ຫັນອາຊີບສ້ອມແປງມາປູກພືດເປັນສິນຄ້າພາຄອບຄົວພົ້ນທຸກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 26/05/2020 08:53:07 ຈຳ​ນວນ​​ຢ້ຽມ​ຊົມ 1796 ຄັ້ງ

  ຄອບຄົວ​ຂອງ ທ້າວ ພູມ​ມາ ວົງ​ສັກ​ດີ ອາຍຸ 42 ປີ  ອາຊີບ​ສ້ອມແປງ​ລົດ  ຢູ່​ບ້ານ ນາ​ສ້ານ ເມືອງບໍ່​ແຕນ ແຂວງໄຊ​ຍະ​ບູ​ລີ, ແມ່ນ​ຄອບຄົວ​ໜຶ່ງ​ທີ່​ຫັນ​ຈາກ​ອາຊີບ​ສ້ອມແປງ​ມາ​ເຮັດ​ອາຊີບ​ປູກ​ພືດ​ສະບຽງ​ອາຫານ ເປັນ​ອາຊີບ​ຕົ້ນຕໍ, ພາຍ​ໃນ​ຄອບຄົວ​ມີ​ຈຳນວນ​ພົນ​ທັງ​ໝົດ 7 ຄົນ, ຍິງ 3 ຄົນ, ມີແຮງ​ງານ​ຕົ້ນຕໍ 2 ແຮງ​ງານ, ເປັນ​ຄອບຄົວ​ທີ່​ສູ້​ຊົນ​ເພື່ອ​ເຮັດ​ໃຫ້​ຄອບຄົວ​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ ແລະ ພັດທະນາ​ໃຫ້​ຮັ່ງມີ​ຂຶ້ນ ແລະ ດ້ວຍ​ຄວາມ​ສະຫງວນ​ມັກ​ໃນ​ອາຊີບ​ການ​ປູກ​ພືດ ໂດຍ​ສະເພາະ​ການ​ປູກ​ພືດ, ຜັກ, ໃນ​ນັ້ນ ແມ່ນ​ສາລີ​ຫວານ​ທີ່​ເປັນຄວາມ​ຕ້ອງການ​ຂອງ​ທ້ອງ​ຕະຫຼາດ​ທັງ​ພາຍ​ໃນ ແລະ ຕ່າງ​ເມືອງ.
  ທ້າວ ພູມ​ມາ ວົງ​ສັກ​ດີ ໄດ້​ເລົ່າ​ສູ່​ຟັງ​ວ່າ: ໃນ​ເບື້ອງຕົ້ນ​ ຄອບຄົວ​ແມ່ນ​ເຮັດ​ອາຊີບ​ສ້ອມແປງ​ລົດ​ຂະໜາດ​ນ້ອຍ ແຕ່​ລາຍ​ຮັບ​ບໍ່​ກຸ້ມ​ລາຍ​ຈ່າຍ, ຕໍ່​ມາ​ຈຶ່ງ​ໄດ້​ເຮັດ​ກິດຈະການ​ບໍລິການ​ສີ​ເຂົ້າ, ປູກ​ໄມ້​ໃຫ້ ໝາກ, ລ້ຽງ​ໝູ​ພັນ​ເນື້ອ ເປັນ​ອາ​ຊີບ​ສໍາ​ຮອງ,  ມາ​ຮອດ​ປີ 2014 ກໍ່​ໄດ້​ຫັນ​ມາ​ປູກ​ພືດ​ຢ່າງ​ຈິງ​ຈັງ ດ້ວຍ​ການ​ນຳ​ໃຊ້​ພື້ນ​ທີ່​ຂ້າງ​ທົ່ງ​ນາ​ຂອງ​ຕົນ ທີ່​ຕິດ​ກັບ​ແຄມ​ນ້ຳ​ຮອຍ ຊຶ່ງ​ມີ​ເນື້ອທີ່​ພຽງ​ແຕ່ 0,16 ເຮັກຕາ, ໃນ​ເບື້ອງ​ຕົ້ນ​ແມ່ນ​ປູກ​ສາລີ​ຫວານ, ຖົ່ວດິນ ​ໝູນ​ວຽນ​ກັນ​ໄປ ແລະ ໄດ້​ສົ່ງ​ຂາຍ​ຕະຫຼາດ​ແບບ​ເຄິ່ງ​ສຳເລັດ​ຮູບ (ຂາຍ​ດິບ) ເຫັນ​ວ່າ​ໄດ້​ຂາຍ​ດີ, ມາ​ຮອດ​ປີ 2016 ຈຶ່ງ​ໄດ້​ຕັດສິນ​ໃຈ ຂະຫຍາຍ​ເນື້ອທີ່​ການ​ປູກ​ຂອງ​ຕົນ​ຊຶ່ງ​ຫັນ​ຈາກ​ເນື້ອທີ່​ນາ​ບາງ​ສ່ວນ ແລະ ພື້ນ​ທີ່​ວ່າງ​ຈາກ​ແຄມ​ສວນ ເພີ່ມ​ເປັນ 