ໜັງສືພິມ ປະຊາຊົນ

ປີນີ້ ຈີນຈະພະຍາຍາມບັນລຸເປົ້າໝາຍສ້າງສັງຄົມທີ່ອີ່ມໜຳສຳລານຮອບດ້ານ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 25/05/2020 10:27:01 ຈຳນວນຢ້ຽມຊົມ 396 ຄັ້ງ

ຂ່າວສານຊີອາໄອລາຍງານວ່າ: ປີ 2020, ລັດຖະບານຈີນ ຈະໃຫ້ບຸລິມະສິດແກ່ວຽກງານການປະກອບອາຊີບ ແລະ ການຮັບປະກັນຊີວິດການເປັນຢູ່, ເດັດດ່ຽວເອົາຊະນະໃນການລຶບລ້າງຄວາມທຸກຍາກ, ພະຍາຍາມເຮັດສຳເລັດເປົ້າໝາຍໃນການສ້າງສັງຄົມທີ່ອີ່ມໜຳສຳລານຢ່າງຮອບດ້ານ.

ໃນບົດລາຍງານວຽກງານລັດຖະບານຈີນ ທີ່ສະເໜີຕໍ່ສະພາຜູ້ແທນປະຊາຊົນແຫ່ງຊາດຈີນ ເພື່ອນຳໄປຄົ້ນຄວ້າພິຈາລະນາ, ໃນວັນທີ 22 ພຶດສະພາຜ່ານມາ, ໄດ້ກຳນົດເປົ້າໝາຍການປະກອບອາຊີບໃຫ້ເພີ່ມຂຶ້ນໃໝ່ໃນຕົວເມືອງຂອງຈີນ ໃຫ້ເປັນ 9 ລ້ານຄົນຂຶ້ນໄປ, ອັດຕາວ່າງງານຕາມການສຳຫຼວດໃນຕົວເມືອງໃຫ້ຢູ່ໃນລະດັບປະມານ 6%.

ເນື່ອງຈາກໄດ້ຮັບຜົນກະທົບຈາກສະພາບພະຍາດໃນທົ່ວໂລກ ແລະ ສະຖານະການເສດຖະກິດການຄ້າມີຄວາມບໍ່ແນ່ນອນ, ການພັດທະນາຂອງຈີນ ຈະປະເຊີນກັບປັດໃຈຈາກຜົນກະທົບທີ່ຍາກຈະຄາດຄະເນໄດ້. ສະນັ້ນ, ລັດຖະບານຈີນ ຈຶ່ງບໍ່ໄດ້ສະເໜີເປົ້າໝາຍລະອຽດກ່ຽວກັບການເພີ່ມຄວາມວ່ອງໄວດ້ານເສດຖະກິດໃນປີ 2020.

ບົດລາຍງານລະບຸວ່າ: ການເຮັດແນວນີ້ ມີຜົນດີຕໍ່ການຊັກນຳທຸກຝ່າຍໃຫ້ສຸມກຳລັງເຮັດວຽກຕາມ “6 ໝັ້ນທ່ຽງ” “6 ຮັບປະກັນ”, ໂດຍໄດ້ເນັ້ນໜັກວ່າ: ການເຮັດໃຫ້ເສດຖະກິດສາມາດເຄື່ອນໄຫວໄດ້ຢ່າງໝັ້ນທ່ຽງ ແມ່ນກ່ຽວພັນກັບສະພາບລວມ, ຕ້ອງໃຊ້ວິທີການປະຕິຮູບແລະ ເປີດປະຕູສູ່ພາຍນອກ, ຊອກຫາເສັ້ນທາງໃໝ່ ເພື່ອຮັບມືກັບຜົນກະທົບຢ່າງມີປະສິດທິຜົນ ແລະ ສາມາດບັນລຸການໝູນວຽນໄດ້ເປັນຢ່າງດີ.

ບົດລາຍງານຍັງກ່າວເນັ້ນວ່າ: ໃນໄລຍະຕໍ່ໜ້າ ຕ້ອງດຳເນີນການປ້ອງກັນ ແລະ ຄວບຄຸມພະຍາດຢ່າງບໍ່ລົດລະ ແລະ ໃຫ້ດຳເນີນເປັນປະຈຳ, ເຮັດວຽກຕ່າງໆ ເພື່ອພັດທະນາເສດຖະກິດ-ສັງຄົມໃຫ້ດີ. ສໍາລັບ “6 ໝັ້ນທ່ຽງ” ໝາຍເຖິງ: ເຮັດໃຫ້ການປະກອບອາຊີບ, ການທະນາຄານ, ການຄ້າກັບຕ່າງປະເທດ, ການລົງທຶນຂອງຕ່າງປະເທດ, ການລົງທຶນພາຍໃນປະເທດ, ແລະ ການຄາດຄະເນລ່ວງໜ້າ ມີຄວາມໝັ້ນທ່ຽງ. “6 ຮັບປະກັນ” ໝາຍເຖິງ: ການຮັບປະກັນວຽກງານໃນດ້ານການປະກອບອາຊີບຂອງປະຊາຊົນ, ຊີວິດການເປັນຢູ່ພື້ນຖານຂອງປະຊາຊົນ, ພາກສ່ວນຕົ້ນຕໍໃນຕະຫຼາດ, ຄວາມປອດໄພດ້ານສະບຽງອາຫານ ແລະ ພະລັງງານ, ຕ່ອງໂສ້ການຜະລິດ ແລະ ການສະໜອງ, ການໝູນເດີນຂອງຂັ້ນຮາກຖານ.