ທ່ານ ສີຈິ້ນຜິງ ກ່າວວ່າຕ້ອງຢຶດໝັ້ນການຖືປະຊາຊົນສຳຄັນກວ່າໝູ່

  ຂ່າວສານຊີອາໄອລາຍງານວ່າ: ​ໃນ​ເວ​ລາເຂົ້າຮ່ວມການຄົ້ນຄວ້າພິຈາລະນາຂອງຄະນະຜູ້ແທນເຂດປົກຄອງຕົນເອງມົງໂກໃນ ທີ່ເຂົ້າຮ່ວມກອງປະຊຸມຄັ້ງທີ 3 ຂອງສະພາປະຊາຊົນແຫ່ງຊາດຈີນສະໄໝທີ 13, ໃນວັນທີ 22 ພຶດສະພາຜ່ານມາ, ທ່ານ ສີຈິ້ນຜິງ ເລຂາທິການໃຫຍ່ພັກກອມມູນິດຈີນ ກ່າວເນັ້ນວ່າ: ພື້ນຖານຂອງພັກກອມມູນິດຈີນ ແມ່ນ​ຂຶ້ນຢູ່ກັບປະຊາຊົນ, ​ສາຍເລືອດກໍ​ຂຶ້ນຢູ່ກັບປະຊາຊົນ. ພັກ​ໄດ້ນຳພາແລະ ​ສ້າງ​ຄວາມສາມັກຄີກັບປະຊາຊົນ ​ເພື່ອ​ເຮັດການປະຕິວັດ, ສ້າງສາ ແລະ ປະຕິຮູບ, ​ຈຸດ​ໝາຍພື້ນ​ຖານກໍແມ່ນເພື່ອໃຫ້ປະຊາຊົນມີຊີວິດການເປັນຢູ່ທີ່ດີ.

  ບັນ​ດາ​ຜູ້ແທນທີ່ເຂົ້າຮ່ວມປະຊຸມ ​ຢືນ​ຢັນວ່າ: ຈະ​ຜັນ​ຂະ​ຫຍາຍຄວາມຮຽກຮ້ອງຂອງທ່ານ ເລຂາທິການໃຫຍ່, ຈະຈັດຕັ້ງປະຕິບັດແນວ​ຄິດພັດທະນາ ທີ່ຖືປະຊາຊົນເປັນໃຈກາງ​ ເຂົ້າ​ໃນ​ການ​ວາງ​ແຜນ​ງານ ແລະ​ ມາດຕະການຕ່າງໆ ກໍ​ຄື​ການ​ເຄື່ອນ​ໄຫວວຽກງານຕົວຈິງ.

  ທ່ານ ສີຈິ້ນຜິງ ກ່າວຕື່ມວ່າ: ພັກກອມມູນິດຈີນ ບໍ່ມີຜົນປະໂຫຍດສ່ວນຕົວ​ພິ​ເສດ, ພັກຈະຖືຜົນປະໂຫຍດຂອງປະຊາ​ຊົນເປັນອັນດັບໜຶ່ງ​ຢູ່ທຸກເວລາ. ທ່ານ ຍັງກ່າວວ່າ: ຢູ່ຕໍ່ໜ້າການແຜ່ລະບາດຂອງພະຍາດຢ່າງຮ້າຍແຮງ, ຕັ້ງແຕ່ຫົວທີພວກເຮົາກໍໄດ້ສະເໜີອອກຢ່າງຈະແຈ້ງວ່າ, ຕ້ອງຖືເອົາຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນສຳ​ຄັນ​ກວ່າ​ໝູ່. ປະຊາຊົນ​ສຳ​ຄັນ​ກວ່າ​ໝູ່, ຊີວິດ​ເປັນ​ສິ່ງ​ສຳ​ຄັນ​ກວ່າ​ໝູ່, ພວກເຮົາຍອມເສຍສະຫຼະທຸກສິ່ງຢ່າງ ເພື່ອປ້ອງກັນຄວາມປອດໄພດ້ານຊີວິດ ແລະ ສຸຂະພາບຮ່າງກາຍຂອງປະຊາຊົນ.

  ທ່ານ ສີຈິ້ນຜິງ ເນັ້ນວ່າ: ພັກເຮົາຢາກກຳອຳນາດ​ໄວ້ຍາວນານ ກໍຕ້ອງຮັກສາສາຍສຳພັນແບບກາຍ​ອິນ​ຊີກັບປະຊາຊົນຕະຫຼອດໄປ, ຄິດເພື່ອປະຊາຊົນ,​ ສູ້​ຊົນ​ຢ່າງ​ຄຽງ​ບ່າ​ຄຽງ​ໄຫຼ່​ກັບປະຊາຊົນ, ຮ່ວມແຮງຮ່ວມໃຈກັບປະຊາຊົນ ​ເພື່ອ​ຜ່ານ​ຜ່າ​ຄວາມ​ຫຍຸ້ງຍ​າກ, ຮ່ວມທຸກຮ່ວມສຸກກັບປະຊາຊົນຢ່າງສະເໝີຕົ້ນສະເໝີປາຍ. ຕ້ອງຖືການສ້າງຄວາມສຸກໃຫ້ແກ່ປະຊາຊົນ ເປັນຜົນງານການເມືອງທີ່ສຳຄັນທີ່ສຸດ. ພວກເຮົາຊຸກຍູ້ການພັດທະນາເສດຖະກິດ-ສັງຄົມ, ​ຈຸດ​ປະ​ສົງ ກໍແມ່ນເພື່ອຕອບສະໜອງ​ກັບຄວາມຮຽກຮ້ອງຕ້ອງການຂອງປະຊາຊົນ ທີ່ມີຕໍ່ຊີວິດການເປັນຢູ່ທີ່ດີງາມ. ພະຍາຍາມ​ສູ້​ຊົນ​ເພື່ອໃຫ້ປະຊາຊົນເຫັນ​ເຖິງການປ່ຽນແປງແລະ ​ໄດ້ຮັບຜົນປະໂຫຍດຕົວຈິງ.