0,80 ເຮັກຕາ ດ້ວຍ​ການ​ປູກ​ແບບ​ປະສົມ​ປະສານ ແລະ ນໍາ​ໃຊ້​ເຕັກນິກ​ແບບ​ໃໝ່​ເຂົ້າ​ຊ່ວຍ ດ້ວຍ​ການ​ແບ່ງ​ເນື້ອທີ່​ອອກ​ເປັນ​ລ໋ອກ ເພື່ອ​ໃຫ້​ປູກ​ພືດ​ຜັກ ເປັນ​ຮອບ​ວຽນ​ກັນ​ໄປ ເຊັ່ນ: ສາລີ​ຫວານ, ໝາກແຕງ​ກວາ, ໝາກຖົ່ວ​ຝັກ​ຍາວ, ກະ​ລ່ຳ​ປີ ແລະ ອື່ນໆ ຊຶ່ງ​ສາມາດ​ເກັບ​ກູ້​ໄດ້​ຕະຫຼອດ​ປີ ແລະ ເຫັນ​ວ່າ​ໄດ້​ຮັບ​ຜົນ​ຜະລິດ​ດີ ແລະ ມີ​ຄຸນ​ນະ​ພາບ,  ສາມາດ​ຕອບ​ສະໜອງ​ໃຫ້​ທ້ອງ​ຕະຫຼາດ​ພາຍ​ໃນ​ເມືອງ ແລະ ຕ່າງ​ເມືອງ;  ຕໍ່​ມາ​ກໍ່​ໄດ້​ຍົກ​ລະດັບ​ຈາກ​ການ​ສົ່ງ​ຂາຍ​ສາລີ​ຫວານ​ແບບ​ເຄິ່ງ​ສຳເລັດ​ຮູບ (ສາລີ​ດິບ) ມາ​ເປັນ​ສຳເລັດ​ຮູບ (ຕົ້ມ​ສຸກ) ຂາຍ ຕາມ​ຄວາມ​ຕ້ອງການ​ຂອງ​ລູກ​ຄ້າ ແລະ ສົ່ງ​ທ້ອງ​ຕະຫຼາດ​ພາຍ​ໃນ, ມາ​ຮອດ​ປີ 2018 ໄດ້​ຕັ້ງ​ຮ້ານ​ວາງ​ຂາຍ​ຢູ່​ແຄມ​ທາງ​ຕໍ່ໜ້າ​ສວນ​ຂອງ​ຕົນ​ເອງ ເພື່ອ​ສະດວກ​ໃນ​ການ​ບົວລະບັດ​ຮັກສາ​ສວນ​ພືດ​ຂອງ​ຕົນ ແລະ ເປັນ​ການ​ດຶງ​ດູດ​ຜູ້​ບໍລິການ​ໃຫ້​ມາ​ຊື້​ກັບ​ທີ່, ຜ່ານ​ການ​ປູກ​ພືດ​ໃນ​ໄລຍະ​ຜ່ານ​ມາ ເຫັນ​ວ່າ​ມີ​ຄວາມ​ຮັບປະກັນ ແລະ ໝັ້ນຄົງ​ກ່​ວາ​ເກົ່າ, ເຮັດ​ໃຫ້​ຄອບຄົວ ມີ​ລາຍ​ຮັບ​ຈາກ​ການ​ປູກ​ພືດ​-​ຜັກ​ໄດ້ 33 ລ້ານ​ກວ່າ​ກີບ​ຕໍ່​ປີ, ຮັບ​ຈາກ​ການ​ຜະລິດ​ເຂົ້າ​ໄດ້ 10 ລ້ານ​ກວ່າ​ກີບ, ຄຽງ​ຄູ່​ກັນ​ນັ້ນ ກໍ່​ມີ​ລາຍ​ຮັບ​ຈາກ​ການ​ບໍລິການ​ສີ​ເຂົ້າ ແລະ ຂາຍ​ໝາກ​ໄມ້ 26 ລ້ານ​ກີບ​ຕໍ່​ປີ ແລະ ລາຍ​ຮັບ​ອື່ນໆ 15 ລ້ານ​ກີບ ລວມ​ລາຍ​ຮັບ​ທັງ​ໝົດ 84 ລ້ານ​ກວ່າ​ກີບ​ຕໍ່​ປີ, ສະເລ່ຍ​ຕໍ່​ຄົນ​ໜຶ່ງ ໄດ້ 12 ລ້ານ​ກີບ​ຕໍ່​ຄົນ​ຕໍ່​ປີ, ຜ່ານ​ການ​ປ່ຽນ​ອາຊີບ​ຈາກ​ສ້ອມ​ແປງ​ມາ​ປູກ​ພືດ​ເຫັນ​ວ່າ​ສາມາດ​ສ້າງ​ລາຍ​ຮັບ​ໃຫ້​ແກ່​ຄອບຄົວ​ຢ່າງ​ໝັ້ນ​ທ່ຽງ ແລະ ເຮັດ​ໃຫ້​ຊີວິດ​ການ​ເປັນ​​ຢູ່ຂອງ​ຄອບຄົວ​ໄດ້​ ຮັບ​ການ​ປັບປຸງ​ດີ​ຂຶ້ນ.
(ຂ່າວ-​ພາບ: ອຸ່ນ​ເຮືອນ ໂພທິ​ລັກ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110