ປູກອ້ອຍເປັນສິນຄ້າ ພາໃຫ້ຄອບຄົວພົ້ນທຸກ

ເຜີຍ​ແຜ່​ໂດຍ​: ທ່ານ ວິ​ໄລ​ສັກ ສໍ​ພາບ​ມີ​ໄຊ​ ເວ​ລາ: 27/05/2020 09:05:39 ຈຳ​ນວນ​​ຢ້ຽມ​ຊົມ 1742 ຄັ້ງ

  ການ​ສ້າງ​ເສດຖະກິດ​ຄອບຄົວ​ດ້ວຍ​ການ​ຜະລິດ​ກະ​ສິ​ກໍາ​ເປັນ​ສິນຄ້າ   ແມ່ນ​ອາຊີບ​ໜຶ່ງ​ທີ່​ສາມາດ​ສ້າງ​ລາຍ​ຮັບ​ໃຫ້​ແກ່​ຄອບຄົວ​ໄດ້​ດີ​ສົມຄວນ ຖ້າ​ຫາກ​ວ່າ​ທຸກ​ຄົນ​ໃນ​ຄອບຄົວມີ​ຄວາມ​ສາມັກຄີ,  ມີ​ຄວາມ​ດຸ ໝັ່ນ​ຂະຫຍັນ​ພຽນ, ຮູ້​ປະຢັດ​ມັດທະຍັດ​ກໍຈະ​ກ້າວ​ໄປ​ສູ່​ຜົນ ສຳເລັດ ແລະ ກ້າວ​ໄປ​ສູ່​ການ​ແກ້​ໄຂ​ຄວາມທຸກ​ຍາກ​ເທື່ອ​ລະ​ກ້າວ​ຕາມ​ແນວທາງ​ຂອງ​ພັກ​-​ລັດ​ວາງ​ອອກ ຄື​ດັ່ງ​ຄອບຄົວ​ຂອງ​ທ່ານ ບຸນ​ເລີຍ ເຄນ​ໄຊ​ຍະ ປະຊາຊົນ​ບ້ານ​ດົງ​ພຸງ ເມືອງ​ໄຊ​ບູ​ລີ ແຂວງ​ສະຫວັນ​ນະ​ເຂດ  ຊຶ່ງແມ່ນ​ ຄອບຄົວ​ໜຶ່ງທີ່​ຢຶດຖືເອົາ​ການ​ປູກ​ອ້ອຍ​ເປັນ​ສິນຄ້າ​ສ້າງ​ລາຍ​ຮັບ​ໃຫ້​ແກ່​ຄອບຄົວ​ສາມາດ​ປັບປຸງ​ຊີວິດ​ການ​ເປັນ​ຢູ່​ຂອງ​ຄອບຄົວໃຫ້​ມີ​ຄວາມ​ຈະເລີນ​ຮັ່ງມີ​ຂຶ້ນ​ເປັນ​ກ້າວໆ.
