອມມູນິດຈີນ ໄດ້ເປີດກອງປະຊຸມໃນວັນທີ 14 ພຶດສະພາຜ່ານມາ, ເພື່ອວິເຄາະສະພາບການປ້ອງກັນ ແລະ ຄວບຄຸມພະຍາດໂຄວິດ-19, ທັງພາຍໃນ ແລະ ຕ່າງປະເທດ. ໃນການຄົ້ນຄວ້າ, ວາງແຜນ ແລະ ຊຸກຍູ້ໃຫ້ຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມພະຍາດຕາມສະພາວະປົກກະຕິຢ່າງມີ ປະສິດທິຜົນ ແລະ ຄົ້ນຄວ້າເພື່ອຍົກສູງຄວາມໝັ້ນທ່ຽງ ແລະ ຄວາມສາມາດການແຂ່ງຂັນຂອງຕ່ອງໂສ້ອຸດສາຫະກຳ ແລະ ຕ່ອງໂສ້ການສະໜອງ.
ທ່ານ ສີຈິ້ນຜິງ ເລຂາທິ ການໃຫຍ່ຄະນະກຳມະການສູນກາງພັກກອມມູນິດຈີນ ໄດ້ເປັນປະທານກອງປະຊຸມ ທັງໄດ້ໃຫ້ທິດຊີ້ນຳທີ່ສຳຄັນ ໂດຍກ່າວວ່າ: ປັດຈຸບັນ, ການປ້ອງກັນ ແລະ ຄວບຄຸມພະຍາດໃນທົ່ວປະເທດ ແມ່ນຢູ່ໃນສະ ພາບທີ່ດີໂດຍລວມ, ໃນຂະ ນະທີ່ການແຜ່ລະບາດຂອງພະຍາດຢູ່ຕ່າງປະເທດຍັງຢູ່ໃນສະພາບທີ່ຂ້ຽວຂາດ ແລະ ສັບສົນ, ການປ້ອງກັນບໍ່ໃຫ້ແຜ່ລະບາດຂອງພະຍາດຢູ່ພາຍໃນປະເທດຮ້າຍແຮງຂຶ້ນອີກນັ້ນ ຍັງເປັນໜ້າທີ່ອັນລຳບາກ ແລະ ໜັກໜ່ວງ. ຕ້ອງເດັດດ່ຽວຜ່ານຜ່າແນວຄິດທີ່ລະເຫຼີງ, ອາລົມເບື່ອໜ່າຍຕໍ່ການຕໍ່ສູ້ກັບພະຍາດ, ຄິດເພິ່ງໂຊກຊາຕາ ແລະ ຈິດໃຈອ່ອນໄຫວຄອນແຄນ, ຕ້ອງເອົາໃຈໃສ່ວຽກງານໃນການປ້ອງກັນບໍ່ໃຫ້ມີການແຜ່ລະບາດຈາກຕ່າງປະເທດ ແລະ ປ້ອງກັນບໍ່ໃຫ້ພະຍາດແຜ່ລະບາດຮ້າຍແຮງຂຶ້ນອີກພາຍໃນປະເທດ, ເດັດຂາດບໍ່ໃຫ້ຜົນສຳເລັດໃນການປ້ອງກັນ ແລະ ຄວບຄຸມການແຜ່ລະບາດຂອງພະຍາດທີ່ຍາດມາໄດ້ຢ່າງຍາກລໍາບາກນັ້ນ ປະສົບກັບຄວາມຫຼົ້ມເຫຼວ, ຮັບປະກັນເຮັດສຳເລັດໜ້າທີ່ ເພື່ອບັນລຸເປົ້າໝາຍໃນບັ້ນລຶບລ້າງຄວາມທຸກຍາກຂັ້ນສຸດທ້າຍ ແລະ ສ້າງສັງຄົມທີ່ອີ່ມໜຳສຳລານໃຫ້ສຳເລັດຢ່າງຮອບດ້ານ.