ໜັງສືພິມ ປະຊາຊົນ

ສິງກະໂປ ປັບຫຼຸດການຄາດຄະເນ GDP ໃນປີນີ້ລົງ

ເຜີຍແຜ່ໂດຍ: ທ່ານ ວິໄລສັກ ສໍພາບມີໄຊ ເວລາ: 27/05/2020 09:41:27 ຈຳນວນຢ້ຽມຊົມ 465 ຄັ້ງ

ຂ່າວຕ່າງປະເທດລາຍ ງານໃນວັນທີ 26 ພຶດສະພາ, ກະຊວງການຄ້າ ແລະ ອຸດສາ ຫະກຳຂອງສິງກະໂປ ໄດ້ປະກາດປັບຫຼຸດການຄາດຄະເນໂຕເລກລວມຍອດຜະລິດຕະພັນພາຍໃນປະເທດ (GDP) ຂອງປີ 2020 ລົງສູ່ລະດັບ -4% ເຖິງ -7% ຫຼັງຈາກການແຜ່ລະ ບາດຂອງໄວຣັດ COVID-19 ໄດ້ຖ່ວງດຶງໂຕເລກ GDP ຂອງສິງກະໂປຫົດຕົວລົງໃນໄຕມາດທຳອິດຂອງປີນີ້.
ການປັບຫຼຸດການຄາດຄະເນ GDP ຄັ້ງນີ້ຖືວ່າເປັນຄັ້ງທີ 3 ແລ້ວ ເມື່ອວັນທີ 17 ກຸມພາທີ່ຜ່ານມາ, ກະຊວງການຄ້າ ແລະ ອຸດສາຫະກຳຂອງສິງກະໂປກໍໄດ້ປັບຫຼຸດໂຕເລກການຂະຫຍາຍຕົວຂອງ GDP ໃນປີນີ້ລົງສູ່ລະດັບ -0,5% ເຖິງ 1,5% ຈາກໂຕເລກການຄາດຄະເນໄວ້ໃນເມື່ອກ່ອນທີ່ລະດັບ 0,5% ເຖິງ 2,5% ແລະ ຕໍ່ມາໃນວັນທີ 26 ມີນາ ກະຊວງການຄ້າ ແລະ ອຸດສາຫະກຳຂອງສິງກະໂປ ໄດ້ປັບຫຼຸດໂຕເລກການຄາດຄະເນ GDP ລົງອີກຄັ້ງສູ່ລະດັບ -1% ເຖິງ -4%. ການປັບຫຼຸດການຄາດຄະເນໂຕເລກ GDP ຂອງສິງກະໂປໃນຄັ້ງນີ້ຖືວ່າເປັນຄັ້ງທີ 3 ຊຶ່ງມີຂຶ້ນຫຼັງຈາກກະຊວງການຄ້າ ແລະ ອຸດສາຫະກຳຂອງສິງກະໂປໄດ້ເປີດເຜີຍວ່າ ໂຕເລກ GDP ໃນໄຕມາດທໍາອິດຂອງປີນີ້ຫົດໂຕລົງ 0,7% ເມື່ອທຽບແບບລາຍປີ ເຖິງຢ່າງໃດກໍຕາມ, ໂຕເລກດັ່ງກ່າວຍັງຖືວ່າດີກວ່າການຄາດຄະເນໃນເບື້ອງຕົ້ນທີ່ລະບຸວ່າ GDP ໃນໄຕມາດທຳອິດຂອງປີນີ້ຈະຫຼຸດລົງ 2,2% ແລະ ດີກວ່າທີ່ນັກວິເຄາະໄດ້ຄາດຄະເນໄວ້ວ່າຈະຫຼຸດລົງ 1,5%.
ໃນໄລຍະຕົ້ນເດືອນເມສາ ທີ່ຜ່ານມາ, ລັດຖະບານສິງກະ ໂປໄດ້ປະກາດໃຊ້ມາດຕະການລັອກດາວບາງສ່ວນ ຫຼື Circuit Breaker ຊຶ່ງລວມເຖິງການປິດໂຮງຮຽນ ແລະ ສະຖານທີ່ເຮັດວຽກສ່ວນໃຫຍ່ ເປັນການຊົ່ວຄາວ ແລະ ລັດຖະບານກໍໄດ້ວາງແຜນທີ່ຈະຄ່ອຍໆຜ່ອນຄາຍມາດຕະການດັ່ງກ່າວແບບຄ່ອຍເປັນຄ່ອຍໄປໃນເດືອນມິຖຸນາທີ່ຈະເຖິງນີ້ ໂດຍຈະອະນຸ ຍາດໃຫ້ສະເພາະບາງທຸລະກິດ ເທົ່ານັ້ນທີ່ສາມາດເປີດດຳເນີນກິດຈະການໄດ້ເຊັ່ນ: ທຸລະກິດອີເລັກໂຕຣນິກ, ທຸລະກິດທາງການແພດ ແລະ ປິໂຕຣເຄມີ.