  ທ່ານ ບຸນ​ເລີຍ ເຄນ​ໄຊ​ຍະ ໄດ້​ກ່າວ​ວ່າ: ພາຍ​ໃນ​ຄອບຄົວ​ມີແຮງ​ງານ​ຕົ້ນຕໍ​ທັງ​ໝົດ 8 ຄົນ, ສຳຮອງ 3 ຄົນ ຊຶ່ງ​ໄລຍະ​ຜ່ານ​ມາ, ພຽງ​ແຕ່​ອາໄສ​ການ​ເຮັດ​ນາ​ຂາຍ​ເຂົ້າ ແລະ ລ້ຽງສັດ​ພໍ​ກຸ້ມ​ກິນ ແຕ່​ກໍບໍ່​ພຽງພໍ​ກັບ​ຄວາມ​ຮຽກຮ້ອງ​ຕ້ອງການ ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ຄອບຄົວ​ພົບ​ຄວາມ​ຫຍຸ້ງຍາກ ເມື່ອ​ເປັນ​ເຊັ່ນ​ນັ້ນ ຕົນ​ເອງ​ ຈຶ່ງ​ໄດ້​ປຶກສາ​ກັບ​ຄອບຄົວ ເພື່ອ​ຊອກ​ວິທີ​ເຮັດ​ໃຫ້​ຊີວິດ​ການ​ເປັນ​ຢູ່​ຂອງ​ຄອບຄົວ​ດີ​ຂຶ້ນ ຕາມ​ທິດ​ຊີ້​ນຳ​ຂອງ​ຂັ້ນ​ເທິງ​ທີ່​ວ່າ: ກຸ້ມ​ຕົນ​ເອງ ເພິ່ງ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ. ຕົກ​ມາ​ຮອດ​ປີ 2007 ຈຶ່ງ​ໄດ້​ຕັດສິນ​ໃຈ​ເລີ່ມ​ບຸກເບີກ​ເນື້ອທີ່​ດິນ​ຂອງ​ຕົນ​ເອງ​ທີ່​ມີ​ຢູ່ ໃນ​ເນື້ອທີ່ 2 ເຮັກຕາ​ປາຍ ຄ່າ​ບຸກເບີກ​ປີ​ທຳອິດໃຊ້ງົບ ປະມານ 3 ລ້ານ​ກວ່າ​ກີບ ໂດຍ​ເລີ່ມ​ລົງມືປູກ ແລະ ຊື້​ແນວພັນ ​ອ້ອຍ​ມາ​ຈາກ​ປະເທດ​ໄທ ແລະ ມາ​ຮອດ​ປີ 2008 ເປັນ​ປີ​ທຳ ອິດ​ທີ່​ໄດ້​ເລີ່ມ​ຕັດ​ອ້ອຍ​ເຂົ້າ​ໂຮງ ງານ ເຫັນ​ວ່າ​ລາຍ​ຮັບ​ຍັງ​ບໍ່​ໄດ້​ດີ​ເທົ່າ​ທີ່ຄວນ, ຫັກ​ໃຊ້​ຄ່າ​ໜີ້​ສິນ​ຕ່າງໆ​ກໍ່​ຫຼວງ​ຫຼາຍ. ຈາກນັ້ນ, ຕົນ​ເອງ ແລະ ຄອບຄົວ​ ຈຶ່ງໄດ້ (ເຊົ່າ​ດິນ) ເພື່ອ​ຂະຫຍາຍ​ເນື້ອທີ່​ປູກ​ອ້ອຍ​ອອກ​ຕື່ມ​ໄປ​ອີກ​ຈໍາ​ນວນ 28,48 ເຮັກຕາ ແລະ ຊື້​ແນວ​ພັນ​ຈາກ​ສວນ​ອ້ອຍ​ໃກ້​ຄຽງ​ໃນ​ລາຄາ 333.000 ກີບ ຕໍ່​ໂຕນ. ການ​ປູກ​ອ້ອຍ​ໃນ​ແຕ່​ລະ​ປີ​ແມ່ນ​ເລີ່ມ​ໄຖ​ພວນ​ດິນ ໃນ​ເດືອນ​ກັນຍາ ແລະ ຊຳ​ເບ້ຍ(ປູກ)ໃນ​ເດືອນ​ຕຸລາ​ຂອງ​ທຸກໆ​ປີ ໃຊ້​ເວລາ 4 ເດືອນ​ຈຶ່ງ​ຈະ​ຕັດ​ຂາຍ​ໄດ້. ການ​ປູກ​ແມ່ນ​ບໍ່​ໄດ້​ມີ​ຄວາມ​ຫຍຸ້ງຍາກ​ແຕ່​ຢ່າງໃດ ເພາະ​ມີ​ລົດ​ຈາກ​ໂຮງງານ​ນ້ຳຕານ​ມາ​ປູກ ໃຫ້​ເພື່ອ​ໃຫ້​ຖືກ​ຕາມ​ເຕັກນິກ​ວິຊາ​ການ​ຂອງ​ບໍລິສັດ​ເອງ, ປູກ​ດ້ວຍ​ທຳ​ມະ​ຊາດ ບໍ່​ໄດ້​ໃສ່​ຝຸ່ນເຄ​ມີ​ຫົດ​ນ້ຳ​ແຕ່​ຕອນ​ປູກ​ທຳອິດ, ສຳລັບ​ການ​ເກັບ​ກ່ຽວ​ແມ່ນ​ໄດ້​ຈ້າງ​ແຮງ​ງານ​ຄົນ​ຕັດ ມັດ​ລະ 500 ກີບ ແລ້ວ​ຈະ​ມີ​ລົດ​ຈາກ​ໂຮງງານ ມາ​ຮັບ​ເກັບ​ຊື້​ກັບ​ສວນ​ເລີຍ.
