ອາດສະພອນ ມີແຜນປູກເຂົ້ານາປີ 19.500 ເຮັກຕາ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 25/05/2020 09:15:43 ຈຳ​ນວນ​​ຢ້ຽມ​ຊົມ 1290 ຄັ້ງ

  ທ່ານ ສີວິໄລ ສີ​ທຳ​ມະ​ວັນ ຫົວໜ້າ​ຫ້ອງການ​ກະ​ສິ​ກຳ​-​ປ່າໄມ້​ເມືອງ​ອາດ​ສະ​ພອນ ແຂວງ​ສະຫວັນ​ນະ​ເຂດ ໄດ້​ໃຫ້​ສຳພາດ​ຕໍ່​ຜູ້​ສື່​ຂ່າວ​ເມືອງ​ໃນ​ວັນ​ທີ 20 ພຶດສະພາ​ຜ່ານ​ມາ​​ວ່າ: ປັດຈຸ​ບັນ ຊາວ​ກະສິກອນ​ທົ່ວ​ເມືອງ​ອາດ​ສະ​ພອນ ພວມ​ກຳລັງ​ຫັນ​ລົງ​ສູ່​ການ​ຜະລິດ​ເຂົ້ານາ​ປີ ໂດຍ​ທົ່ວ​ເມືອງ​ມີ​ແຜນ​ຜະລິດ​ເຂົ້ານາ​ປີ​ໃນ​ເນື້ອທີ່​ທັງ​ໝົດ 19.500 ເຮັກຕາ. ພ້ອມ​ນີ້, ປະຊາຊົນ​ສ່ວນ​ໜຶ່ງ​ໄດ້​ຫັນ​ມາ​ເຮັດ​ນາຫວ່ານ ແລະ ນາ​ຢອດ​ເມັດ​ແຫ້ງ ເພື່ອ​ປະຢັດ​ຕົ້ນ​ທຶນ​ການ​ຜະລິດ​ຂອງ​ຕົນ. ໃນ​ນີ້, ນາຫວ່ານ ມີ 975 ເຮັກຕາ ແລະ ຢອດ​ເມັດ​ແຫ້ງ ມີ 975 ເຮັກຕາ, ສຳລັບ​ປະຊາຊົນ​ທີ່​ຊົມໃຊ້​ລະບົບ​ຊົນລະປະທານ ຫຼື ມີ​ໜອງ​-​ຝາຍ ກໍສາມາດ​ຕົກກ້າ​ໄດ້​ຕາມ​ເງື່ອນໄຂ​ຂອງ​ໃຜລາວ ຊຶ່ງ​ຮອດ​ປັດຈຸ​ບັນ ຊາວນາ​ແມ່ນ​ໄດ້​ເລີ່ມ​ຕົກກ້າ​ແລ້ວ​ສ່ວນ​ໜຶ່ງ; ນອກຈາກ​ປູກ​ເຂົ້າ​ແລ້ວ, ປະຊາຊົນ​ຍັງ​ໄດ້​ປູກ​ພືດ​ລະດູຝົນ​ໃນ​ເນື້ອ​ທີ່ 2.950 ເຮັກຕາ ໂດຍ​ພືດ​ທີ່​ປູກ​ມີ ສາລີ, ໝາກໂມ, ໝາກຖົ່ວ, ໝາກແຕງ, ໝາກ​ອຶ​-​ບວບ, ໝາກ​ເຜັດ, ໝາກເຂືອ, ໝາກ​ນັດ, ມັນຕົ້ນ, ຖົ່ວດິນ, ເຜືອກ​-​ມັນ, ໄມ້​ໃຫ້​ໝາກ ແລະ ຜັກ​ຕ່າງໆ. ສຳລັບ​ການ​ຜະລິດ​ເຂົ້ານາ​ປີ​ໆນີ້, ຫ້ອງການ​ກະ​ສິ​ກຳ​-​ປ່າໄມ້​ເມືອງ ໄດ້​ກຽມ​ແນວ​ພັນ​ເຂົ້າທ່າ​ສະໂນ 8, ທ່າ​ສະໂນ 11, ທ່າ​ດອກ​ຄຳ 8, ທ່າ​ດອກ​ຄຳ 11 ແລະ ເຂົ້າ ກຂ 6 ຊຶ່ງ​ມີ​ທັງ​ໝົດ 5 ໂຕນ ທີ່​ເປັນ​ພັນ​ປັບປຸງ 100%  ເພື່ອ​ສະໜອງ​ແນວ​ພັນ​ໃຫ້​ພໍ່​ແມ່​ປະຊາຊົນ​ຕື່ມ​ອີກ.
(ຂ່າວ​-​ພາບ: ແຂວງ​ສະ ຫວັນ​ນະ​ເຂດ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110