ປີນີ້ ຈີນ ຮັບປະກັນໃຫ້ປະຊາກອນຫຼຸດພົ້ນອອກຈາກຄວາມທຸກຍາກທັງໝົດ

  ບົດລາຍງານວຽກງານລັດຖະບານຈີນທີ່ກ່າວ ໂດຍທ່ານ ຫຼີເຄີ້ສຽງ ນາຍົກລັດຖະມົນຕີຈີນ ໃນກອງປະຊຸມສະພາຜູ້ແທນປະຊາຊົນແຫ່ງຊາດຈີນຄັ້ງທີ 3 ຊຸດທີ 13 ທີ່ໄຂຂຶ້ນຢູ່ນະຄອນຫຼວງປັກກິ່ງ, ໃນວັນທີ 22 ພືດສະພາຜ່ານມາ ໄດ້ເນັ້ນວ່າ: ປີນີ້, ຈີນ ຕ້ອງຮັບປະກັນໃຫ້ຈໍານວນປະຊາກອນທຸກຍາກທີ່ຍັງເຫຼືອ ຫຼຸດພົ້ນອອກຈາກຄວາມທຸກຍາກທັງໝົດ, ເພີ່ມທະວີຄວາມແຮງໃນການລຶບລ້າງຄວາມທຸກຍາກຢູ່ເມືອງ ແລະ ບ້ານທີ່ຍັງທຸກຍາກຢູ່, ດຳເນີນການເຄື່ອນໄຫວລຶບລ້າງຄວາມທຸກຍາກດ້ວຍການບໍລິໂພກ, ສະໜັບສະໜູນຂະແໜງການລຶບລ້າງຄວາມທຸກຍາກ ໃຫ້ຟື້ນຟູການພັດທະນາຄືນໃໝ່. ເພີ່ມທະວີຄວາມຊ່ວຍເຫຼືອພາຍຫຼັງປະຊາກອນຜູ້ທຸກຍາກຍ້າຍບ່ອນຢູ່ອາໄສ. ສືບຕໍ່ຊຸກຍູ້ໃຫ້ການລຶບລ້າງຄວາມທຸກຍາກ ກັບການຟື້ນຟູຄວາມຈະເລີນຂອງຊົນນະບົດເຊື່ອມຕໍ່ກັນຢ່າງບັງເກີດຜົນ, ສຸດຄວາມສາມາດເຮັດໃຫ້ປະຊາຊົນທີ່ໄດ້ຫຼຸດພົ້ນອອກຈາກຄວາມທຸກຍາກສ້າງຄວາມຮັ່ງມີຂຶ້ນ.

  ພ້ອມກັນນັ້ນ, ທ່ານ ຫຼີເຄີ້ສຽງ ກ່າວວ່າ: ໃນປີ 2019, ພາຍໃຕ້ສະພາບທີ່ປະເຊີນໜ້າກັບຄວາມຫຍຸ້ງຍາກ ແລະ ສິ່ງທ້າທາຍຕ່າງໆ, ຈີນ ໄດ້ສໍາເລັດໜ້າທີ່ເປົ້າໝາຍຕົ້ນຕໍ ໃນການພັດ ທະນາເສດຖະກິດ-ສັງຄົມ, ການດໍາເນີນເສດຖະກິດມີຄວາມໝັ້ນທ່ຽງໂດຍລວມ, ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງໃຫ້ດີຂຶ້ນຕື່ມອີກ, ໄດ້ສ້າງພື້ນຖານລັກສະນະຕັດສິນຊີ້ຂາດໃຫ້ແກ່ການສ້າງສັງຄົມອີ່ມໜໍາສໍາລານໃຫ້ສໍາເລັດຢ່າງຮອບດ້ານ.

  ຂ່າວສານຊີອາໄລາຍງານວ່າ: ປີ 2019, ລວມຍອດຜະລິດຕະພັນພາຍໃນ ຫຼື GDP ຂອງຈີນ ໄດ້ເພີ່ມຂຶ້ນ 6,1%, ບັນລຸ 99.100 ຕື້ຢວນ. ການປະກອບອາຊີບທີ່ເພີ່ມຂຶ້ນໃໝ່ຂອງຕົວເມືອງບັນລຸເຖິງ 13.520.000 ຄົນ, ປະຊາກອນທຸກຍາກຂອງຊົນນະບົດຫຼຸດລົງ 11.090.000 ຄົນ, ລາຍໄດ້ສະເລ່ຍຕໍ່ຫົວຄົນຫຼາຍກວ່າ 3 ໝື່ນຢວນ.