  ທ່ານ​ ບຸນ​ເລີຍ ເຄນ​ໄຊ​ຍະ ຍັງ​ກ່າວ​ຕື່ມ​ວ່າ:ໃນ​ແຕ່​ລະ​ປີ​ນັ້ນ ແມ່ນ​ຈະ​ມີ​ພະນັກງານ​ວິຊາ​ການ​ຈາກ​ຫ້ອງການ​ກະ​ສິ​ກຳ​-​ປ່າໄມ້​ເມືອງ ລົງ​ມາ​ແນະນຳ​ວິທີ​ການ​ບົວລະບັດ​ຮັກສາ​ເບ້ຍ​ອ້ອຍ​ບໍ່​ໃຫ້​ຕາຍ ແຫ້ງ, ການ​ຮັກສາ ແລະ ວິທີ​ການ​ບໍ່​ໃຫ້​ມີ​ດ້ວງ, ບົ້ງ​ເຈາະ, ແມງໄມ້​ຊະນິດ​ອື່ນໆ​ມາ​ທຳລາຍ  ແລະ​ລວມ​ເຖິງ​ການ​ໃສ່​ຝຸ່ນ​ທຳ​ມະ​ຊາດ​ໃຫ້​ຖືກ​ວິ​ທີ.
  ຜ່ານ​ການ​ສູ້​ຊົນ​ສ້າງ​ເສດ ຖະກິດ​ຄອບຄົວ​ມາ​ໄດ້ 1 ທົດ​ສະ​ວັດ ປັດຈຸ​ບັນ ເຫັນ​ໄດ້​ວ່າ: ຊີວິດ​ການ​ເປັນ​ຢູ່​ຂອງ​ຄອບຄົວ​ໄດ້​ຮັບ​ການ​ພັດທະນາ​ດີ​ຂຶ້ນ ຍ້ອນ​ສະມາຊິກ​ພາຍ​ໃນ​ຄອບຄົວ​ມີ​ຄວາມ​ສາມັກຄີ, ມີ​ຄວາມ​ດຸໝັ່ນ, ເປັນ​ຈິດ​ໜຶ່ງ​ໃຈ​ດຽວ ພ້ອມ​ກັນ​ເຮັດ​ພ້ອມ​ກັນ​ສ້າງ ຈຶ່ງ​ໄດ້​ຮັບ​ຜົນສຳເລັດ​ຄື​ດັ່ງກ່າວ ຊຶ່ງ​ສະແດງ​ອອກ ມີ​ລາຍ​ຮັບ​ເຂົ້າ​ຄອບຄົວ 240 ລ້ານ​ກີບ​ຕໍ່​ປີ, ສາມາດ​ປຸກເຮືອນ​ໄດ້​ອີກ 1 ຫຼັງ, ມີ​ລົດ​ໄຖ​ນ້ອຍ 1 ຄັນ, ລົດ​ໄຖ​ໃຫຍ່ 2 ຄັນ ແລະ ອຸປະກອນ​ທາງ​ການ​ກະເສດ​ອີກ​ຈຳ​ນວນ​ໜຶຶ່ງ, ຊື້​ດິນ​ປຸກ​ສ້າງ​ອີກ 4 ຕອນ, ລົດຈັກ 5 ຄັນ, ມີ​ທຶນ​ການ​ສຶກສາ​ໃຫ້​ລູກ, ມີ​ທຶນ​ໝູນວຽນ​ພາຍ​ໃນ​ຄອບຄົວ, ລ້ຽງສັດ​ປະເພດ​ງົວ, ຄວາຍ ທັງ​ໝົດ​ລວມ 24 ໂຕ, ໜອງ​ປາ 1 ໜອງ ແລະ ພິເສດ​ແມ່ນ​ຍັງ​ໄດ້​ຮັບ​ເໝົາ​ບຸກເບີກ​ເນື້ອທີ່​ດິນ, ດຸດ​ດິນ, ໄຖ​ໄຮ່, ໄຖ​ສວນ​ຕ່າງໆ ສາມາດ​ສ້າງ​ລາຍ​ຮັບ​ປີ​ໜຶ່ງໆ​ແມ່ນ 30-40 ລ້ານ​ກີບ. ອາດ​ເວົ້າ​ໄດ້​ວ່າ​ເປັນ​ຄອບຄົວ​ທີ່​ຫຼຸດ​ພົ້ນ​ອອກ​ຈາກ​ຄວາມທຸກ​ຍາກ​ໄດ້​ຢ່າງ​ສົມ​ບູນ.
  ໃນ​ທິດ​ທາງ​ຕໍ່ໜ້າ, ທ່ານ ບຸນ​ເລີຍ ແມ່ນ​ບໍ່​ໄດ້​ຂະຫຍາຍ​ເນື້ອທີ່​ອອກ ເພາະ​ຈະ​ປູກ​ໃນ​ເນື້ອທີ່​ອັນ​ເກົ່າ ເພາະ​ຕົນ​ເອງ​ກໍ່​ມີ​ປະສົບ​ການ​ມາ​ແລ້ວ ພ້ອມ​ທັງ​ຊຸກຍູ້​ໃຫ້​ຍາດຕິ​ພີ່ນ້ອງ ແລະ ປະຊາຊົນ​ພາຍ​ໃນ​ບ້ານ ຫັນ​ມາ​ປູກ​ອ້ອຍ​ໃຫ້​ຫຼາຍ​ຂຶ້ນ ເພື່ອ​ຕອບ​ສະໜອງ​ກັບ​ຄວາມ​ຕ້ອງການ​ຂອງ​ຕະຫຼາດ ແລະ ຈະ​ເຮັດ​ໃຫ້​ທຸກ​ຄອບຄົວ​ມີ​ລາຍ​ຮັບ​ເພີ່ມ​ຂຶ້ນ ແລະ ອີກ​ຢ່າງ​ກໍ່​ແມ່ນ​ເປັນ​ການ​ຮູ້​ໝູນ​ໃຊ້​ທ່າແຮງ​ບົ່ມ​ຊ້ອນ​ຂອງ​ຕົນ​ເອງ ທີ່​ມີ​ຢູ່​ຈົນ​ເຮັດ​ໃຫ້​ຄອບຄົວ​ປະສົບ​ຜົນສຳເລັດ​ໄດ້​ທັງ​ເປັນ​ແບບຢ່າງ​ທີ່​ດີ​ໃຫ້​ແກ່​ປະຊາຊົນ​ໃນ​ທົ່ວ​ເມືອງ​ໄຊ​ບູ​ລີ ແຂວງ​ສະຫວັນ​ນະ​ເຂດ​.

(ໂດຍ: ນັກ​ຂ່າວ​ແຂວງ​ສະ​ຫວັນ​ນະ​ເຂດ)


ລິຂະສິດ © 2014 www.pasaxon.org.la. ສະຫງວນໄວ້ເຊິງສິດທັງຫມົດ
ໜັງສືພິມປະຊາຊົນ ຖະໜົນກຳແພງເມືອງ ນະຄອນຫຼວງວຽງຈັນ ໂທລະສັບ: 021336111, ແຟັກ: 021336113,ອີເມວ: pasaxonit@gmail.com, ຕູ້ ປ.ນ 1110