ໜັງສືພິມ ປະຊາຊົນ

ທ່ານ ຫວາງອີ້ ເຫັນວ່າ ພະຍາດໂຄວິດ-19 ເຮັດໃຫ້ການພົວພັນຈີນ-ອາຊຽນມີຄວາມສະໜິດແໜ້ນຂຶ້ນຕື່ມ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 25/05/2020 15:38:41 ຈຳນວນຢ້ຽມຊົມ 368 ຄັ້ງ

ຂ່າວສານຊີອາໄອລາຍງານວ່າ: ວັນທີ 24 ພຶດສະພາຜ່ານມາ, ທ່ານ ຫວາງອີ້ ລັດຖະມົນຕີກະ ຊວງການຕ່າງປະເທດຈີນ ກ່າວວ່າ: ພະຍາດໂຄວິດ-19, ເຮັດໃຫ້ການພົວພັນ ລະຫວ່າງ ຈີນ-ອາຊຽນ ມີຄວາມສະໜິດແໜ້ນຂຶ້ນຕື່ມ, ການຮ່ວມມື ລະຫວ່າງ ຈີນ-ອາຊຽນ ພວມເຂັ້ມແຂງຂຶ້ນ.

ໃນເວລາຕອບຄຳຖາມໃນກອງປະຊຸມຂ່າວທີ່ຈັດຂຶ້ນໃນມື້ດຽວກັນ, ທ່ານ ຫວາງອີ້ ຊີ້ອອກວ່າ: ເມື່ອຫວນຄືນປະຫວັດສາດແຫ່ງການພົວພັນ ລະຫວ່າງ ຈີນ-ອາຊຽນ, ລວມທັງໃນໄລຍະເກີດວິກິດການການເງິນອາຊີ ຫຼື ໄລຍະວິກິດການສາກົນ, ເຫັນວ່າ: ວິກິດການທຸກຄັ້ງ ລ້ວນແຕ່ເຮັດໃຫ້ການພົວພັນ ຈີນ-ອາຊຽນ ແໜ້ນແຟ້ນຍິ່ງຂຶ້ນ, ເຮັດໃຫ້ການຮ່ວມມື ລະຫວ່າງ ຈີນ-ອາຊຽນ ມີຄວາມເຂັ້ມແຂງຂຶ້ນຕື່ມ. ນີ້ສະແດງໃຫ້ເຫັນຢ່າງເຕັມສ່ວນວ່າ: ຈີນ - ອາຊຽນ ມີມິດຕະພາບ ແລະ ຄວາມໄວ້ເນຶ້ອເຊື່ອໃຈຊຶ່ງກັນ ແລະ ກັນຢ່າງເລິກເຊິ່ງ.

ທ່ານ ຫວາງອີ້ ກ່າວຕື່ມວ່າ: ພາຍໃຕ້ຄວາມພະຍາຍາມຮ່ວມຂອງສອງຝ່າຍ, ປີນີ້ ການຮ່ວມມືລະຫວ່າງ ຈີນກັບອາຊຽນ ໄດ້ມີການເຕີບໂຕຂຶ້ນ ພາຍໃຕ້ເບື້ອງຫຼັງທີ່ທົ່ວໂລກມີຄວາມຊຸດໂຊມລົງ. ໄຕມາດທີ 1 ປີນີ້, ຍອດມູນຄ່າການຄ້າສິນຄ້າ ລະຫວ່າງ ສອງຝ່າຍບັນລຸ 140 ຕື້ໂດລາ, ເພີ່ມຂຶ້ນ 6,1% ເມື່ອທຽບກັບໄລຍະດຽວກັນຂອງປີກາຍ, ເຮັດໃຫ້ອາຊຽນ ກາຍເປັນຄູ່ການຄ້າໃຫຍ່ອັນດັບໜຶ່ງຂອງຈີນ ເປັນຄັ້ງທຳອິດ.

ທ່ານ ຫວາງອີ້ ກ່າວເພີ່ມເຕີມວ່າ: ຈີນ ຈະສືບຕໍ່ຖືອາຊຽນເປັນບຸລິມະສິດ ໃນນະໂຍບາຍການຕ່າງປະເທດ ກັບບັນດາປະເທດອ້ອມຂ້າງ, ສະໜັບສະໜູນອາຊຽນ ເປັນຖານະໃຈກາງໃນການຮ່ວມມືໃນພາກພື້ນອາຊີຕາເວັນອອກ, ພວກເຮົາຈະເພີ່ມທະວີການໃຫ້ຂໍ້ລິເລິ່ມ; “ໜຶ່ງແລວໜຶ່ງເສັ້ນທາງ” ເຊື່ອມຈອດກັບແຜນຍຸດທະສາດພັດທະນາອາຊຽນ, ປົກປັກຮັກສາລະບຽບການຄ້າຫຼາຍຝ່າຍ, ຮ່ວມກັນຊຸກຍູ້ໃຫ້ບັນລຸການເຊັນສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ, ຊຸກຍູ້ການສ້າງກົນໄກປະສານງານສຸກເສີນກ່ຽວກັບເຫດການສາທາລະນະສຸກ ແລະ ສູນສະສົມອຸປະກອນປ້ອງກັນພະຍາດ, ເສີມຂະຫຍາຍບົດບາດຂອງໂຄງການສຶກສາທີ່ສຳຄັນຕ່າງໆ ແລະ ເພີ່ມທະວີການຮ່ວມມືໃນດ້ານເສດຖະກິດສີຟ້າ ແລະ ການອະນຸລັກສິ່ງແວດລ້ອມ, ເພື່ອຊຸກຍູ້ການພັດທະນາແບບຍືນຍົງ ແລະ ສ້າງຄວາມຜາສຸກໃຫ້ກັບປະຊາຊົນພາກພື້ນແຫ່ງນີ້.