ໜັງສືພິມ ປະຊາຊົນ

ອາກຊັງຕິນ ຕິດອັນດັບ 5 ປະເທດຜະລິດອາຫານ ຂອງໂລກ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 26/05/2020 09:15:03 ຈຳນວນຢ້ຽມຊົມ 331 ຄັ້ງ

(ເນື່ອງໃນໂອກາດວັນຊາດ ອາກຊັງຕິນ 25 ພຶດສະພາ 2020)

ຮຽບຮຽງໂດຍ: ລຸ້ງດາວ ບຸນມີ

ອາກຊັງຕິນ ເປັນປະເທດໃຫຍ່ອັນດັບ 2 ຂອງທະວີບອາເມຣິກາໃຕ້ ຮອງຈາກປະເທດບຣາຊິນ ແລະ ເປັນປະເທດໃຫຍ່ອັນດັບ 8 ຂອງໂລກ. ມີເນື້ອທີ່ທັງໝົດ 2.780.400 ກິໂລແມັດມົນທົນ, ມີຊາຍແດນທາງດ້ານເໜືອຕິດກັບ ປາຣາກວາຍ ແລະ ໂບລີວີ, ດ້ານຕາເວັນອອກສ່ຽງເໜືອຕິດກັບ ບຣາຊິນ ແລະ ອູຣູກວາຍ, ທາງດ້ານ ໃຕ້ ແລະ ດ້ານຕາເວັນຕົກ ຕິດກັບຈີເລ. ມີພົນລະເມືອງ ທັງໝົດ 18 ລ້ານຄົນ (ຂໍ້ມູນປີ 2018), ເມືອງຫຼວງຂອງປະ ເທດ ແມ່ນ ບູໂນສໄອເຣັສ.
ສະພາບພູມອາກາດຂອງ ອາກຊັງຕິນ ມີ 4 ລະດູເຊັ່ນດຽວກັບເອີຣົບ, ແຕ່ລະດູການຈະກົງກັນຂ້າມ ເນື່ອງຈາກຢູ່ໃນຂົ້ວໂລກໃຕ້. ລະດູໃບໄມ້ປົ່ງ ແມ່ນເລີ່ມແຕ່ເດືອນກັນຍາ ຫາ ເດືອນພະຈິກ ອຸນຫະພູມຢູ່ໃນລະຫວ່າງ 15-20 ອົງສາເຊ, ລະດູຮ້ອນແຕ່ເດືອນທັນວາ ຫາ ເດືອນກຸມພາ ອຸນຫະພູມ 25-35 ອົງສາເຊ. ລະດູໜາວແຕ່ເດືອນມີນາຫາເດືອນສິງ ຫາ ອຸນຫະພູມ 1-15 ອົງສາ ເຊ. ສຳລັບນະຄອນຫຼວງບູໂນສໄອເຣັສ ມີຄວາມໝາຍ ວ່າ ອາກາດດີ, ອຸນຫະພູມໃນ ໄລຍະລະດູໜາວ ແມ່ນຢູ່ລະ ຫວ່າງ 1-15 ອົງສາເຊ. ແຕ່ບໍ່ມີຫິມະຕົກໃນເມືອງ ແລະ ໃນໄລຍະລະດູຮ້ອນ ອຸນຫະພູມຈະຢູ່ປະມານ 25-35 ອົງສາເຊ, ອາກາດຈະໜາວເຢັນເປັນພິເສດໃນແຖບຕອນໃຕ້ຂອງປະເທດ ແລະ ຢູ່ພູສູງຈະມີຫິມະປົກຄຸມເກືອບຕະຫຼອດປີ, ສຳລັບພູມອາກາດສ່ວນໃຫຍ່ຂອງປະເທດຈະຢູ່ໃນລະດັບກາງ, ແຫ້ງແລ້ງໃນພາກຕາເວັນອອກສຽງໃຕ້ ແລະ ເຄິ່ງແອນຕາກຕິກ ໃນພາກຕາເວັນຕົກສ່ຽງໃຕ້. ຊັບພະຍາກອນທຳມະຊາດ ທີ່ເປັນທ່າແຮງໃຫ້ກັບປະເທດແມ່ນ ກົ່ວ, ສັງກະສີ, ທອງແດງ, ເຫຼັກ, ມັງການັສ, ປີໂຕຣລຽມ, ຢູເຣນຽມ. ນອກຈາກນີ້ ຍັງມີທົ່ງຫຍ້າ ແລະ ແຫຼ່ງນຳ້ທີ່ອຸດົມສົມບູນ ຊຶ່ງເໝາະແກ່ການປູກຝັງ ແລະ ລ້ຽງສັດຂະ ໜາດໃຫຍ່.
ອາກຊັງຕິນ ເປັນປະເທດ ໃຫຍ່ ແລະ ມີຄວາມອຸດົມສົມ ບູນທີ່ສຸດ ຕິດອັນດັບ 5 ປະເທດແຫຼ່ງຜະລິດອາຫານຂອງໂລກ ທີ່ຜະລິດສົ່ງອອກທັນຍາພືດ (grains), ມີເນື້ອທີ່ໃຫຍ່ເປັນອັນດັບ 8 ຂອງໂລກ. ນອກຈາກນີ້, ຍັງມີຊັບພະຍາກອນທຳມະຊາດຈຳນວນຫຼາຍ, ມີຖານການຜະລິດດ້ານອຸດສາ ຫະກຳທີ່ຫຼາກຫຼາຍ, ມີພາກບໍລິການທີ່ກ້າວໜ້າ, ເປັນປະເທດຜູ້ຜະລິດ ແລະ ສົ່ງອອກສິນຄ້າກະສິກຳ ແລະ ທັນຍາຫານລາຍໃຫຍ່ຂອງໂລກ, ມີລະບົບການກະສິກຳທີ່ທັນສະໄໝ ແລະ ໃຊ້ເຄື່ອງຈັກຂະໜາດໃຫຍ່, ມີເຕັກໂນໂລຊີຊັ້ນນຳຂອງໂລກ, ສາມາດທຽບໄດ້ກັບສະຫະລັດອາເມຣິກາ ຊຶ່ງຈະເຫັນໄດ້ວ່າ ມີການໃຊ້ແຮງງານໃນພາກກະສິກຳຂ້ອນຂ້າງນ້ອຍ, ແຕ່ໃຫ້ຜົນຜະລິດສູງຕິດກຸ່ມຜູ້ນໍາ ໂລກ, ມີການຫຼຸດຕົ້ນທຶນດ້ວຍ ວິທີການໃຊ້ GMO (ສິ່ງທີ່ມີຊີວິດເຊັ່ນ: ພືດ, ສັດ ແລະ ອື່ນໆ) ເປັນອັນດັບ 2 ຂອງໂລກຮອງຈາກ ອາເມຣິກາ, ສິນຄ້າກະສິກຳທີ່ສຳຄັນຂອງປະເທດແມ່ນ ຖົ່ວເຫຼືອງ (ອັນດັບ 3 ຂອງໂລກ, ນ້ຳມັນຖົ່ວເຫຼືອງອັນ ດັບ1), ສາລີ (ອັນດັບ2 ຂອງ ໂລກ), ສິນຄ້າກະສິກຳປະ ເພດໝາກກ້ຽງ, ໝາກນາວ ແລະ ນ້ຳເຜິ້ງ (ອັນດັບ 1 ຂອງໂລກ), ເຂົ້າຟ້າງ, ເຂົ້າ ສາລີ,ແກ່ນ ດອກຕາເວັນ, ນ້ຳຕານເປັນຕົ້ນ.
ນອກຈາກສິນຄ້າກະສິກຳ, ສິນຄ້າສົ່ງອອກປະເພດອື່ນໆທີ່ສໍາຄັນຂອງປະເທດແມ່ນ ນໍ້າມັນ, ແກັສທຳມະຊາດ, ຍານ ພາຫະນະ, ເຄມີ, ວັດສະດຸກໍ່ສ້າງ, ປຸຍເຄມີ, ຄຳ (80% ສົ່ງອອກໄປສະວິດ), ໂປແຕສຊຽມ, ຫີນ, ນ້ຳມັນ (ຕິດລະດັບໂລກ) ແລະ ອັນຍະມະນີ ທີ່ມີເອກະລັກພິເສດບໍ່ຄືໃຜ ເພື່ອໃຊ້ສຳລັບເຮັດເຄື່ອງປະດັບ ແລະ ຕົບແຕ່ງເຮືອນສໍາລັບຊົນຊັ້ນສູງ. ນອກຈາກກຸ່ມສິນຄ້າດັ່ງກ່າວແລ້ວ, ອາກຊັງຕິນ ຍັງເປັນປະເທດທີ່ມີການເຮັດຟາມລ້ຽງງົວຊີ້ນ, ງົວນົມ ແລະ ມ້າຂະໜາດໃຫຍ່, ມີການລ້ຽງງົວຫຼາຍກວ່າ 40 ລ້ານໂຕ ມີການສົ່ງອອກຊີ້ນ ແລະ ຜະລິດຕະພັນ ໂດຍຊີ້ນສະເຕັກຄຸນນະພາບສູງສ່ວນໃຫຍ່ສົ່ງອອກໄປເຢຍລະມັນ ທີ່ມີເຄື່ອງໝາຍການຄ້າ ຮິວຕັນໂຄຕາ ຂອງ EU (ອາກຊັງຕິນ ເຄີຍເປັນຜູ້ສົ່ງອອກອັນດັບ 1 ຊີ້ນສະເຕັກ ສະຖິຕິກີນເນັສ). ລວມຍອດຜະລິດຕະພັນພາຍໃນປະເທດບັນລຸ 911,5 ຕື້ໂດລາ (ຂໍ້ມູນປີ 2018).
ສປປ ລາວ ສ້າງຕັ້ງສາຍພົວພັນທາງການທູດກັບ ອາກຊັງຕິນ, ໃນວັນທີ 24 ກໍລະກົດ ປີ 1975.